Utshovঅধ্যায় 91
91.1
সংজয় উবাচ
শৃণুষ্বৈকমনা রাজন্যন্মাং ত্বং পরিপৃচ্ছসি
দ্রাব্যমাণে বলে তস্মিন্হার্দিক্যেন মহাত্মনা
91.2
লজ্জয়াবনতে চাপি প্রহৃষ্টৈশ্চৈব তাবকৈঃ
দ্বীপো য আসীত্পাণ্ডূনামগাধে গাধমিচ্ছতাম্
91.3
শ্রুত্বা তু নিনদং ভীমং তাবকানাং মহাহবে
শৈনেয়স্ত্বরিতো রাজন্কৃতবর্মাণমভ্যয়াৎ
91.4
কৃতবর্মা তু হার্দিক্যঃ শৈনেয়ং নিশিতৈঃ শরৈঃ
অবাকিরত্সুসংক্রুদ্ধস্ততোঽক্রুধ্যত সাত্যকিঃ
91.5
ততঃ সুনিশিতং ভল্লং শৈনেয়ঃ কৃতবর্মণে
প্রেষয়ামাস সমরে শরাংশ্চ চতুরোঽপরান্
91.6
তে তস্য জঘ্নিরে বাহান্ভল্লেনাস্যাচ্ছিনদ্ধনুঃ
পৃষ্ঠরক্ষং তথা সূতমবিধ্যন্নিশিতৈঃ শরৈঃ
91.7
ততস্তং বিরথং কৃত্বা সাত্যকিঃ সত্যবিক্রমঃ
সেনামস্যার্দয়ামাস শরৈঃ সংনতপর্বভিঃ
91.8
সাভজ্যতাথ পৃতনা শৈনেয়শরপীডিতা
ততঃ প্রায়াদ্বৈ ত্বরিতঃ সাত্যকিঃ সত্যবিক্রমঃ
91.9
শৃণু রাজন্যদকরোত্তব সৈন্যেষু বীর্যবান্
অতীত্য স মহারাজ দ্রোণানীকমহার্ণবম্
91.10
পরাজিত্য চ সংহৃষ্টঃ কৃতবর্মাণমাহবে
যন্তারমব্রবীচ্ছূরঃ শনৈর্যাহীত্যসংভ্রমম্
91.11
দৃষ্ট্বা তু তব তত্সৈন্যং রথাশ্বদ্বিপসংকুলম্
পদাতিজনসংপূর্ণমব্রবীত্সারথিং পুনঃ
91.12
যদেতন্মেঘসংকাশং দ্রোণানীকস্য সব্যতঃ
সুমহত্কুঞ্জরানীকং যস্য রুক্মরথো মুখম্
91.13
এতে হি বহবঃ সূত দুর্নিবার্যাশ্চ সংয়ুগে
দুর্যোধনসমাদিষ্টা মদর্থে ত্যক্তজীবিতাঃ
রাজপুত্রা মহেষ্বাসাঃ সর্বে বিক্রান্তয়োধিনঃ
91.14
ত্রিগর্তানাং রথোদারাঃ সুবর্ণবিকৃতধ্বজাঃ
মামেবাভিমুখা বীরা যোত্স্যমানা ব্যবস্থিতাঃ
91.15
অত্র মাং প্রাপয় ক্ষিপ্রমশ্বাংশ্চোদয় সারথে
ত্রিগর্তৈঃ সহ যোত্স্যামি ভারদ্বাজস্য পশ্যতঃ
91.16
ততঃ প্রায়াচ্ছনৈঃ সূতঃ সাত্বতস্য মতে স্থিতঃ
রথেনাদিত্যবর্ণেন ভাস্বরেণ পতাকিনা
91.17
তমূহুঃ সারথের্বশ্যা বল্গমানা হয়োত্তমাঃ
বায়ুবেগসমাঃ সংখ্যে কুন্দেন্দুরজতপ্রভাঃ
91.18
আপতন্তং রথং তং তু শঙ্খবর্ণৈর্হয়োত্তমৈঃ
পরিবব্রুস্ততঃ শূরা গজানীকেন সর্বতঃ
কিরন্তো বিবিধাংস্তীক্ষ্ণান্সায়কাঁল্লঘুবেধিনঃ
91.19
সাত্বতোঽপি শিতৈর্বাণৈর্গজানীকময়োধয়ৎ
পর্বতানিব বর্ষেণ তপান্তে জলদো মহান্
91.20
বজ্রাশনিসমস্পর্শৈর্বধ্যমানাঃ শরৈর্গজাঃ
প্রাদ্রবন্রণমুত্সৃজ্য শিনিবীর্যসমীরিতৈঃ
91.21
শীর্ণদন্তা বিরুধিরা ভিন্নমস্তকপিণ্ডকাঃ
বিশীর্ণকর্ণাস্যকরা বিনিয়ন্তৃপতাকিনঃ
91.22
সংভিন্নবর্মঘণ্টাশ্চ সংনিকৃত্তমহাধ্বজাঃ
হতারোহা দিশো রাজন্ভেজিরে ভ্রষ্টকম্বলাঃ
91.23
রুবন্তো বিবিধান্রাবাঞ্জলদোপমনিস্বনাঃ
নারাচৈর্বত্সদন্তৈশ্চ সাত্বতেন বিদারিতাঃ
91.24
তস্মিন্দ্রুতে গজানীকে জলসংধো মহারথঃ
যত্তঃ সংপ্রাপয়ন্নাগং রজতাশ্বরথং প্রতি
91.25
রুক্মবর্ণকরঃ শূরস্তপনীয়াঙ্গদঃ শুচিঃ
কুণ্ডলী মুকুটী শঙ্খী রক্তচন্দনরূষিতঃ
91.26
শিরসা ধারয়ন্দীপ্তাং তপনীয়ময়ীং স্রজম্
উরসা ধারয়ন্নিষ্কং কণ্ঠসূত্রং চ ভাস্বরম্
91.27
চাপং চ রুক্মবিকৃতং বিধুন্বন্গজমূর্ধনি
অশোভত মহারাজ সবিদ্যুদিব তোয়দঃ
91.28
তমাপতন্তং সহসা মাগধস্য গজোত্তমম্
সাত্যকির্বারয়ামাস বেলেবোদ্বৃত্তমর্ণবম্
91.29
নাগং নিবারিতং দৃষ্ট্বা শৈনেয়স্য শরোত্তমৈঃ
অক্রুধ্যত রণে রাজঞ্জলসংধো মহাবলঃ
91.30
ততঃ ক্রুদ্ধো মহেষ্বাসো মার্গণৈর্ভারসাধনৈঃ
অবিধ্যত শিনেঃ পৌত্রং জলসংধো মহোরসি
91.31
ততোঽপরেণ ভল্লেন পীতেন নিশিতেন চ
অস্যতো বৃষ্ণিবীরস্য নিচকর্ত শরাসনম্
91.32
সাত্যকিং ছিন্নধন্বানং প্রহসন্নিব ভারত
অবিধ্যন্মাগধো বীরঃ পঞ্চভির্নিশিতৈঃ শরৈঃ
91.33
স বিদ্ধো বহুভির্বাণৈর্জলসংধেন বীর্যবান্
নাকম্পত মহাবাহুস্তদদ্ভুতমিবাভবৎ
91.34
অচিন্তয়ন্বৈ স শরান্নাত্যর্থং সংভ্রমাদ্বলী
ধনুরন্যত্সমাদায় তিষ্ঠ তিষ্ঠেত্যুবাচ হ
91.35
এতাবদুক্ত্বা শৈনেয়ো জলসংধং মহোরসি
বিব্যাধ ষষ্ট্যা সুভৃশং শরাণাং প্রহসন্নিব
91.36
ক্ষুরপ্রেণ চ পীতেন মুষ্টিদেশে মহদ্ধনুঃ
জলসংধস্য চিচ্ছেদ বিব্যাধ চ ত্রিভিঃ শরৈঃ
91.37
জলসংধস্তু তত্ত্যক্ত্বা সশরং বৈ শরাসনম্
তোমরং ব্যসৃজত্তূর্ণং সাত্যকিং প্রতি মারিষ
91.38
স নির্ভিদ্য ভুজং সব্যং মাধবস্য মহারণে
অভ্যগাদ্ধরণীং ঘোরঃ শ্বসন্নিব মহোরগঃ
91.39
নির্ভিন্নে তু ভুজে সব্যে সাত্যকিঃ সত্যবিক্রমঃ
ত্রিংশদ্ভির্বিশিখৈস্তীক্ষ্ণৈর্জলসংধমতাডয়ৎ
91.40
প্রগৃহ্য তু ততঃ খড্গং জলসংধো মহাবলঃ
আর্ষভং চর্ম চ মহচ্ছতচন্দ্রমলংকৃতম্
তত আবিধ্য তং খড্গং সাত্বতায়োত্সসর্জ হ
91.41
শৈনেয়স্য ধনুশ্ছিত্ত্বা স খড্গো ন্যপতন্মহীম্
অলাতচক্রবচ্চৈব ব্যরোচত মহীং গতঃ
91.42
অথান্যদ্ধনুরাদায় সর্বকায়াবদারণম্
শালস্কন্ধপ্রতীকাশমিন্দ্রাশনিসমস্বনম্
বিস্ফার্য বিব্যধে ক্রুদ্ধো জলসংধং শরেণ হ
91.43
ততঃ সাভরণৌ বাহূ ক্ষুরাভ্যাং মাধবোত্তমঃ
সাঙ্গদৌ জলসংধস্য চিচ্ছেদ প্রহসন্নিব
91.44
তৌ বাহূ পরিঘপ্রখ্যৌ পেততুর্গজসত্তমাৎ
বসুংধরাধরাদ্ভ্রষ্টৌ পঞ্চশীর্ষাবিবোরগৌ
91.45
ততঃ সুদংষ্ট্রং সুহনু চারুকুণ্ডলমুন্নসম্
ক্ষুরেণাস্য তৃতীয়েন শিরশ্চিচ্ছেদ সাত্যকিঃ
91.46
তত্পাতিতশিরোবাহুকবন্ধং ভীমদর্শনম্
দ্বিরদং জলসংধস্য রুধিরেণাভ্যষিঞ্চত
91.47
জলসংধং নিহত্যাজৌ ত্বরমাণস্তু সাত্বতঃ
নৈষাদিং পাতয়ামাস গজস্কন্ধাদ্বিশাং পতে
91.48
রুধিরেণাবসিক্তাঙ্গো জলসংধস্য কুঞ্জরঃ
বিলম্বমানমবহত্সংশ্লিষ্টং পরমাসনম্
91.49
শরার্দিতঃ সাত্বতেন মর্দমানঃ স্ববাহিনীম্
ঘোরমার্তস্বরং কৃত্বা বিদুদ্রাব মহাগজঃ
91.50
হাহাকারো মহানাসীত্তব সৈন্যস্য মারিষ
জলসংধং হতং দৃষ্ট্বা বৃষ্ণীনামৃষভেণ হ
91.51
বিমুখাশ্চাভ্যধাবন্ত তব যোধাঃ সমন্ততঃ
পলায়নে কৃতোত্সাহা নিরুত্সাহা দ্বিষজ্জয়ে
91.52
এতস্মিন্নন্তরে রাজন্দ্রোণঃ শস্ত্রভৃতাং বরঃ
অভ্যয়াজ্জবনৈরশ্বৈর্যুয়ুধানং মহারথম্
91.53
তমুদীর্ণং তথা দৃষ্ট্বা শৈনেয়ং কুরুপুংগবাঃ
দ্রোণেনৈব সহ ক্রুদ্ধাঃ সাত্যকিং পর্যবারয়ন্
91.54
ততঃ প্রববৃতে যুদ্ধং কুরূণাং সাত্বতস্য চ
দ্রোণস্য চ রণে রাজন্ঘোরং দেবাসুরোপমম্