Utshovঅধ্যায় 76
76.1
সংজয় উবাচ
স্রংসন্ত ইব মজ্জানস্তাবকানাং ভয়ান্নৃপ
তৌ দৃষ্ট্বা সমতিক্রান্তৌ বাসুদেবধনংজয়ৌ
76.2
সর্বে তু প্রতিসংরব্ধা হ্রীমন্তঃ সত্ত্বচোদিতাঃ
স্থিরীবূতা মহাত্মানঃ প্রত্যগচ্ছন্ধনংজয়ম্
76.3
যে গতাঃ পাণ্ডবং যুদ্ধে ক্রোধামর্ষসমন্বিতাঃ
তেঽদ্যাপি ন নিবর্তন্তে সিন্ধবঃ সাগরাদিব
76.4
অসন্তস্তু ন্যবর্তন্ত বেদেভ্য ইব নাস্তিকাঃ
নরকং ভজমানাস্তে প্রত্যপদ্যন্ত কিল্বিষম্
76.5
তাবতীত্য রথানীকং বিমুক্তৌ পুরুষর্ষভৌ
দদৃশাতে যথা রাহোরাস্যান্মুক্তৌ প্রভাকরৌ
76.6
মত্স্যাবিব মহাজালং বিদার্য বিগতজ্বরৌ
তথা কৃষ্ণাবদৃশ্যেতাং সেনাজালং বিদার্য তৎ
76.7
বিমুক্তৌ শস্ত্রসংবাধাদ্দ্রোণানীকাত্সুদুর্ভিদাৎ
অদৃশ্যেতাং মহাত্মানৌ কালসূর্যাবিবোদিতৌ
76.8
অস্ত্রসংবাধনির্মুক্তৌ বিমুক্তৌ শস্ত্রসংকটাৎ
অদৃশ্যেতাং মহাত্মানৌ শত্রুসংবাধকারিণৌ
76.9
বিমুক্তৌ জ্বলনস্পর্শান্মকরাস্যাজ্ঝষাবিব
ব্যক্ষোভয়েতাং সেনাং তৌ সমুদ্রং মকরাবিব
76.10
তাবকাস্তব পুত্রাশ্চ দ্রোণানীকস্থয়োস্তয়োঃ
নৈতৌ তরিষ্যতো দ্রোণমিতি চক্রুস্তদা মতিম্
76.11
তৌ তু দৃষ্ট্বা ব্যতিক্রান্তৌ দ্রোণানীকং মহাদ্যুতী
নাশশংসুর্মহারাজ সিন্ধুরাজস্য জীবিতম্
76.12
আশা বলবতী রাজন্পুত্রাণামভবত্তব
দ্রোণহার্দিক্যয়োঃ কৃষ্ণৌ ন মোক্ষ্যেতে ইতি প্রভো
76.13
তামাশাং বিফলাং কৃত্বা নিস্তীর্ণৌ তৌ পরংতপৌ
দ্রোণানীকং মহারাজ ভোজানীকং চ দুস্তরম্
76.14
অথ দৃষ্ট্বা ব্যতিক্রান্তৌ জ্বলিতাবিব পাবকৌ
নিরাশাঃ সিন্ধুরাজস্য জীবিতং নাশশংসিরে
76.15
মিথশ্চ সমভাষেতামভীতৌ ভয়বর্ধনৌ
জয়দ্রথবধে বাচস্তাস্তাঃ কৃষ্ণধনংজয়ৌ
76.16
অসৌ মধ্যে কৃতঃ ষড্ভির্ধার্তরাষ্ট্রৈর্মহারথৈঃ
চক্ষুর্বিষয়সংপ্রাপ্তো ন নৌ মোক্ষ্যতি সৈন্ধবঃ
76.17
যদ্যস্য সমরে গোপ্তা শক্রো দেবগণৈঃ সহ
তথাপ্যেনং হনিষ্যাব ইতি কৃষ্ণাবভাষতাম্
76.18
ইতি কৃষ্ণৌ মহাবাহূ মিথঃ কথয়তাং তদা
সিন্ধুরাজমবেক্ষন্তৌ তত্পুত্রাস্তব শুশ্রুবুঃ
76.19
অতীত্য মরুধন্বেব প্রয়ান্তৌ তৃষিতৌ গজৌ
পীত্বা বারি সমাশ্বস্তৌ তথৈবাস্তামরিংদমৌ
76.20
ব্যাঘ্রসিংহগজাকীর্ণানতিক্রম্যেব পর্বতান্
অদৃশ্যেতাং মহাবাহূ যথা মৃত্যুজরাতিগৌ
76.21
তথা হি মুখবর্ণোঽয়মনয়োরিতি মেনিরে
তাবকা দৃশ্য মুক্তৌ তৌ বিক্রোশন্তি স্ম সর্বতঃ
76.22
দ্রোণাদাশীবিষাকারাজ্জ্বলিতাদিব পাবকাৎ
অন্যেভ্যঃ পার্থিবেভ্যশ্চ ভাস্বন্তাবিব ভাস্করৌ
76.23
তৌ মুক্তৌ সাগরপ্রখ্যাদ্দ্রোণানীকাদরিংদমৌ
অদৃশ্যেতাং মুদা যুক্তৌ সমুত্তীর্যার্ণবং যথা
76.24
শস্ত্রৌঘান্মহতো মুক্তৌ দ্রোণহার্দিক্যরক্ষিতান্
রোচমানাবদৃশ্যেতামিন্দ্রাগ্ন্যোঃ সদৃশৌ রণে
76.25
উদ্ভিন্নরুধিরৌ কৃষ্ণৌ ভারদ্বাজস্য সায়কৈঃ
শিতৈশ্চিতৌ ব্যরোচেতাং কর্ণিকারৈরিবাচলৌ
76.26
দ্রোণগ্রাহহ্রদান্মুক্তৌ শক্ত্যাশীবিষসংকটাৎ
অয়ঃশরোগ্রমকরাত্ক্ষত্রিয়প্রবরাম্ভসঃ
76.27
জ্যাঘোষতলনির্হ্রাদাদ্গদানিস্ত্রিংশবিদ্যুতঃ
দ্রোণাস্ত্রমেঘান্নির্মুক্তৌ সূর্যেন্দূ তিমিরাদিব
76.28
বাহুভ্যামিব সংতীর্ণৌ সিন্ধুষষ্ঠাঃ সমুদ্রগাঃ
তপান্তে সরিতঃ পূর্ণা মহাগ্রাহসমাকুলাঃ
76.29
ইতি কৃষ্ণৌ মহেষ্বাসৌ যশসা লোকবিশ্রুতৌ
সর্বভূতান্যমন্যন্ত দ্রোণাস্ত্রবলবিস্ময়াৎ
76.30
জয়দ্রথং সমীপস্থমবেক্ষন্তৌ জিঘাংসয়া
রুরুং নিপানে লিপ্সন্তৌ ব্যাঘ্রবত্তাবতিষ্ঠতাম্
76.31
যথা হি মুখবর্ণোঽয়মনয়োরিতি মেনিরে
তব যোধা মহারাজ হতমেব জয়দ্রথম্
76.32
লোহিতাক্ষৌ মহাবাহূ সংয়ত্তৌ কৃষ্ণপাণ্ডবৌ
সিন্ধুরাজমভিপ্রেক্ষ্য হৃষ্টৌ ব্যনদতাং মুহুঃ
76.33
শৌরেরভীশুহস্তস্য পার্থস্য চ ধনুষ্মতঃ
তয়োরাসীত্প্রতিভ্রাজঃ সূর্যপাবকয়োরিব
76.34
হর্ষ এব তয়োরাসীদ্দ্রোণানীকপ্রমুক্তয়োঃ
সমীপে সৈন্ধবং দৃষ্ট্বা শ্যেনয়োরামিষং যথা
76.35
তৌ তু সৈন্ধবমালোক্য বর্তমানমিবান্তিকে
সহসা পেততুঃ ক্রুদ্ধৌ ক্ষিপ্রং শ্যেনাবিবামিষে
76.36
তৌ তু দৃষ্ট্বা ব্যতিক্রান্তৌ হৃষীকেশধনংজয়ৌ
সিন্ধুরাজস্য রক্ষার্থং পরাক্রান্তঃ সুতস্তব
76.37
দ্রোণেনাবদ্ধকবচো রাজা দুর্যোধনস্তদা
যয়াবেকরথেনাজৌ হয়সংস্কারবিত্প্রভো
76.38
কৃষ্ণপার্থৌ মহেষ্বাসৌ ব্যতিক্রম্যাথ তে সুতঃ
অগ্রতঃ পুণ্ডরীকাক্ষং প্রতীয়ায় নরাধিপ
76.39
ততঃ সর্বেষু সৈন্যেষু বাদিত্রাণি প্রহৃষ্টবৎ
প্রাবাদ্যন্সমতিক্রান্তে তব পুত্রে ধনংজয়ম্
76.40
সিংহনাদরবাশ্চাসঞ্শঙ্খদুন্দুভিমিশ্রিতাঃ
দৃষ্ট্বা দুর্যোধনং তত্র কৃষ্ণয়োঃ প্রমুখে স্থিতম্
76.41
যে চ তে সিন্ধুরাজস্য গোপ্তারঃ পাবকোপমাঃ
তে প্রহৃষ্যন্ত সমরে দৃষ্ট্বা পুত্রং তবাভিভো
76.42
দৃষ্ট্বা দুর্যোধনং কৃষ্ণস্ত্বতিক্রান্তং সহানুগম্
অব্রবীদর্জুনং রাজন্প্রাপ্তকালমিদং বচঃ