Utshovঅধ্যায় 75
75.1
সংজয় উবাচ
সলিলে জনিতে তস্মিন্কৌন্তেয়েন মহাত্মনা
নিবারিতে দ্বিষত্সৈন্যে কৃতে চ শরবেশ্মনি
75.2
বাসুদেবো রথাত্তূর্ণমবতীর্য মহাদ্যুতিঃ
মোচয়ামাস তুরগান্বিতুন্নান্কঙ্কপত্রিভিঃ
75.3
অদৃষ্টপূর্বং তদ্দৃষ্ট্বা সিংহনাদো মহানভূৎ
সিদ্ধচারণসংঘানাং সৈনিকানাং চ সর্বশঃ
75.4
পদাতিনং তু কৌন্তেয়ং যুধ্যমানং নরর্ষভাঃ
নাশক্নুবন্বারয়িতুং তদদ্ভুতমিবাভবৎ
75.5
আপতত্সু রথৌঘেষু প্রভূতগজবাজিষু
নাসংভ্রমত্তদা পার্থস্তদস্য পুরুষানতি
75.6
ব্যসৃজন্ত শরৌঘাংস্তে পাণ্ডবং প্রতি পার্থিবাঃ
ন চাব্যথত ধর্মাত্মা বাসবিঃ পরবীরহা
75.7
স তানি শরজালানি গদাঃ প্রাসাংশ্চ বীর্যবান্
আগতানগ্রসত্পার্থঃ সরিতঃ সাগরো যথা
75.8
অস্ত্রবেগেন মহতা পার্থো বাহুবলেন চ
সর্বেষাং পার্থিবেন্দ্রাণামগ্রসত্তাঞ্শরোত্তমান্
75.9
তত্তু পার্থস্য বিক্রান্তং বাসুদেবস্য চোভয়োঃ
অপূজয়ন্মহারাজ কৌরবাঃ পরমাদ্ভুতম্
75.10
কিমদ্ভুততরং লোকে ভবিতাপ্যথ বাপ্যভূৎ
যদশ্বান্পার্থগোবিন্দৌ মোচয়ামাসতূ রণে
75.11
ভয়ং বিপুলমস্মাসু তাবধত্তাং নরোত্তমৌ
তেজো বিদধতুশ্চোগ্রং বিস্রব্ধৌ রণমূর্ধনি
75.12
অথোত্স্ময়ন্হৃষীকেশঃ স্ত্রীমধ্য ইব ভারত
অর্জুনেন কৃতে সংখ্যে শরগর্ভগৃহে তদা
75.13
উপাবর্তয়দব্যগ্রস্তানশ্বান্পুষ্করেক্ষণঃ
মিষতাং সর্বসৈন্যানাং ত্বদীয়ানাং বিশাং পতে
75.14
তেষাং শ্রমং চ গ্লানিং চ বেপথুং বমথুং ব্রণান্
সর্বং ব্যপানুদত্কৃষ্ণঃ কুশলো হ্যশ্বকর্মণি
75.15
শল্যানুদ্ধৃত্য পাণিভ্যাং পরিমৃজ্য চ তান্হয়ান্
উপাবৃত্য যথান্যায়ং পায়য়ামাস বারি সঃ
75.16
স তাঁল্লব্ধোদকান্স্নাতাঞ্জগ্ধান্নান্বিগতক্লমান্
যোজয়ামাস সংহৃষ্টঃ পুনরেব রথোত্তমে
75.17
স তং রথবরং শৌরিঃ সর্বশস্ত্রভৃতাং বরঃ
সমাস্থায় মহাতেজাঃ সার্জুনঃ প্রয়য়ৌ দ্রুতম্
75.18
রথং রথবরস্যাজৌ যুক্তং লব্ধোদকৈর্হয়ৈঃ
দৃষ্ট্বা কুরুবলশ্রেষ্ঠাঃ পুনর্বিমনসোঽভবন্
75.19
বিনিঃশ্বসন্তস্তে রাজন্ভগ্নদংষ্ট্রা ইবোরগাঃ
ধিগহো ধিগ্গতঃ পার্থঃ কৃষ্ণশ্চেত্যব্রুবন্পৃথক্
75.20
সর্বক্ষত্রস্য মিষতো রথেনৈকেন দংশিতৌ
বালক্রীডনকেনেব কদর্থীকৃত্য নো বলম্
75.21
ক্রোশতাং যতমানানামসংসক্তৌ পরংতপৌ
দর্শয়িত্বাত্মনো বীর্যং প্রয়াতৌ সর্বরাজসু
75.22
তৌ প্রয়াতৌ পুনর্দৃষ্ট্বা তদান্যে সৈনিকাব্রুবন্
ত্বরধ্বং কুরবঃ সর্বে বধে কৃষ্ণকিরীটিনোঃ
75.23
রথং যুক্ত্বা হি দাশার্হো মিষতাং সর্বধন্বিনাম্
জয়দ্রথায় যাত্যেষ কদর্থীকৃত্য নো রণে
75.24
তত্র কেচিন্মিথো রাজন্সমভাষন্ত ভূমিপাঃ
অদৃষ্টপূর্বং সংগ্রামে তদ্দৃষ্ট্বা মহদদ্ভুতম্
75.25
সর্বসৈন্যানি রাজা চ ধৃতরাষ্ট্রোঽত্যয়ং গতঃ
দুর্যোধনাপরাধেন ক্ষত্রং কৃত্স্না চ মেদিনী
75.26
বিলয়ং সমনুপ্রাপ্তা তচ্চ রাজা ন বুধ্যতে
ইত্যেবং ক্ষত্রিয়াস্তত্র ব্রুবন্ত্যন্যে চ ভারত
75.27
সিন্ধুরাজস্য যত্কৃত্যং গতস্য যমসাদনম্
তত্করোতু বৃথাদৃষ্টির্ধার্তরাষ্ট্রোঽনুপায়বিৎ
75.28
ততঃ শীঘ্রতরং প্রায়াত্পাণ্ডবঃ সৈন্ধবং প্রতি
নিবর্তমানে তিগ্মাংশৌ হৃষ্টৈঃ পীতোদকৈর্হয়ৈঃ
75.29
তং প্রয়ান্তং মহাবাহুং সর্বশস্ত্রভৃতাং বরম্
নাশক্নুবন্বারয়িতুং যোধাঃ ক্রুদ্ধমিবান্তকম্
75.30
বিদ্রাব্য তু ততঃ সৈন্যং পাণ্ডবঃ শত্রুতাপনঃ
যথা মৃগগণান্সিংহঃ সৈন্ধবার্থে ব্যলোডয়ৎ
75.31
গাহমানস্ত্বনীকানি তূর্ণমশ্বানচোদয়ৎ
বলাকবর্ণান্দাশার্হঃ পাঞ্চজন্যং ব্যনাদয়ৎ
75.32
কৌন্তেয়েনাগ্রতঃ সৃষ্টা ন্যপতন্পৃষ্ঠতঃ শরাঃ
তূর্ণাত্তূর্ণতরং হ্যশ্বাস্তেঽবহন্বাতরংহসঃ
75.33
বাতোদ্ধূতপতাকান্তং রথং জলদনিস্বনম্
ঘোরং কপিধ্বজং দৃষ্ট্বা বিষণ্ণা রথিনোঽভবন্
75.34
দিবাকরেঽথ রজসা সর্বতঃ সংবৃতে ভৃশম্
শরার্তাশ্চ রণে যোধা ন কৃষ্ণৌ শেকুরীক্ষিতুম্
75.35
ততো নৃপতয়ঃ ক্রুদ্ধাঃ পরিবব্রুর্ধনংজয়ম্
ক্ষত্রিয়া বহবশ্চান্যে জয়দ্রথবধৈষিণম্
75.36
অপনীয়ত্সু শল্যেষু ধিষ্ঠিতং পুরুষর্ষভম্
দুর্যোধনস্ত্বগাত্পার্থং ত্বরমাণো মহাহবে