Utshovঅধ্যায় 73
73.1
ধৃতরাষ্ট্র উবাচ
বাণে তস্মিন্নিকৃত্তে তু ধৃষ্টদ্যুম্নে চ মোক্ষিতে
তেন বৃষ্ণিপ্রবীরেণ যুয়ুধানেন সংজয়
73.2
অমর্ষিতো মহেষ্বাসঃ সর্বশস্ত্রভৃতাং বরঃ
নরব্যাঘ্রঃ শিনেঃ পৌত্রে দ্রোণঃ কিমকরোদ্যুধি
73.3
সংজয় উবাচ
সংপ্রদ্রুতঃ ক্রোধবিষো ব্যাদিতাস্যশরাসনঃ
তীক্ষ্ণধারেষুদশনঃ শিতনারাচদংষ্ট্রবান্
73.4
সংরম্ভামর্ষতাম্রাক্ষো মহাহিরিব নিঃশ্বসন্
নরবীরপ্রমুদিতৈঃ শোণৈরশ্বৈর্মহাজবৈঃ
73.5
উত্পতদ্ভিরিবাকাশং ক্রমদ্ভিরিব সর্বতঃ
রুক্মপুঙ্খাঞ্শরানস্যন্যুয়ুধানমুপাদ্রবৎ
73.6
শরপাতমহাবর্ষং রথঘোষবলাহকম্
কার্মুকাকর্ষবিক্ষিপ্তং নারাচবহুবিদ্যুতম্
73.7
শক্তিখড্গাশনিধরং ক্রোধবেগসমুত্থিতম্
দ্রোণমেঘমনাবার্যং হয়মারুতচোদিতম্
73.8
দৃষ্ট্বৈবাভিপতন্তং তং শূরঃ পরপুরংজয়ঃ
উবাচ সূতং শৈনেয়ঃ প্রহসন্যুদ্ধদুর্মদঃ
73.9
এতং বৈ ব্রাহ্মণং ক্রূরং স্বকর্মণ্যনবস্থিতম্
আশ্রয়ং ধার্তরাষ্ট্রস্য রাজ্ঞো দুঃখভয়াবহম্
73.10
শীঘ্রং প্রজবিতৈরশ্বৈঃ প্রত্যুদ্যাহি প্রহৃষ্টবৎ
আচার্যং রাজপুত্রাণাং সততং শূরমানিনম্
73.11
ততো রজতসংকাশা মাধবস্য হয়োত্তমাঃ
দ্রোণস্যাভিমুখাঃ শীঘ্রমগচ্ছন্বাতরংহসঃ
73.12
ইষুজালাবৃতং ঘোরমন্ধকারমনন্তরম্
অনাধৃষ্যমিবান্যেষাং শূরাণামভবত্তদা
73.13
ততঃ শীঘ্রাস্ত্রবিদুষোর্দ্রোণসাত্বতয়োস্তদা
নান্তরং শরবৃষ্টীনাং দৃশ্যতে নরসিংহয়োঃ
73.14
ইষূণাং সংনিপাতেন শব্দো ধারাভিঘাতজঃ
শুশ্রুবে শক্রমুক্তানামশনীনামিব স্বনঃ
73.15
নারাচৈরতিবিদ্ধানাং শরাণাং রূপমাবভৌ
আশীবিষবিদষ্টানাং সর্পাণামিব ভারত
73.16
তয়োর্জ্যাতলনির্ঘোষো ব্যশ্রূয়ত সুদারুণঃ
অজস্রং শৈলশৃঙ্গাণাং বজ্রেণাহন্যতামিব
73.17
উভয়োস্তৌ রথৌ রাজংস্তে চাশ্বাস্তৌ চ সারথী
রুক্মপুঙ্খৈঃ শরৈশ্ছন্নাশ্চিত্ররূপা বভুস্তদা
73.18
নির্মলানামজিহ্মানাং নারাচানাং বিশাং পতে
নির্মুক্তাশীবিষাভানাং সংপাতোঽভূত্সুদারুণঃ
73.19
উভয়োঃ পতিতে ছত্রে তথৈব পতিতৌ ধ্বজৌ
উভৌ রুধিরসিক্তাঙ্গাবুভৌ চ বিজয়ৈষিণৌ
73.20
স্রবদ্ভিঃ শোণিতং গাত্রৈঃ প্রস্রুতাবিব বারণৌ
অন্যোন্যমভিবিধ্যেতাং জীবিতান্তকরৈঃ শরৈঃ
73.21
গর্জিতোত্ক্রুষ্টসংনাদাঃ শঙ্খদুন্দুভিনিস্বনাঃ
উপারমন্মহারাজ ব্যাজহার ন কশ্চন
73.22
তূষ্ণীংভূতান্যনীকানি যোধা যুদ্ধাদুপারমন্
দদৃশে দ্বৈরথং তাভ্যাং জাতকৌতূহলো জনঃ
73.23
রথিনো হস্তিয়ন্তারো হয়ারোহাঃ পদাতয়ঃ
অবৈক্ষন্তাচলৈর্নেত্রৈঃ পরিবার্য রথর্ষভৌ
73.24
হস্ত্যনীকান্যতিষ্ঠন্ত তথানীকানি বাজিনাম্
তথৈব রথবাহিন্যঃ প্রতিব্যূহ্য ব্যবস্থিতাঃ
73.25
মুক্তাবিদ্রুমচিত্রৈশ্চ মণিকাঞ্চনভূষিতৈঃ
ধ্বজৈরাভরণৈশ্চিত্রৈঃ কবচৈশ্চ হিরণ্ময়ৈঃ
73.26
বৈজয়ন্তীপতাকাভিঃ পরিস্তোমাঙ্গকম্বলৈঃ
বিমলৈর্নিশিতৈঃ শস্ত্রৈর্হয়ানাং চ প্রকীর্ণকৈঃ
73.27
জাতরূপময়ীভিশ্চ রাজতীভিশ্চ মূর্ধসু
গজানাং কুম্ভমালাভির্দন্তবেষ্টৈশ্চ ভারত
73.28
সবলাকাঃ সখদ্যোতাঃ সৈরাবতশতহ্রদাঃ
অদৃশ্যন্তোষ্ণপর্যায়ে মেঘানামিব বাগুরাঃ
73.29
অপশ্যন্নস্মদীয়াশ্চ তে চ যৌধিষ্ঠিরাঃ স্থিতাঃ
তদ্যুদ্ধং যুয়ুধানস্য দ্রোণস্য চ মহাত্মনঃ
73.30
বিমানাগ্রগতা দেবা ব্রহ্মশক্রপুরোগমাঃ
সিদ্ধচারণসংঘাশ্চ বিদ্যাধরমহোরগাঃ
73.31
গতপ্রত্যাগতাক্ষেপৈশ্চিত্রৈঃ শস্ত্রবিঘাতিভিঃ
বিবিধৈর্বিস্ময়ং জগ্মুস্তয়োঃ পুরুষসিংহয়োঃ
73.32
হস্তলাঘবমস্ত্রেষু দর্শয়ন্তৌ মহাবলৌ
অন্যোন্যং সমবিধ্যেতাং শরৈস্তৌ দ্রোণসাত্যকী
73.33
ততো দ্রোণস্য দাশার্হঃ শরাংশ্চিচ্ছেদ সংয়ুগে
পত্রিভিঃ সুদৃঢৈরাশু ধনুশ্চৈব মহাদ্যুতে
73.34
নিমেষান্তরমাত্রেণ ভারদ্বাজোঽপরং ধনুঃ
সজ্যং চকার তচ্চাশু চিচ্ছেদাস্য স সাত্যকিঃ
73.35
ততস্ত্বরন্পুনর্দ্রোণো ধনুর্হস্তো ব্যতিষ্ঠত
সজ্যং সজ্যং পুনশ্চাস্য চিচ্ছেদ নিশিতৈঃ শরৈঃ
73.36
ততোঽস্য সংয়ুগে দ্রোণো দৃষ্ট্বা কর্মাতিমানুষম্
যুয়ুধানস্য রাজেন্দ্র মনসেদমচিন্তয়ৎ
73.37
এতদস্ত্রবলং রামে কার্তবীর্যে ধনংজয়ে
ভীষ্মে চ পুরুষব্যাঘ্রে যদিদং সাত্বতাং বরে
73.38
তং চাস্য মনসা দ্রোণঃ পূজয়ামাস বিক্রমম্
লাঘবং বাসবস্যেব সংপ্রেক্ষ্য দ্বিজসত্তমঃ
73.39
তুতোষাস্ত্রবিদাং শ্রেষ্ঠস্তথা দেবাঃ সবাসবাঃ
ন তামালক্ষয়ামাসুর্লঘুতাং শীঘ্রকারিণঃ
73.40
দেবাশ্চ যুয়ুধানস্য গন্ধর্বাশ্চ বিশাং পতে
সিদ্ধচারণসংঘাশ্চ বিদুর্দ্রোণস্য কর্ম তৎ
73.41
ততোঽন্যদ্ধনুরাদায় দ্রোণঃ ক্ষত্রিয়মর্দনঃ
অস্ত্রৈরস্ত্রবিদাং শ্রেষ্ঠো যোধয়ামাস ভারত
73.42
তস্যাস্ত্রাণ্যস্ত্রমায়াভিঃ প্রতিহন্য স সাত্যকিঃ
জঘান নিশিতৈর্বাণৈস্তদদ্ভুতমিবাভবৎ
73.43
তস্যাতিমানুষং কর্ম দৃষ্ট্বান্যৈরসমং রণে
যুক্তং যোগেন যোগজ্ঞাস্তাবকাঃ সমপূজয়ন্
73.44
যদস্ত্রমস্যতি দ্রোণস্তদেবাস্যতি সাত্যকিঃ
তমাচার্যোঽপ্যসংভ্রান্তোঽয়োধয়চ্ছত্রুতাপনঃ
73.45
ততঃ ক্রুদ্ধো মহারাজ ধনুর্বেদস্য পারগঃ
বধায় যুয়ুধানস্য দিব্যমস্ত্রমুদৈরয়ৎ
73.46
তদাগ্নেয়ং মহাঘোরং রিপুঘ্নমুপলক্ষ্য সঃ
অস্ত্রং দিব্যং মহেষ্বাসো বারুণং সমুদৈরয়ৎ
73.47
হাহাকারো মহানাসীদ্দৃষ্ট্বা দিব্যাস্ত্রধারিণৌ
ন বিচেরুস্তদাকাশে ভূতান্যাকাশগান্যপি
73.48
অস্ত্রে তে বারুণাগ্নেয়ে তাভ্যাং বাণসমাহিতে
ন তাবদভিষজ্যেতে ব্যাবর্তদথ ভাস্করঃ
73.49
ততো যুধিষ্ঠিরো রাজা ভীমসেনশ্চ পাণ্ডবঃ
নকুলঃ সহদেবশ্চ পর্যরক্ষন্ত সাত্যকিম্
73.50
ধৃষ্টদ্যুম্নমুখৈঃ সার্ধং বিরাটশ্চ সকেকয়ঃ
মত্স্যাঃ শাল্বেয়সেনাশ্চ দ্রোণমাজগ্মুরঞ্জসা
73.51
দুঃশাসনং পুরস্কৃত্য রাজপুত্রাঃ সহস্রশঃ
দ্রোণমভ্যুপপদ্যন্ত সপত্নৈঃ পরিবারিতম্
73.52
ততো যুদ্ধমভূদ্রাজংস্তব তেষাং চ ধন্বিনাম্
রজসা সংবৃতে লোকে শরজালসমাবৃতে
73.53
সর্বমাবিগ্নমভবন্ন প্রাজ্ঞায়ত কিংচন
সৈন্যেন রজসা ধ্বস্তে নির্মর্যাদমবর্তত