Utshovঅধ্যায় 92
92.1
সংজয় উবাচ
তে কিরন্তঃ শরব্রাতান্সর্বে যত্তাঃ প্রহারিণঃ
ত্বরমাণা মহারাজ যুয়ুধানময়োধয়ন্
92.2
তং দ্রোণঃ সপ্তসপ্তত্যা জঘান নিশিতৈঃ শরৈঃ
দুর্মর্ষণো দ্বাদশভির্দুঃসহো দশভিঃ শরৈঃ
92.3
বিকর্ণশ্চাপি নিশিতৈস্ত্রিংশদ্ভিঃ কঙ্কপত্রিভিঃ
বিব্যাধ সব্যে পার্শ্বে তু স্তনাভ্যামন্তরে তথা
92.4
দুর্মুখো দশভির্বাণৈস্তথা দুঃশাসনোঽষ্টভিঃ
চিত্রসেনশ্চ শৈনেয়ং দ্বাভ্যাং বিব্যাধ মারিষ
92.5
দুর্যোধনশ্চ মহতা শরবর্ষেণ মাধবম্
অপীডয়দ্রণে রাজঞ্শূরাশ্চান্যে মহারথাঃ
92.6
সর্বতঃ প্রতিবিদ্ধস্তু তব পুত্রৈর্মহারথৈঃ
তান্প্রত্যবিধ্যচ্ছৈনেয়ঃ পৃথক্পৃথগজিহ্মগৈঃ
92.7
ভারদ্বাজং ত্রিভির্বাণৈর্দুঃসহং নবভিস্তথা
বিকর্ণং পঞ্চবিংশত্যা চিত্রসেনং চ সপ্তভিঃ
92.8
দুর্মর্ষণং দ্বাদশভিশ্চতুর্ভিশ্চ বিবিংশতিম্
সত্যব্রতং চ নবভির্বিজয়ং দশভিঃ শরৈঃ
92.9
ততো রুক্মাঙ্গদং চাপং বিধুন্বানো মহারথঃ
অভ্যয়াত্সাত্যকিস্তূর্ণং পুত্রং তব মহারথম্
92.10
রাজানং সর্বলোকস্য সর্বশস্ত্রভৃতাং বরম্
শরৈরভ্যাহনদ্গাঢং ততো যুদ্ধমভূত্তয়োঃ
92.11
বিমুঞ্চন্তৌ শরাংস্তীক্ষ্ণান্সংদধানৌ চ সায়কান্
অদৃশ্যং সমরেঽন্যোন্যং চক্রতুস্তৌ মহারথৌ
92.12
সাত্যকিঃ কুরুরাজেন নির্বিদ্ধো বহ্বশোভত
অস্রবদ্রুধিরং ভূরি স্বরসং চন্দনো যথা
92.13
সাত্বতেন চ বাণৌঘৈর্নির্বিদ্ধস্তনয়স্তব
শাতকুম্ভময়াপীডো বভৌ যূপ ইবোচ্ছ্রিতঃ
92.14
মাধবস্তু রণে রাজন্কুরুরাজস্য ধন্বিনঃ
ধনুশ্চিচ্ছেদ সহসা ক্ষুরপ্রেণ হসন্নিব
অথৈনং ছিন্নধন্বানং শরৈর্বহুভিরাচিনোৎ
92.15
নির্ভিন্নশ্চ শরৈস্তেন দ্বিষতা ক্ষিপ্রকারিণা
নামৃষ্যত রণে রাজা শত্রোর্বিজয়লক্ষণম্
92.16
অথান্যদ্ধনুরাদায় হেমপৃষ্ঠং দুরাসদম্
বিব্যাধ সাত্যকিং তূর্ণং সায়কানাং শতেন হ
92.17
সোঽতিবিদ্ধো বলবতা পুত্রেণ তব ধন্বিনা
অমর্ষবশমাপন্নস্তব পুত্রমপীডয়ৎ
92.18
পীডিতং নৃপতিং দৃষ্ট্বা তব পুত্রা মহারথাঃ
সাত্বতং শরবর্ষেণ ছাদয়ামাসুরঞ্জসা
92.19
স ছাদ্যমানো বহুভিস্তব পুত্রৈর্মহারথৈঃ
একৈকং পঞ্চভির্বিদ্ধ্বা পুনর্বিব্যাধ সপ্তভিঃ
92.20
দুর্যোধনং চ ত্বরিতো বিব্যাধাষ্টভিরাশুগৈঃ
প্রহসংশ্চাস্য চিচ্ছেদ কার্মুকং রিপুভীষণম্
92.21
নাগং মণিময়ং চৈব শরৈর্ধ্বজমপাতয়ৎ
হত্বা তু চতুরো বাহাংশ্চতুর্ভির্নিশিতৈঃ শরৈঃ
সারথিং পাতয়ামাস ক্ষুরপ্রেণ মহায়শাঃ
92.22
এতস্মিন্নন্তরে চৈব কুরুরাজং মহারথম্
অবাকিরচ্ছরৈর্হৃষ্টো বহুভির্মর্মভেদিভিঃ
92.23
স বধ্যমানঃ সমরে শৈনেয়স্য শরোত্তমৈঃ
প্রাদ্রবত্সহসা রাজন্পুত্রো দুর্যোধনস্তব
আপ্লুতশ্চ ততো যানং চিত্রসেনস্য ধন্বিনঃ
92.24
হাহাভূতং জগচ্চাসীদ্দৃষ্ট্বা রাজানমাহবে
গ্রস্যমানং সাত্যকিনা খে সোমমিব রাহুণা
92.25
তং তু শব্দং মহচ্ছ্রুত্বা কৃতবর্মা মহারথঃ
অভ্যয়াত্সহসা তত্র যত্রাস্তে মাধবঃ প্রভুঃ
92.26
বিধুন্বানো ধনুঃশ্রেষ্ঠং চোদয়ংশ্চৈব বাজিনঃ
ভর্ত্সয়ন্সারথিং চোগ্রং যাহি যাহীতি সত্বরঃ
92.27
তমাপতন্তং সংপ্রেক্ষ্য ব্যাদিতাস্যমিবান্তকম্
যুয়ুধানো মহারাজ যন্তারমিদমব্রবীৎ
92.28
কৃতবর্মা রথেনৈষ দ্রুতমাপততে শরী
প্রত্যুদ্যাহি রথেনৈনং প্রবরং সর্বধন্বিনাম্
92.29
ততঃ প্রজবিতাশ্বেন বিধিবত্কল্পিতেন চ
আসসাদ রণে ভোজং প্রতিমানং ধনুষ্মতাম্
92.30
ততঃ পরমসংক্রুদ্ধৌ জ্বলন্তাবিব পাবকৌ
সমেয়াতাং নরব্যাঘ্রৌ ব্যাঘ্রাবিব তরস্বিনৌ
92.31
কৃতবর্মা তু শৈনেয়ং ষড্বিংশত্যা সমার্পয়ৎ
নিশিতৈঃ সায়কৈস্তীক্ষ্ণৈর্যন্তারং চাস্য সপ্তভিঃ
92.32
চতুরশ্চ হয়োদারাংশ্চতুর্ভিঃ পরমেষুভিঃ
অবিধ্যত্সাধুদান্তান্বৈ সৈন্ধবান্সাত্বতস্য হ
92.33
রুক্মধ্বজো রুক্মপৃষ্ঠং মহদ্বিস্ফার্য কার্মুকম্
রুক্মাঙ্গদী রুক্মবর্মা রুক্মপুঙ্খানবাকিরৎ
92.34
ততোঽশীতিং শিনেঃ পৌত্রঃ সায়কান্কৃতবর্মণে
প্রাহিণোত্ত্বরয়া যুক্তো দ্রষ্টুকামো ধনংজয়ম্
92.35
সোঽতিবিদ্ধো বলবতা শত্রুণা শত্রুতাপনঃ
সমকম্পত দুর্ধর্ষঃ ক্ষিতিকম্পে যথাচলঃ
92.36
ত্রিষষ্ট্যা চতুরোঽস্যাশ্বান্সপ্তভিঃ সারথিং শরৈঃ
বিব্যাধ নিশিতৈস্তূর্ণং সাত্যকিঃ কৃতবর্মণঃ
92.37
সুবর্ণপুঙ্খং বিশিখং সমাধায় স সাত্যকিঃ
ব্যসৃজত্তং মহাজ্বালং সংক্রুদ্ধমিব পন্নগম্
92.38
সোঽবিশত্কৃতবর্মাণং যমদণ্ডোপমঃ শরঃ
জাম্বূনদবিচিত্রং চ বর্ম নির্ভিদ্য ভানুমৎ
অভ্যগাদ্ধরণীমুগ্রো রুধিরেণ সমুক্ষিতঃ
92.39
সংজাতরুধিরশ্চাজৌ সাত্বতেষুভিরর্দিতঃ
প্রচলন্ধনুরুত্সৃজ্য ন্যপতত্স্যন্দনোত্তমে
92.40
স সিংহদংষ্ট্রো জানুভ্যামাপন্নোঽমিতবিক্রমঃ
শরার্দিতঃ সাত্যকিনা রথোপস্থে নরর্ষভঃ
92.41
সহস্রবাহোঃ সদৃশমক্ষোভ্যমিব সাগরম্
নিবার্য কৃতবর্মাণং সাত্যকিঃ প্রয়য়ৌ ততঃ
92.42
খড্গশক্তিধনুঃকীর্ণাং গজাশ্বরথসংকুলাম্
প্রবর্তিতোগ্ররুধিরাং শতশঃ ক্ষত্রিয়র্ষভৈঃ
92.43
প্রেক্ষতাং সর্বসৈন্যানাং মধ্যেন শিনিপুংগবঃ
অভ্যগাদ্বাহিনীং ভিত্ত্বা বৃত্রহেবাসুরীং চমূম্
92.44
সমাশ্বাস্য চ হার্দিক্যো গৃহ্য চান্যন্মহদ্ধনুঃ
তস্থৌ তত্রৈব বলবান্বারয়ন্যুধি পাণ্ডবান্