Utshovঅধ্যায় 82
82.1
সংজয় উবাচ
বৃহত্ক্ষত্রমথায়ান্তং কেকয়ং দৃঢবিক্রমম্
ক্ষেমধূর্তির্মহারাজ বিব্যাধোরসি মার্গণৈঃ
82.2
বৃহত্ক্ষত্রস্তু তং রাজা নবত্যা নতপর্বণাম্
আজঘ্নে ত্বরিতো যুদ্ধে দ্রোণানীকবিভিত্সয়া
82.3
ক্ষেমধূর্তিস্তু সংক্রুদ্ধঃ কেকয়স্য মহাত্মনঃ
ধনুশ্চিচ্ছেদ ভল্লেন পীতেন নিশিতেন চ
82.4
অথৈনং ছিন্নধন্বানং শরেণ নতপর্বণা
বিব্যাধ হৃদয়ে তূর্ণং প্রবরং সর্বধন্বিনাম্
82.5
অথান্যদ্ধনুরাদায় বৃহত্ক্ষত্রো হসন্নিব
ব্যশ্বসূতধ্বজং চক্রে ক্ষেমধূর্তিং মহারথম্
82.6
ততোঽপরেণ ভল্লেন পীতেন নিশিতেন চ
জহার নৃপতেঃ কায়াচ্ছিরো জ্বলিতকুণ্ডলম্
82.7
তচ্ছিন্নং সহসা তস্য শিরঃ কুঞ্চিতমূর্ধজম্
সকিরীটং মহীং প্রাপ্য বভৌ জ্যোতিরিবাম্বরাৎ
82.8
তং নিহত্য রণে হৃষ্টো বৃহত্ক্ষত্রো মহারথঃ
সহসাভ্যপতত্সৈন্যং তাবকং পার্থকারণাৎ
82.9
ধৃষ্টকেতুমথায়ান্তং দ্রোণহেতোঃ পরাক্রমী
বীরধন্বা মহেষ্বাসো বারয়ামাস ভারত
82.10
তৌ পরস্পরমাসাদ্য শরদংষ্ট্রৌ তরস্বিনৌ
শরৈরনেকসাহস্রৈরন্যোন্যমভিজঘ্নতুঃ
82.11
তাবুভৌ নরশার্দূলৌ যুয়ুধাতে পরস্পরম্
মহাবনে তীব্রমদৌ বারণাবিব যূথপৌ
82.12
গিরিগহ্বরমাসাদ্য শার্দূলাবিব রোষিতৌ
যুয়ুধাতে মহাবীর্যৌ পরস্পরজিঘাংসয়া
82.13
তদ্যুদ্ধমাসীত্তুমুলং প্রেক্ষণীয়ং বিশাং পতে
সিদ্ধচারণসংঘানাং বিস্ময়াদ্ভুতদর্শনম্
82.14
বীরধন্বা ততঃ ক্রুদ্ধো ধৃষ্টকেতোঃ শরাসনম্
দ্বিধা চিচ্ছেদ ভল্লেন প্রহসন্নিব ভারত
82.15
তদুত্সৃজ্য ধনুশ্ছিন্নং চেদিরাজো মহারথঃ
শক্তিং জগ্রাহ বিপুলাং রুক্মদণ্ডাময়স্ময়ীম্
82.16
তাং তু শক্তিং মহাবীর্যাং দোর্ভ্যামায়ম্য ভারত
চিক্ষেপ সহসা যত্তো বীরধন্বরথং প্রতি
82.17
স তয়া বীরঘাতিন্যা শক্ত্যা ত্বভিহতো ভৃশম্
নির্ভিন্নহৃদয়স্তূর্ণং নিপপাত রথান্মহীম্
82.18
তস্মিন্বিনিহতে শূরে ত্রিগর্তানাং মহারথে
বলং তেঽভজ্যত বিভো পাণ্ডবেয়ৈঃ সমন্ততঃ
82.19
সহদেবে ততঃ ষষ্টিং সায়কান্দুর্মুখোঽক্ষিপৎ
ননাদ চ মহানাদং তর্জয়ন্পাণ্ডবং রণে
82.20
মদ্রেয়স্তু ততঃ ক্রুদ্ধো দুর্মুখং দশভিঃ শরৈঃ
ভ্রাতা ভ্রাতরমায়ান্তং বিব্যাধ প্রহসন্নিব
82.21
তং রণে রভসং দৃষ্ট্বা সহদেবং মহাবলম্
দুর্মুখো নবভির্বাণৈস্তাডয়ামাস ভারত
82.22
দুর্মুখস্য তু ভল্লেন ছিত্ত্বা কেতুং মহাবলঃ
জঘান চতুরো বাহাংশ্চতুর্ভির্নিশিতৈঃ শরৈঃ
82.23
অথাপরেণ ভল্লেন পীতেন নিশিতেন চ
চিচ্ছেদ সারথেঃ কায়াচ্ছিরো জ্বলিতকুণ্ডলম্
82.24
ক্ষুরপ্রেণ চ তীক্ষ্ণেন কৌরব্যস্য মহদ্ধনুঃ
সহদেবো রণে ছিত্ত্বা তং চ বিব্যাধ পঞ্চভিঃ
82.25
হতাশ্বং তু রথং ত্যক্ত্বা দুর্মুখো বিমনাস্তদা
আরুরোহ রথং রাজন্নিরমিত্রস্য ভারত
82.26
সহদেবস্ততঃ ক্রুদ্ধো নিরমিত্রং মহাহবে
জঘান পৃতনামধ্যে ভল্লেন পরবীরহা
82.27
স পপাত রথোপস্থান্নিরমিত্রো জনেশ্বরঃ
ত্রিগর্তরাজস্য সুতো ব্যথয়ংস্তব বাহিনীম্
82.28
তং তু হত্বা মহাবাহুঃ সহদেবো ব্যরোচত
যথা দাশরথী রামঃ খরং হত্বা মহাবলম্
82.29
হাহাকারো মহানাসীত্ত্রিগর্তানাং জনেশ্বর
রাজপুত্রং হতং দৃষ্ট্বা নিরমিত্রং মহাবলম্
82.30
নকুলস্তে সুতং রাজন্বিকর্ণং পৃথুলোচনম্
মুহূর্তাজ্জিতবান্সংখ্যে তদদ্ভুতমিবাভবৎ
82.31
সাত্যকিং ব্যাঘ্রদত্তস্তু শরৈঃ সংনতপর্বভিঃ
চক্রেঽদৃশ্যং সাশ্বসূতং সধ্বজং পৃতনান্তরে
82.32
তান্নিবার্য শরাঞ্শূরঃ শৈনেয়ঃ কৃতহস্তবৎ
সাশ্বসূতধ্বজং বাণৈর্ব্যাঘ্রদত্তমপাতয়ৎ
82.33
কুমারে নিহতে তস্মিন্মগধস্য সুতে প্রভো
মাগধাঃ সর্বতো যত্তা যুয়ুধানমুপাদ্রবন্
82.34
বিসৃজন্তঃ শরাংশ্চৈব তোমরাংশ্চ সহস্রশঃ
ভিণ্ডিপালাংস্তথা প্রাসান্মুদ্গরান্মুসলানপি
82.35
অয়োধয়ন্রণে শূরাঃ সাত্বতং যুদ্ধদুর্মদম্
তাংস্তু সর্বান্স বলবান্সাত্যক্তির্যুদ্ধদুর্মদঃ
নাতিকৃচ্ছ্রাদ্ধসন্নেব বিজিগ্যে পুরুষর্ষভ
82.36
মাগধান্দ্রবতো দৃষ্ট্বা হতশেষান্সমন্ততঃ
বলং তেঽভজ্যত বিভো যুয়ুধানশরার্দিতম্
82.37
নাশয়িত্বা রণে সৈন্যং ত্বদীয়ং মাধবোত্তমঃ
বিধুন্বানো ধনুঃশ্রেষ্ঠং ব্যভ্রাজত মহায়শাঃ
82.38
ভজ্যমানং বলং রাজন্সাত্বতেন মহাত্মনা
নাভ্যবর্তত যুদ্ধায় ত্রাসিতং দীর্ঘবাহুনা
82.39
ততো দ্রোণো ভৃশং ক্রুদ্ধঃ সহসোদ্বৃত্য চক্ষুষী
সাত্যকিং সত্যকর্মাণং স্বয়মেবাভিদুদ্রুবে