Utshovঅধ্যায় 72
72.1
সংজয় উবাচ
তথা তস্মিন্প্রবৃত্তে তু সংগ্রামে লোমহর্ষণে
কৌরবেয়াংস্ত্রিধাভূতান্পাণ্ডবাঃ সমুপাদ্রবন্
72.2
জলসংধং মহাবাহুর্ভীমসেনো ন্যবারয়ৎ
যুধিষ্ঠিরঃ সহানীকঃ কৃতবর্মাণমাহবে
72.3
কিরন্তং শরবর্ষাণি রোচমান ইবাংশুমান্
ধৃষ্টদ্যুম্নো মহারাজ দ্রোণমভ্যদ্রবদ্রণে
72.4
ততঃ প্রববৃতে যুদ্ধং ত্বরতাং সর্বধন্বিনাম্
কুরূণাং সোমকানাং চ সংক্রুদ্ধানাং পরস্পরম্
72.5
সংক্ষয়ে তু তথা ভূতে বর্তমানে মহাভয়ে
দ্বংদ্বীভূতেষু সৈন্যেষু যুধ্যমানেষ্বভীতবৎ
72.6
দ্রোণঃ পাঞ্চালপুত্রেণ বলী বলবতা সহ
বিচিক্ষেপ পৃষত্কৌঘাংস্তদদ্ভুতমিবাভবৎ
72.7
পুণ্ডরীকবনানীব বিধ্বস্তানি সমন্ততঃ
চক্রাতে দ্রোণপাঞ্চাল্যৌ নৃণাং শীর্ষাণ্যনেকশঃ
72.8
বিনিকীর্ণানি বীরাণামনীকেষু সমন্ততঃ
বস্ত্রাভরণশস্ত্রাণি ধ্বজবর্মায়ুধানি চ
72.9
তপনীয়বিচিত্রাঙ্গাঃ সংসিক্তা রুধিরেণ চ
সংসক্তা ইব দৃশ্যন্তে মেঘসংঘাঃ সবিদ্যুতঃ
72.10
কুঞ্জরাশ্বনরান্সংখ্যে পাতয়ন্তঃ পতত্রিভিঃ
তালমাত্রাণি চাপানি বিকর্ষন্তো মহারথাঃ
72.11
অসিচর্মাণি চাপানি শিরাংসি কবচানি চ
বিপ্রকীর্যন্ত শূরাণাং সংপ্রহারে মহাত্মনাম্
72.12
উত্থিতান্যগণেয়ানি কবন্ধানি সমন্ততঃ
অদৃশ্যন্ত মহারাজ তস্মিন্পরমসংকুলে
72.13
গৃধ্রাঃ কঙ্কা বডাঃ শ্যেনা বায়সা জম্বুকাস্তথা
বহবঃ পিশিতাশাশ্চ তত্রাদৃশ্যন্ত মারিষ
72.14
ভক্ষয়ন্তঃ স্ম মাংসানি পিবন্তশ্চাপি শোণিতম্
বিলুম্পন্তঃ স্ম কেশাংশ্চ মজ্জাশ্চ বহুধা নৃপ
72.15
আকর্ষন্তঃ শরীরাণি শরীরাবয়বাংস্তথা
নরাশ্বগজসংঘানাং শিরাংসি চ ততস্ততঃ
72.16
কৃতাস্ত্রা রণদীক্ষাভির্দীক্ষিতাঃ শরধারিণঃ
রণে জয়ং প্রার্থয়ন্তো ভৃশং যুয়ুধিরে তদা
72.17
অসিমার্গান্বহুবিধান্বিচেরুস্তাবকা রণে
ঋষ্টিভিঃ শক্তিভিঃ প্রাসৈঃ শূলতোমরপট্টিশৈঃ
72.18
গদাভিঃ পরিঘৈশ্চান্যে ব্যায়ুধাশ্চ ভুজৈরপি
অন্যোন্যং জঘ্নিরে ক্রুদ্ধা যুদ্ধরঙ্গগতা নরাঃ
72.19
রথিনো রথিভিঃ সার্ধমশ্বারোহাশ্চ সাদিভিঃ
মাতঙ্গা বরমাতঙ্গৈঃ পদাতাশ্চ পদাতিভিঃ
72.20
ক্ষীবা ইবান্যে চোন্মত্তা রঙ্গেষ্বিব চ চারণাঃ
উচ্চুক্রুশুস্তথান্যোন্যং জঘ্নুরন্যোন্যমাহবে
72.21
বর্তমানে তথা যুদ্ধে নির্মর্যাদে বিশাং পতে
ধৃষ্টদ্যুম্নো হয়ানশ্বৈর্দ্রোণস্য ব্যত্যমিশ্রয়ৎ
72.22
তে হয়া সাধ্বশোভন্ত বিমিশ্রা বাতরংহসঃ
পারাবতসবর্ণাশ্চ রক্তশোণাশ্চ সংয়ুগে
হয়াঃ শুশুভিরে রাজন্মেঘা ইব সবিদ্যুতঃ
72.23
ধৃষ্টদ্যুম্নশ্চ সংপ্রেক্ষ্য দ্রোণমভ্যাশমাগতম্
অসিচর্মাদদে বীরো ধনুরুত্সৃজ্য ভারত
72.24
চিকীর্ষুর্দুষ্করং কর্ম পার্ষতঃ পরবীরহা
ঈষয়া সমতিক্রম্য দ্রোণস্য রথমাবিশৎ
72.25
অতিষ্ঠদ্যুগমধ্যে স যুগসংনহনেষু চ
জঘানার্ধেষু চাশ্বানাং তত্সৈন্যান্যভ্যপূজয়ন্
72.26
খড্গেন চরতস্তস্য শোণাশ্বানধিতিষ্ঠতঃ
ন দদর্শান্তরং দ্রোণস্তদদ্ভুতমিবাভবৎ
72.27
যথা শ্যেনস্য পতনং বনেষ্বামিষগৃদ্ধিনঃ
তথৈবাসীদভীসারস্তস্য দ্রোণং জিঘাংসতঃ
72.28
ততঃ শরশতেনাস্য শতচন্দ্রং সমাক্ষিপৎ
দ্রোণো দ্রুপদপুত্রস্য খড্গং চ দশভিঃ শরৈঃ
72.29
হয়াংশ্চৈব চতুঃষষ্ট্যা শরাণাং জঘ্নিবান্বলী
ধ্বজং ছত্রং চ ভল্লাভ্যাং তথোভৌ পার্ষ্ণিসারথী
72.30
অথাস্মৈ ত্বরিতো বাণমপরং জীবিতান্তকম্
আকর্ণপূর্ণং চিক্ষেপ বজ্রং বজ্রধরো যথা
72.31
তং চতুর্দশভির্বাণৈর্বাণং চিচ্ছেদ সাত্যকিঃ
গ্রস্তমাচার্যমুখ্যেন ধৃষ্টদ্যুম্নমমোচয়ৎ
72.32
সিংহেনেব মৃগং গ্রস্তং নরসিংহেন মারিষ
দ্রোণেন মোচয়ামাস পাঞ্চাল্যং শিনিপুংগবঃ
72.33
সাত্যকিং প্রেক্ষ্য গোপ্তারং পাঞ্চাল্যস্য মহাহবে
শরাণাং ত্বরিতো দ্রোণঃ ষড্বিংশত্যা সমর্পয়ৎ
72.34
ততো দ্রোণং শিনেঃ পৌত্রো গ্রসন্তমিব সৃঞ্জয়ান্
প্রত্যবিধ্যচ্ছিতৈর্বাণৈঃ ষড্বিংশত্যা স্তনান্তরে
72.35
ততঃ সর্বে রথাস্তূর্ণং পাঞ্চালা জয়গৃদ্ধিনঃ
সাত্বতাভিসৃতে দ্রোণে ধৃষ্টদ্যুম্নমমোচয়ন্