Utshovঅধ্যায় 81
81.1
ধৃতরাষ্ট্র উবাচ
অর্জুনে সৈন্ধবং প্রাপ্তে ভারদ্বাজেন সংবৃতাঃ
পাঞ্চালাঃ কুরুভিঃ সার্ধং কিমকুর্বত সংজয়
81.2
সংজয় উবাচ
অপরাহ্ণে মহারাজ সংগ্রামে লোমহর্ষণে
পাঞ্চালানাং কুরূণাং চ দ্রোণে দ্যূতমবর্তত
81.3
পাঞ্চালা হি জিঘাংসন্তো দ্রোণং সংহৃষ্টচেতসঃ
অভ্যবর্ষন্ত গর্জন্তঃ শরবর্ষাণি মারিষ
81.4
ততঃ সুতুমুলস্তেষাং সংগ্রামোঽবর্ততাদ্ভুতঃ
পাঞ্চালানাং কুরূণাং চ ঘোরো দেবাসুরোপমঃ
81.5
সর্বে দ্রোণরথং প্রাপ্য পাঞ্চালাঃ পাণ্ডবৈঃ সহ
তদনীকং বিভিত্সন্তো মহাস্ত্রাণি ব্যদর্শয়ন্
81.6
দ্রোণস্য রথপর্যন্তং রথিনো রথমাস্থিতাঃ
কম্পয়ন্তোঽভ্যবর্তন্ত বেগমাস্থায় মধ্যমম্
81.7
তমভ্যগাদ্বৃহত্ক্ষত্রঃ কেকয়ানাং মহারথঃ
প্রবপন্নিশিতান্বাণান্মহেন্দ্রাশনিসংনিভান্
81.8
তং তু প্রত্যুদিয়াচ্ছীঘ্রং ক্ষেমধূর্তির্মহায়শাঃ
বিমুঞ্চন্নিশিতান্বাণাঞ্শতশোঽথ সহস্রশঃ
81.9
ধৃষ্টকেতুশ্চ চেদীনামৃষভোঽতিবলোদিতঃ
ত্বরিতোঽভ্যদ্রবদ্দ্রোণং মহেন্দ্র ইব শম্বরম্
81.10
তমাপতন্তং সহসা ব্যাদিতাস্যমিবান্তকম্
বীরধন্বা মহেষ্বাসস্ত্বরমাণঃ সমভ্যয়াৎ
81.11
যুধিষ্ঠিরং মহারাজ জিগীষুং সমবস্থিতম্
সহানীকং ততো দ্রোণো ন্যবারয়ত বীর্যবান্
81.12
নকুলং কুশলং যুদ্ধে পরাক্রান্তং পরাক্রমী
অভ্যগচ্ছত্সমায়ান্তং বিকর্ণস্তে সুতঃ প্রভো
81.13
সহদেবং তথায়ান্তং দুর্মুখঃ শত্রুকর্শনঃ
শরৈরনেকসাহস্রৈঃ সমবাকিরদাশুগৈঃ
81.14
সাত্যকিং তু নরব্যাঘ্রং ব্যাঘ্রদত্তস্ত্ববারয়ৎ
শরৈঃ সুনিশিতৈস্তীক্ষ্ণৈঃ কম্পয়ন্বৈ মুহুর্মুহুঃ
81.15
দ্রৌপদেয়ান্নরব্যাঘ্রান্মুঞ্চতঃ সায়কোত্তমান্
সংরব্ধান্রথিনাং শ্রেষ্ঠান্সৌমদত্তিরবারয়ৎ
81.16
ভীমসেনং তথা ক্রুদ্ধং ভীমরূপো ভয়ানকম্
প্রত্যবারয়দায়ান্তমার্ষ্যশৃঙ্গির্মহারথঃ
81.17
তয়োঃ সমভবদ্যুদ্ধং নররাক্ষসয়োর্মৃধে
যাদৃগেব পুরা বৃত্তং রামরাবণয়োর্নৃপ
81.18
ততো যুধিষ্ঠিরো দ্রোণং নবত্যা নতপর্বণাম্
আজঘ্নে ভরতশ্রেষ্ঠ সর্বমর্মসু ভারত
81.19
তং দ্রোণঃ পঞ্চবিংশত্যা নিজঘান স্তনান্তরে
রোষিতো ভরতশ্রেষ্ঠ কৌন্তেয়েন যশস্বিনা
81.20
ভূয় এব তু বিংশত্যা সায়কানাং সমাচিনোৎ
সাশ্বসূতধ্বজং দ্রোণঃ পশ্যতাং সর্বধন্বিনাম্
81.21
তাঞ্শরান্দ্রোণমুক্তাংস্তু শরবর্ষেণ পাণ্ডবঃ
অবারয়ত ধর্মাত্মা দর্শয়ন্পাণিলাঘবম্
81.22
ততো দ্রোণো ভৃশং ক্রুদ্ধো ধর্মরাজস্য সংয়ুগে
চিচ্ছেদ সহসা ধন্বী ধনুস্তস্য মহাত্মনঃ
81.23
অথৈনং ছিন্নধন্বানং ত্বরমাণো মহারথঃ
শরৈরনেকসাহস্রৈঃ পুরয়ামাস সর্বতঃ
81.24
অদৃশ্যং দৃশ্য রাজানং ভারদ্বাজস্য সায়কৈঃ
সর্বভূতান্যমন্যন্ত হতমেব যুধিষ্ঠিরম্
81.25
কেচিচ্চৈনমমন্যন্ত তথা বৈ বিমুখীকৃতম্
হৃতো রাজেতি রাজেন্দ্র ব্রাহ্মণেন যশস্বিনা
81.26
স কৃচ্ছ্রং পরমং প্রাপ্তো ধর্মরাজো যুধিষ্ঠিরঃ
ত্যক্ত্বা তত্কার্মুকং ছিন্নং ভারদ্বাজেন সংয়ুগে
আদদেঽন্যদ্ধনুর্দিব্যং ভারঘ্নং বেগবত্তরম্
81.27
ততস্তান্সায়কান্সর্বান্দ্রোণমুক্তান্সহস্রশঃ
চিচ্ছেদ সমরে বীরস্তদদ্ভুতমিবাভবৎ
81.28
ছিত্ত্বা চ তাঞ্শরান্রাজা ক্রোধসংরক্তলোচনঃ
শক্তিং জগ্রাহ সমরে গিরীণামপি দারণীম্
স্বর্ণদণ্ডাং মহাঘোরামষ্টঘণ্টাং ভয়াবহাম্
81.29
সমুত্ক্ষিপ্য চ তাং হৃষ্টো ননাদ বলবদ্বলী
নাদেন সর্বভূতানি ত্রাসয়ন্নিব ভারত
81.30
শক্তিং সমুদ্যতাং দৃষ্ট্বা ধর্মরাজেন সংয়ুগে
স্বস্তি দ্রোণায় সহসা সর্বভূতান্যথাব্রুবন্
81.31
সা রাজভুজনির্মুক্তা নির্মুক্তোরগসংনিভা
প্রজ্বালয়ন্তী গগনং দিশশ্চ বিদিশস্তথা
দ্রোণান্তিকমনুপ্রাপ্তা দীপ্তাস্যা পন্নগী যথা
81.32
তামাপতন্তীং সহসা প্রেক্ষ্য দ্রোণো বিশাং পতে
প্রাদুশ্চক্রে ততো ব্রাহ্মমস্ত্রমস্ত্রবিদাং বরঃ
81.33
তদস্ত্রং ভস্মসাত্কৃত্বা তাং শক্তিং ঘোরদর্শনাম্
জগাম স্যন্দনং তূর্ণং পাণ্ডবস্য যশস্বিনঃ
81.34
ততো যুধিষ্ঠিরো রাজা দ্রোণাস্ত্রং তত্সমুদ্যতম্
অশাময়ন্মহাপ্রাজ্ঞো ব্রহ্মাস্ত্রেণৈব ভারত
81.35
বিব্যাধ চ রণে দ্রোণং পঞ্চভির্নতপর্বভিঃ
ক্ষুরপ্রেণ চ তীক্ষ্ণেন চিচ্ছেদাস্য মহদ্ধনুঃ
81.36
তদপাস্য ধনুশ্ছিন্নং দ্রোণঃ ক্ষত্রিয়মর্দনঃ
গদাং চিক্ষেপ সহসা ধর্মপুত্রায় মারিষ
81.37
তামাপতন্তীং সহসা গদাং দৃষ্ট্বা যুধিষ্ঠিরঃ
গদামেবাগ্রহীত্ক্রুদ্ধশ্চিক্ষেপ চ পরংতপঃ
81.38
তে গদে সহসা মুক্তে সমাসাদ্য পরস্পরম্
সংঘর্ষাত্পাবকং মুক্ত্বা সমেয়াতাং মহীতলে
81.39
ততো দ্রোণো ভৃশং ক্রুদ্ধো ধর্মরাজস্য মারিষ
চতুর্ভির্নিশিতৈস্তীক্ষ্ণৈর্হয়াঞ্জঘ্নে শরোত্তমৈঃ
81.40
ধনুশ্চৈকেন বাণেন চিচ্ছেদেন্দ্রধ্বজোপমম্
কেতুমেকেন চিচ্ছেদ পাণ্ডবং চার্দয়ত্ত্রিভিঃ
81.41
হতাশ্বাত্তু রথাত্তূর্ণমবপ্লুত্য যুধিষ্ঠিরঃ
তস্থাবূর্ধ্বভুজো রাজা ব্যায়ুধো ভরতর্ষভ
81.42
বিরথং তং সমালোক্য ব্যায়ুধং চ বিশেষতঃ
দ্রোণো ব্যমোহয়চ্ছত্রূন্সর্বসৈন্যানি চাভিভো
81.43
মুঞ্চন্নিষুগণাংস্তীক্ষ্ণাঁল্লঘুহস্তো দৃঢব্রতঃ
অভিদুদ্রাব রাজানং সিংহো মৃগমিবোল্বণঃ
81.44
তমভিদ্রুতমালোক্য দ্রোণেনামিত্রঘাতিনা
হা হেতি সহসা শব্দঃ পাণ্ডূনাং সমজায়ত
81.45
হৃতো রাজা হৃতো রাজা ভারদ্বাজেন মারিষ
ইত্যাসীত্সুমহাঞ্শব্দঃ পাণ্ডুসৈন্যস্য সর্বতঃ
81.46
ততস্ত্বরিতমারুহ্য সহদেবরথং নৃপঃ
অপায়াজ্জবনৈরশ্বৈঃ কুন্তীপুত্রো যুধিষ্ঠিরঃ