Utshovঅধ্যায় 74
74.1
সংজয় উবাচ
পরিবর্তমানে ত্বাদিত্যে তত্র সূর্যস্য রশ্মিভিঃ
রজসা কীর্যমাণাশ্চ মন্দীভূতাশ্চ সৈনিকাঃ
74.2
তিষ্ঠতাং যুধ্যমানানাং পুনরাবর্ততামপি
ভজ্যতাং জয়তাং চৈব জগাম তদহঃ শনৈঃ
74.3
তথা তেষু বিষক্তেষু সৈন্যেষু জয়গৃদ্ধিষু
অর্জুনো বাসুদেবশ্চ সৈন্ধবায়ৈব জগ্মতুঃ
74.4
রথমার্গপ্রমাণং তু কৌন্তেয়ো নিশিতৈঃ শরৈঃ
চকার তত্র পন্থানং যয়ৌ যেন জনার্দনঃ
74.5
যত্র যত্র রথো যাতি পাণ্ডবস্য মহাত্মনঃ
তত্র তত্রৈব দীর্যন্তে সেনাস্তব বিশাং পতে
74.6
রথশিক্ষাং তু দাশার্হো দর্শয়ামাস বীর্যবান্
উত্তমাধমমধ্যানি মণ্ডলানি বিদর্শয়ন্
74.7
তে তু নামাঙ্কিতাঃ পীতাঃ কালজ্বলনসংনিভাঃ
স্নায়ুনদ্ধাঃ সুপর্বাণঃ পৃথবো দীর্ঘগামিনঃ
74.8
বৈণবায়স্ময়শরাঃ স্বায়তা বিবিধাননাঃ
রুধিরং পতগৈঃ সার্ধং প্রাণিনাং পপুরাহবে
74.9
রথস্থিতঃ ক্রোশমাত্রে যানস্যত্যর্জুনঃ শরান্
রথে ক্রোশমতিক্রান্তে তস্য তে ঘ্নন্তি শাত্রবান্
74.10
তার্ক্ষ্যমারুতরংহোভির্বাজিভিঃ সাধুবাহিভিঃ
তথাগচ্ছদ্ধৃষীকেশঃ কৃত্স্নং বিস্মাপয়ঞ্জগৎ
74.11
ন তথা গচ্ছতি রথস্তপনস্য বিশাং পতে
নেন্দ্রস্য ন চ রুদ্রস্য নাপি বৈশ্রবণস্য চ
74.12
নান্যস্য সমরে রাজন্গতপূর্বস্তথা রথঃ
যথা যয়াবর্জুনস্য মনোভিপ্রায়শীঘ্রগঃ
74.13
প্রবিশ্য তু রণে রাজন্কেশবঃ পরবীরহা
সেনামধ্যে হয়াংস্তূর্ণং চোদয়ামাস ভারত
74.14
ততস্তস্য রথৌঘস্য মধ্যং প্রাপ্য হয়োত্তমাঃ
কৃচ্ছ্রেণ রথমূহুস্তং ক্ষুত্পিপাসাশ্রমান্বিতাঃ
74.15
ক্ষতাশ্চ বহুভিঃ শস্ত্রৈর্যুদ্ধশৌণ্ডৈরনেকশঃ
মণ্ডলানি বিচিত্রাণি বিচেরুস্তে মুহুর্মুহুঃ
74.16
হতানাং বাজিনাগানাং রথানাং চ নরৈঃ সহ
উপরিষ্টাদতিক্রান্তাঃ শৈলাভানাং সহস্রশঃ
74.17
এতস্মিন্নন্তরে বীরাবাবন্ত্যৌ ভ্রাতরৌ নৃপ
সহসেনৌ সমার্ছেতাং পাণ্ডবং ক্লান্তবাহনম্
74.18
তাবর্জুনং চতুঃষষ্ট্যা সপ্তত্যা চ জনার্দনম্
শরাণাং চ শতেনাশ্বানবিধ্যেতাং মুদান্বিতৌ
74.19
তাবর্জুনো মহারাজ নবভির্নতপর্বভিঃ
আজঘান রণে ক্রুদ্ধো মর্মজ্ঞো মর্মভেদিভিঃ
74.20
ততস্তৌ তু শরৌঘেণ বীভত্সুং সহকেশবম্
আচ্ছাদয়েতাং সংরব্ধৌ সিংহনাদং চ নেদতুঃ
74.21
তয়োস্তু ধনুষী চিত্রে ভল্লাভ্যাং শ্বেতবাহনঃ
চিচ্ছেদ সমরে তূর্ণং ধ্বজৌ চ কনকোজ্জ্বলৌ
74.22
অথান্যে ধনুষী রাজন্প্রগৃহ্য সমরে তদা
পাণ্ডবং ভৃশসংক্রুদ্ধাবর্দয়ামাসতুঃ শরৈঃ
74.23
তয়োস্তু ভৃশসংক্রুদ্ধঃ শরাভ্যাং পাণ্ডুনন্দনঃ
চিচ্ছেদ ধনুষী তূর্ণং ভূয় এব ধনংজয়ঃ
74.24
তথান্যৈর্বিশিখৈস্তূর্ণং হেমপুঙ্খৈঃ শিলাশিতৈঃ
জঘানাশ্বান্সপদাতাংস্তথোভৌ পার্ষ্ণিসারথী
74.25
জ্যেষ্ঠস্য চ শিরঃ কায়াত্ক্ষুরপ্রেণ ন্যকৃন্তত
স পপাত হতঃ পৃথ্ব্যাং বাতরুগ্ণ ইব দ্রুমঃ
74.26
বিন্দং তু নিহতং দৃষ্ট্বা অনুবিন্দঃ প্রতাপবান্
হতাশ্বং রথমুত্সৃজ্য গদাং গৃহ্য মহাবলঃ
74.27
অভ্যদ্রবত সংগ্রামে ভ্রাতুর্বধমনুস্মরন্
গদয়া গদিনাং শ্রেষ্ঠো নৃত্যন্নিব মহারথঃ
74.28
অনুবিন্দস্তু গদয়া ললাটে মধুসূদনম্
স্পৃষ্ট্বা নাকম্পয়ত্ক্রুদ্ধো মৈনাকমিব পর্বতম্
74.29
তস্যার্জুনঃ শরৈঃ ষড্ভির্গ্রীবাং পাদৌ ভুজৌ শিরঃ
নিচকর্ত স সংছিন্নঃ পপাতাদ্রিচয়ো যথা
74.30
ততস্তৌ নিহতৌ দৃষ্ট্বা তয়ো রাজন্পদানুগাঃ
অভ্যদ্রবন্ত সংক্রুদ্ধাঃ কিরন্তঃ শতশঃ শরান্
74.31
তানর্জুনঃ শরৈস্তূর্ণং নিহত্য ভরতর্ষভ
ব্যরোচত যথা বহ্নির্দাবং দগ্ধ্বা হিমাত্যয়ে
74.32
তয়োঃ সেনামতিক্রম্য কৃচ্ছ্রান্নির্যাদ্ধনংজয়ঃ
বিবভৌ জলদান্ভিত্ত্বা দিবাকর ইবোদিতঃ
74.33
তং দৃষ্ট্বা কুরবস্ত্রস্তাঃ প্রহৃষ্টাশ্চাভবন্পুনঃ
অভ্যবর্ষংস্তদা পার্থং সমন্তাদ্ভরতর্ষভ
74.34
শ্রান্তং চৈনং সমালক্ষ্য জ্ঞাত্বা দূরে চ সৈন্ধবম্
সিংহনাদেন মহতা সর্বতঃ পর্যবারয়ন্
74.35
তাংস্তু দৃষ্ট্বা সুসংরব্ধানুত্স্ময়ন্পুরুষর্ষভঃ
শনকৈরিব দাশার্হমর্জুনো বাক্যমব্রবীৎ
74.36
শরার্দিতাশ্চ গ্লানাশ্চ হয়া দূরে চ সৈন্ধবঃ
কিমিহানন্তরং কার্যং জ্যায়িষ্ঠং তব রোচতে
74.37
ব্রূহি কৃষ্ণ যথাতত্ত্বং ত্বং হি প্রাজ্ঞতমঃ সদা
ভবন্নেত্রা রণে শত্রূন্বিজেষ্যন্তীহ পাণ্ডবাঃ
74.38
মম ত্বনন্তরং কৃত্যং যদ্বৈ তত্সংনিবোধ মে
হয়ান্বিমুচ্য হি সুখং বিশল্যান্কুরু মাধব
74.39
এবমুক্তস্তু পার্থেন কেশবঃ প্রত্যুবাচ তম্
মমাপ্যেতন্মতং পার্থ যদিদং তে প্রভাষিতম্
74.40
অর্জুন উবাচ
অহমাবারয়িষ্যামি সর্বসৈন্যানি কেশব
ত্বমপ্যত্র যথান্যায়ং কুরু কার্যমনন্তরম্
74.41
সংজয় উবাচ
সোঽবতীর্য রথোপস্থাদসংভ্রান্তো ধনংজয়ঃ
গাণ্ডীবং ধনুরাদায় তস্থৌ গিরিরিবাচলঃ
74.42
তমভ্যধাবন্ক্রোশন্তঃ ক্ষত্রিয়া জয়কাঙ্ক্ষিণঃ
ইদং ছিদ্রমিতি জ্ঞাত্বা ধরণীস্থং ধনংজয়ম্
74.43
তমেকং রথবংশেন মহতা পর্যবারয়ন্
বিকর্ষন্তশ্চ চাপানি বিসৃজন্তশ্চ সায়কান্
74.44
অস্ত্রাণি চ বিচিত্রাণি ক্রুদ্ধাস্তত্র ব্যদর্শয়ন্
ছাদয়ন্তঃ শরৈঃ পার্থং মেঘা ইব দিবাকরম্
74.45
অভ্যদ্রবন্ত বেগেন ক্ষত্রিয়াঃ ক্ষত্রিয়র্ষভম্
রথসিংহং রথোদারাঃ সিংহং মত্তা ইব দ্বিপাঃ
74.46
তত্র পার্থস্য ভুজয়োর্মহদ্বলমদৃশ্যত
যত্ক্রুদ্ধো বহুলাঃ সেনাঃ সর্বতঃ সমবারয়ৎ
74.47
অস্ত্রৈরস্ত্রাণি সংবার্য দ্বিষতাং সর্বতো বিভুঃ
ইষুভির্বহুভিস্তূর্ণং সর্বানেব সমাবৃণোৎ
74.48
তত্রান্তরিক্ষে বাণানাং প্রগাঢানাং বিশাং পতে
সংঘর্ষেণ মহার্চিষ্মান্পাবকঃ সমজায়ত
74.49
তত্র তত্র মহেষ্বাসৈঃ শ্বসদ্ভিঃ শোণিতোক্ষিতৈঃ
হয়ৈর্নাগৈশ্চ সংভিন্নৈর্নদদ্ভিশ্চারিকর্শনৈঃ
74.50
সংরব্ধৈশ্চারিভির্বীরৈঃ প্রার্থয়দ্ভির্জয়ং মৃধে
একস্থৈর্বহুভিঃ ক্রুদ্ধৈরূষ্মেব সমজায়ত
74.51
শরোর্মিণং ধ্বজাবর্তং নাগনক্রং দুরত্যয়ম্
পদাতিমত্স্যকলিলং শঙ্খদুন্দুভিনিস্বনম্
74.52
অসংখ্যেয়মপারং চ রজোঽঽভীলমতীব চ
উষ্ণীষকমঠচ্ছন্নং পতাকাফেনমালিনম্
74.53
রথসাগরমক্ষোভ্যং মাতঙ্গাঙ্গশিলাচিতম্
বেলাভূতস্তদা পার্থঃ পত্রিভিঃ সমবারয়ৎ
74.54
ততো জনার্দনঃ সংখ্যে প্রিয়ং পুরুষসত্তমম্
অসংভ্রান্তো মহাবাহুরর্জুনং বাক্যমব্রবীৎ
74.55
উদপানমিহাশ্বানাং নালমস্তি রণেঽর্জুন
পরীপ্সন্তে জলং চেমে পেয়ং ন ত্ববগাহনম্
74.56
ইদমস্তীত্যসংভ্রান্তো ব্রুবন্নস্ত্রেণ মেদিনীম্
অভিহত্যার্জুনশ্চক্রে বাজিপানং সরঃ শুভম্
74.57
শরবংশং শরস্থূণং শরাচ্ছাদনমদ্ভুতম্
শরবেশ্মাকরোত্পার্থস্ত্বষ্টেবাদ্ভুতকর্মকৃৎ
74.58
ততঃ প্রহস্য গোবিন্দঃ সাধু সাধ্বিত্যথাব্রবীৎ
শরবেশ্মনি পার্থেন কৃতে তস্মিন্মহারণে