Utshovঅধ্যায় 90
90.1
সংজয় উবাচ
আত্মাপরাধাত্সংভূতং ব্যসনং ভরতর্ষভ
প্রাপ্য প্রাকৃতবদ্বীর ন ত্বং শোচিতুমর্হসি
90.2
তব নির্গুণতাং জ্ঞাত্বা পক্ষপাতং সুতেষু চ
দ্বৈধীভাবং তথা ধর্মে পাণ্ডবেষু চ মত্সরম্
আর্তপ্রলাপাংশ্চ বহূন্মনুজাধিপসত্তম
90.3
সর্বলোকস্য তত্ত্বজ্ঞঃ সর্বলোকগুরুঃ প্রভুঃ
বাসুদেবস্ততো যুদ্ধং কুরূণামকরোন্মহৎ
90.4
আত্মাপরাধাত্সুমহান্প্রাপ্তস্তে বিপুলঃ ক্ষয়ঃ
ন হি তে সুকৃতং কিংচিদাদৌ মধ্যে চ ভারত
দৃশ্যতে পৃষ্ঠতশ্চৈব ত্বন্মূলো হি পরাজয়ঃ
90.5
তস্মাদদ্য স্থিরো ভূত্বা জ্ঞাত্বা লোকস্য নির্ণয়ম্
শৃণু যুদ্ধং যথা বৃত্তং ঘোরং দেবাসুরোপমম্
90.6
প্রবিষ্টে তব সৈন্যং তু শৈনেয়ে সত্যবিক্রমে
ভীমসেনমুখাঃ পার্থাঃ প্রতীয়ুর্বাহিনীং তব
90.7
আগচ্ছতস্তান্সহসা ক্রুদ্ধরূপান্সহানুগান্
দধারৈকো রণে পাণ্ডূন্কৃতবর্মা মহারথঃ
90.8
যথোদ্বৃত্তং ধারয়তে বেলা বৈ সলিলার্ণবম্
পাণ্ডুসৈন্যং তথা সংখ্যে হার্দিক্যঃ সমবারয়ৎ
90.9
তত্রাদ্ভুতমমন্যন্ত হার্দিক্যস্য পরাক্রমম্
যদেনং সহিতাঃ পার্থা নাতিচক্রমুরাহবে
90.10
ততো ভীমস্ত্রিভির্বিদ্ধ্বা কৃতবর্মাণমায়সৈঃ
শঙ্খং দধ্মৌ মহাবাহুর্হর্ষয়ন্সর্বপাণ্ডবান্
90.11
সহদেবস্তু বিংশত্যা ধর্মরাজশ্চ পঞ্চভিঃ
শতেন নকুলশ্চাপি হার্দিক্যং সমবিধ্যত
90.12
দ্রৌপদেয়াস্ত্রিসপ্তত্যা সপ্তভিশ্চ ঘটোত্কচঃ
ধৃষ্টদ্যুম্নস্ত্রিভিশ্চাপি কৃতবর্মাণমার্দয়ৎ
বিরাটো দ্রুপদশ্চৈব যাজ্ঞসেনিশ্চ পঞ্চভিঃ
90.13
শিখণ্ডী চাপি হার্দিক্যং বিদ্ধ্বা পঞ্চভিরাশুগৈঃ
পুনর্বিব্যাধ বিংশত্যা সায়কানাং হসন্নিব
90.14
কৃতবর্মা ততো রাজন্সর্বতস্তান্মহারথান্
একৈকং পঞ্চভির্বিদ্ধ্বা ভীমং বিব্যাধ সপ্তভিঃ
ধনুর্ধ্বজং চ সংয়ত্তো রথাদ্ভূমাবপাতয়ৎ
90.15
অথৈনং ছিন্নধন্বানং ত্বরমাণো মহারথঃ
আজঘানোরসি ক্রুদ্ধঃ সপ্তত্যা নিশিতৈঃ শরৈঃ
90.16
স গাঢবিদ্ধো বলবান্হার্দিক্যস্য শরোত্তমৈঃ
চচাল রথমধ্যস্থঃ ক্ষিতিকম্পে যথাচলঃ
90.17
ভীমসেনং তথা দৃষ্ট্বা ধর্মরাজপুরোগমাঃ
বিসৃজন্তঃ শরান্ঘোরান্কৃতবর্মাণমার্দয়ন্
90.18
তং তথা কোষ্ঠকীকৃত্য রথবংশেন মারিষ
বিব্যধুঃ সায়কৈর্হৃষ্টা রক্ষার্থং মারুতের্মৃধে
90.19
প্রতিলভ্য ততঃ সংজ্ঞাং ভীমসেনো মহাবলঃ
শক্তিং জগ্রাহ সমরে হেমদণ্ডাময়স্ময়ীম্
চিক্ষেপ চ রথাত্তূর্ণং কৃতবর্মরথং প্রতি
90.20
সা ভীমভুজনির্মুক্তা নির্মুক্তোরগসংনিভা
কৃতবর্মাণমভিতঃ প্রজজ্বাল সুদারুণা
90.21
তামাপতন্তীং সহসা যুগান্তাগ্নিসমপ্রভাম্
দ্বাভ্যাং শরাভ্যাং হার্দিক্যো নিচকর্ত দ্বিধা তদা
90.22
সা ছিন্না পতিতা ভূমৌ শক্তিঃ কনকভূষণা
দ্যোতয়ন্তী দিশো রাজন্মহোল্কেব দিবশ্চ্যুতা
শক্তিং বিনিহতাং দৃষ্ট্বা ভীমশ্চুক্রোধ বৈ ভৃশম্
90.23
ততোঽন্যদ্ধনুরাদায় বেগবত্সুমহাস্বনম্
ভীমসেনো রণে ক্রুদ্ধো হার্দিক্যং সমবারয়ৎ
90.24
অথৈনং পঞ্চভির্বাণৈরাজঘান স্তনান্তরে
ভীমো ভীমবলো রাজংস্তব দুর্মন্ত্রিতেন হ
90.25
ভোজস্তু ক্ষতসর্বাঙ্গো ভীমসেনেন মারিষ
রক্তাশোক ইবোত্ফুল্লো ব্যভ্রাজত রণাজিরে
90.26
ততঃ ক্রুদ্ধস্ত্রিভির্বাণৈর্ভীমসেনং হসন্নিব
অভিহত্য দৃঢং যুদ্ধে তান্সর্বান্প্রত্যবিধ্যত
90.27
ত্রিভিস্ত্রিভির্মহেষ্বাসো যতমানান্মহারথান্
তেঽপি তং প্রত্যবিধ্যন্ত সপ্তভিঃ সপ্তভিঃ শরৈঃ
90.28
শিখণ্ডিনস্ততঃ ক্রুদ্ধঃ ক্ষুরপ্রেণ মহারথঃ
ধনুশ্চিচ্ছেদ সমরে প্রহসন্নিব ভারত
90.29
শিখণ্ডী তু ততঃ ক্রুদ্ধশ্ছিন্নে ধনুষি সত্বরম্
অসিং জগ্রাহ সমরে শতচন্দ্রং চ ভাস্বরম্
90.30
ভ্রাময়িত্বা মহাচর্ম চামীকরবিভূষিতম্
তমসিং প্রেষয়ামাস কৃতবর্মরথং প্রতি
90.31
স তস্য সশরং চাপং ছিত্ত্বা সংখ্যে মহানসিঃ
অভ্যগাদ্ধরণীং রাজংশ্চ্যুতং জ্যোতিরিবাম্বরাৎ
90.32
এতস্মিন্নেব কালে তু ত্বরমাণা মহারথাঃ
বিব্যধুঃ সায়কৈর্গাঢং কৃতবর্মাণমাহবে
90.33
অথান্যদ্ধনুরাদায় ত্যক্ত্বা তচ্চ মহদ্ধনুঃ
বিশীর্ণং ভরতশ্রেষ্ঠ হার্দিক্যঃ পরবীরহা
90.34
বিব্যাধ পাণ্ডবান্যুদ্ধে ত্রিভিস্ত্রিভিরজিহ্মগৈঃ
শিখণ্ডিনং চ বিব্যাধ ত্রিভিঃ পঞ্চভিরেব চ
90.35
ধনুরন্যত্সমাদায় শিখণ্ডী তু মহায়শাঃ
অবারয়ত্কূর্মনখৈরাশুগৈর্হৃদিকাত্মজম্
90.36
ততঃ ক্রুদ্ধো রণে রাজন্হৃদিকস্যাত্মসংভবঃ
অভিদুদ্রাব বেগেন যাজ্ঞসেনিং মহারথম্
90.37
ভীষ্মস্য সমরে রাজন্মৃত্যোর্হেতুং মহাত্মনঃ
বিদর্শয়ন্বলং শূরঃ শার্দূল ইব কুঞ্জরম্
90.38
তৌ দিশাগজসংকাশৌ জ্বলিতাবিব পাবকৌ
সমাসেদতুরন্যোন্যং শরসংঘৈররিংদমৌ
90.39
বিধুন্বানৌ ধনুঃশ্রেষ্ঠে সংদধানৌ চ সায়কান্
বিসৃজন্তৌ চ শতশো গভস্তীনিব ভাস্করৌ
90.40
তাপয়ন্তৌ শরৈস্তীক্ষ্ণৈরন্যোন্যং তৌ মহারথৌ
যুগান্তপ্রতিমৌ বীরৌ রেজতুর্ভাস্করাবিব
90.41
কৃতবর্মা তু রভসং যাজ্ঞসেনিং মহারথম্
বিদ্ধ্বেষূণাং ত্রিসপ্তত্যা পুনর্বিব্যাধ সপ্তভিঃ
90.42
স গাঢবিদ্ধো ব্যথিতো রথোপস্থ উপাবিশৎ
বিসৃজন্সশরং চাপং মূর্ছয়াভিপরিপ্লুতঃ
90.43
তং বিষণ্ণং রথে দৃষ্ট্বা তাবকা ভরতর্ষভ
হার্দিক্যং পূজয়ামাসুর্বাসাংস্যাদুধুবুশ্চ হ
90.44
শিখণ্ডিনং তথা জ্ঞাত্বা হার্দিক্যশরপীডিতম্
অপোবাহ রণাদ্যন্তা ত্বরমাণো মহারথম্
90.45
সাদিতং তু রথোপস্থে দৃষ্ট্বা পার্থাঃ শিখণ্ডিনম্
পরিবব্রূ রথৈস্তূর্ণং কৃতবর্মাণমাহবে
90.46
তত্রাদ্ভুতং পরং চক্রে কৃতবর্মা মহারথঃ
যদেকঃ সমরে পার্থান্বারয়ামাস সানুগান্
90.47
পার্থাঞ্জিত্বাজয়চ্চেদীন্পাঞ্চালান্সৃঞ্জয়ানপি
কেকয়াংশ্চ মহাবীর্যান্কৃতবর্মা মহারথঃ
90.48
তে বধ্যমানাঃ সমরে হার্দিক্যেন স্ম পাণ্ডবাঃ
ইতশ্চেতশ্চ ধাবন্তো নৈব চক্রুর্ধৃতিং রণে
90.49
জিত্বা পাণ্ডুসুতান্যুদ্ধে ভীমসেনপুরোগমান্
হার্দিক্যঃ সমরেঽতিষ্ঠদ্বিধূম ইব পাবকঃ
90.50
তে দ্রাব্যমাণাঃ সমরে হার্দিক্যেন মহারথাঃ
বিমুখাঃ সমপদ্যন্ত শরবৃষ্টিভিরর্দিতাঃ