Utshovঅধ্যায় 93
93.1
সংজয় উবাচ
কাল্যমানেষু সৈন্যেষু শৈনেয়েন ততস্ততঃ
ভারদ্বাজঃ শরব্রাতৈর্মহদ্ভিঃ সমবাকিরৎ
93.2
স সংপ্রহারস্তুমুলো দ্রোণসাত্বতয়োরভূৎ
পশ্যতাং সর্বসৈন্যানাং বলিবাসবয়োরিব
93.3
ততো দ্রোণঃ শিনেঃ পৌত্রং চিত্রৈঃ সর্বায়সৈঃ শরৈঃ
ত্রিভিরাশীবিষাকারৈর্ললাটে সমবিধ্যত
93.4
তৈর্ললাটার্পিতৈর্বাণৈর্যুয়ুধানস্ত্বজিহ্মগৈঃ
ব্যরোচত মহারাজ ত্রিশৃঙ্গ ইব পর্বতঃ
93.5
ততোঽস্য বাণানপরানিন্দ্রাশনিসমস্বনান্
ভারদ্বাজোঽন্তরপ্রেক্ষী প্রেষয়ামাস সংয়ুগে
93.6
তান্দ্রোণচাপনির্মুক্তান্দাশার্হঃ পততঃ শরান্
দ্বাভ্যাং দ্বাভ্যাং সুপুঙ্খাভ্যাং চিচ্ছেদ পরমাস্ত্রবিৎ
93.7
তামস্য লঘুতাং দ্রোণঃ সমবেক্ষ্য বিশাং পতে
প্রহস্য সহসাবিধ্যদ্বিংশত্যা শিনিপুংগবম্
93.8
পুনঃ পঞ্চাশতেষূণাং শতেন চ সমার্পয়ৎ
লঘুতাং যুয়ুধানস্য লাঘবেন বিশেষয়ন্
93.9
সমুত্পতন্তি বল্মীকাদ্যথা ক্রুদ্ধা মহোরগাঃ
তথা দ্রোণরথাদ্রাজন্নুত্পতন্তি তনুচ্ছিদঃ
93.10
তথৈব যুয়ুধানেন সৃষ্টাঃ শতসহস্রশঃ
অবাকিরন্দ্রোণরথং শরা রুধিরভোজনাঃ
93.11
লাঘবাদ্দ্বিজমুখ্যস্য সাত্বতস্য চ মারিষ
বিশেষং নাধ্যগচ্ছাম সমাবাস্তাং নরর্ষভৌ
93.12
সাত্যকিস্তু ততো দ্রোণং নবভির্নতপর্বভিঃ
আজঘান ভৃশং ক্রুদ্ধো ধ্বজং চ নিশিতৈঃ শরৈঃ
সারথিং চ শতেনৈব ভারদ্বাজস্য পশ্যতঃ
93.13
লাঘবং যুয়ুধানস্য দৃষ্ট্বা দ্রোণো মহারথঃ
সপ্তত্যা সাত্যকিং বিদ্ধ্বা তুরগাংশ্চ ত্রিভিস্ত্রিভিঃ
ধ্বজমেকেন বিব্যাধ মাধবস্য রথে স্থিতম্
93.14
অথাপরেণ ভল্লেন হেমপুঙ্খেন পত্রিণা
ধনুশ্চিচ্ছেদ সমরে মাধবস্য মহাত্মনঃ
93.15
সাত্যকিস্তু ততঃ ক্রুদ্ধো ধনুস্ত্যক্ত্বা মহারথঃ
গদাং জগ্রাহ মহতীং ভারদ্বাজায় চাক্ষিপৎ
93.16
তামাপতন্তীং সহসা পট্টবদ্ধাময়স্ময়ীম্
ন্যবারয়চ্ছরৈর্দ্রোণো বহুভির্বহুরূপিভিঃ
93.17
অথান্যদ্ধনুরাদায় সাত্যকিঃ সত্যবিক্রমঃ
বিব্যাধ বহুভির্বীরং ভারদ্বাজং শিলাশিতৈঃ
93.18
স বিদ্ধ্বা সমরে দ্রোণং সিংহনাদমমুঞ্চত
তং বৈ ন মমৃষে দ্রোণঃ সর্বশস্ত্রভৃতাং বরঃ
93.19
ততঃ শক্তিং গৃহীত্বা তু রুক্মদণ্ডাময়স্ময়ীম্
তরসা প্রেষয়ামাস মাধবস্য রথং প্রতি
93.20
অনাসাদ্য তু শৈনেয়ং সা শক্তিঃ কালসংনিভা
ভিত্ত্বা রথং জগামোগ্রা ধরণীং দারুণস্বনা
93.21
ততো দ্রোণং শিনেঃ পৌত্রো রাজন্বিব্যাধ পত্রিণা
দক্ষিণং ভুজমাসাদ্য পীডয়ন্ভরতর্ষভ
93.22
দ্রোণোঽপি সমরে রাজন্মাধবস্য মহদ্ধনুঃ
অর্ধচন্দ্রেণ চিচ্ছেদ রথশক্ত্যা চ সারথিম্
93.23
মুমোহ সারথিস্তস্য রথশক্ত্যা সমাহতঃ
স রথোপস্থমাসাদ্য মুহূর্তং সংন্যষীদত
93.24
চকার সাত্যকী রাজংস্তত্র কর্মাতিমানুষম্
অয়োধয়চ্চ যদ্দ্রোণং রশ্মীঞ্জগ্রাহ চ স্বয়ম্
93.25
ততঃ শরশতেনৈব যুয়ুধানো মহারথঃ
অবিধ্যদ্ব্রাহ্মণং সংখ্যে হৃষ্টরূপো বিশাং পতে
93.26
তস্য দ্রোণঃ শরান্পঞ্চ প্রেষয়ামাস ভারত
তে তস্য কবচং ভিত্ত্বা পপুঃ শোণিতমাহবে
93.27
নির্বিদ্ধস্তু শরৈর্ঘোরৈরক্রুধ্যত্সাত্যকির্ভৃশম্
সায়কান্ব্যসৃজচ্চাপি বীরো রুক্মরথং প্রতি
93.28
ততো দ্রোণস্য যন্তারং নিপাত্যৈকেষুণা ভুবি
অশ্বান্ব্যদ্রাবয়দ্বাণৈর্হতসূতান্মহাত্মনঃ
93.29
স রথঃ প্রদ্রুতঃ সংখ্যে মণ্ডলানি সহস্রশঃ
চকার রাজতো রাজন্ভ্রাজমান ইবাংশুমান্
93.30
অভিদ্রবত গৃহ্ণীত হয়ান্দ্রোণস্য ধাবত
ইতি স্ম চুক্রুশুঃ সর্বে রাজপুত্রাঃ সরাজকাঃ
93.31
তে সাত্যকিমপাস্যাশু রাজন্যুধি মহারথাঃ
যতো দ্রোণস্ততঃ সর্বে সহসা সমুপাদ্রবন্
93.32
তান্দৃষ্ট্বা প্রদ্রুতান্সর্বান্সাত্বতেন শরার্দিতান্
প্রভগ্নং পুনরেবাসীত্তব সৈন্যং সমাকুলম্
93.33
ব্যূহস্যৈব পুনর্দ্বারং গত্বা দ্রোণো ব্যবস্থিতঃ
বাতায়মানৈস্তৈরশ্বৈর্হৃতো বৃষ্ণিশরার্দিতৈঃ
93.34
পাণ্ডুপাঞ্চালসংভগ্নং ব্যূহমালোক্য বীর্যবান্
শৈনেয়ে নাকরোদ্যত্নং ব্যূহস্যৈবাভিরক্ষণে
93.35
নিবার্য পাণ্ডুপাঞ্চালান্দ্রোণাগ্নিঃ প্রদহন্নিব
তস্থৌ ক্রোধাগ্নিসংদীপ্তঃ কালসূর্য ইবোদিতঃ