Utshovঅধ্যায় 96
96.1
সংজয় উবাচ
জিত্বা যবনকাম্বোজান্যুয়ুধানস্ততোঽর্জুনম্
জগাম তব সৈন্যস্য মধ্যেন রথিনাং বরঃ
96.2
শরদংষ্ট্রো নরব্যাঘ্রো বিচিত্রকবচচ্ছবিঃ
মৃগান্ব্যাঘ্র ইবাজিঘ্রংস্তব সৈন্যমভীষয়ৎ
96.3
স রথেন চরন্মার্গান্ধনুরভ্রাময়দ্ভৃশম্
রুক্মপৃষ্ঠং মহাবেগং রুক্মচন্দ্রকসংকুলম্
96.4
রুক্মাঙ্গদশিরস্ত্রাণো রুক্মবর্মসমাবৃতঃ
রুক্মধ্বজবরঃ শূরো মেরুশৃঙ্গ ইবাবভৌ
96.5
সধনুর্মণ্ডলঃ সংখ্যে তেজোভাস্বররশ্মিবান্
শরদীবোদিতঃ সূর্যো নৃসূর্যো বিররাজ হ
96.6
বৃষভস্কন্ধবিক্রান্তো বৃষভাক্ষো নরর্ষভঃ
তাবকানাং বভৌ মধ্যে গবাং মধ্যে যথা বৃষঃ
96.7
মত্তদ্বিরদসংকাশং মত্তদ্বিরদগামিনম্
প্রভিন্নমিব মাতঙ্গং যূথমধ্যে ব্যবস্থিতম্
ব্যাঘ্রা ইব জিঘাংসন্তস্ত্বদীয়াভ্যদ্রবন্রণে
96.8
দ্রোণানীকমতিক্রান্তং ভোজানীকং চ দুস্তরম্
জলসংধার্ণবং তীর্ত্বা কাম্বোজানাং চ বাহিনীম্
96.9
হার্দিক্যমকরান্মুক্তং তীর্ণং বৈ সৈন্যসাগরম্
পরিবব্রুঃ সুসংক্রুদ্ধাস্ত্বদীয়াঃ সাত্যকিং রথাঃ
96.10
দুর্যোধনশ্চিত্রসেনো দুঃশাসনবিবিংশতী
শকুনির্দুঃসহশ্চৈব যুবা দুর্মর্ষণঃ ক্রথঃ
96.11
অন্যে চ বহবঃ শূরাঃ শস্ত্রবন্তো দুরাসদাঃ
পৃষ্ঠতঃ সাত্যকিং যান্তমন্বধাবন্নমর্ষিতাঃ
96.12
অথ শব্দো মহানাসীত্তব সৈন্যস্য মারিষ
মারুতোদ্ধূতবেগস্য সাগরস্যেব পর্বণি
96.13
তানভিদ্রবতঃ সর্বান্সমীক্ষ্য শিনিপুংগবঃ
শনৈর্যাহীতি যন্তারমব্রবীত্প্রহসন্নিব
96.14
ইদমেতি সমুদ্ধূতং ধার্তরাষ্ট্রস্য যদ্বলম্
মামেবাভিমুখং তূর্ণং গজাশ্বরথপত্তিমৎ
96.15
নাদয়ন্বৈ দিশঃ সর্বা রথঘোষেণ সারথে
পৃথিবীং চান্তরিক্ষং চ কম্পয়ন্সাগরানপি
96.16
এতদ্বলার্ণবং তাত বারয়িষ্যে মহারণে
পৌর্ণমাস্যামিবোদ্ধূতং বেলেব সলিলাশয়ম্
96.17
পশ্য মে সূত বিক্রান্তমিন্দ্রস্যেব মহামৃধে
এষ সৈন্যানি শত্রূণাং বিধমামি শিতৈঃ শরৈঃ
96.18
নিহতানাহবে পশ্য পদাত্যশ্বরথদ্বিপান্
মচ্ছরৈরগ্নিসংকাশৈর্বিদেহাসূন্সহস্রশঃ
96.19
ইত্যেবং ব্রুবতস্তস্য সাত্যকেরমিতৌজসঃ
সমীপং সৈনিকাস্তে তু শীঘ্রমীয়ুর্যুয়ুত্সবঃ
জহ্যাদ্রবস্ব তিষ্ঠেতি পশ্য পশ্যেতি বাদিনঃ
96.20
তানেবং ব্রুবতো বীরান্সাত্যকির্নিশিতৈঃ শরৈঃ
জঘান ত্রিশতানশ্বান্কুঞ্জরাংশ্চ চতুঃশতান্
96.21
স সংপ্রহারস্তুমুলস্তস্য তেষাং চ ধন্বিনাম্
দেবাসুররণপ্রখ্যঃ প্রাবর্তত জনক্ষয়ঃ
96.22
মেঘজালনিভং সৈন্যং তব পুত্রস্য মারিষ
প্রত্যগৃহ্ণাচ্ছিনেঃ পৌত্রঃ শরৈরাশীবিষোপমৈঃ
96.23
প্রচ্ছাদ্যমানঃ সমরে শরজালৈঃ স বীর্যবান্
অসংভ্রমং মহারাজ তাবকানবধীদ্বহূন্
96.24
আশ্চর্যং তত্র রাজেন্দ্র সুমহদ্দৃষ্টবানহম্
ন মোঘঃ সায়কঃ কশ্চিত্সাত্যকেরভবত্প্রভো
96.25
রথনাগাশ্বকলিলঃ পদাত্যূর্মিসমাকুলঃ
শৈনেয়বেলামাসাদ্য স্থিতঃ সৈন্যমহার্ণবঃ
96.26
সংভ্রান্তনরনাগাশ্বমাবর্তত মুহুর্মুহুঃ
তত্সৈন্যমিষুভিস্তেন বধ্যমানং সমন্ততঃ
বভ্রাম তত্র তত্রৈব গাবঃ শীতার্দিতা ইব
96.27
পদাতিনং রথং নাগং সাদিনং তুরগং তথা
অবিদ্ধং তত্র নাদ্রাক্ষং যুয়ুধানস্য সায়কৈঃ
96.28
ন তাদৃক্কদনং রাজন্কৃতবাংস্তত্র ফল্গুনঃ
যাদৃক্ক্ষয়মনীকানামকরোত্সাত্যকির্নৃপ
অত্যর্জুনং শিনেঃ পৌত্রো যুধ্যতে ভরতর্ষভ
96.29
ততো দুর্যোধনো রাজা সাত্বতস্য ত্রিভিঃ শরৈঃ
বিব্যাধ সূতং নিশিতৈশ্চতুর্ভিশ্চতুরো হয়ান্
96.30
সাত্যকিং চ ত্রিভির্বিদ্ধ্বা পুনর্বিব্যাধ সোঽষ্টভিঃ
দুঃশাসনঃ ষোডশভির্বিব্যাধ শিনিপুংগবম্
96.31
শকুনিঃ পঞ্চবিংশত্যা চিত্রসেনশ্চ পঞ্চভিঃ
দুঃসহঃ পঞ্চদশভির্বিব্যাধোরসি সাত্যকিম্
96.32
উত্স্ময়ন্বৃষ্ণিশার্দূলস্তথা বাণৈঃ সমাহতঃ
তানবিধ্যন্মহারাজ সর্বানেব ত্রিভিস্ত্রিভিঃ
96.33
গাঢবিদ্ধানরীন্কৃত্বা মার্গণৈঃ সোঽতিতেজনৈঃ
শৈনেয়ঃ শ্যেনবত্সংখ্যে ব্যচরল্লঘুবিক্রমঃ
96.34
সৌবলস্য ধনুশ্ছিত্ত্বা হস্তাবাপং নিকৃত্য চ
দুর্যোধনং ত্রিভির্বাণৈরভ্যবিধ্যত্স্তনান্তরে
96.35
চিত্রসেনং শতেনৈব দশভির্দুঃসহং তথা
দুঃশাসনং চ বিংশত্যা বিব্যাধ শিনিপুংগবঃ
96.36
অথান্যদ্ধনুরাদায় স্যালস্তব বিশাং পতে
অষ্টভিঃ সাত্যকিং বিদ্ধ্বা পুনর্বিব্যাধ পঞ্চভিঃ
96.37
দুঃশাসনশ্চ দশভির্দুঃসহশ্চ ত্রিভিঃ শরৈঃ
দুর্মুখশ্চ দ্বাদশভী রাজন্বিব্যাধ সাত্যকিম্
96.38
দুর্যোধনস্ত্রিসপ্তত্যা বিদ্ধ্বা ভারত মাধবম্
ততোঽস্য নিশিতৈর্বাণৈস্ত্রিভির্বিব্যাধ সারথিম্
96.39
তান্সর্বান্সহিতাঞ্শূরান্যতমানান্মহারথান্
পঞ্চভিঃ পঞ্চভির্বাণৈঃ পুনর্বিব্যাধ সাত্যকিঃ
96.40
ততঃ স রথিনাং শ্রেষ্ঠস্তব পুত্রস্য সারথিম্
আজঘানাশু ভল্লেন স হতো ন্যপতদ্ভুবি
96.41
পাতিতে সারথৌ তস্মিংস্তব পুত্ররথঃ প্রভো
বাতায়মানৈস্তৈরশ্বৈরপানীয়ত সংগরাৎ
96.42
ততস্তব সুতা রাজন্সৈনিকাশ্চ বিশাং পতে
রাজ্ঞো রথমভিপ্রেক্ষ্য বিদ্রুতাঃ শতশোঽভবন্
96.43
বিদ্রুতং তত্র তত্সৈন্যং দৃষ্ট্বা ভারত সাত্যকিঃ
অবাকিরচ্ছরৈস্তীক্ষ্ণৈ রুক্মপুঙ্খৈঃ শিলাশিতৈঃ
96.44
বিদ্রাব্য সর্বসৈন্যানি তাবকানি সমন্ততঃ
প্রয়য়ৌ সাত্যকী রাজঞ্শ্বেতাশ্বস্য রথং প্রতি
96.45
তং শরানাদদানং চ রক্ষমাণং চ সারথিম্
আত্মানং মোচয়ন্তং চ তাবকাঃ সমপূজয়ন্