Utshovঅধ্যায় 87
87.1
সংজয় উবাচ
ধর্মরাজস্য তদ্বাক্যং নিশম্য শিনিপুংগবঃ
পার্থাচ্চ ভয়মাশঙ্কন্পরিত্যাগান্মহীপতেঃ
87.2
অপবাদং হ্যাত্মনশ্চ লোকাদ্রক্ষন্বিশেষতঃ
ন মাং ভীত ইতি ব্রূয়ুরায়ান্তং ফল্গুনং প্রতি
87.3
নিশ্চিত্য বহুধৈবং স সাত্যকির্যুদ্ধদুর্মদঃ
ধর্মরাজমিদং বাক্যমব্রবীত্পুরুষর্ষভ
87.4
কৃতাং চেন্মন্যসে রক্ষাং স্বস্তি তেঽস্তু বিশাং পতে
অনুয়াস্যামি বীভত্সুং করিষ্যে বচনং তব
87.5
ন হি মে পাণ্ডবাত্কশ্চিত্ত্রিষু লোকেষু বিদ্যতে
যো বৈ প্রিয়তরো রাজন্সত্যমেতদ্ব্রবীমি তে
87.6
তস্যাহং পদবীং যাস্যে সংদেশাত্তব মানদ
ত্বত্কৃতে ন চ মে কিংচিদকর্তব্যং কথংচন
87.7
যথা হি মে গুরোর্বাক্যং বিশিষ্টং দ্বিপদাং বর
তথা তবাপি বচনং বিশিষ্টতরমেব মে
87.8
প্রিয়ে হি তব বর্তেতে ভ্রাতরৌ কৃষ্ণপাণ্ডবৌ
তয়োঃ প্রিয়ে স্থিতং চৈব বিদ্ধি মাং রাজপুংগব
87.9
তবাজ্ঞাং শিরসা গৃহ্য পাণ্ডবার্থমহং প্রভো
ভিত্ত্বেদং দুর্ভিদং সৈন্যং প্রয়াস্যে নরসত্তম
87.10
দ্রোণানীকং বিশাম্যেষ ক্রুদ্ধো ঝষ ইবার্ণবম্
তত্র যাস্যামি যত্রাসৌ রাজন্রাজা জয়দ্রথঃ
87.11
যত্র সেনাং সমাশ্রিত্য ভীতস্তিষ্ঠতি পাণ্ডবাৎ
গুপ্তো রথবরশ্রেষ্ঠৈর্দ্রৌণিকর্ণকৃপাদিভিঃ
87.12
ইতস্ত্রিয়োজনং মন্যে তমধ্বানং বিশাং পতে
যত্র তিষ্ঠতি পার্থোঽসৌ জয়দ্রথবধোদ্যতঃ
87.13
ত্রিয়োজনগতস্যাপি তস্য যাস্যাম্যহং পদম্
আসৈন্ধববধাদ্রাজন্সুদৃঢেনান্তরাত্মনা
87.14
অনাদিষ্টস্তু গুরুণা কো নু যুধ্যেত মানবঃ
আদিষ্টস্তু ত্বয়া রাজন্কো ন যুধ্যেত মাদৃশঃ
অভিজানামি তং দেশং যত্র যাস্যাম্যহং প্রভো
87.15
হুডশক্তিগদাপ্রাসখড্গচর্মর্ষ্টিতোমরম্
ইষ্বস্ত্রবরসংবাধং ক্ষোভয়িষ্যে বলার্ণবম্
87.16
যদেতত্কুঞ্জরানীকং সাহস্রমনুপশ্যসি
কুলমঞ্জনকং নাম যত্রৈতে বীর্যশালিনঃ
87.17
আস্থিতা বহুভির্ম্লেচ্ছৈর্যুদ্ধশৌণ্ডৈঃ প্রহারিভিঃ
নাগা মেঘনিভা রাজন্ক্ষরন্ত ইব তোয়দাঃ
87.18
নৈতে জাতু নিবর্তেরন্প্রেষিতা হস্তিসাদিভিঃ
অন্যত্র হি বধাদেষাং নাস্তি রাজন্পরাজয়ঃ
87.19
অথ যান্রথিনো রাজন্সমন্তাদনুপশ্যসি
এতে রুক্মরথা নাম রাজপুত্রা মহারথাঃ
87.20
রথেষ্বস্ত্রেষু নিপুণা নাগেষু চ বিশাং পতে
ধনুর্বেদে গতাঃ পারং মুষ্টিয়ুদ্ধে চ কোবিদাঃ
87.21
গদায়ুদ্ধবিশেষজ্ঞা নিয়ুদ্ধকুশলাস্তথা
খড্গপ্রহরণে যুক্তাঃ সংপাতে চাসিচর্মণোঃ
87.22
শূরাশ্চ কৃতবিদ্যাশ্চ স্পর্ধন্তে চ পরস্পরম্
নিত্যং চ সমরে রাজন্বিজিগীষন্তি মানবান্
87.23
কর্ণেন বিজিতা রাজন্দুঃশাসনমনুব্রতাঃ
এতাংস্তু বাসুদেবোঽপি রথোদারান্প্রশংসতি
87.24
সততং প্রিয়কামাশ্চ কর্ণস্যৈতে বশে স্থিতাঃ
তস্যৈব বচনাদ্রাজন্নিবৃত্তাঃ শ্বেতবাহনাৎ
87.25
তে ন ক্ষতা ন চ শ্রান্তা দৃঢাবরণকার্মুকাঃ
মদর্থং বিষ্ঠিতা নূনং ধার্তরাষ্ট্রস্য শাসনাৎ
87.26
এতান্প্রমথ্য সংগ্রামে প্রিয়ার্থং তব কৌরব
প্রয়াস্যামি ততঃ পশ্চাত্পদবীং সব্যসাচিনঃ
87.27
যাংস্ত্বেতানপরান্রাজন্নাগান্সপ্তশতানি চ
প্রেক্ষসে বর্মসংছন্নান্কিরাতৈঃ সমধিষ্ঠিতান্
87.28
কিরাতরাজো যান্প্রাদাদ্গৃহীতঃ সব্যসাচিনা
স্বলংকৃতাংস্তথা প্রেষ্যানিচ্ছঞ্জীবিতমাত্মনঃ
87.29
আসন্নেতে পুরা রাজংস্তব কর্মকরা দৃঢম্
ত্বামেবাদ্য যুয়ুত্সন্তে পশ্য কালস্য পর্যয়ম্
87.30
তেষামেতে মহামাত্রাঃ কিরাতা যুদ্ধদুর্মদাঃ
হস্তিশিক্ষাবিদশ্চৈব সর্বে চৈবাগ্নিয়োনয়ঃ
87.31
এতে বিনির্জিতাঃ সর্বে সংগ্রামে সব্যসাচিনা
মদর্থমদ্য সংয়ত্তা দুর্যোধনবশানুগাঃ
87.32
এতান্ভিত্ত্বা শরৈ রাজন্কিরাতান্যুদ্ধদুর্মদান্
সৈন্ধবস্য বধে যুক্তমনুয়াস্যামি পাণ্ডবম্
87.33
যে ত্বেতে সুমহানাগা অঞ্জনস্য কুলোদ্ভবাঃ
কর্কশাশ্চ বিনীতাশ্চ প্রভিন্নকরটামুখাঃ
87.34
জাম্বূনদময়ৈঃ সর্বৈর্বর্মভিঃ সুবিভূষিতাঃ
লব্ধলক্ষ্যা রণে রাজন্নৈরাবণসমা যুধি
87.35
উত্তরাত্পর্বতাদেতে তীক্ষ্ণৈর্দস্যুভিরাস্থিতাঃ
কর্কশৈঃ প্রবরৈর্যোধৈঃ কার্ষ্ণায়সতনুচ্ছদৈঃ
87.36
সন্তি গোয়োনয়শ্চাত্র সন্তি বানরয়োনয়ঃ
অনেকয়োনয়শ্চান্যে তথা মানুষয়োনয়ঃ
87.37
অনীকমসতামেতদ্ধূমবর্ণমুদীর্যতে
ম্লেচ্ছানাং পাপকর্তৄণাং হিমবদ্দুর্গবাসিনাম্
87.38
এতদ্দুর্যোধনো লব্ধ্বা সমগ্রং নাগমণ্ডলম্
কৃপং চ সৌমদত্তিং চ দ্রোণং চ রথিনাং বরম্
87.39
সিন্ধুরাজং তথা কর্ণমবমন্যত পাণ্ডবান্
কৃতার্থমথ চাত্মানং মন্যতে কালচোদিতঃ
87.40
তে চ সর্বেঽনুসংপ্রাপ্তা মম নারাচগোচরম্
ন বিমোক্ষ্যন্তি কৌন্তেয় যদ্যপি স্যুর্মনোজবাঃ
87.41
তেন সংভাবিতা নিত্যং পরবীর্যোপজীবিনা
বিনাশমুপয়াস্যন্তি মচ্ছরৌঘনিপীডিতাঃ
87.42
যে ত্বেতে রথিনো রাজন্দৃশ্যন্তে কাঞ্চনধ্বজাঃ
এতে দুর্বারণা নাম কাম্বোজা যদি তে শ্রুতাঃ
87.43
শূরাশ্চ কৃতবিদ্যাশ্চ ধনুর্বেদে চ নিষ্ঠিতাঃ
সংহতাশ্চ ভৃশং হ্যেতে অন্যোন্যস্য হিতৈষিণঃ
87.44
অক্ষৌহিণ্যশ্চ সংরব্ধা ধার্তরাষ্ট্রস্য ভারত
যত্তা মদর্থং তিষ্ঠন্তি কুরুবীরাভিরক্ষিতাঃ
87.45
অপ্রমত্তা মহারাজ মামেব প্রত্যুপস্থিতাঃ
তাংস্ত্বহং প্রমথিষ্যামি তৃণানীব হুতাশনঃ
87.46
তস্মাত্সর্বানুপাসঙ্গান্সর্বোপকরণানি চ
রথে কুর্বন্তু মে রাজন্যথাবদ্রথকল্পকাঃ
87.47
অস্মিংস্তু খলু সংগ্রামে গ্রাহ্যং বিবিধমায়ুধম্
যথোপদিষ্টমাচার্যৈঃ কার্যঃ পঞ্চগুণো রথঃ
87.48
কাম্বোজৈর্হি সমেষ্যামি ক্রুদ্ধৈরাশীবিষোপমৈঃ
নানাশস্ত্রসমাবাপৈর্বিবিধায়ুধয়োধিভিঃ
87.49
কিরাতৈশ্চ সমেষ্যামি বিষকল্পৈঃ প্রহারিভিঃ
লালিতৈঃ সততং রাজ্ঞা দুর্যোধনহিতৈষিভিঃ
87.50
শকৈশ্চাপি সমেষ্যামি শক্রতুল্যপরাক্রমৈঃ
অগ্নিকল্পৈর্দুরাধর্ষৈঃ প্রদীপ্তৈরিব পাবকৈঃ
87.51
তথান্যৈর্বিবিধৈর্যোধৈঃ কালকল্পৈর্দুরাসদৈঃ
সমেষ্যামি রণে রাজন্বহুভির্যুদ্ধদুর্মদৈঃ
87.52
তস্মাদ্বৈ বাজিনো মুখ্যা বিশ্রান্তাঃ শুভলক্ষণাঃ
উপাবৃত্তাশ্চ পীতাশ্চ পুনর্যুজ্যন্তু মে রথে
87.53
তস্য সর্বানুপাসঙ্গান্সর্বোপকরণানি চ
রথে প্রাস্থাপয়দ্রাজা শস্ত্রাণি বিবিধানি চ
87.54
ততস্তান্সর্বতো মুক্ত্বা সদশ্বাংশ্চতুরো জনাঃ
রসবত্পায়য়ামাসুঃ পানং মদসমীরিণম্
87.55
পীতোপবৃত্তান্স্নাতাংশ্চ জগ্ধান্নান্সমলংকৃতান্
বিনীতশল্যাংস্তুরগাংশ্চতুরো হেমমালিনঃ
87.56
তান্যত্তান্রুক্মবর্ণাভান্বিনীতাঞ্শীঘ্রগামিনঃ
সংহৃষ্টমনসোঽব্যগ্রান্বিধিবত্কল্পিতে রথে
87.57
মহাধ্বজেন সিংহেন হেমকেসরমালিনা
সংবৃতে কেতনৈর্হেমৈর্মণিবিদ্রুমচিত্রিতৈঃ
পাণ্ডুরাভ্রপ্রকাশাভিঃ পতাকাভিরলংকৃতে
87.58
হেমদণ্ডোচ্ছ্রিতচ্ছত্রে বহুশস্ত্রপরিচ্ছদে
যোজয়ামাস বিধিবদ্ধেমভাণ্ডবিভূষিতান্
87.59
দারুকস্যানুজো ভ্রাতা সূতস্তস্য প্রিয়ঃ সখা
ন্যবেদয়দ্রথং যুক্তং বাসবস্যেব মাতলিঃ
87.60
ততঃ স্নাতঃ শুচির্ভূত্বা কৃতকৌতুকমঙ্গলঃ
স্নাতকানাং সহস্রস্য স্বর্ণনিষ্কানদাপয়ৎ
আশীর্বাদৈঃ পরিষ্বক্তঃ সাত্যকিঃ শ্রীমতাং বরঃ
87.61
ততঃ স মধুপর্কার্হঃ পীত্বা কৈলাবতং মধু
লোহিতাক্ষো বভৌ তত্র মদবিহ্বললোচনঃ
87.62
আলভ্য বীরকাংস্যং চ হর্ষেণ মহতান্বিতঃ
দ্বিগুণীকৃততেজা হি প্রজ্বলন্নিব পাবকঃ
উত্সঙ্গে ধনুরাদায় সশরং রথিনাং বরঃ
87.63
কৃতস্বস্ত্যয়নো বিপ্রৈঃ কবচী সমলংকৃতঃ
লাজৈর্গন্ধৈস্তথা মাল্যৈঃ কন্যাভিশ্চাভিনন্দিতঃ
87.64
যুধিষ্ঠিরস্য চরণাবভিবাদ্য কৃতাঞ্জলিঃ
তেন মূর্ধন্যুপাঘ্রাত আরুরোহ মহারথম্
87.65
ততস্তে বাজিনো হৃষ্টাঃ সুপুষ্টা বাতরংহসঃ
অজয্যা জৈত্রমূহুস্তং বিকুর্বন্তঃ স্ম সৈন্ধবাঃ
87.66
অথ হর্ষপরীতাঙ্গঃ সাত্যকির্ভীমমব্রবীৎ
ত্বং ভীম রক্ষ রাজানমেতত্কার্যতমং হি তে
87.67
অহং ভিত্ত্বা প্রবেক্ষ্যামি কালপক্বমিদং বলম্
আয়ত্যাং চ তদাত্বে চ শ্রেয়ো রাজ্ঞোঽভিরক্ষণম্
87.68
জানীষে মম বীর্যং ত্বং তব চাহমরিংদম
তস্মাদ্ভীম নিবর্তস্ব মম চেদিচ্ছসি প্রিয়ম্
87.69
তথোক্তঃ সাত্যকিং প্রাহ ব্রজ ত্বং কার্যসিদ্ধয়ে
অহং রাজ্ঞঃ করিষ্যামি রক্ষাং পুরুষসত্তম
87.70
এবমুক্তঃ প্রত্যুবাচ ভীমসেনং স মাধবঃ
গচ্ছ গচ্ছ দ্রুতং পার্থ ধ্রুবোঽদ্য বিজয়ো মম
87.71
যন্মে স্নিগ্ধোঽনুরক্তশ্চ ত্বমদ্য বশগঃ স্থিতঃ
নিমিত্তানি চ ধন্যানি যথা ভীম বদন্তি মে
87.72
নিহতে সৈন্ধবে পাপে পাণ্ডবেন মহাত্মনা
পরিষ্বজিষ্যে রাজানং ধর্মাত্মানং ন সংশয়ঃ
87.73
এতাবদুক্ত্বা ভীমং তু বিসৃজ্য চ মহামনাঃ
সংপ্রৈক্ষত্তাবকং সৈন্যং ব্যাঘ্রো মৃগগণানিব
87.74
তং দৃষ্ট্বা প্রবিবিক্ষন্তং সৈন্যং তব জনাধিপ
ভূয় এবাভবন্মূঢং সুভৃশং চাপ্যকম্পত
87.75
ততঃ প্রয়াতঃ সহসা সৈন্যং তব স সাত্যকিঃ
দিদৃক্ষুরর্জুনং রাজন্ধর্মরাজস্য শাসনাৎ