Utshovঅধ্যায় 83
83.1
সংজয় উবাচ
দ্রৌপদেয়ান্মহেষ্বাসান্সৌমদত্তির্মহায়শাঃ
একৈকং পঞ্চভির্বিদ্ধ্বা পুনর্বিব্যাধ সপ্তভিঃ
83.2
তে পীডিতা ভৃশং তেন রৌদ্রেণ সহসা বিভো
প্রমূঢা নৈব বিবিদুর্মৃধে কৃত্যং স্ম কিংচন
83.3
নাকুলিস্তু শতানীকঃ সৌমদত্তিং নরর্ষভম্
দ্বাভ্যাং বিদ্ধ্বানদদ্ধৃষ্টঃ শরাভ্যাং শত্রুতাপনঃ
83.4
তথেতরে রণে যত্তাস্ত্রিভিস্ত্রিভিরজিহ্মগৈঃ
বিব্যধুঃ সমরে তূর্ণং সৌমদত্তিমমর্ষণম্
83.5
স তান্প্রতি মহারাজ চিক্ষিপে পঞ্চ সায়কান্
একৈকং হৃদি চাজঘ্নে একৈকেন মহায়শাঃ
83.6
ততস্তে ভ্রাতরঃ পঞ্চ শরৈর্বিদ্ধা মহাত্মনা
পরিবার্য রথৈর্বীরং বিব্যধুঃ সায়কৈর্ভৃশম্
83.7
আর্জুনিস্তু হয়াংস্তস্য চতুর্ভির্নিশিতৈঃ শরৈঃ
প্রেষয়ামাস সংক্রুদ্ধো যমস্য সদনং প্রতি
83.8
ভৈমসেনির্ধনুশ্ছিত্ত্বা সৌমদত্তের্মহাত্মনঃ
ননাদ বলবন্নাদং বিব্যাধ চ শিতৈঃ শরৈঃ
83.9
যৌধিষ্ঠিরো ধ্বজং তস্য ছিত্ত্বা ভূমাবপাতয়ৎ
নাকুলিশ্চাশ্বয়ন্তারং রথনীডাদপাহরৎ
83.10
সাহদেবিস্তু তং জ্ঞাত্বা ভ্রাতৃভির্বিমুখীকৃতম্
ক্ষুরপ্রেণ শিরো রাজন্নিচকর্ত মহামনাঃ
83.11
তচ্ছিরো ন্যপতদ্ভূমৌ তপনীয়বিভূষিতম্
ভ্রাজয়ন্তং রণোদ্দেশং বালসূর্যসমপ্রভম্
83.12
সৌমদত্তেঃ শিরো দৃষ্ট্বা নিপতত্তন্মহাত্মনঃ
বিত্রস্তাস্তাবকা রাজন্প্রদুদ্রুবুরনেকধা
83.13
অলম্বুসস্তু সমরে ভীমসেনং মহাবলম্
যোধয়ামাস সংক্রুদ্ধো লক্ষ্মণং রাবণির্যথা
83.14
সংপ্রয়ুদ্ধৌ রণে দৃষ্ট্বা তাবুভৌ নররাক্ষসৌ
বিস্ময়ঃ সর্বভূতানাং প্রহর্ষশ্চাভবত্তদা
83.15
আর্ষ্যশৃঙ্গিং ততো ভীমো নবভির্নিশিতৈঃ শরৈঃ
বিব্যাধ প্রহসন্রাজন্রাক্ষসেন্দ্রমমর্ষণম্
83.16
তদ্রক্ষঃ সমরে বিদ্ধং কৃত্বা নাদং ভয়াবহম্
অভ্যদ্রবত্ততো ভীমং যে চ তস্য পদানুগাঃ
83.17
স ভীমং পঞ্চভির্বিদ্ধ্বা শরৈঃ সংনতপর্বভিঃ
ভীমানুগাঞ্জঘানাশু রথাংস্ত্রিংশদরিংদমঃ
পুনশ্চতুঃশতান্হত্বা ভীমং বিব্যাধ পত্রিণা
83.18
সোঽতিবিদ্ধস্তদা ভীমো রাক্ষসেন মহাবলঃ
নিষসাদ রথোপস্থে মূর্ছয়াভিপরিপ্লুতঃ
83.19
প্রতিলভ্য ততঃ সংজ্ঞাং মারুতিঃ ক্রোধমূর্ছিতঃ
বিকৃষ্য কার্মুকং ঘোরং ভারসাধনমুত্তমম্
অলম্বুসং শরৈস্তীক্ষ্ণৈরর্দয়ামাস সর্বতঃ
83.20
স বিদ্ধো বহুভির্বাণৈর্নীলাঞ্জনচয়োপমঃ
শুশুভে সর্বতো রাজন্প্রদীপ্ত ইব কিংশুকঃ
83.21
স বধ্যমানঃ সমরে ভীমচাপচ্যুতৈঃ শরৈঃ
স্মরন্ভ্রাতৃবধং চৈব পাণ্ডবেন মহাত্মনা
83.22
ঘোরং রূপমথো কৃত্বা ভীমসেনমভাষত
তিষ্ঠেদানীং রণে পার্থ পশ্য মেঽদ্য পরাক্রমম্
83.23
বকো নাম সুদুর্বুদ্ধে রাক্ষসপ্রবরো বলী
পরোক্ষং মম তদ্বৃত্তং যদ্ভ্রাতা মে হতস্ত্বয়া
83.24
এবমুক্ত্বা ততো ভীমমন্তর্ধানগতস্তদা
মহাতা শরবর্ষেণ ভৃশং তং সমবাকিরৎ
83.25
ভীমস্তু সমরে রাজন্নদৃশ্যে রাক্ষসে তদা
আকাশং পূরয়ামাস শরৈঃ সংনতপর্বভিঃ
83.26
স বধ্যমানো ভীমেন নিমেষাদ্রথমাস্থিতঃ
জগাম ধরণীং ক্ষুদ্রঃ খং চৈব সহসাগমৎ
83.27
উচ্চাবচানি রূপাণি চকার সুবহূনি চ
উচ্চাবচাস্তথা বাচো ব্যাজহার সমন্ততঃ
83.28
তেন পাণ্ডবসৈন্যানাং মৃদিতা যুধি বারণাঃ
হয়াশ্চ বহবো রাজন্পত্তয়শ্চ তথা পুনঃ
রথেভ্যো রথিনঃ পেতুস্তস্য নুন্নাঃ স্ম সায়কৈঃ
83.29
শোণিতোদাং রথাবর্তাং হস্তিগ্রাহসমাকুলাম্
ছত্রহংসাং কর্দমিনীং বাহুপন্নগসংকুলাম্
83.30
নদীং প্রবর্তয়ামাস রক্ষোগণসমাকুলাম্
বহন্তীং বহুধা রাজংশ্চেদিপাঞ্চালসৃঞ্জয়ান্
83.31
তং তথা সমরে রাজন্বিচরন্তমভীতবৎ
পাণ্ডবা ভৃশসংবিগ্নাঃ প্রাপশ্যংস্তস্য বিক্রমম্
83.32
তাবকানাং তু সৈন্যানাং প্রহর্ষঃ সমজায়ত
বাদিত্রনিনদশ্চোগ্রঃ সুমহাঁল্লোমহর্ষণঃ
83.33
তং শ্রুত্বা নিনদং ঘোরং তব সৈন্যস্য পাণ্ডবঃ
নামৃষ্যত যথা নাগস্তলশব্দং সমীরিতম্
83.34
ততঃ ক্রোধাভিতাম্রাক্ষো নির্দহন্নিব পাবকঃ
সংদধে ত্বাষ্ট্রমস্ত্রং স স্বয়ং ত্বষ্টেব মারিষ
83.35
ততঃ শরসহস্রাণি প্রাদুরাসন্সমন্ততঃ
তৈঃ শরৈস্তব সৈন্যস্য বিদ্রাবঃ সুমহানভূৎ
83.36
তদস্ত্রং প্রেষিতং তেন ভীমসেনেন সংয়ুগে
রাক্ষসস্য মহামায়াং হত্বা রাক্ষসমার্দয়ৎ
83.37
স বধ্যমানো বহুধা ভীমসেনেন রাক্ষসঃ
সংত্যজ্য সংয়ুগে ভীমং দ্রোণানীকমুপাদ্রবৎ
83.38
তস্মিংস্তু নির্জিতে রাজন্রাক্ষসেন্দ্রে মহাত্মনা
অনাদয়ন্সিংহনাদৈঃ পাণ্ডবাঃ সর্বতোদিশম্
83.39
অপূজয়ন্মারুতিং চ সংহৃষ্টাস্তে মহাবলম্
প্রহ্রাদং সমরে জিত্বা যথা শক্রং মরুদ্গণাঃ