Utshovঅধ্যায় 80
80.1
ধৃতরাষ্ট্র উবাচ
ধ্বজান্বহুবিধাকারান্ভ্রাজমানানতিশ্রিয়া
পার্থানাং মামকানাং চ তান্মমাচক্ষ্ব সংজয়
80.2
সংজয় উবাচ
ধ্বজান্বহুবিধাকারাঞ্শৃণু তেষাং মহাত্মনাম্
রূপতো বর্ণতশ্চৈব নামতশ্চ নিবোধ মে
80.3
তেষাং তু রথমুহ্যানাং রথেষু বিবিধা ধ্বজাঃ
প্রত্যদৃশ্যন্ত রাজেন্দ্র জ্বলিতা ইব পাবকাঃ
80.4
কাঞ্চনাঃ কাঞ্চনাপীডাঃ কাঞ্চনস্রগলংকৃতাঃ
কাঞ্চনানীব শৃঙ্গাণি কাঞ্চনস্য মহাগিরেঃ
80.5
তে ধ্বজাঃ সংবৃতাস্তেষাং পতাকাভিঃ সমন্ততঃ
নানাবর্ণবিরাগাভির্বিবভুঃ সর্বতো বৃতাঃ
80.6
পতাকাশ্চ ততস্তাস্তু শ্বসনেন সমীরিতাঃ
নৃত্যমানাঃ ব্যদৃশ্যন্ত রঙ্গমধ্যে বিলাসিকাঃ
80.7
ইন্দ্রায়ুধসবর্ণাভাঃ পতাকা ভরতর্ষভ
দোধূয়মানা রথিনাং শোভয়ন্তি মহারথান্
80.8
সিংহলাঙ্গূলমুগ্রাস্যং ধ্বজং বানরলক্ষণম্
ধনংজয়স্য সংগ্রামে প্রত্যপশ্যাম ভৈরবম্
80.9
স বানরবরো রাজন্পতাকাভিরলংকৃতঃ
ত্রাসয়ামাস তত্সৈন্যং ধ্বজো গাণ্ডীবধন্বনঃ
80.10
তথৈব সিংহলাঙ্গূলং দ্রোণপুত্রস্য ভারত
ধ্বজাগ্রং সমপশ্যাম বালসূর্যসমপ্রভম্
80.11
কাঞ্চনং পবনোদ্ধূতং শক্রধ্বজসমপ্রভম্
নন্দনং কৌরবেন্দ্রাণাং দ্রৌণের্লক্ষণমুচ্ছ্রিতম্
80.12
হস্তিকক্ষ্যা পুনর্হৈমী বভূবাধিরথের্ধ্বজে
আহবে খং মহারাজ দদৃশে পূরয়ন্নিব
80.13
পতাকী কাঞ্চনস্রগ্বী ধ্বজঃ কর্ণস্য সংয়ুগে
নৃত্যতীব রথোপস্থে শ্বসনেন সমীরিতঃ
80.14
আচার্যস্য চ পাণ্ডূনাং ব্রাহ্মণস্য যশস্বিনঃ
গোবৃষো গৌতমস্যাসীত্কৃপস্য সুপরিষ্কৃতঃ
80.15
স তেন ভ্রাজতে রাজন্গোবৃষেণ মহারথঃ
ত্রিপুরঘ্নরথো যদ্বদ্গোবৃষেণ বিরাজতে
80.16
ময়ূরো বৃষসেনস্য কাঞ্চনো মণিরত্নবান্
ব্যাহরিষ্যন্নিবাতিষ্ঠত্সেনাগ্রমপি শোভয়ন্
80.17
তেন তস্য রথো ভাতি ময়ূরেণ মহাত্মনঃ
যথা স্কন্দস্য রাজেন্দ্র ময়ূরেণ বিরাজতা
80.18
মদ্ররাজস্য শল্যস্য ধ্বজাগ্রেঽগ্নিশিখামিব
সৌবর্ণীং প্রতিপশ্যাম সীতামপ্রতিমাং শুভাম্
80.19
সা সীতা ভ্রাজতে তস্য রথমাস্থায় মারিষ
সর্ববীজবিরূঢেব যথা সীতা শ্রিয়া বৃতা
80.20
বরাহঃ সিন্ধুরাজস্য রাজতোঽভিবিরাজতে
ধ্বজাগ্রেঽলোহিতার্কাভো হেমজালপরিষ্কৃতঃ
80.21
শুশুভে কেতুনা তেন রাজতেন জয়দ্রথঃ
যথা দেবাসুরে যুদ্ধে পুরা পূষা স্ম শোভতে
80.22
সৌমদত্তেঃ পুনর্যূপো যজ্ঞশীলস্য ধীমতঃ
ধ্বজঃ সূর্য ইবাভাতি সোমশ্চাত্র প্রদৃশ্যতে
80.23
স যূপঃ কাঞ্চনো রাজন্সৌমদত্তের্বিরাজতে
রাজসূয়ে মখশ্রেষ্ঠে যথা যূপঃ সমুচ্ছ্রিতঃ
80.24
শলস্য তু মহারাজ রাজতো দ্বিরদো মহান্
কেতুঃ কাঞ্চনচিত্রাঙ্গৈর্ময়ূরৈরুপশোভিতঃ
80.25
স কেতুঃ শোভয়ামাস সৈন্যং তে ভরতর্ষভ
যথা শ্বেতো মহানাগো দেবরাজচমূং তথা
80.26
নাগো মণিময়ো রাজ্ঞো ধ্বজঃ কনকসংবৃতঃ
কিঙ্কিণীশতসংহ্রাদো ভ্রাজংশ্চিত্রে রথোত্তমে
80.27
ব্যভ্রাজত ভৃশং রাজন্পুত্রস্তব বিশাং পতে
ধ্বজেন মহতা সংখ্যে কুরূণামৃষভস্তদা
80.28
নবৈতে তব বাহিন্যামুচ্ছ্রিতাঃ পরমধ্বজাঃ
ব্যদীপয়ংস্তে পৃতনাং যুগান্তাদিত্যসংনিভাঃ
80.29
দশমস্ত্বর্জুনস্যাসীদেক এব মহাকপিঃ
অদীপ্যতার্জুনো যেন হিমবানিব বহ্নিনা
80.30
ততশ্চিত্রাণি শুভ্রাণি সুমহান্তি মহারথাঃ
কার্মুকাণ্যাদদুস্তূর্ণমর্জুনার্থে পরংতপাঃ
80.31
তথৈব ধনুরায়চ্ছত্পার্থঃ শত্রুবিনাশনঃ
গাণ্ডীবং দিব্যকর্মা তদ্রাজন্দুর্মন্ত্রিতে তব
80.32
তবাপরাধাদ্ধি নরা নিহতা বহুধা যুধি
নানাদিগ্ভ্যঃ সমাহূতাঃ সহয়াঃ সরথদ্বিপাঃ
80.33
তেষামাসীদ্ব্যতিক্ষেপো গর্জতামিতরেতরম্
দুর্যোধনমুখানাং চ পাণ্ডূনামৃষভস্য চ
80.34
তত্রাদ্ভুতং পরং চক্রে কৌন্তেয়ঃ কৃষ্ণসারথিঃ
যদেকো বহুভিঃ সার্ধং সমাগচ্ছদভীতবৎ
80.35
অশোভত মহাবাহুর্গাণ্ডীবং বিক্ষিপন্ধনুঃ
জিগীষুস্তান্নরব্যাঘ্রাঞ্জিঘাংসুশ্চ জয়দ্রথম্
80.36
তত্রার্জুনো মহারাজ শরৈর্মুক্তৈঃ সহস্রশঃ
অদৃশ্যানকরোদ্যোধাংস্তাবকাঞ্শত্রুতাপনঃ
80.37
ততস্তেঽপি নরব্যাঘ্রাঃ পার্থং সর্বে মহারথাঃ
অদৃশ্যং সমরে চক্রুঃ সায়কৌঘৈঃ সমন্ততঃ
80.38
সংবৃতে নরসিংহৈস্তৈঃ কুরূণামৃষভেঽর্জুনে
মহানাসীত্সমুদ্ধূতস্তস্য সৈন্যস্য নিস্বনঃ