Utshovঅধ্যায় 89
89.1
ধৃতরাষ্ট্র উবাচ
এবং বহুবিধং সৈন্যমেবং প্রবিচিতং বরম্
ব্যূঢমেবং যথান্যায়মেবং বহু চ সংজয়
89.2
নিত্যং পূজিতমস্মাভিরভিকামং চ নঃ সদা
প্রৌঢমত্যদ্ভুতাকারং পুরস্তাদ্দৃঢবিক্রমম্
89.3
নাতিবৃদ্ধমবালং চ ন কৃশং নাতিপীবরম্
লঘুবৃত্তায়তপ্রাণং সারগাত্রমনাময়ম্
89.4
আত্তসংনাহসংপন্নং বহুশস্ত্রপরিচ্ছদম্
শস্ত্রগ্রহণবিদ্যাসু বহ্বীষু পরিনিষ্ঠিতম্
89.5
আরোহে পর্যবস্কন্দে সরণে সান্তরপ্লুতে
সম্যক্প্রহরণে যানে ব্যপয়ানে চ কোবিদম্
89.6
নাগেষ্বশ্বেষু বহুশো রথেষু চ পরীক্ষিতম্
পরীক্ষ্য চ যথান্যায়ং বেতনেনোপপাদিতম্
89.7
ন গোষ্ঠ্যা নোপচারেণ ন সংবন্ধনিমিত্ততঃ
নানাহূতো ন হ্যভৃতো মম সৈন্যে বভূব হ
89.8
কুলীনার্যজনোপেতং তুষ্টপুষ্টমনুদ্ধতম্
কৃতমানোপকারং চ যশস্বি চ মনস্বি চ
89.9
সচিবৈশ্চাপরৈর্মুখ্যৈর্বহুভির্মুখ্যকর্মভিঃ
লোকপালোপমৈস্তাত পালিতং নরসত্তমৈঃ
89.10
বহুভিঃ পার্থিবৈর্গুপ্তমস্মত্প্রিয়চিকীর্ষুভিঃ
অস্মানভিসৃতৈঃ কামাত্সবলৈঃ সপদানুগৈঃ
89.11
মহোদধিমিবাপূর্ণমাপগাভিঃ সমন্ততঃ
অপক্ষৈঃ পক্ষিসংকাশৈ রথৈরশ্বৈশ্চ সংবৃতম্
89.12
যোধাক্ষয্যজলং ভীমং বাহনোর্মিতরঙ্গিণম্
ক্ষেপণ্যসিগদাশক্তিশরপ্রাসঝষাকুলম্
89.13
ধ্বজভূষণসংবাধং রত্নপট্টেন সংচিতম্
বাহনৈরপি ধাবদ্ভির্বায়ুবেগবিকম্পিতম্
89.14
দ্রোণগম্ভীরপাতালং কৃতবর্মমহাহ্রদম্
জলসংধমহাগ্রাহং কর্ণচন্দ্রোদয়োদ্ধতম্
89.15
গতে সৈন্যার্ণবং ভিত্ত্বা তরসা পাণ্ডবর্ষভে
সংজয়ৈকরথেনৈব যুয়ুধানে চ মামকম্
89.16
তত্র শেষং ন পশ্যামি প্রবিষ্টে সব্যসাচিনি
সাত্বতে চ রথোদারে মম সৈন্যস্য সংজয়
89.17
তৌ তত্র সমতিক্রান্তৌ দৃষ্ট্বাভীতৌ তরস্বিনৌ
সিন্ধুরাজং চ সংপ্রেক্ষ্য গাণ্ডীবস্যেষুগোচরে
89.18
কিং তদা কুরবঃ কৃত্যং বিদধুঃ কালচোদিতাঃ
দারুণৈকায়নে কালে কথং বা প্রতিপেদিরে
89.19
গ্রস্তান্হি কৌরবান্মন্যে মৃত্যুনা তাত সংগতান্
বিক্রমো হি রণে তেষাং ন তথা দৃশ্যতেঽদ্য বৈ
89.20
অক্ষতৌ সংয়ুগে তত্র প্রবিষ্টৌ কৃষ্ণপাণ্ডবৌ
ন চ বারয়িতা কশ্চিত্তয়োরস্তীহ সংজয়
89.21
ভৃতাশ্চ বহবো যোধাঃ পরীক্ষ্যৈব মহারথাঃ
বেতনেন যথায়োগ্যং প্রিয়বাদেন চাপরে
89.22
অকারণভৃতস্তাত মম সৈন্যে ন বিদ্যতে
কর্মণা হ্যনুরূপেণ লভ্যতে ভক্তবেতনম্
89.23
ন চ যোধোঽভবত্কশ্চিন্মম সৈন্যে তু সংজয়
অল্পদানভৃতস্তাত ন কুপ্যভৃতকো নরঃ
89.24
পূজিতা হি যথাশক্ত্যা দানমানাসনৈর্ময়া
তথা পুত্রৈশ্চ মে তাত জ্ঞাতিভিশ্চ সবান্ধবৈঃ
89.25
তে চ প্রাপ্যৈব সংগ্রামে নির্জিতাঃ সব্যসাচিনা
শৈনেয়েন পরামৃষ্টাঃ কিমন্যদ্ভাগধেয়তঃ
89.26
রক্ষ্যতে যশ্চ সংগ্রামে যে চ সংজয় রক্ষিণঃ
একঃ সাধারণঃ পন্থা রক্ষ্যস্য সহ রক্ষিভিঃ
89.27
অর্জুনং সমরে দৃষ্ট্বা সৈন্ধবস্যাগ্রতঃ স্থিতম্
পুত্রো মম ভৃশং মূঢঃ কিং কার্যং প্রত্যপদ্যত
89.28
সাত্যকিং চ রণে দৃষ্ট্বা প্রবিশন্তমভীতবৎ
কিং নু দুর্যোধনঃ কৃত্যং প্রাপ্তকালমমন্যত
89.29
সর্বশস্ত্রাতিগৌ সেনাং প্রবিষ্টৌ রথসত্তমৌ
দৃষ্ট্বা কাং বৈ ধৃতিং যুদ্ধে প্রত্যপদ্যন্ত মামকাঃ
89.30
দৃষ্ট্বা কৃষ্ণং তু দাশার্হমর্জুনার্থে ব্যবস্থিতম্
শিনীনামৃষভং চৈব মন্যে শোচন্তি পুত্রকাঃ
89.31
দৃষ্ট্বা সেনাং ব্যতিক্রান্তাং সাত্বতেনার্জুনেন চ
পলায়মানাংশ্চ কুরূন্মন্যে শোচন্তি পুত্রকাঃ
89.32
বিদ্রুতান্রথিনো দৃষ্ট্বা নিরুত্সাহান্দ্বিষজ্জয়ে
পলায়নে কৃতোত্সাহান্মন্যে শোচন্তি পুত্রকাঃ
89.33
শূন্যান্কৃতান্রথোপস্থান্সাত্বতেনার্জুনেন চ
হতাংশ্চ যোধান্সংদৃশ্য মন্যে শোচন্তি পুত্রকাঃ
89.34
ব্যশ্বনাগরথান্দৃষ্ট্বা তত্র বীরান্সহস্রশঃ
ধাবমানান্রণে ব্যগ্রান্মন্যে শোচন্তি পুত্রকাঃ
89.35
বিবীরাংশ্চ কৃতানশ্বান্বিরথাংশ্চ কৃতান্নরান্
তত্র সাত্যকিপার্থাভ্যাং মন্যে শোচন্তি পুত্রকাঃ
89.36
পত্তিসংঘান্রণে দৃষ্ট্বা ধাবমানাংশ্চ সর্বশঃ
নিরাশা বিজয়ে সর্বে মন্যে শোচন্তি পুত্রকাঃ
89.37
দ্রোণস্য সমতিক্রান্তাবনীকমপরাজিতৌ
ক্ষণেন দৃষ্ট্বা তৌ বীরৌ মন্যে শোচন্তি পুত্রকাঃ
89.38
সংমূঢোঽস্মি ভৃশং তাত শ্রুত্বা কৃষ্ণধনংজয়ৌ
প্রবিষ্টৌ মামকং সৈন্যং সাত্বতেন সহাচ্যুতৌ
89.39
তস্মিন্প্রবিষ্টে পৃতনাং শিনীনাং প্রবরে রথে
ভোজানীকং ব্যতিক্রান্তে কথমাসন্হি কৌরবাঃ
89.40
তথা দ্রোণেন সমরে নিগৃহীতেষু পাণ্ডুষু
কথং যুদ্ধমভূত্তত্র তন্মমাচক্ষ্ব সংজয়
89.41
দ্রোণো হি বলবাঞ্শূরঃ কৃতাস্ত্রো দৃঢবিক্রমঃ
পাঞ্চালাস্তং মহেষ্বাসং প্রত্যয়ুধ্যন্কথং রণে
89.42
বদ্ধবৈরাস্তথা দ্রোণে ধর্মরাজজয়ৈষিণঃ
ভারদ্বাজস্তথা তেষু কৃতবৈরো মহারথঃ
89.43
অর্জুনশ্চাপি যচ্চক্রে সিন্ধুরাজবধং প্রতি
তন্মে সর্বং সমাচক্ষ্ব কুশলো হ্যসি সংজয়