অধ্যায় 94

94.1

সংজয় উবাচ
দ্রোণং স জিত্বা পুরুষপ্রবীর;স্তথৈব হার্দিক্যমুখাংস্ত্বদীয়ান্
প্রহস্য সূতং বচনং বভাষে; শিনিপ্রবীরঃ কুরুপুংগবাগ্র্য

নিমিত্তমাত্রং বয়মত্র সূত; দগ্ধারয়ঃ কেশবফল্গুনাভ্যাম্
হতান্নিহন্মেহ নরর্ষভেণ; বয়ং সুরেশাত্মসমুদ্ভবেন

তমেবমুক্ত্বা শিনিপুংগবস্তদা; মহামৃধে সোঽগ্র্যধনুর্ধরোঽরিহা
কিরন্সমন্তাত্সহসা শরান্বলী; সমাপতচ্ছ্যেন ইবামিষং যথা

তং যান্তমশ্বৈঃ শশিশঙ্খবর্ণৈ;র্বিগাহ্য সৈন্যং পুরুষপ্রবীরম্
নাশক্নুবন্বারয়িতুং সমন্তা;দাদিত্যরশ্মিপ্রতিমং নরাগ্র্যম্

অসহ্যবিক্রান্তমদীনসত্ত্বং; সর্বে গণা ভারত দুর্বিষহ্যম্
সহস্রনেত্রপ্রতিমপ্রভাবং; দিবীব সূর্যং জলদব্যপায়ে

অমর্ষপূর্ণস্ত্বতিচিত্রয়োধী; শরাসনী কাঞ্চনবর্মধারী
সুদর্শনঃ সাত্যকিমাপতন্তং; ন্যবারয়দ্রাজবরঃ প্রসহ্য

তয়োরভূদ্ভরত সংপ্রহারঃ; সুদারুণস্তং সমভিপ্রশংসন্
যোধাস্ত্বদীয়াশ্চ হি সোমকাশ্চ; বৃত্রেন্দ্রয়োর্যুদ্ধমিবামরৌঘাঃ

শরৈঃ সুতীক্ষ্ণৈঃ শতশোঽভ্যবিধ্য;ত্সুদর্শনঃ সাত্বতমুখ্যমাজৌ
অনাগতানেব তু তান্পৃষত্কাং;শ্চিচ্ছেদ বাণৈঃ শিনিপুংগবোঽপি

তথৈব শক্রপ্রতিমোঽপি সাত্যকিঃ; সুদর্শনে যান্ক্ষিপতি স্ম সায়কান্
দ্বিধা ত্রিধা তানকরোত্সুদর্শনঃ; শরোত্তমৈঃ স্যন্দনবর্যমাস্থিতঃ

সংপ্রেক্ষ্য বাণান্নিহতাংস্তদানীং; সুদর্শনঃ সাত্যকিবাণবেগৈঃ
ক্রোধাদ্দিধক্ষন্নিব তিগ্মতেজাঃ; শরানমুঞ্চত্তপনীয়চিত্রান্

পুনঃ স বাণৈস্ত্রিভিরগ্নিকল্পৈ;রাকর্ণপূর্ণৈর্নিশিতৈঃ সুপুঙ্খৈঃ
বিব্যাধ দেহাবরণং বিভিদ্য; তে সাত্যকেরাবিবিশুঃ শরীরম্

তথৈব তস্যাবনিপালপুত্রঃ; সংধায় বাণৈরপরৈর্জ্বলদ্ভিঃ
আজঘ্নিবাংস্তান্রজতপ্রকাশাং;শ্চতুর্ভিরশ্বাংশ্চতুরঃ প্রসহ্য

তথা তু তেনাভিহতস্তরস্বী; নপ্তা শিনেরিন্দ্রসমানবীর্যঃ
সুদর্শনস্যেষুগণৈঃ সুতীক্ষ্ণৈ;র্হয়ান্নিহত্যাশু ননাদ নাদম্

অথাস্য সূতস্য শিরো নিকৃত্য; ভল্লেন বজ্রাশনিসংনিভেন
সুদর্শনস্যাপি শিনিপ্রবীরঃ; ক্ষুরেণ চিচ্ছেদ শিরঃ প্রসহ্য

সকুণ্ডলং পূর্ণশশিপ্রকাশং; ভ্রাজিষ্ণু বক্ত্রং নিচকর্ত দেহাৎ
যথা পুরা বজ্রধরঃ প্রসহ্য; বলস্য সংখ্যেঽতিবলস্য রাজন্

নিহত্য তং পার্থিবপুত্রপৌত্রং; রণে যদূনামৃষভস্তরস্বী
মুদা সমেতঃ পরয়া মহাত্মা; ররাজ রাজন্সুররাজকল্পঃ

ততো যয়াবর্জুনমেব যেন; নিবার্য সৈন্যং তব মার্গণৌঘৈঃ
সদশ্বয়ুক্তেন রথেন নির্যা;ল্লোকান্বিসিস্মাপয়িষুর্নৃবীরঃ

তত্তস্য বিস্মাপয়নীয়মগ্র্য;মপূজয়ন্যোধবরাঃ সমেতাঃ
যদ্বর্তমানানিষুগোচরেঽরী;ন্দদাহ বাণৈর্হুতভুগ্যথৈব