Utshovঅধ্যায় 86
86.1
সংজয় উবাচ
প্রীতিয়ুক্তং চ হৃদ্যং চ মধুরাক্ষরমেব চ
কালয়ুক্তং চ চিত্রং চ স্বতয়া চাভিভাষিতম্
86.2
ধর্মরাজস্য তদ্বাক্যং নিশম্য শিনিপুংগবঃ
সাত্যকির্ভরতশ্রেষ্ঠ প্রত্যুবাচ যুধিষ্ঠিরম্
86.3
শ্রুতং তে গদতো বাক্যং সর্বমেতন্ময়াচ্যুত
ন্যায়য়ুক্তং চ চিত্রং চ ফল্গুনার্থে যশস্করম্
86.4
এবংবিধে তথা কালে মাদৃশং প্রেক্ষ্য সংমতম্
বক্তুমর্হসি রাজেন্দ্র যথা পার্থং তথৈব মাম্
86.5
ন মে ধনংজয়স্যার্থে প্রাণা রক্ষ্যাঃ কথংচন
ত্বত্প্রয়ুক্তঃ পুনরহং কিং ন কুর্যাং মহাহবে
86.6
লোকত্রয়ং যোধয়েয়ং সদেবাসুরমানুষম্
ত্বত্প্রয়ুক্তো নরেন্দ্রেহ কিমুতৈতত্সুদুর্বলম্
86.7
সুয়োধনবলং ত্বদ্য যোধয়িষ্যে সমন্ততঃ
বিজেষ্যে চ রণে রাজন্সত্যমেতদ্ব্রবীমি তে
86.8
কুশল্যহং কুশলিনং সমাসাদ্য ধনংজয়ম্
হতে জয়দ্রথে রাজন্পুনরেষ্যামি তেঽন্তিকম্
86.9
অবশ্যং তু ময়া সর্বং বিজ্ঞাপ্যস্ত্বং নরাধিপ
বাসুদেবস্য যদ্বাক্যং ফল্গুনস্য চ ধীমতঃ
86.10
দৃঢং ত্বভিপরীতোঽহমর্জুনেন পুনঃ পুনঃ
মধ্যে সর্বস্য সৈন্যস্য বাসুদেবস্য শৃণ্বতঃ
86.11
অদ্য মাধব রাজানমপ্রমত্তোঽনুপালয়
আর্যাং যুদ্ধে মতিং কৃত্বা যাবদ্ধন্মি জয়দ্রথম্
86.12
ত্বয়ি বাহং মহাবাহো প্রদ্যুম্নে বা মহারথে
নৃপং নিক্ষিপ্য গচ্ছেয়ং নিরপেক্ষো জয়দ্রথম্
86.13
জানীষে হি রণে দ্রোণং রভসং শ্রেষ্ঠসংমতম্
প্রতিজ্ঞা চাপি তে নিত্যং শ্রুতা দ্রোণস্য মাধব
86.14
গ্রহণং ধর্মরাজস্য ভারদ্বাজোঽনুগৃধ্যতি
শক্তশ্চাপি রণে দ্রোণো নিগৃহীতুং যুধিষ্ঠিরম্
86.15
এবং ত্বয়ি সমাধায় ধর্মরাজং নরোত্তমম্
অহমদ্য গমিষ্যামি সৈন্ধবস্য বধায় হি
86.16
জয়দ্রথমহং হত্বা ধ্রুবমেষ্যামি মাধব
ধর্মরাজং যথা দ্রোণো নিগৃহ্ণীয়াদ্রণে বলাৎ
86.17
নিগৃহীতে নরশ্রেষ্ঠে ভারদ্বাজেন মাধব
সৈন্ধবস্য বধো ন স্যান্মমাপ্রীতিস্তথা ভবেৎ
86.18
এবং গতে নরশ্রেষ্ঠ পাণ্ডবে সত্যবাদিনি
অস্মাকং গমনং ব্যক্তং বনং প্রতি ভবেত্পুনঃ
86.19
সোঽয়ং মম জয়ো ব্যক্তং ব্যর্থ এব ভবিষ্যতি
যদি দ্রোণো রণে ক্রুদ্ধো নিগৃহ্ণীয়াদ্যুধিষ্ঠিরম্
86.20
স ত্বমদ্য মহাবাহো প্রিয়ার্থং মম মাধব
জয়ার্থং চ যশোর্থং চ রক্ষ রাজানমাহবে
86.21
স ভবান্ময়ি নিক্ষেপো নিক্ষিপ্তঃ সব্যসাচিনা
ভারদ্বাজাদ্ভয়ং নিত্যং পশ্যমানেন তে প্রভো
86.22
তস্যাপি চ মহাবাহো নিত্যং পশ্যতি সংয়ুগে
নান্যং হি প্রতিয়োদ্ধারং রৌক্মিণেয়াদৃতে প্রভো
মাং বাপি মন্যতে যুদ্ধে ভারদ্বাজস্য ধীমতঃ
86.23
সোঽহং সংভাবনাং চৈতামাচার্যবচনং চ তৎ
পৃষ্ঠতো নোত্সহে কর্তুং ত্বাং বা ত্যক্তুং মহীপতে
86.24
আচার্যো লঘুহস্তত্বাদভেদ্যকবচাবৃতঃ
উপলভ্য রণে ক্রীডেদ্যথা শকুনিনা শিশুঃ
86.25
যদি কার্ষ্ণির্ধনুষ্পাণিরিহ স্যান্মকরধ্বজঃ
তস্মৈ ত্বাং বিসৃজেয়ং বৈ স ত্বাং রক্ষেদ্যথার্জুনঃ
86.26
কুরু ত্বমাত্মনো গুপ্তিং কস্তে গোপ্তা গতে ময়ি
যঃ প্রতীয়াদ্রণে দ্রোণং যাবদ্গচ্ছামি পাণ্ডবম্
86.27
মা চ তে ভয়মদ্যাস্তু রাজন্নর্জুনসংভবম্
ন স জাতু মহাবাহুর্ভারমুদ্যম্য সীদতি
86.28
যে চ সৌবীরকা যোধাস্তথা সৈন্ধবপৌরবাঃ
উদীচ্যা দাক্ষিণাত্যাশ্চ যে চান্যেঽপি মহারথাঃ
86.29
যে চ কর্ণমুখা রাজন্রথোদারাঃ প্রকীর্তিতাঃ
এতেঽর্জুনস্য ক্রুদ্ধস্য কলাং নার্হন্তি ষোডশীম্
86.30
উদ্যুক্তা পৃথিবী সর্বা সসুরাসুরমানুষা
সরাক্ষসগণা রাজন্সকিংনরমহোরগা
86.31
জঙ্গমাঃ স্থাবরৈঃ সার্ধং নালং পার্থস্য সংয়ুগে
এবং জ্ঞাত্বা মহারাজ ব্যেতু তে ভীর্ধনংজয়ে
86.32
যত্র বীরৌ মহেষ্বাসৌ কৃষ্ণৌ সত্যপরাক্রমৌ
ন তত্র কর্মণো ব্যাপত্কথংচিদপি বিদ্যতে
86.33
দৈবং কৃতাস্ত্রতাং যোগমমর্ষমপি চাহবে
কৃতজ্ঞতাং দয়াং চৈব ভ্রাতুস্ত্বমনুচিন্তয়
86.34
ময়ি চাপ্যপয়াতে বৈ গচ্ছমানেঽর্জুনং প্রতি
দ্রোণে চিত্রাস্ত্রতাং সংখ্যে রাজংস্ত্বমনুচিন্তয়
86.35
আচার্যো হি ভৃশং রাজন্নিগ্রহে তব গৃধ্যতি
প্রতিজ্ঞামাত্মনো রক্ষন্সত্যাং কর্তুং চ ভারত
86.36
কুরুষ্বাদ্যাত্মনো গুপ্তিং কস্তে গোপ্তা গতে ময়ি
যস্যাহং প্রত্যয়াত্পার্থ গচ্ছেয়ং ফল্গুনং প্রতি
86.37
ন হ্যহং ত্বা মহারাজ অনিক্ষিপ্য মহাহবে
ক্বচিদ্যাস্যামি কৌরব্য সত্যমেতদ্ব্রবীমি তে
86.38
এতদ্বিচার্য বহুশো বুদ্ধ্যা বুদ্ধিমতাং বর
দৃষ্ট্বা শ্রেয়ঃ পরং বুদ্ধ্যা ততো রাজন্প্রশাধি মাম্
86.39
যুধিষ্ঠির উবাচ
এবমেতন্মহাবাহো যথা বদসি মাধব
ন তু মে শুধ্যতে ভাবঃ শ্বেতাশ্বং প্রতি মারিষ
86.40
করিষ্যে পরমং যত্নমাত্মনো রক্ষণং প্রতি
গচ্ছ ত্বং সমনুজ্ঞাতো যত্র যাতো ধনংজয়ঃ
86.41
আত্মসংরক্ষণং সংখ্যে গমনং চার্জুনং প্রতি
বিচার্যৈতদ্দ্বয়ং বুদ্ধ্যা গমনং তত্র রোচয়ে
86.42
স ত্বমাতিষ্ঠ যানায় যত্র যাতো ধনংজয়ঃ
মমাপি রক্ষণং ভীমঃ করিষ্যতি মহাবলঃ
86.43
পার্ষতশ্চ সসোদর্যঃ পার্থিবাশ্চ মহাবলাঃ
দ্রৌপদেয়াশ্চ মাং তাত রক্ষিষ্যন্তি ন সংশয়ঃ
86.44
কেকয়া ভ্রাতরঃ পঞ্চ রাক্ষসশ্চ ঘটোত্কচঃ
বিরাটো দ্রুপদশ্চৈব শিখণ্ডী চ মহারথঃ
86.45
ধৃষ্টকেতুশ্চ বলবান্কুন্তিভোজশ্চ মারিষ
নকুলঃ সহদেবশ্চ পাঞ্চালাঃ সৃঞ্জয়াস্তথা
এতে সমাহিতাস্তাত রক্ষিষ্যন্তি ন সংশয়ঃ
86.46
ন দ্রোণঃ সহ সৈন্যেন কৃতবর্মা চ সংয়ুগে
সমাসাদয়িতুং শক্তো ন চ মাং ধর্ষয়িষ্যতি
86.47
ধৃষ্টদ্যুম্নশ্চ সমরে দ্রোণং ক্রুদ্ধং পরংতপঃ
বারয়িষ্যতি বিক্রম্য বেলেব মকরালয়ম্
86.48
যত্র স্থাস্যতি সংগ্রামে পার্ষতঃ পরবীরহা
ন দ্রোণসৈন্যং বলবত্ক্রামেত্তত্র কথংচন
86.49
এষ দ্রোণবিনাশায় সমুত্পন্নো হুতাশনাৎ
কবচী স শরী খড্গী ধন্বী চ বরভূষণঃ
86.50
বিশ্রব্ধো গচ্ছ শৈনেয় মা কার্ষীর্ময়ি সংভ্রমম্
ধৃষ্টদ্যুম্নো রণে ক্রুদ্ধো দ্রোণমাবারয়িষ্যতি