Utshovঅধ্যায় 77
77.1
বাসুদেব উবাচ
সুয়োধনমতিক্রান্তমেনং পশ্য ধনংজয়
আপদ্গতমিমং মন্যে নাস্ত্যস্য সদৃশো রথঃ
77.2
দূরপাতী মহেষ্বাসঃ কৃতাস্ত্রো যুদ্ধদুর্মদঃ
দৃঢাস্ত্রশ্চিত্রয়োধী চ ধার্তরাষ্ট্রো মহাবলঃ
77.3
অত্যন্তসুখসংবৃদ্ধো মানিতশ্চ মহারথৈঃ
কৃতী চ সততং পার্থ নিত্যং দ্বেষ্টি চ পাণ্ডবান্
77.4
তেন যুদ্ধমহং মন্যে প্রাপ্তকালং তবানঘ
অত্র বো দ্যূতমায়াতং বিজয়ায়েতরায় বা
77.5
অত্র ক্রোধবিষং পার্থ বিমুঞ্চ চিরসংভৃতম্
এষ মূলমনর্থানাং পাণ্ডবানাং মহারথঃ
77.6
সোঽয়ং প্রাপ্তস্তবাক্ষেপং পশ্য সাফল্যমাত্মনঃ
কথং হি রাজা রাজ্যার্থী ত্বয়া গচ্ছেত সংয়ুগম্
77.7
দিষ্ট্যা ত্বিদানীং সংপ্রাপ্ত এষ তে বাণগোচরম্
স যথা জীবিতং জহ্যাত্তথা কুরু ধনংজয়
77.8
ঐশ্বর্যমদসংমূঢো নৈষ দুঃখমুপেয়িবান্
ন চ তে সংয়ুগে বীর্যং জানাতি পুরুষর্ষভ
77.9
ত্বাং হি লোকাস্ত্রয়ঃ পার্থ সসুরাসুরমানুষাঃ
নোত্সহন্তে রণে জেতুং কিমুতৈকঃ সুয়োধনঃ
77.10
স দিষ্ট্যা সমনুপ্রাপ্তস্তব পার্থ রথান্তিকম্
জহ্যেনং বৈ মহাবাহো যথা বৃত্রং পুরংদরঃ
77.11
এষ হ্যনর্থে সততং পরাক্রান্তস্তবানঘ
নিকৃত্যা ধর্মরাজং চ দ্যূতে বঞ্চিতবানয়ম্
77.12
বহূনি সুনৃশংসানি কৃতান্যেতেন মানদ
যুষ্মাসু পাপমতিনা অপাপেষ্বেব নিত্যদা
77.13
তমনার্যং সদা ক্ষুদ্রং পুরুষং কামচারিণম্
আর্যাং যুদ্ধে মতিং কৃত্বা জহি পার্থাবিচারয়ন্
77.14
নিকৃত্যা রাজ্যহরণং বনবাসং চ পাণ্ডব
পরিক্লেশং চ কৃষ্ণায়া হৃদি কৃত্বা পরাক্রম
77.15
দিষ্ট্যৈষ তব বাণানাং গোচরে পরিবর্ততে
প্রতিঘাতায় কার্যস্য দিষ্ট্যা চ যততেঽগ্রতঃ
77.16
দিষ্ট্যা জানাতি সংগ্রামে যোদ্ধব্যং হি ত্বয়া সহ
দিষ্ট্যা চ সফলাঃ পার্থ সর্বে কামা হি কামিতাঃ
77.17
তস্মাজ্জহি রণে পার্থ ধার্তরাষ্ট্রং কুলাধমম্
যথেন্দ্রেণ হতঃ পূর্বং জম্ভো দেবাসুরে মৃধে
77.18
অস্মিন্হতে ত্বয়া সৈন্যমনাথং ভিদ্যতামিদম্
বৈরস্যাস্যাস্ত্ববভৃথো মূলং ছিন্ধি দুরাত্মনাম্
77.19
সংজয় উবাচ
তং তথেত্যব্রবীত্পার্থঃ কৃত্যরূপমিদং মম
সর্বমন্যদনাদৃত্য গচ্ছ যত্র সুয়োধনঃ
77.20
যেনৈতদ্দীর্ঘকালং নো ভুক্তং রাজ্যমকণ্টকম্
অপ্যস্য যুধি বিক্রম্য ছিন্দ্যাং মূর্ধানমাহবে
77.21
অপি তস্যা অনর্হায়াঃ পরিক্লেশস্য মাধব
কৃষ্ণায়াঃ শক্নুয়াং গন্তুং পদং কেশপ্রধর্ষণে
77.22
ইত্যেবং বাদিনৌ হৃষ্টৌ কৃষ্ণৌ শ্বেতান্হয়োত্তমান্
প্রেষয়ামাসতুঃ সংখ্যে প্রেপ্সন্তৌ তং নরাধিপম্
77.23
তয়োঃ সমীপং সংপ্রাপ্য পুত্রস্তে ভরতর্ষভ
ন চকার ভয়ং প্রাপ্তে ভয়ে মহতি মারিষ
77.24
তদস্য ক্ষত্রিয়াস্তত্র সর্ব এবাভ্যপূজয়ন্
যদর্জুনহৃষীকেশৌ প্রত্যুদ্যাতোঽবিচারয়ন্
77.25
ততঃ সর্বস্য সৈন্যস্য তাবকস্য বিশাং পতে
মহান্নাদো হ্যভূত্তত্র দৃষ্ট্বা রাজানমাহবে
77.26
তস্মিঞ্জনসমুন্নাদে প্রবৃত্তে ভৈরবে সতি
কদর্থীকৃত্য তে পুত্রঃ প্রত্যমিত্রমবারয়ৎ
77.27
আবারিতস্তু কৌন্তেয়স্তব পুত্রেণ ধন্বিনা
সংরম্ভমগমদ্ভূয়ঃ স চ তস্মিন্পরংতপঃ
77.28
তৌ দৃষ্ট্বা প্রতিসংরব্ধৌ দুর্যোধনধনংজয়ৌ
অভ্যবৈক্ষন্ত রাজানো ভীমরূপাঃ সমন্ততঃ
77.29
দৃষ্ট্বা তু পার্থং সংরব্ধং বাসুদেবং চ মারিষ
প্রহসন্নিব পুত্রস্তে যোদ্ধুকামঃ সমাহ্বয়ৎ
77.30
ততঃ প্রহৃষ্টো দাশার্হঃ পাণ্ডবশ্চ ধনংজয়ঃ
ব্যাক্রোশেতাং মহানাদং দধ্মতুশ্চাম্বুজোত্তমৌ
77.31
তৌ হৃষ্টরূপৌ সংপ্রেক্ষ্য কৌরবেয়াশ্চ সর্বশঃ
নিরাশাঃ সমপদ্যন্ত পুত্রস্য তব জীবিতে
77.32
শোকমীয়ুঃ পরং চৈব কুরবঃ সর্ব এব তে
অমন্যন্ত চ পুত্রং তে বৈশ্বানরমুখে হুতম্
77.33
তথা তু দৃষ্ট্বা যোধাস্তে প্রহৃষ্টৌ কৃষ্ণপাণ্ডবৌ
হতো রাজা হতো রাজেত্যূচুরেবং ভয়ার্দিতাঃ
77.34
জনস্য সংনিনাদং তু শ্রুত্বা দুর্যোধনোঽব্রবীৎ
ব্যেতু বো ভীরহং কৃষ্ণৌ প্রেষয়িষ্যামি মৃত্যবে
77.35
ইত্যুক্ত্বা সৈনিকান্সর্বাঞ্জয়াপেক্ষী নরাধিপঃ
পার্থমাভাষ্য সংরম্ভাদিদং বচনমব্রবীৎ
77.36
পার্থ যচ্ছিক্ষিতং তেঽস্ত্রং দিব্যং মানুষমেব চ
তদ্দর্শয় ময়ি ক্ষিপ্রং যদি জাতোঽসি পাণ্ডুনা
77.37
যদ্বলং তব বীর্যং চ কেশবস্য তথৈব চ
তত্কুরুষ্ব ময়ি ক্ষিপ্রং পশ্যামস্তব পৌরুষম্
77.38
অস্মত্পরোক্ষং কর্মাণি প্রবদন্তি কৃতানি তে
স্বামিসত্কারয়ুক্তানি যানি তানীহ দর্শয়