Utshovঅধ্যায় 84
84.1
সংজয় উবাচ
অলম্বুসং তথা যুদ্ধে বিচরন্তমভীতবৎ
হৈডিম্বঃ প্রয়য়ৌ তূর্ণং বিব্যাধ চ শিতৈঃ শরৈঃ
84.2
তয়োঃ প্রতিভয়ং যুদ্ধমাসীদ্রাক্ষসসিংহয়োঃ
কুর্বতোর্বিবিধা মায়াঃ শক্রশম্বরয়োরিব
84.3
অলম্বুসো ভৃশং ক্রুদ্ধো ঘটোত্কচমতাডয়ৎ
ঘটোত্কচস্তু বিংশত্যা নারাচানাং স্তনান্তরে
অলম্বুসমথো বিদ্ধ্বা সিংহবদ্ব্যনদন্মুহুঃ
84.4
তথৈবালম্বুসো রাজন্হৈডিম্বং যুদ্ধদুর্মদম্
বিদ্ধ্বা বিদ্ধ্বানদদ্ধৃষ্টঃ পূরয়ন্খং সমন্ততঃ
84.5
তথা তৌ ভৃশসংক্রুদ্ধৌ রাক্ষসেন্দ্রৌ মহাবলৌ
নির্বিশেষময়ুধ্যেতাং মায়াভিরিতরেতরম্
84.6
মায়াশতসৃজৌ দৃপ্তৌ মোহয়ন্তৌ পরস্পরম্
মায়ায়ুদ্ধে সুকুশলৌ মায়ায়ুদ্ধময়ুধ্যতাম্
84.7
যাং যাং ঘটোত্কচো যুদ্ধে মায়াং দর্শয়তে নৃপ
তাং তামলম্বুসো রাজন্মায়য়ৈব নিজঘ্নিবান্
84.8
তং তথা যুধ্যমানং তু মায়ায়ুদ্ধবিশারদম্
অলম্বুসং রাক্ষসেন্দ্রং দৃষ্ট্বাক্রুধ্যন্ত পাণ্ডবাঃ
84.9
ত এনং ভৃশসংক্রুদ্ধাঃ সর্বতঃ প্রবরা রথৈঃ
অভ্যদ্রবন্ত সংক্রুদ্ধা ভীমসেনাদয়ো নৃপ
84.10
ত এনং কোষ্ঠকীকৃত্য রথবংশেন মারিষ
সর্বতো ব্যকিরন্বাণৈরুল্কাভিরিব কুঞ্জরম্
84.11
স তেষামস্ত্রবেগং তং প্রতিহত্যাস্ত্রমায়য়া
তস্মাদ্রথব্রজান্মুক্তো বনদাহাদিব দ্বিপঃ
84.12
স বিস্ফার্য ধনুর্ঘোরমিন্দ্রাশনিসমস্বনম্
মারুতিং পঞ্চবিংশত্যা ভৈমসেনিং চ পঞ্চভিঃ
যুধিষ্ঠিরং ত্রিভির্বিদ্ধ্বা সহদেবং চ সপ্তভিঃ
84.13
নকুলং চ ত্রিসপ্তত্যা দ্রৌপদেয়াংশ্চ মারিষ
পঞ্চভিঃ পঞ্চভির্বিদ্ধ্বা ঘোরং নাদং ননাদ হ
84.14
তং ভীমসেনো নবভিঃ সহদেবশ্চ পঞ্চভিঃ
যুধিষ্ঠিরঃ শতেনৈব রাক্ষসং প্রত্যবিধ্যত
নকুলশ্চ চতুঃষষ্ট্যা দ্রৌপদেয়াস্ত্রিভিস্ত্রিভিঃ
84.15
হৈডিম্বো রাক্ষসং বিদ্ধ্বা যুদ্ধে পঞ্চাশতা শরৈঃ
পুনর্বিব্যাধ সপ্তত্যা ননাদ চ মহাবলঃ
84.16
সোঽতিবিদ্ধো মহেষ্বাসঃ সর্বতস্তৈর্মহারথৈঃ
প্রতিবিব্যাধ তান্সর্বান্পঞ্চভিঃ পঞ্চভিঃ শরৈঃ
84.17
তং ক্রুদ্ধং রাক্ষসং যুদ্ধে প্রতিক্রুদ্ধস্তু রাক্ষসঃ
হৈডিম্বো ভরতশ্রেষ্ঠ শরৈর্বিব্যাধ সপ্তভিঃ
84.18
সোঽতিবিদ্ধো বলবতা রাক্ষসেন্দ্রো মহাবলঃ
ব্যসৃজত্সায়কাংস্তূর্ণং স্বর্ণপুঙ্খাঞ্শিলাশিতান্
84.19
তে শরা নতপর্বাণো বিবিশূ রাক্ষসং তদা
রুষিতাঃ পন্নগা যদ্বদ্গিরিমুগ্রা মহাবলাঃ
84.20
ততস্তে পাণ্ডবা রাজন্সমন্তান্নিশিতাঞ্শরান্
প্রেষয়ামাসুরুদ্বিগ্না হৈডিম্বশ্চ ঘটোত্কচঃ
84.21
স বধ্যমানঃ সমরে পাণ্ডবৈর্জিতকাশিভিঃ
দগ্ধাদ্রিকূটশৃঙ্গাভং ভিন্নাঞ্জনচয়োপমম্
84.22
সমুত্ক্ষিপ্য চ বাহুভ্যামাবিধ্য চ পুনঃ পুনঃ
নিষ্পিপেষ ক্ষিতৌ ক্ষিপ্রং পূর্ণকুম্ভমিবাশ্মনি
84.23
বললাঘবসংপন্নঃ সংপন্নো বিক্রমেণ চ
ভৈমসেনী রণে ক্রুদ্ধঃ সর্বসৈন্যান্যভীষয়ৎ
84.24
স বিস্ফুটিতসর্বাঙ্গশ্চূর্ণিতাস্থিবিভূষণঃ
ঘটোত্কচেন বীরেণ হতঃ সালকটঙ্কটঃ
84.25
ততঃ সুমনসঃ পার্থা হতে তস্মিন্নিশাচরে
চুক্রুশুঃ সিংহনাদাংশ্চ বাসাংস্যাদুধুবুশ্চ হ
84.26
তাবকাশ্চ হতং দৃষ্ট্বা রাক্ষসেন্দ্রং মহাবলম্
অলম্বুসং ভীমরূপং বিশীর্ণমিব পর্বতম্
হাহাকারমকুর্বন্ত সৈন্যানি ভরতর্ষভ
84.27
জনাশ্চ তদ্দদৃশিরে রক্ষঃ কৌতূহলান্বিতাঃ
যদৃচ্ছয়া নিপতিতং ভূমাবঙ্গারকং যথা
84.28
ঘটোত্কচস্তু তদ্ধত্বা রক্ষো বলবতাং বরম্
মুমোচ বলবন্নাদং বলং হত্বেব বাসবঃ
84.29
স পূজ্যমানঃ পিতৃভিঃ সবান্ধবৈ;র্ঘটোত্কচঃ কর্মণি দুষ্করে কৃতে
রিপুং নিহত্যাভিননন্দ বৈ তদা; অলম্বুসং পক্বমলম্বুসং যথা
84.30
ততো নিনাদঃ সুমহান্সমুত্থিতঃ; সশঙ্খনানাবিধবাণঘোষবান্
নিশম্য তং প্রত্যনদংস্তু কৌরবা;স্ততো ধ্বনির্ভুবনমথাস্পৃশদ্ভৃশম্