Utshovঅধ্যায় 85
85.1
ধৃতরাষ্ট্র উবাচ
ভারদ্বাজং কথং যুদ্ধে যুয়ুধানোঽভ্যবারয়ৎ
সংজয়াচক্ষ্ব তত্ত্বেন পরং কৌতূহলং হি মে
85.2
সংজয় উবাচ
শৃণু রাজন্মহাপ্রাজ্ঞ সংগ্রামং লোমহর্ষণম্
দ্রোণস্য পাণ্ডবৈঃ সার্ধং যুয়ুধানপুরোগমৈঃ
85.3
বধ্যমানং বলং দৃষ্ট্বা যুয়ুধানেন মারিষ
অভ্যদ্রবত্স্বয়ং দ্রোণঃ সাত্যকিং সত্যবিক্রমম্
85.4
তমাপতন্তং সহসা ভারদ্বাজং মহারথম্
সাত্যকিঃ পঞ্চবিংশত্যা ক্ষুদ্রকাণাং সমার্পয়ৎ
85.5
দ্রোণোঽপি যুধি বিক্রান্তো যুয়ুধানং সমাহিতঃ
অবিধ্যত্পঞ্চভিস্তূর্ণং হেমপুঙ্খৈঃ শিলাশিতৈঃ
85.6
তে বর্ম ভিত্ত্বা সুদৃঢং দ্বিষত্পিশিতভোজনাঃ
অভ্যগুর্ধরণীং রাজঞ্শ্বসন্ত ইব পন্নগাঃ
85.7
দীর্ঘবাহুরভিক্রুদ্ধস্তোত্ত্রার্দিত ইব দ্বিপঃ
দ্রোণং পঞ্চাশতাবিধ্যন্নারাচৈরগ্নিসংনিভৈঃ
85.8
ভারদ্বাজো রণে বিদ্ধো যুয়ুধানেন সত্বরম্
সাত্যকিং বহুভির্বাণৈর্যতমানমবিধ্যত
85.9
ততঃ ক্রুদ্ধো মহেষ্বাসো ভূয় এব মহাবলঃ
সাত্বতং পীডয়ামাস শতেন নতপর্বণা
85.10
স বধ্যমানঃ সমরে ভারদ্বাজেন সাত্যকিঃ
নাভ্যপদ্যত কর্তব্যং কিংচিদেব বিশাং পতে
85.11
বিষণ্ণবদনশ্চাপি যুয়ুধানোঽভবন্নৃপ
ভারদ্বাজং রণে দৃষ্ট্বা বিসৃজন্তং শিতাঞ্শরান্
85.12
তং তু সংপ্রেক্ষ্য তে পুত্রাঃ সৈনিকাশ্চ বিশাং পতে
প্রহৃষ্টমনসো ভূত্বা সিংহবদ্ব্যনদন্মুহুঃ
85.13
তং শ্রুত্বা নিনদং ঘোরং পীড্যমানং চ মাধবম্
যুধিষ্ঠিরোঽব্রবীদ্রাজন্সর্বসৈন্যানি ভারত
85.14
এষ বৃষ্ণিবরো বীরঃ সাত্যকিঃ সত্যকর্মকৃৎ
গ্রস্যতে যুধি বীরেণ ভানুমানিব রাহুণা
অভিদ্রবত গচ্ছধ্বং সাত্যকির্যত্র যুধ্যতে
85.15
ধৃষ্টদ্যুম্নং চ পাঞ্চাল্যমিদমাহ জনাধিপ
অভিদ্রব দ্রুতং দ্রোণং কিং নু তিষ্ঠসি পার্ষত
ন পশ্যসি ভয়ং ঘোরং দ্রোণান্নঃ সমুপস্থিতম্
85.16
অসৌ দ্রোণো মহেষ্বাসো যুয়ুধানেন সংয়ুগে
ক্রীডতে সূত্রবদ্ধেন পক্ষিণা বালকো যথা
85.17
তত্রৈব সর্বে গচ্ছন্তু ভীমসেনমুখা রথাঃ
ত্বয়ৈব সহিতা যত্তা যুয়ুধানরথং প্রতি
85.18
পৃষ্ঠতোঽনুগমিষ্যামি ত্বামহং সহসৈনিকঃ
সাত্যকিং মোক্ষয়স্বাদ্য যমদংষ্ট্রান্তরং গতম্
85.19
এবমুক্ত্বা ততো রাজা সর্বসৈন্যেন পাণ্ডবঃ
অভ্যদ্রবদ্রণে দ্রোণং যুয়ুধানস্য কারণাৎ
85.20
তত্রারাবো মহানাসীদ্দ্রোণমেকং যুয়ুত্সতাম্
পাণ্ডবানাং চ ভদ্রং তে সৃঞ্জয়ানাং চ সর্বশঃ
85.21
তে সমেত্য নরব্যাঘ্রা ভারদ্বাজং মহারথম্
অভ্যবর্ষঞ্শরৈস্তীক্ষ্ণৈঃ কঙ্কবর্হিণবাজিতৈঃ
85.22
স্ময়ন্নেব তু তান্বীরান্দ্রোণঃ প্রত্যগ্রহীত্স্বয়ম্
অতিথীনাগতান্যদ্বত্সলিলেনাসনেন চ
85.23
তর্পিতাস্তে শরৈস্তস্য ভারদ্বাজস্য ধন্বিনঃ
আতিথেয়গৃহং প্রাপ্য নৃপতেঽতিথয়ো যথা
85.24
ভারদ্বাজং চ তে সর্বে ন শেকুঃ প্রতিবীক্ষিতুম্
মধ্যংদিনমনুপ্রাপ্তং সহস্রাংশুমিব প্রভো
85.25
তাংস্তু সর্বান্মহেষ্বাসান্দ্রোণঃ শস্ত্রভৃতাং বরঃ
অতাপয়চ্ছরব্রাতৈর্গভস্তিভিরিবাংশুমান্
85.26
বধ্যমানা রণে রাজন্পাণ্ডবাঃ সৃঞ্জয়াস্তথা
ত্রাতারং নাধ্যগচ্ছন্ত পঙ্কমগ্না ইব দ্বিপাঃ
85.27
দ্রোণস্য চ ব্যদৃশ্যন্ত বিসর্পন্তো মহাশরাঃ
গভস্তয় ইবার্কস্য প্রতপন্তঃ সমন্ততঃ
85.28
তস্মিন্দ্রোণেন নিহতাঃ পাঞ্চালাঃ পঞ্চবিংশতিঃ
মহারথসমাখ্যাতা ধৃষ্টদ্যুম্নস্য সংমতাঃ
85.29
পাণ্ডূনাং সর্বসৈন্যেষু পাঞ্চালানাং তথৈব চ
দ্রোণং স্ম দদৃশুঃ শূরং বিনিঘ্নন্তং বরান্বরান্
85.30
কেকয়ানাং শতং হত্বা বিদ্রাব্য চ সমন্ততঃ
দ্রোণস্তস্থৌ মহারাজ ব্যাদিতাস্য ইবান্তকঃ
85.31
পাঞ্চালান্সৃঞ্জয়ান্মত্স্যান্কেকয়ান্পাণ্ডবানপি
দ্রোণোঽজয়ন্মহাবাহুঃ শতশোঽথ সহস্রশঃ
85.32
তেষাং সমভবচ্ছব্দো বধ্যতাং দ্রোণসায়কৈঃ
বনৌকসামিবারণ্যে দহ্যতাং ধূমকেতুনা
85.33
তত্র দেবাঃ সগন্ধর্বাঃ পিতরশ্চাব্রুবন্নৃপ
এতে দ্রবন্তি পাঞ্চালাঃ পাণ্ডবাশ্চ সসৈনিকাঃ
85.34
তং তথা সমরে দ্রোণং নিঘ্নন্তং সোমকান্রণে
ন চাপ্যভিয়য়ুঃ কেচিদপরে নৈব বিব্যধুঃ
85.35
বর্তমানে তথা রৌদ্রে তস্মিন্বীরবরক্ষয়ে
অশৃণোত্সহসা পার্থঃ পাঞ্চজন্যস্য নিস্বনম্
85.36
পূরিতো বাসুদেবেন শঙ্খরাট্স্বনতে ভৃশম্
যুধ্যমানেষু বীরেষু সৈন্ধবস্যাভিরক্ষিষু
নদত্সু ধার্তরাষ্ট্রেষু বিজয়স্য রথং প্রতি
85.37
গাণ্ডীবস্য চ নির্ঘোষে বিপ্রনষ্টে সমন্ততঃ
কশ্মলাভিহতো রাজা চিন্তয়ামাস পাণ্ডবঃ
85.38
ন নূনং স্বস্তি পার্থস্য যথা নদতি শঙ্খরাট্
কৌরবাশ্চ যথা হৃষ্টা বিনদন্তি মুহুর্মুহুঃ
85.39
এবং সংচিন্তয়িত্বা তু ব্যাকুলেনান্তরাত্মনা
অজাতশত্রুঃ কৌন্তেয়ঃ সাত্বতং প্রত্যভাষত
85.40
বাষ্পগদ্গদয়া বাচা মুহ্যমানো মুহুর্মুহুঃ
কৃত্যস্যানন্তরাপেক্ষী শৈনেয়ং শিনিপুংগবম্
85.41
যঃ স ধর্মঃ পুরা দৃষ্টঃ সদ্ভিঃ শৈনেয় শাশ্বতঃ
সাংপরায়ে সুহৃত্কৃত্যে তস্য কালোঽয়মাগতঃ
85.42
সর্বেষ্বপি চ যোধেষু চিন্তয়ঞ্শিনিপুংগব
ত্বত্তঃ সুহৃত্তমং কংচিন্নাভিজানামি সাত্যকে
85.43
যো হি প্রীতমনা নিত্যং যশ্চ নিত্যমনুব্রতঃ
স কার্যে সাংপরায়ে তু নিয়োজ্য ইতি মে মতিঃ
85.44
যথা চ কেশবো নিত্যং পাণ্ডবানাং পরায়ণম্
তথা ত্বমপি বার্ষ্ণেয় কৃষ্ণতুল্যপরাক্রমঃ
85.45
সোঽহং ভারং সমাধাস্যে ত্বয়ি তং বোঢুমর্হসি
অভিপ্রায়ং চ মে নিত্যং ন বৃথা কর্তুমর্হসি
85.46
স ত্বং ভ্রাতুর্বয়স্যস্য গুরোরপি চ সংয়ুগে
কুরু কৃচ্ছ্রে সহায়ার্থমর্জুনস্য নরর্ষভ
85.47
ত্বং হি সত্যব্রতঃ শূরো মিত্রাণামভয়ংকরঃ
লোকে বিখ্যায়সে বীর কর্মভিঃ সত্যবাগিতি
85.48
যো হি শৈনেয় মিত্রার্থে যুধ্যমানস্ত্যজেত্তনুম্
পৃথিবীং বা দ্বিজাতিভ্যো যো দদ্যাত্সমমেব তৎ
85.49
শ্রুতাশ্চ বহবোঽস্মাভী রাজানো যে দিবং গতাঃ
দত্ত্বেমাং পৃথিবীং কৃত্স্নাং ব্রাহ্মণেভ্যো যথাবিধি
85.50
এবং ত্বামপি ধর্মাত্মন্প্রয়াচেঽহং কৃতাঞ্জলিঃ
পৃথিবীদানতুল্যং স্যাদধিকং বা ফলং বিভো
85.51
এক এব সদা কৃষ্ণো মিত্রাণামভয়ংকরঃ
রণে সংত্যজতি প্রাণান্দ্বিতীয়স্ত্বং চ সাত্যকে
85.52
বিক্রান্তস্য চ বীরস্য যুদ্ধে প্রার্থয়তো যশঃ
শূর এব সহায়ঃ স্যান্নেতরঃ প্রাকৃতো জনঃ
85.53
ঈদৃশে তু পরামর্দে বর্তমানস্য মাধব
ত্বদন্যো হি রণে গোপ্তা বিজয়স্য ন বিদ্যতে
85.54
শ্লাঘন্নেব হি কর্মাণি শতশস্তব পাণ্ডবঃ
মম সংজনয়ন্হর্ষং পুনঃ পুনরকীর্তয়ৎ
85.55
লঘ্বস্ত্রশ্চিত্রয়োধী চ তথা লঘুপরাক্রমঃ
প্রাজ্ঞঃ সর্বাস্ত্রবিচ্ছূরো মুহ্যতে ন চ সংয়ুগে
85.56
মহাস্কন্ধো মহোরস্কো মহাবাহুর্মহাধনুঃ
মহাবলো মহাবীর্যঃ স মহাত্মা মহারথঃ
85.57
শিষ্যো মম সখা চৈব প্রিয়োঽস্যাহং প্রিয়শ্চ মে
যুয়ুধানঃ সহায়ো মে প্রমথিষ্যতি কৌরবান্
85.58
অস্মদর্থং চ রাজেন্দ্র সংনহ্যেদ্যদি কেশবঃ
রামো বাপ্যনিরুদ্ধো বা প্রদ্যুম্নো বা মহারথঃ
85.59
গদো বা সারণো বাপি সাম্বো বা সহ বৃষ্ণিভিঃ
সহায়ার্থং মহারাজ সংগ্রামোত্তমমূর্ধনি
85.60
তথাপ্যহং নরব্যাঘ্রং শৈনেয়ং সত্যবিক্রমম্
সাহায্যে বিনিয়োক্ষ্যামি নাস্তি মেঽন্যো হি তত্সমঃ
85.61
ইতি দ্বৈতবনে তাত মামুবাচ ধনংজয়ঃ
পরোক্ষং ত্বদ্গুণাংস্তথ্যান্কথয়ন্নার্যসংসদি
85.62
তস্য ত্বমেবং সংকল্পং ন বৃথা কর্তুমর্হসি
ধনংজয়স্য বার্ষ্ণেয় মম ভীমস্য চোভয়োঃ
85.63
যচ্চাপি তীর্থানি চরন্নগচ্ছং দ্বারকাং প্রতি
তত্রাহমপি তে ভক্তিমর্জুনং প্রতি দৃষ্টবান্
85.64
ন তত্সৌহৃদমন্যেষু ময়া শৈনেয় লক্ষিতম্
যথা ত্বমস্মান্ভজসে বর্তমানানুপপ্লবে
85.65
সোঽভিজাত্যা চ ভক্ত্যা চ সখ্যস্যাচার্যকস্য চ
সৌহৃদস্য চ বীর্যস্য কুলীনত্বস্য মাধব
85.66
সত্যস্য চ মহাবাহো অনুকম্পার্থমেব চ
অনুরূপং মহেষ্বাস কর্ম ত্বং কর্তুমর্হসি
85.67
সুয়োধনো হি সহসা গতো দ্রোণেন দংশিতঃ
পূর্বমেব তু যাতাস্তে কৌরবাণাং মহারথাঃ
85.68
সুমহান্নিনদশ্চৈব শ্রূয়তে বিজয়ং প্রতি
স শৈনেয় জবেনাত্র গন্তুমর্হসি মাধব
85.69
ভীমসেনো বয়ং চৈব সংয়ত্তাঃ সহসৈনিকাঃ
দ্রোণমাবারয়িষ্যামো যদি ত্বাং প্রতি যাস্যতি
85.70
পশ্য শৈনেয় সৈন্যানি দ্রবমাণানি সংয়ুগে
মহান্তং চ রণে শব্দং দীর্যমাণাং চ ভারতীম্
85.71
মহামারুতবেগেন সমুদ্রমিব পর্বসু
ধার্তরাষ্ট্রবলং তাত বিক্ষিপ্তং সব্যসাচিনা
85.72
রথৈর্বিপরিধাবদ্ভির্মনুষ্যৈশ্চ হয়ৈশ্চ হ
সৈন্যং রজঃসমুদ্ধূতমেতত্সংপরিবর্ততে
85.73
সংবৃতঃ সিন্ধুসৌবীরৈর্নখরপ্রাসয়োধিভিঃ
অত্যন্তাপচিতৈঃ শূরৈঃ ফল্গুনঃ পরবীরহা
85.74
নৈতদ্বলমসংবার্য শক্যো হন্তুং জয়দ্রথঃ
এতে হি সৈন্ধবস্যার্থে সর্বে সংত্যক্তজীবিতাঃ
85.75
শরশক্তিধ্বজবনং হয়নাগসমাকুলম্
পশ্যৈতদ্ধার্তরাষ্ট্রাণামনীকং সুদুরাসদম্
85.76
শৃণু দুন্দুভিনির্ঘোষং শঙ্খশব্দাংশ্চ পুষ্কলান্
সিংহনাদরবাংশ্চৈব রথনেমিস্বনাংস্তথা
85.77
নাগানাং শৃণু শব্দং চ পত্তীনাং চ সহস্রশঃ
সাদিনাং দ্রবতাং চৈব শৃণু কম্পয়তাং মহীম্
85.78
পুরস্তাত্সৈন্ধবানীকং দ্রোণানীকস্য পৃষ্ঠতঃ
বহুত্বাদ্ধি নরব্যাঘ্র দেবেন্দ্রমপি পীডয়েৎ
85.79
অপর্যন্তে বলে মগ্নো জহ্যাদপি চ জীবিতম্
তস্মিংশ্চ নিহতে যুদ্ধে কথং জীবেত মাদৃশঃ
সর্বথাহমনুপ্রাপ্তঃ সুকৃচ্ছ্রং বত জীবিতম্
85.80
শ্যামো যুবা গুডাকেশো দর্শনীয়শ্চ পাণ্ডবঃ
লঘ্বস্ত্রশ্চিত্রয়োধী চ প্রবিষ্টস্তাত ভারতীম্
85.81
সূর্যোদয়ে মহাবাহুর্দিবসশ্চাতিবর্ততে
তন্ন জানামি বার্ষ্ণেয় যদি জীবতি বা ন বা
কুরূণাং চাপি তত্সৈন্যং সাগরপ্রতিমং মহৎ
85.82
এক এব চ বীভত্সুঃ প্রবিষ্টস্তাত ভারতীম্
অবিষহ্যাং মহাবাহুঃ সুরৈরপি মহামৃধে
85.83
ন চ মে বর্ততে বুদ্ধিরদ্য যুদ্ধে কথংচন
দ্রোণোঽপি রভসো যুদ্ধে মম পীডয়তে বলম্
প্রত্যক্ষং তে মহাবাহো যথাসৌ চরতি দ্বিজঃ
85.84
যুগপচ্চ সমেতানাং কার্যাণাং ত্বং বিচক্ষণঃ
মহার্থং লঘুসংয়ুক্তং কর্তুমর্হসি মাধব
85.85
তস্য মে সর্বকার্যেষু কার্যমেতন্মতং সদা
অর্জুনস্য পরিত্রাণং কর্তব্যমিতি সংয়ুগে
85.86
নাহং শোচামি দাশার্হং গোপ্তারং জগতঃ প্রভুম্
স হি শক্তো রণে তাত ত্রীঁল্লোকানপি সংগতান্
85.87
বিজেতুং পুরুষব্যাঘ্র সত্যমেতদ্ব্রবীমি তে
কিং পুনর্ধার্তরাষ্ট্রস্য বলমেতত্সুদুর্বলম্
85.88
অর্জুনস্ত্বেব বার্ষ্ণেয় পীডিতো বহুভির্যুধি
প্রজহ্যাত্সমরে প্রাণাংস্তস্মাদ্বিন্দামি কশ্মলম্
85.89
তস্য ত্বং পদবীং গচ্ছ গচ্ছেয়ুস্ত্বাদৃশা যথা
তাদৃশস্যেদৃশে কালে মাদৃশেনাভিচোদিতঃ
85.90
রণে বৃষ্ণিপ্রবীরাণাং দ্বাবেবাতিরথৌ স্মৃতৌ
প্রদ্যুম্নশ্চ মহাবাহুস্ত্বং চ সাত্বত বিশ্রুতঃ
85.91
অস্ত্রে নারায়ণসমঃ সংকর্ষণসমো বলে
বীরতায়াং নরব্যাঘ্র ধনংজয়সমো হ্যসি
85.92
ভীষ্মদ্রোণাবতিক্রম্য সর্বয়ুদ্ধবিশারদম্
ত্বামদ্য পুরুষব্যাঘ্রং লোকে সন্তঃ প্রচক্ষতে
85.93
নাসাধ্যং বিদ্যতে লোকে সাত্যকেরিতি মাধব
তত্ত্বাং যদভিবক্ষ্যামি তত্কুরুষ্ব মহাবল
85.94
সংভাবনা হি লোকস্য তব পার্থস্য চোভয়োঃ
নান্যথা তাং মহাবাহো সংপ্রকর্তুমিহার্হসি
85.95
পরিত্যজ্য প্রিয়ান্প্রাণান্রণে বিচর বীরবৎ
ন হি শৈনেয় দাশার্হা রণে রক্ষন্তি জীবিতম্
85.96
অয়ুদ্ধমনবস্থানং সংগ্রামে চ পলায়নম্
ভীরূণামসতাং মার্গো নৈষ দাশার্হসেবিতঃ
85.97
তবার্জুনো গুরুস্তাত ধর্মাত্মা শিনিপুংগব
বাসুদেবো গুরুশ্চাপি তব পার্থস্য ধীমতঃ
85.98
কারণদ্বয়মেতদ্ধি জানানস্ত্বাহমব্রুবম্
মাবমংস্থা বচো মহ্যং গুরুস্তব গুরোর্হ্যহম্
85.99
বাসুদেবমতং চৈতন্মম চৈবার্জুনস্য চ
সত্যমেতন্ময়োক্তং তে যাহি যত্র ধনংজয়ঃ
85.100
এতদ্বচনমাজ্ঞায় মম সত্যপরাক্রম
প্রবিশৈতদ্বলং তাত ধার্তরাষ্ট্রস্য দুর্মতেঃ
85.101
প্রবিশ্য চ যথান্যায়ং সংগম্য চ মহারথৈঃ
যথার্হমাত্মনঃ কর্ম রণে সাত্বত দর্শয়