Utshovঅধ্যায় 95
95.1
সংজয় উবাচ
ততঃ স সাত্যকির্ধীমান্মহাত্মা বৃষ্ণিপুংগবঃ
সুদর্শনং নিহত্যাজৌ যন্তারমিদমব্রবীৎ
95.2
রথাশ্বনাগকলিলং শরশক্ত্যূর্মিমালিনম্
খড্গমত্স্যং গদাগ্রাহং শূরায়ুধমহাস্বনম্
95.3
প্রাণাপহারিণং রৌদ্রং বাদিত্রোত্ক্রুষ্টনাদিতম্
যোধানামসুখস্পর্শং দুর্ধর্ষমজয়ৈষিণাম্
95.4
তীর্ণাঃ স্ম দুস্তরং তাত দ্রোণানীকমহার্ণবম্
জলসংধবলেনাজৌ পুরুষাদৈরিবাবৃতম্
95.5
অতোঽন্যং পৃতনাশেষং মন্যে কুনদিকামিব
তর্তব্যামল্পসলিলাং চোদয়াশ্বানসংভ্রমম্
95.6
হস্তপ্রাপ্তমহং মন্যে সাংপ্রতং সব্যসাচিনম্
নির্জিত্য দুর্ধরং দ্রোণং সপদানুগমাহবে
95.7
হার্দিক্যং যোধবর্যং চ প্রাপ্তং মন্যে ধনংজয়ম্
ন হি মে জায়তে ত্রাসো দৃষ্ট্বা সৈন্যান্যনেকশঃ
বহ্নেরিব প্রদীপ্তস্য গ্রীষ্মে শুষ্কং তৃণোলপম্
95.8
পশ্য পাণ্ডবমুখ্যেন যাতাং ভূমিং কিরীটিনা
পত্ত্যশ্বরথনাগৌঘৈঃ পতিতৈর্বিষমীকৃতাম্
95.9
অভ্যাশস্থমহং মন্যে শ্বেতাশ্বং কৃষ্ণসারথিম্
স এষ শ্রূয়তে শব্দো গাণ্ডীবস্যামিতৌজসঃ
95.10
যাদৃশানি নিমিত্তানি মম প্রাদুর্ভবন্তি বৈ
অনস্তংগত আদিত্যে হন্তা সৈন্ধবমর্জুনঃ
95.11
শনৈর্বিশ্রম্ভয়ন্নশ্বান্যাহি যত্তোঽরিবাহিনীম্
যত্রৈতে সতনুত্রাণাঃ সুয়োধনপুরোগমাঃ
95.12
দংশিতাঃ ক্রূরকর্মাণঃ কাম্বোজা যুদ্ধদুর্মদাঃ
শরবাণাসনধরা যবনাশ্চ প্রহারিণঃ
95.13
শকাঃ কিরাতা দরদা বর্বরাস্তাম্রলিপ্তকাঃ
অন্যে চ বহবো ম্লেচ্ছা বিবিধায়ুধপাণয়ঃ
মামেবাভিমুখাঃ সর্বে তিষ্ঠন্তি সমরার্থিনঃ
95.14
এতান্সরথনাগাশ্বান্নিহত্যাজৌ সপত্তিনঃ
ইদং দুর্গং মহাঘোরং তীর্ণমেবোপধারয়
95.15
সূত উবাচ
ন সংভ্রমো মে বার্ষ্ণেয় বিদ্যতে সত্যবিক্রম
যদ্যপি স্যাত্সুসংক্রুদ্ধো জামদগ্ন্যোঽগ্রতঃ স্থিতঃ
95.16
দ্রোণো বা রথিনাং শ্রেষ্ঠঃ কৃপো মদ্রেশ্বরোঽপি বা
তথাপি সংভ্রমো ন স্যাত্ত্বামাশ্রিত্য মহাভুজ
95.17
ত্বয়া সুবহবো যুদ্ধে নির্জিতাঃ শত্রুসূদন
ন চ মে সংভ্রমঃ কশ্চিদ্ভূতপূর্বঃ কদাচন
কিমু চৈতত্সমাসাদ্য বীর সংয়ুগগোষ্পদম্
95.18
আয়ুষ্মন্কতরেণ ত্বা প্রাপয়ামি ধনংজয়ম্
কেষাং ক্রুদ্ধোঽসি বার্ষ্ণেয় কেষাং মৃত্যুরুপস্থিতঃ
কেষাং সংয়মনীমদ্য গন্তুমুত্সহতে মনঃ
95.19
কে ত্বাং যুধি পরাক্রান্তং কালান্তকয়মোপমম্
দৃষ্ট্বা বিক্রমসংপন্নং বিদ্রবিষ্যন্তি সংয়ুগে
কেষাং বৈবস্বতো রাজা স্মরতেঽদ্য মহাভুজ
95.20
সাত্যকিরুবাচ
মুণ্ডানেতান্হনিষ্যামি দানবানিব বাসবঃ
প্রতিজ্ঞাং পারয়িষ্যামি কাম্বোজানেব মা বহ
অদ্যৈষাং কদনং কৃত্বা ক্ষিপ্রং যাস্যামি পাণ্ডবম্
95.21
অদ্য দ্রক্ষ্যন্তি মে বীর্যং কৌরবাঃ সসুয়োধনাঃ
মুণ্ডানীকে হতে সূত সর্বসৈন্যেষু চাসকৃৎ
95.22
অদ্য কৌরবসৈন্যস্য দীর্যমাণস্য সংয়ুগে
শ্রুত্বা বিরাবং বহুধা সংতপ্স্যতি সুয়োধনঃ
95.23
অদ্য পাণ্ডবমুখ্যস্য শ্বেতাশ্বস্য মহাত্মনঃ
আচার্যককৃতং মার্গং দর্শয়িষ্যামি সংয়ুগে
95.24
অদ্য মদ্বাণনিহতান্যোধমুখ্যান্সহস্রশঃ
দৃষ্ট্বা দুর্যোধনো রাজা পশ্চাত্তাপং গমিষ্যতি
95.25
অদ্য মে ক্ষিপ্রহস্তস্য ক্ষিপতঃ সায়কোত্তমান্
অলাতচক্রপ্রতিমং ধনুর্দ্রক্ষ্যন্তি কৌরবাঃ
95.26
মত্সায়কচিতাঙ্গানাং রুধিরং স্রবতাং বহু
সৈনিকানাং বধং দৃষ্ট্বা সংতপ্স্যতি সুয়োধনঃ
95.27
অদ্য মে ক্রুদ্ধরূপস্য নিঘ্নতশ্চ বরান্বরান্
দ্বিরর্জুনমিমং লোকং মংস্যতে স সুয়োধনঃ
95.28
অদ্য রাজসহস্রাণি নিহতানি ময়া রণে
দৃষ্ট্বা দুর্যোধনো রাজা সংতপ্স্যতি মহামৃধে
95.29
অদ্য স্নেহং চ ভক্তিং চ পাণ্ডবেষু মহাত্মসু
হত্বা রাজসহস্রাণি দর্শয়িষ্যামি রাজসু
95.30
সংজয় উবাচ
এবমুক্তস্তদা সূতঃ শিক্ষিতান্সাধুবাহিনঃ
শশাঙ্কসংনিকাশান্বৈ বাজিনোঽচূচুদদ্ভৃশম্
95.31
তে পিবন্ত ইবাকাশং যুয়ুধানং হয়োত্তমাঃ
প্রাপয়ন্যবনাঞ্শীঘ্রং মনঃপবনরংহসঃ
95.32
সাত্যকিং তে সমাসাদ্য পৃতনাস্বনিবর্তিনম্
বহবো লঘুহস্তাশ্চ শরবর্ষৈরবাকিরন্
95.33
তেষামিষূনথাস্ত্রাণি বেগবন্নতপর্বভিঃ
অচ্ছিনত্সাত্যকী রাজন্নৈনং তে প্রাপ্নুবঞ্শরাঃ
95.34
রুক্মপুঙ্খৈঃ সুনিশিতৈর্গার্ধ্রপত্রৈরজিহ্মগৈঃ
উচ্চকর্ত শিরাংস্যুগ্রো যবনানাং ভুজানপি
95.35
শৈক্যায়সানি বর্মাণি কাংস্যানি চ সমন্ততঃ
ভিত্ত্বা দেহাংস্তথা তেষাং শরা জগ্মুর্মহীতলম্
95.36
তে হন্যমানা বীরেণ ম্লেচ্ছাঃ সাত্যকিনা রণে
শতশো ন্যপতংস্তত্র ব্যসবো বসুধাতলে
95.37
সুপূর্ণায়তমুক্তৈস্তানব্যবচ্ছিন্নপিণ্ডিতৈঃ
পঞ্চ ষট্সপ্ত চাষ্টৌ চ বিভেদ যবনাঞ্শরৈঃ
95.38
কাম্বোজানাং সহস্রৈস্তু শকানাং চ বিশাং পতে
শবরাণাং কিরাতানাং বর্বরাণাং তথৈব চ
95.39
অগম্যরূপাং পৃথিবীং মাংসশোণিতকর্দমাম্
কৃতবাংস্তত্র শৈনেয়ঃ ক্ষপয়ংস্তাবকং বলম্
95.40
দস্যূনাং সশিরস্ত্রাণৈঃ শিরোভির্লূনমূর্ধজৈঃ
তত্র তত্র মহী কীর্ণা বিবর্হৈরণ্ডজৈরিব
95.41
রুধিরোক্ষিতসর্বাঙ্গৈস্তৈস্তদায়োধনং বভৌ
কবন্ধৈঃ সংবৃতং সর্বং তাম্রাভ্রৈঃ খমিবাবৃতম্
95.42
বজ্রাশনিসমস্পর্শৈঃ সুপর্বভিরজিহ্মগৈঃ
তে সাশ্বয়ানা নিহতাঃ সমাবব্রুর্বসুংধরাম্
95.43
অল্পাবশিষ্টাঃ সংভগ্নাঃ কৃচ্ছ্রপ্রাণা বিচেতসঃ
জিতাঃ সংখ্যে মহারাজ যুয়ুধানেন দংশিতাঃ
95.44
পার্ষ্ণিভিশ্চ কশাভিশ্চ তাডয়ন্তস্তুরংগমান্
জবমুত্তমমাস্থায় সর্বতঃ প্রাদ্রবন্ভয়াৎ
95.45
কাম্বোজসৈন্যং বিদ্রাব্য দুর্জয়ং যুধি ভারত
যবনানাং চ তত্সৈন্যং শকানাং চ মহদ্বলম্
95.46
স ততঃ পুরুষব্যাঘ্রঃ সাত্যকিঃ সত্যবিক্রমঃ
প্রহৃষ্টস্তাবকাঞ্জিত্বা সূতং যাহীত্যচোদয়ৎ
95.47
তং যান্তং পৃষ্ঠগোপ্তারমর্জুনস্য বিশাং পতে
চারণাঃ প্রেক্ষ্য সংহৃষ্টাস্ত্বদীয়াশ্চাপ্যপূজয়ন্