Utshovঅধ্যায় 78
78.1
সংজয় উবাচ
এবমুক্ত্বার্জুনং রাজা ত্রিভির্মর্মাতিগৈঃ শরৈঃ
প্রত্যবিধ্যন্মহাবেগৈশ্চতুর্ভিশ্চতুরো হয়ান্
78.2
বাসুদেবং চ দশভিঃ প্রত্যবিধ্যত্স্তনান্তরে
প্রতোদং চাস্য ভল্লেন ছিত্ত্বা ভূমাবপাতয়ৎ
78.3
তং চতুর্দশভিঃ পার্থশ্চিত্রপুঙ্খৈঃ শিলাশিতৈঃ
অবিধ্যত্তূর্ণমব্যগ্রস্তেঽস্যাভ্রশ্যন্ত বর্মণঃ
78.4
তেষাং বৈফল্যমালোক্য পুনর্নব চ পঞ্চ চ
প্রাহিণোন্নিশিতান্বাণাংস্তে চাভ্রশ্যন্ত বর্মণঃ
78.5
অষ্টাবিংশত্তু তান্বাণানস্তান্বিপ্রেক্ষ্য নিষ্ফলান্
অব্রবীত্পরবীরঘ্নঃ কৃষ্ণোঽর্জুনমিদং বচঃ
78.6
অদৃষ্টপূর্বং পশ্যামি শিলানামিব সর্পণম্
ত্বয়া সংপ্রেষিতাঃ পার্থ নার্থং কুর্বন্তি পত্রিণঃ
78.7
কচ্চিদ্গাণ্ডীবতঃ প্রাণাস্তথৈব ভরতর্ষভ
মুষ্টিশ্চ তে যথাপূর্বং ভুজয়োশ্চ বলং তব
78.8
ন চেদ্বিধেরয়ং কালঃ প্রাপ্তঃ স্যাদদ্য পশ্চিমঃ
তব চৈবাস্য শত্রোশ্চ তন্মমাচক্ষ্ব পৃচ্ছতঃ
78.9
বিস্ময়ো মে মহান্পার্থ তব দৃষ্ট্বা শরানিমান্
ব্যর্থান্নিপততঃ সংখ্যে দুর্যোধনরথং প্রতি
78.10
বজ্রাশনিসমা ঘোরাঃ পরকায়াবভেদিনঃ
শরাঃ কুর্বন্তি তে নার্থং পার্থ কাদ্য বিডম্বনা
78.11
অর্জুন উবাচ
দ্রোণেনৈষা মতিঃ কৃষ্ণ ধার্তরাষ্ট্রে নিবেশিতা
অন্তে বিহিতমস্ত্রাণামেতত্কবচধারণম্
78.12
অস্মিন্নন্তর্হিতং কৃষ্ণ ত্রৈলোক্যমপি বর্মণি
একো দ্রোণো হি বেদৈতদহং তস্মাচ্চ সত্তমাৎ
78.13
ন শক্যমেতত্কবচং বাণৈর্ভেত্তুং কথংচন
অপি বজ্রেণ গোবিন্দ স্বয়ং মঘবতা যুধি
78.14
জানংস্ত্বমপি বৈ কৃষ্ণ মাং বিমোহয়সে কথম্
যদ্বৃত্তং ত্রিষু লোকেষু যচ্চ কেশব বর্ততে
78.15
তথা ভবিষ্যদ্যচ্চৈব তত্সর্বং বিদিতং তব
ন ত্বেবং বেদ বৈ কশ্চিদ্যথা ত্বং মধুসূদন
78.16
এষ দুর্যোধনঃ কৃষ্ণ দ্রোণেন বিহিতামিমাম্
তিষ্ঠত্যভীতবত্সংখ্যে বিভ্রত্কবচধারণাম্
78.17
যত্ত্বত্র বিহিতং কার্যং নৈষ তদ্বেত্তি মাধব
স্ত্রীবদেষ বিভর্ত্যেতাং যুক্তাং কবচধারণাম্
78.18
পশ্য বাহ্বোশ্চ মে বীর্যং ধনুষশ্চ জনার্দন
পরাজয়িষ্যে কৌরব্যং কবচেনাপি রক্ষিতম্
78.19
ইদমঙ্গিরসে প্রাদাদ্দেবেশো বর্ম ভাস্বরম্
পুনর্দদৌ সুরপতির্মহ্যং বর্ম সসংগ্রহম্
78.20
দৈবং যদ্যস্য বর্মৈতদ্ব্রহ্মণা বা স্বয়ং কৃতম্
নৈতদ্গোপ্স্যতি দুর্বুদ্ধিমদ্য বাণহতং ময়া
78.21
সংজয় উবাচ
এবমুক্ত্বার্জুনো বাণানভিমন্ত্র্য ব্যকর্ষয়ৎ
বিকৃষ্যমাণাংস্তেনৈবং ধনুর্মধ্যগতাঞ্শরান্
তানস্যাস্ত্রেণ চিচ্ছেদ দ্রৌণিঃ সর্বাস্ত্রঘাতিনা
78.22
তান্নিকৃত্তানিষূন্দৃষ্ট্বা দূরতো ব্রহ্মবাদিনা
ন্যবেদয়ত্কেশবায় বিস্মিতঃ শ্বেতবাহনঃ
78.23
নৈতদস্ত্রং ময়া শক্যং দ্বিঃ প্রয়োক্তুং জনার্দন
অস্ত্রং মামেব হন্যাদ্ধি পশ্য ত্বদ্য বলং মম
78.24
ততো দুর্যোধনঃ কৃষ্ণৌ নবভির্নতপর্বভিঃ
অবিধ্যত রণে রাজঞ্শরৈরাশীবিষোপমৈঃ
ভূয় এবাভ্যবর্ষচ্চ সমরে কৃষ্ণপাণ্ডবৌ
78.25
শরবর্ষেণ মহতা ততোঽহৃষ্যন্ত তাবকাঃ
চক্রুর্বাদিত্রনিনদান্সিংহনাদরবাংস্তথা
78.26
ততঃ ক্রুদ্ধো রণে পার্থঃ সৃক্কণী পরিসংলিহন্
নাপশ্যত ততোঽস্যাঙ্গং যন্ন স্যাদ্বর্মরক্ষিতম্
78.27
ততোঽস্য নিশিতৈর্বাণৈঃ সুমুক্তৈরন্তকোপমৈঃ
হয়াংশ্চকার নির্দেহানুভৌ চ পার্ষ্ণিসারথী
78.28
ধনুরস্যাচ্ছিনচ্চিত্রং হস্তাবাপং চ বীর্যবান্
রথং চ শকলীকর্তুং সব্যসাচী প্রচক্রমে
78.29
দুর্যোধনং চ বাণাভ্যাং তীক্ষ্ণাভ্যাং বিরথীকৃতম্
অবিধ্যদ্ধস্ততলয়োরুভয়োরর্জুনস্তদা
78.30
তং কৃচ্ছ্রামাপদং প্রাপ্তং দৃষ্ট্বা পরমধন্বিনঃ
সমাপেতুঃ পরীপ্সন্তো ধনংজয়শরার্দিতম্
78.31
তে রথৈর্বহুসাহস্রৈঃ কল্পিতৈঃ কুঞ্জরৈর্হয়ৈঃ
পদাত্যোঘৈশ্চ সংরব্ধৈঃ পরিবব্রুর্ধনংজয়ম্
78.32
অথ নার্জুনগোবিন্দৌ রথো বাপি ব্যদৃশ্যত
অস্ত্রবর্ষেণ মহতা জনৌঘৈশ্চাপি সংবৃতৌ
78.33
ততোঽর্জুনোঽস্ত্রবীর্যেণ নিজঘ্নে তাং বরূথিনীম্
তত্র ব্যঙ্গীকৃতাঃ পেতুঃ শতশোঽথ রথদ্বিপাঃ
78.34
তে হতা হন্যমানাশ্চ ন্যগৃহ্ণংস্তং রথোত্তমম্
স রথস্তম্ভিতস্তস্থৌ ক্রোশমাত্রং সমন্ততঃ
78.35
ততোঽর্জুনং বৃষ্ণিবীরস্ত্বরিতো বাক্যমব্রবীৎ
ধনুর্বিস্ফারয়াত্যর্থমহং ধ্মাস্যামি চাম্বুজম্
78.36
ততো বিস্ফার্য বলবদ্গাণ্ডীবং জঘ্নিবান্রিপূন্
মহতা শরবর্ষেণ তলশব্দেন চার্জুনঃ
78.37
পাঞ্চজন্যং চ বলবদ্দধ্মৌ তারেণ কেশবঃ
রজসা ধ্বস্তপক্ষ্মান্তঃ প্রস্বিন্নবদনো ভৃশম্
78.38
তস্য শঙ্খস্য নাদেন ধনুষো নিস্বনেন চ
নিঃসত্ত্বাশ্চ সসত্ত্বাশ্চ ক্ষিতৌ পেতুস্তদা জনাঃ
78.39
তৈর্বিমুক্তো রথো রেজে বায্বীরিত ইবাম্বুদঃ
জয়দ্রথস্য গোপ্তারস্ততঃ ক্ষুব্ধাঃ সহানুগাঃ
78.40
তে দৃষ্ট্বা সহসা পার্থং গোপ্তারঃ সৈন্ধবস্য তু
চক্রুর্নাদান্বহুবিধান্কম্পয়ন্তো বসুংধরাম্
78.41
বাণশব্দরবাংশ্চোগ্রান্বিমিশ্রাঞ্শঙ্খনিস্বনৈঃ
প্রাদুশ্চক্রুর্মহাত্মানঃ সিংহনাদরবানপি
78.42
তং শ্রুত্বা নিনদং ঘোরং তাবকানাং সমুত্থিতম্
প্রদধ্মতুস্তদা শঙ্খৌ বাসুদেবধনংজয়ৌ
78.43
তেন শব্দেন মহতা পূরিতেয়ং বসুংধরা
সশৈলা সার্ণবদ্বীপা সপাতালা বিশাং পতে
78.44
স শব্দো ভরতশ্রেষ্ঠ ব্যাপ্য সর্বা দিশো দশ
প্রতিসস্বান তত্রৈব কুরুপাণ্ডবয়োর্বলে
78.45
তাবকা রথিনস্তত্র দৃষ্ট্বা কৃষ্ণধনংজয়ৌ
সংরম্ভং পরমং প্রাপ্তাস্ত্বরমাণা মহারথাঃ
78.46
অথ কৃষ্ণৌ মহাভাগৌ তাবকা দৃশ্য দংশিতৌ
অভ্যদ্রবন্ত সংক্রুদ্ধাস্তদদ্ভুতমিবাভবৎ