Utshovঅধ্যায় 97
97.1
ধৃতরাষ্ট্র উবাচ
সংপ্রমৃদ্য মহত্সৈন্যং যান্তং শৈনেয়মর্জুনম্
নির্হ্রীকা মম তে পুত্রাঃ কিমকুর্বত সংজয়
97.2
কথং চৈষাং তথা যুদ্ধে ধৃতিরাসীন্মুমূর্ষতাম্
শৈনেয়চরিতং দৃষ্ট্বা সদৃশং সব্যসাচিনঃ
97.3
কিং নু বক্ষ্যন্তি তে ক্ষাত্রং সৈন্যমধ্যে পরাজিতাঃ
কথং চ সাত্যকির্যুদ্ধে ব্যতিক্রান্তো মহায়শাঃ
97.4
কথং চ মম পুত্রাণাং জীবতাং তত্র সংজয়
শৈনেয়োঽভিয়য়ৌ যুদ্ধে তন্মমাচক্ষ্ব তত্ত্বতঃ
97.5
অত্যদ্ভুতমিদং তাত ত্বত্সকাশাচ্ছৃণোম্যহম্
একস্য বহুভির্যুদ্ধং শত্রুভির্বৈ মহারথৈঃ
97.6
বিপরীতমহং মন্যে মন্দভাগ্যান্সুতান্প্রতি
যত্রাবধ্যন্ত সমরে সাত্বতেন মহাত্মনা
97.7
একস্য হি ন পর্যাপ্তং মত্সৈন্যং তস্য সংজয়
ক্রুদ্ধস্য যুয়ুধানস্য সর্বে তিষ্ঠন্তু পাণ্ডবাঃ
97.8
নির্জিত্য সমরে দ্রোণং কৃতিনং যুদ্ধদুর্মদম্
যথা পশুগণান্সিংহস্তদ্বদ্ধন্তা সুতান্মম
97.9
কৃতবর্মাদিভিঃ শূরৈর্যত্তৈর্বহুভিরাহবে
যুয়ুধানো ন শকিতো হন্তুং যঃ পুরুষর্ষভঃ
97.10
নৈতদীদৃশকং যুদ্ধং কৃতবাংস্তত্র ফল্গুনঃ
যাদৃশং কৃতবান্যুদ্ধং শিনের্নপ্তা মহায়শাঃ
97.11
সংজয় উবাচ
তব দুর্মন্ত্রিতে রাজন্দুর্যোধনকৃতেন চ
শৃণুষ্বাবহিতো ভূত্বা যত্তে বক্ষ্যামি ভারত
97.12
তে পুনঃ সংন্যবর্তন্ত কৃত্বা সংশপ্তকান্মিথঃ
পরাং যুদ্ধে মতিং কৃত্বা পুত্রস্য তব শাসনাৎ
97.13
ত্রীণি সাদিসহস্রাণি দুর্যোধনপুরোগমাঃ
শকাঃ কাম্বোজবাহ্লীকা যবনাঃ পারদাস্তথা
97.14
কুণিন্দাস্তঙ্গণাম্বষ্ঠাঃ পৈশাচাশ্চ সমন্দরাঃ
অভ্যদ্রবন্ত শৈনেয়ং শলভাঃ পাবকং যথা
97.15
যুক্তাশ্চ পার্বতীয়ানাং রথাঃ পাষাণয়োধিনাম্
শূরাঃ পঞ্চশতা রাজঞ্শৈনেয়ং সমুপাদ্রবন্
97.16
ততো রথসহস্রেণ মহারথশতেন চ
দ্বিরদানাং সহস্রেণ দ্বিসাহস্রৈশ্চ বাজিভিঃ
97.17
শরবর্ষাণি মুঞ্চন্তো বিবিধানি মহারথাঃ
অভ্যদ্রবন্ত শৈনেয়মসংখ্যেয়াশ্চ পত্তয়ঃ
97.18
তাংশ্চ সংচোদয়ন্সর্বান্ঘ্নতৈনমিতি ভারত
দুঃশাসনো মহারাজ সাত্যকিং পর্যবারয়ৎ
97.19
তত্রাদ্ভুতমপশ্যাম শৈনেয়চরিতং মহৎ
যদেকো বহুভিঃ সার্ধমসংভ্রান্তময়ুধ্যত
97.20
অবধীচ্চ রথানীকং দ্বিরদানাং চ তদ্বলম্
সাদিনশ্চৈব তান্সর্বান্দস্যূনপি চ সর্বশঃ
97.21
তত্র চক্রৈর্বিমথিতৈর্ভগ্নৈশ্চ পরমায়ুধৈঃ
অক্ষৈশ্চ বহুধা ভগ্নৈরীষাদণ্ডকবন্ধুরৈঃ
97.22
কূবরৈর্মথিতৈশ্চাপি ধ্বজৈশ্চাপি নিপাতিতৈঃ
বর্মভিশ্চামরৈশ্চৈব ব্যবকীর্ণা বসুংধরা
97.23
স্রগ্ভিরাভরণৈর্বস্ত্রৈরনুকর্ষৈশ্চ মারিষ
সংছন্না বসুধা তত্র দ্যৌর্গ্রহৈরিব ভারত
97.24
গিরিরূপধরাশ্চাপি পতিতাঃ কুঞ্জরোত্তমাঃ
অঞ্জনস্য কুলে জাতা বামনস্য চ ভারত
সুপ্রতীককুলে জাতা মহাপদ্মকুলে তথা
97.25
ঐরাবণকুলে চৈব তথান্যেষু কুলেষু চ
জাতা দন্তিবরা রাজঞ্শেরতে বহবো হতাঃ
97.26
বনায়ুজান্পার্বতীয়ান্কাম্বোজারট্টবাহ্লিকান্
তথা হয়বরান্রাজন্নিজঘ্নে তত্র সাত্যকিঃ
97.27
নানাদেশসমুত্থাংশ্চ নানাজাত্যাংশ্চ পত্তিনঃ
নিজঘ্নে তত্র শৈনেয়ঃ শতশোঽথ সহস্রশঃ
97.28
তেষু প্রকাল্যমানেষু দস্যূন্দুঃশাসনোঽব্রবীৎ
নিবর্তধ্বমধর্মজ্ঞা যুধ্যধ্বং কিং সৃতেন বঃ
97.29
তাংশ্চাপি সর্বান্সংপ্রেক্ষ্য পুত্রো দুঃশাসনস্তব
পাষাণয়োধিনঃ শূরান্পার্বতীয়ানচোদয়ৎ
97.30
অশ্ময়ুদ্ধেষু কুশলা নৈতজ্জানাতি সাত্যকিঃ
অশ্ময়ুদ্ধমজানন্তং ঘ্নতৈনং যুদ্ধকামুকম্
97.31
তথৈব কুরবঃ সর্বে নাশ্ময়ুদ্ধবিশারদাঃ
অভিদ্রবত মা ভৈষ্ট ন বঃ প্রাপ্স্যতি সাত্যকিঃ
97.32
ততো গজশিশুপ্রখ্যৈরুপলৈঃ শৈলবাসিনঃ
উদ্যতৈর্যুয়ুধানস্য স্থিতা মরণকাঙ্ক্ষিণঃ
97.33
ক্ষেপণীয়ৈস্তথাপ্যন্যে সাত্বতস্য বধৈষিণঃ
চোদিতাস্তব পুত্রেণ রুরুধুঃ সর্বতোদিশম্
97.34
তেষামাপততামেব শিলায়ুদ্ধং চিকীর্ষতাম্
সাত্যকিঃ প্রতিসংধায় ত্রিংশতং প্রাহিণোচ্ছরান্
97.35
তামশ্মবৃষ্টিং তুমুলাং পার্বতীয়ৈঃ সমীরিতাম্
বিভেদোরগসংকাশৈর্নারাচৈঃ শিনিপুংগবঃ
97.36
তৈরশ্মচূর্ণৈর্দীপ্যদ্ভিঃ খদ্যোতানামিব ব্রজৈঃ
প্রায়ঃ সৈন্যান্যবধ্যন্ত হাহাভূতানি মারিষ
97.37
ততঃ পঞ্চশতাঃ শূরাঃ সমুদ্যতমহাশিলাঃ
নিকৃত্তবাহবো রাজন্নিপেতুর্ধরণীতলে
97.38
পাষাণয়োধিনঃ শূরান্যতমানানবস্থিতান্
অবধীদ্বহুসাহস্রাংস্তদদ্ভুতমিবাভবৎ
97.39
ততঃ পুনর্বস্তমুখৈরশ্মবৃষ্টিং সমন্ততঃ
অয়োহস্তৈঃ শূলহস্তৈর্দরদৈঃ খশতঙ্গণৈঃ
97.40
অম্বষ্ঠৈশ্চ কুণিন্দৈশ্চ ক্ষিপ্তাং ক্ষিপ্তাং স সাত্যকিঃ
নারাচৈঃ প্রতিবিব্যাধ প্রেক্ষমাণো মহাবলঃ
97.41
অদ্রীণাং ভিদ্যমানানামন্তরিক্ষে শিতৈঃ শরৈঃ
শব্দেন প্রাদ্রবন্রাজন্গজাশ্বরথপত্তয়ঃ
97.42
অশ্মচূর্ণৈঃ সমাকীর্ণা মনুষ্যাশ্চ বয়াংসি চ
নাশক্নুবন্নবস্থাতুং ভ্রমরৈরিব দংশিতাঃ
97.43
হতশিষ্টা বিরুধিরা ভিন্নমস্তকপিণ্ডিকাঃ
কুঞ্জরাঃ সংন্যবর্তন্ত যুয়ুধানরথং প্রথি
97.44
ততঃ শব্দঃ সমভবত্তব সৈন্যস্য মারিষ
মাধবেনার্দ্যমানস্য সাগরস্যেব দারুণঃ
97.45
তং শব্দং তুমুলং শ্রুত্বা দ্রোণো যন্তারমব্রবীৎ
এষ সূত রণে ক্রুদ্ধঃ সাত্বতানাং মহারথঃ
97.46
দারয়ন্বহুধা সৈন্যং রণে চরতি কালবৎ
যত্রৈষ শব্দস্তুমুলস্তত্র সূত রথং নয়
97.47
পাষাণয়োধিভির্নূনং যুয়ুধানঃ সমাগতঃ
তথা হি রথিনঃ সর্বে হ্রিয়ন্তে বিদ্রুতৈর্হয়ৈঃ
97.48
বিশস্ত্রকবচা রুগ্ণাস্তত্র তত্র পতন্তি চ
ন শক্নুবন্তি যন্তারঃ সংয়ন্তুং তুমুলে হয়ান্
97.49
ইত্যেবং ব্রুবতো রাজন্ভারদ্বাজস্য ধীমতঃ
প্রত্যুবাচ ততো যন্তা দ্রোণং শস্ত্রভৃতাং বরম্
97.50
আয়ুষ্মন্দ্রবতে সৈন্যং কৌরবেয়ং সমন্ততঃ
পশ্য যোধান্রণে ভিন্নান্ধাবমানাংস্ততস্ততঃ
97.51
এতে চ সহিতাঃ শূরাঃ পাঞ্চালাঃ পাণ্ডবৈঃ সহ
ত্বামেব হি জিঘাংসন্তঃ প্রাদ্রবন্তি সমন্ততঃ
97.52
অত্র কার্যং সমাধত্স্ব প্রাপ্তকালমরিংদম
স্থানে বা গমনে বাপি দূরং যাতশ্চ সাত্যকিঃ
97.53
তথৈবং বদতস্তস্য ভারদ্বাজস্য মারিষ
প্রত্যদৃশ্যত শৈনেয়ো নিঘ্নন্বহুবিধান্রথান্
97.54
তে বধ্যমানাঃ সমরে যুয়ুধানেন তাবকাঃ
যুয়ুধানরথং ত্যক্ত্বা দ্রোণানীকায় দুদ্রুবুঃ
97.55
যৈস্তু দুঃশাসনঃ সার্ধং রথৈঃ পূর্বং ন্যবর্তত
তে ভীতাস্ত্বভ্যধাবন্ত সর্বে দ্রোণরথং প্রতি