Utshovঅধ্যায় 79
79.1
সংজয় উবাচ
তাবকাস্তু সমীক্ষ্যৈব বৃষ্ণ্যন্ধককুরূত্তমৌ
প্রাগত্বরঞ্জিঘাংসন্তস্তথৈব বিজয়ঃ পরান্
79.2
সুবর্ণচিত্রৈর্বৈয়াঘ্রৈঃ স্বনবদ্ভির্মহারথৈঃ
দীপয়ন্তো দিশঃ সর্বা জ্বলদ্ভিরিব পাবকৈঃ
79.3
রুক্মপৃষ্ঠৈশ্চ দুষ্প্রেক্ষ্যৈঃ কার্মুকৈঃ পৃথিবীপতে
কূজদ্ভিরতুলান্নাদান্রোষিতৈরুরগৈরিব
79.4
ভূরিশ্রবাঃ শলঃ কর্ণো বৃষসেনো জয়দ্রথঃ
কৃপশ্চ মদ্ররাজশ্চ দ্রৌণিশ্চ রথিনাং বরঃ
79.5
তে পিবন্ত ইবাকাশমশ্বৈরষ্টৌ মহারথাঃ
ব্যরাজয়ন্দশ দিশো বৈয়াঘ্রৈর্হেমচন্দ্রকৈঃ
79.6
তে দংশিতাঃ সুসংরব্ধা রথৈর্মেঘৌঘনিস্বনৈঃ
সমাবৃণ্বন্দিশঃ সর্বাঃ পার্থং চ বিশিখৈঃ শিতৈঃ
79.7
কৌলূতকা হয়াশ্চিত্রা বহন্তস্তান্মহারথান্
ব্যশোভন্ত তদা শীঘ্রা দীপয়ন্তো দিশো দশ
79.8
আজানেয়ৈর্মহাবেগৈর্নানাদেশসমুত্থিতৈঃ
পার্বতীয়ৈর্নদীজৈশ্চ সৈন্ধবৈশ্চ হয়োত্তমৈঃ
79.9
কুরুয়োধবরা রাজংস্তব পুত্রং পরীপ্সবঃ
ধনংজয়রথং শীঘ্রং সর্বতঃ সমুপাদ্রবন্
79.10
তে প্রগৃহ্য মহাশঙ্খান্দধ্মুঃ পুরুষসত্তমাঃ
পূরয়ন্তো দিবং রাজন্পৃথিবীং চ সসাগরাম্
79.11
তথৈব দধ্মতুঃ শঙ্খৌ বাসুদেবধনংজয়ৌ
প্রবরৌ সর্বভূতানাং সর্বশঙ্খবরৌ ভুবি
দেবদত্তং চ কৌন্তেয়ঃ পাঞ্চজন্যং চ কেশবঃ
79.12
শব্দস্তু দেবদত্তস্য ধনংজয়সমীরিতঃ
পৃথিবীং চান্তরিক্ষং চ দিশশ্চৈব সমাবৃণোৎ
79.13
তথৈব পাঞ্চজন্যোঽপি বাসুদেবসমীরিতঃ
সর্বশব্দানতিক্রম্য পূরয়ামাস রোদসী
79.14
তস্মিংস্তথা বর্তমানে দারুণে নাদসংকুলে
ভীরূণাং ত্রাসজননে শূরাণাং হর্ষবর্ধনে
79.15
প্রবাদিতাসু ভেরীষু ঝর্ঝরেষ্বানকেষু চ
মৃদঙ্গেষু চ রাজেন্দ্র বাদ্যমানেষ্বনেকশঃ
79.16
মহারথসমাখ্যাতা দুর্যোধনহিতৈষিণঃ
অমৃষ্যমাণাস্তং শব্দং ক্রুদ্ধাঃ পরমধন্বিনঃ
নানাদেশ্যা মহীপালাঃ স্বসৈন্যপরিরক্ষিণঃ
79.17
অমর্ষিতা মহাশঙ্খান্দধ্মুর্বীরা মহারথাঃ
কৃতে প্রতিকরিষ্যন্তঃ কেশবস্যার্জুনস্য চ
79.18
বভূব তব তত্সৈন্যং শঙ্খশব্দসমীরিতম্
উদ্বিগ্নরথনাগাশ্বমস্বস্থমিব চাভিভো
79.19
তত্প্রয়ুক্তমিবাকাশং শূরৈঃ শঙ্খনিনাদিতম্
বভূব ভৃশমুদ্বিগ্নং নির্ঘাতৈরিব নাদিতম্
79.20
স শব্দঃ সুমহান্রাজন্দিশঃ সর্বা ব্যনাদয়ৎ
ত্রাসয়ামাস তত্সৈন্যং যুগান্ত ইব সংভৃতঃ
79.21
ততো দুর্যোধনোঽষ্টৌ চ রাজানস্তে মহারথাঃ
জয়দ্রথস্য রক্ষার্থং পাণ্ডবং পর্যবারয়ন্
79.22
ততো দ্রৌণিস্ত্রিসপ্তত্যা বাসুদেবমতাডয়ৎ
অর্জুনং চ ত্রিভির্ভল্লৈর্ধ্বজমশ্বাংশ্চ পঞ্চভিঃ
79.23
তমর্জুনঃ পৃষত্কানাং শতৈঃ ষড্ভিরতাডয়ৎ
অত্যর্থমিব সংক্রুদ্ধঃ প্রতিবিদ্ধে জনার্দনে
79.24
কর্ণং দ্বাদশভির্বিদ্ধ্বা বৃষসেনং ত্রিভিস্তথা
শল্যস্য সশরং চাপং মুষ্টৌ চিচ্ছেদ বীর্যবান্
79.25
গৃহীত্বা ধনুরন্যত্তু শল্যো বিব্যাধ পাণ্ডবম্
ভূরিশ্রবাস্ত্রিভির্বাণৈর্হেমপুঙ্খৈঃ শিলাশিতৈঃ
79.26
কর্ণো দ্বাত্রিংশতা চৈব বৃষসেনশ্চ পঞ্চভিঃ
জয়দ্রথস্ত্রিসপ্তত্যা কৃপশ্চ দশভিঃ শরৈঃ
মদ্ররাজশ্চ দশভির্বিব্যধুঃ ফল্গুনং রণে
79.27
ততঃ শরাণাং ষষ্ট্যা তু দ্রৌণিঃ পার্থমবাকিরৎ
বাসুদেবং চ সপ্তত্যা পুনঃ পার্থং চ পঞ্চভিঃ
79.28
প্রহসংস্তু নরব্যাঘ্রঃ শ্বেতাশ্বঃ কৃষ্ণসারথিঃ
প্রত্যবিধ্যত্স তান্সর্বান্দর্শয়ন্পাণিলাঘবম্
79.29
কর্ণং দ্বাদশভির্বিদ্ধ্বা বৃষসেনং ত্রিভিঃ শরৈঃ
শল্যস্য সমরে চাপং মুষ্টিদেশে ন্যকৃন্তত
79.30
সৌমদত্তিং ত্রিভির্বিদ্ধ্বা শল্যং চ দশভিঃ শরৈঃ
শিতৈরগ্নিশিখাকারৈর্দ্রৌণিং বিব্যাধ চাষ্টভিঃ
79.31
গৌতমং পঞ্চবিংশত্যা শৈন্ধবং চ শতেন হ
পুনর্দ্রৌণিং চ সপ্তত্যা শরাণাং সোঽভ্যতাডয়ৎ
79.32
ভূরিশ্রবাস্তু সংক্রুদ্ধঃ প্রতোদং চিচ্ছিদে হরেঃ
অর্জুনং চ ত্রিসপ্তত্যা বাণানামাজঘান হ
79.33
ততঃ শরশতৈস্তীক্ষ্ণৈস্তানরীঞ্শ্বেতবাহনঃ
প্রত্যষেধদ্দ্রুতং ক্রুদ্ধো মহাবাতো ঘনানিব