Utshovঅধ্যায় 88
88.1
সংজয় উবাচ
প্রয়াতে তব সৈন্যং তু যুয়ুধানে যুয়ুত্সয়া
ধর্মরাজো মহারাজ স্বেনানীকেন সংবৃতঃ
প্রায়াদ্দ্রোণরথপ্রেপ্সুর্যুয়ুধানস্য পৃষ্ঠতঃ
88.2
ততঃ পাঞ্চালরাজস্য পুত্রঃ সমরদুর্মদঃ
প্রাক্রোশত্পাণ্ডবানীকে বসুদানশ্চ পার্থিবঃ
88.3
আগচ্ছত প্রহরত দ্রুতং বিপরিধাবত
যথা সুখেন গচ্ছেত সাত্যকির্যুদ্ধদুর্মদঃ
88.4
মহারথা হি বহবো যতিষ্যন্ত্যস্য নির্জয়ে
ইতি ব্রুবন্তো বেগেন সমাপেতুর্বলং তব
88.5
বয়ং প্রতিজিগীষন্তস্তত্র তান্সমভিদ্রুতাঃ
ততঃ শব্দো মহানাসীদ্যুয়ুধানরথং প্রতি
88.6
প্রকম্প্যমানা মহতী তব পুত্রস্য বাহিনী
সাত্বতেন মহারাজ শতধাভিব্যদীর্যত
88.7
তস্যাং বিদীর্যমাণায়াং শিনেঃ পৌত্রো মহারথঃ
সপ্ত বীরান্মহেষ্বাসানগ্রানীকে ব্যপোথয়ৎ
88.8
তে ভীতা মৃদ্যমানাশ্চ প্রমৃষ্টা দীর্ঘবাহুনা
আয়োধনং জহুর্বীরা দৃষ্ট্বা তমতিমানুষম্
88.9
রথৈর্বিমথিতাক্ষৈশ্চ ভগ্ননীডৈশ্চ মারিষ
চক্রৈর্বিমথিতৈশ্ছিন্নৈর্ধ্বজৈশ্চ বিনিপাতিতৈঃ
88.10
অনুকর্ষৈঃ পতাকাভিঃ শিরস্ত্রাণৈঃ সকাঞ্চনৈঃ
বাহুভিশ্চন্দনাদিগ্ধৈঃ সাঙ্গদৈশ্চ বিশাং পতে
88.11
হস্তিহস্তোপমৈশ্চাপি ভুজগাভোগসংনিভৈঃ
ঊরুভিঃ পৃথিবী ছন্না মনুজানাং নরোত্তম
88.12
শশাঙ্কসংনিকাশৈশ্চ বদনৈশ্চারুকুণ্ডলৈঃ
পতিতৈর্বৃষভাক্ষাণাং বভৌ ভারত মেদিনী
88.13
গজৈশ্চ বহুধা ছিন্নৈঃ শয়ানৈঃ পর্বতোপমৈঃ
ররাজাতিভৃশং ভূমির্বিকীর্ণৈরিব পর্বতৈঃ
88.14
তপনীয়ময়ৈর্যোক্ত্রৈর্মুক্তাজালবিভূষিতৈঃ
উরশ্ছদৈর্বিচিত্রৈশ্চ ব্যশোভন্ত তুরংগমাঃ
গতসত্ত্বা মহীং প্রাপ্য প্রমৃষ্টা দীর্ঘবাহুনা
88.15
নানাবিধানি সৈন্যানি তব হত্বা তু সাত্বতঃ
প্রবিষ্টস্তাবকং সৈন্যং দ্রাবয়িত্বা চমূং ভৃশম্
88.16
ততস্তেনৈব মার্গেণ যেন যাতো ধনংজয়ঃ
ইয়েষ সাত্যকির্গন্তুং ততো দ্রোণেন বারিতঃ
88.17
ভরদ্বাজং সমাসাদ্য যুয়ুধানস্তু মারিষ
নাভ্যবর্তত সংক্রুদ্ধো বেলামিব জলাশয়ঃ
88.18
নিবার্য তু রণে দ্রোণো যুয়ুধানং মহারথম্
বিব্যাধ নিশিতৈর্বাণৈঃ পঞ্চভির্মর্মভেদিভিঃ
88.19
সাত্যকিস্তু রণে দ্রোণং রাজন্বিব্যাধ সপ্তভিঃ
হেমপুঙ্খৈঃ শিলাধৌতৈঃ কঙ্কবর্হিণবাজিতৈঃ
88.20
তং ষড্ভিঃ সায়কৈর্দ্রোণঃ সাশ্বয়ন্তারমার্দয়ৎ
স তং ন মমৃষে দ্রোণং যুয়ুধানো মহারথঃ
88.21
সিংহনাদং ততঃ কৃত্বা দ্রোণং বিব্যাধ সাত্যকিঃ
দশভিঃ সায়কৈশ্চান্যৈঃ ষড্ভিরষ্টাভিরেব চ
88.22
যুয়ুধানঃ পুনর্দ্রোণং বিব্যাধ দশভিঃ শরৈঃ
একেন সারথিং চাস্য চতুর্ভিশ্চতুরো হয়ান্
ধ্বজমেকেন বাণেন বিব্যাধ যুধি মারিষ
88.23
তং দ্রোণঃ সাশ্বয়ন্তারং সরথধ্বজমাশুগৈঃ
ত্বরন্প্রাচ্ছাদয়দ্বাণৈঃ শলভানামিব ব্রজৈঃ
88.24
তথৈব যুয়ুধানোঽপি দ্রোণং বহুভিরাশুগৈঃ
প্রাচ্ছাদয়দসংভ্রান্তস্ততো দ্রোণ উবাচ হ
88.25
তবাচার্যো রণং হিত্বা গতঃ কাপুরুষো যথা
যুধ্যমানং হি মাং হিত্বা প্রদক্ষিণমবর্তত
88.26
ত্বং হি মে যুধ্যতো নাদ্য জীবন্মোক্ষ্যসি মাধব
যদি মাং ত্বং রণে হিত্বা ন যাস্যাচার্যবদ্দ্রুতম্
88.27
সাত্যকিরুবাচ
ধনংজয়স্য পদবীং ধর্মরাজস্য শাসনাৎ
গচ্ছামি স্বস্তি তে ব্রহ্মন্ন মে কালাত্যয়ো ভবেৎ
88.28
সংজয় উবাচ
এতাবদুক্ত্বা শৈনেয় আচার্যং পরিবর্জয়ন্
প্রয়াতঃ সহসা রাজন্সারথিং চেদমব্রবীৎ
88.29
দ্রোণঃ করিষ্যতে যত্নং সর্বথা মম বারণে
যত্তো যাহি রণে সূত শৃণু চেদং বচঃ পরম্
88.30
এতদালোক্যতে সৈন্যমাবন্ত্যানাং মহাপ্রভম্
অস্যানন্তরতস্ত্বেতদ্দাক্ষিণাত্যং মহাবলম্
88.31
তদনন্তরমেতচ্চ বাহ্লিকানাং বলং মহৎ
বাহ্লিকাভ্যাশতো যুক্তং কর্ণস্যাপি মহদ্বলম্
88.32
অন্যোন্যেন হি সৈন্যানি ভিন্নান্যেতানি সারথে
অন্যোন্যং সমুপাশ্রিত্য ন ত্যক্ষ্যন্তি রণাজিরম্
88.33
এতদন্তরমাসাদ্য চোদয়াশ্বান্প্রহৃষ্টবৎ
মধ্যমং জবমাস্থায় বহ মামত্র সারথে
88.34
বাহ্লিকা যত্র দৃশ্যন্তে নানাপ্রহরণোদ্যতাঃ
দাক্ষিণাত্যাশ্চ বহবঃ সূতপুত্রপুরোগমাঃ
88.35
হস্ত্যশ্বরথসংবাধং যচ্চানীকং বিলোক্যতে
নানাদেশসমুত্থৈশ্চ পদাতিভিরধিষ্ঠিতম্
88.36
এতাবদুক্ত্বা যন্তারং ব্রহ্মাণং পরিবর্জয়ন্
স ব্যতীয়ায় যত্রোগ্রং কর্ণস্য সুমহদ্বলম্
88.37
তং দ্রোণোঽনুয়য়ৌ ক্রুদ্ধো বিকিরন্বিশিখান্বহূন্
যুয়ুধানং মহাবাহুং গচ্ছন্তমনিবর্তিনম্
88.38
কর্ণস্য সৈন্যং সুমহদভিহত্য শিতৈঃ শরৈঃ
প্রাবিশদ্ভারতীং সেনামপর্যন্তাং স সাত্যকিঃ
88.39
প্রবিষ্টে যুয়ুধানে তু সৈনিকেষু দ্রুতেষু চ
অমর্ষী কৃতবর্মা তু সাত্যকিং পর্যবারয়ৎ
88.40
তমাপতন্তং বিশিখৈঃ ষড্ভিরাহত্য সাত্যকিঃ
চতুর্ভিশ্চতুরোঽস্যাশ্বানাজঘানাশু বীর্যবান্
88.41
ততঃ পুনঃ ষোডশভির্নতপর্বভিরাশুগৈঃ
সাত্যকিঃ কৃতবর্মাণং প্রত্যবিধ্যত্স্তনান্তরে
88.42
স তুদ্যমানো বিশিখৈর্বহুভিস্তিগ্মতেজনৈঃ
সাত্বতেন মহারাজ কৃতবর্মা ন চক্ষমে
88.43
স বত্সদন্তং সংধায় জিহ্মগানলসংনিভম্
আকৃষ্য রাজন্নাকর্ণাদ্বিব্যাধোরসি সাত্যকিম্
88.44
স তস্য দেহাবরণং ভিত্ত্বা দেহং চ সায়কঃ
সপত্রপুঙ্খঃ পৃথিবীং বিবেশ রুধিরোক্ষিতঃ
88.45
অথাস্য বহুভির্বাণৈরচ্ছিনত্পরমাস্ত্রবিৎ
সমার্গণগুণং রাজন্কৃতবর্মা শরাসনম্
88.46
বিব্যাধ চ রণে রাজন্সাত্যকিং সত্যবিক্রমম্
দশভির্বিশিখৈস্তীক্ষ্ণৈরভিক্রুদ্ধঃ স্তনান্তরে
88.47
ততঃ প্রশীর্ণে ধনুষি শক্ত্যা শক্তিমতাং বরঃ
অভ্যহন্দক্ষিণং বাহুং সাত্যকিঃ কৃতবর্মণঃ
88.48
ততোঽন্যত্সুদৃঢং বীরো ধনুরাদায় সাত্যকিঃ
ব্যসৃজদ্বিশিখাংস্তূর্ণং শতশোঽথ সহস্রশঃ
88.49
সরথং কৃতবর্মাণং সমন্তাত্পর্যবাকিরৎ
ছাদয়িত্বা রণেঽত্যর্থং হার্দিক্যং তু স সাত্যকিঃ
88.50
অথাস্য ভল্লেন শিরঃ সারথেঃ সমকৃন্তত
স পপাত হতঃ সূতো হার্দিক্যস্য মহারথাৎ
ততস্তে যন্তরি হতে প্রাদ্রবংস্তুরগা ভৃশম্
88.51
অথ ভোজস্ত্বসংভ্রান্তো নিগৃহ্য তুরগান্স্বয়ম্
তস্থৌ শরধনুষ্পাণিস্তত্সৈন্যান্যভ্যপূজয়ন্
88.52
স মুহূর্তমিবাশ্বস্য সদশ্বান্সমচোদয়ৎ
ব্যপেতভীরমিত্রাণামাবহত্সুমহদ্ভয়ম্
সাত্যকিশ্চাভ্যগাত্তস্মাত্স তু ভীমমুপাদ্রবৎ
88.53
যুয়ুধানোঽপি রাজেন্দ্র দ্রোণানীকাদ্বিনিঃসৃতঃ
প্রয়য়ৌ ত্বরিতস্তূর্ণং কাম্বোজানাং মহাচমূম্
88.54
স তত্র বহুভিঃ শূরৈঃ সংনিরুদ্ধো মহারথৈঃ
ন চচাল তদা রাজন্সাত্যকিঃ সত্যবিক্রমঃ
88.55
সংধায় চ চমূং দ্রোণো ভোজে ভারং নিবেশ্য চ
অন্বধাবদ্রণে যত্তো যুয়ুধানং যুয়ুত্সয়া
88.56
তথা তমনুধাবন্তং যুয়ুধানস্য পৃষ্ঠতঃ
ন্যবারয়ন্ত সংক্রুদ্ধাঃ পাণ্ডুসৈন্যে বৃহত্তমাঃ
88.57
সমাসাদ্য তু হার্দিক্যং রথানাং প্রবরং রথম্
পাঞ্চালা বিগতোত্সাহা ভীমসেনপুরোগমাঃ
বিক্রম্য বারিতা রাজন্বীরেণ কৃতবর্মণা
88.58
যতমানাংস্তু তান্সর্বানীষদ্বিগতচেতসঃ
অভিতস্তাঞ্শরৌঘেণ ক্লান্তবাহানবারয়ৎ
88.59
নিগৃহীতাস্তু ভোজেন ভোজানীকেপ্সবো রণে
অতিষ্ঠন্নার্যবদ্বীরাঃ প্রার্থয়ন্তো মহদ্যশঃ