Utshovঅধ্যায় 71
71.1
সংজয় উবাচ
রাজন্সংগ্রামমাশ্চর্যং শৃণু কীর্তয়তো মম
কুরূণাং পাণ্ডবানাং চ যথা যুদ্ধমবর্তত
71.2
ভারদ্বাজং সমাসাদ্য ব্যূহস্য প্রমুখে স্থিতম্
অয়োধয়ন্রণে পার্থা দ্রোণানীকং বিভিত্সবঃ
71.3
রক্ষমাণাঃ স্বকং ব্যূহং দ্রোণস্যাপি চ সৈনিকাঃ
অয়োধয়ন্রণে পার্থান্প্রার্থয়ন্তো মহদ্যশঃ
71.4
বিন্দানুবিন্দাবাবন্ত্যৌ বিরাটং দশভিঃ শরৈঃ
আজঘ্নতুঃ সুসংক্রুদ্ধৌ তব পুত্রহিতৈষিণৌ
71.5
বিরাটশ্চ মহারাজ তাবুভৌ সমরে স্থিতৌ
পরাক্রান্তৌ পরাক্রম্য যোধয়ামাস সানুগৌ
71.6
তেষাং যুদ্ধং সমভবদ্দারুণং শোণিতোদকম্
সিংহস্য দ্বিপমুখ্যাভ্যাং প্রভিন্নাভ্যাং যথা বনে
71.7
বাহ্লীকং রভসং যুদ্ধে যাজ্ঞসেনির্মহাবলঃ
আজঘ্নে বিশিখৈস্তীক্ষ্ণৈর্ঘোরৈর্মর্মাস্থিভেদিভিঃ
71.8
বাহ্লীকো যাজ্ঞসেনিং তু হেমপুঙ্খৈঃ শিলাশিতৈঃ
আজঘান ভৃশং ক্রুদ্ধো নবভির্নতপর্বভিঃ
71.9
তদ্যুদ্ধমভবদ্ঘোরং শরশক্তিসমাকুলম্
ভীরূণাং ত্রাসজননং শূরাণাং হর্ষবর্ধনম্
71.10
তাভ্যাং তত্র শরৈর্মুক্তৈরন্তরিক্ষং দিশস্তথা
অভবত্সংবৃতং সর্বং ন প্রাজ্ঞায়ত কিংচন
71.11
শৈব্যো গোবাসনো যুদ্ধে কাশ্যপুত্রং মহারথম্
সসৈন্যো যোধয়ামাস গজঃ প্রতিগজং যথা
71.12
বাহ্লীকরাজঃ সংরব্ধো দ্রৌপদেয়ান্মহারথান্
মনঃ পঞ্চেন্দ্রিয়াণীব শুশুভে যোধয়ন্রণে
71.13
অয়োধয়ংস্তে চ ভৃশং তং শরৌঘৈঃ সমন্ততঃ
ইন্দ্রিয়ার্থা যথা দেহং শশ্বদ্দেহভৃতাং বর
71.14
বার্ষ্ণেয়ং সাত্যকিং যুদ্ধে পুত্রো দুঃশাসনস্তব
আজঘ্নে সায়কৈস্তীক্ষ্ণৈর্নবভির্নতপর্বভিঃ
71.15
সোঽতিবিদ্ধো বলবতা মহেষ্বাসেন ধন্বিনা
ঈষন্মূর্ছাং জগামাশু সাত্যকিঃ সত্যবিক্রমঃ
71.16
সমাশ্বস্তস্তু বার্ষ্ণেয়স্তব পুত্রং মহারথম্
বিব্যাধ দশভিস্তূর্ণং সায়কৈঃ কঙ্কপত্রিভিঃ
71.17
তাবন্যোন্যং দৃঢং বিদ্ধাবন্যোন্যশরবিক্ষতৌ
রেজতুঃ সমরে রাজন্পুষ্পিতাবিব কিংশুকৌ
71.18
অলম্বুসস্তু সংক্রুদ্ধঃ কুন্তিভোজশরার্দিতঃ
অশোভত পরং লক্ষ্ম্যা পুষ্পাঢ্য ইব কিংশুকঃ
71.19
কুন্তিভোজং ততো রক্ষো বিদ্ধ্বা বহুভিরায়সৈঃ
অনদদ্ভৈরবং নাদং বাহিন্যাঃ প্রমুখে তব
71.20
ততস্তৌ সমরে শূরৌ যোধয়ন্তৌ পরস্পরম্
দদৃশুঃ সর্বভূতানি শক্রজম্ভৌ যথা পুরা
71.21
শকুনিং রভসং যুদ্ধে কৃতবৈরং চ ভারত
মাদ্রীপুত্রৌ চ সংরব্ধৌ শরৈরর্দয়তাং মৃধে
71.22
তন্মূলঃ স মহারাজ প্রাবর্তত জনক্ষয়ঃ
ত্বয়া সংজনিতোঽত্যর্থং কর্ণেন চ বিবর্ধিতঃ
71.23
উদ্ধুক্ষিতশ্চ পুত্রেণ তব ক্রোধহুতাশনঃ
য ইমাং পৃথিবীং রাজন্দগ্ধুং সর্বাং সমুদ্যতঃ
71.24
শকুনিঃ পাণ্ডুপুত্রাভ্যাং কৃতঃ স বিমুখঃ শরৈঃ
নাভ্যজানত কর্তব্যং যুধি কিংচিত্পরাক্রমম্
71.25
বিমুখং চৈনমালোক্য মাদ্রীপুত্রৌ মহারথৌ
ববর্ষতুঃ পুনর্বাণৈর্যথা মেঘৌ মহাগিরিম্
71.26
স বধ্যমানো বহুভিঃ শরৈঃ সংনতপর্বভিঃ
সংপ্রায়াজ্জবনৈরশ্বৈর্দ্রোণানীকায় সৌবলঃ
71.27
ঘটোত্কচস্তথা শূরং রাক্ষসং তমলায়ুধম্
অভ্যয়াদ্রভসং যুদ্ধে বেগমাস্থায় মধ্যমম্
71.28
তয়োর্যুদ্ধং মহারাজ চিত্ররূপমিবাভবৎ
যাদৃশং হি পুরা বৃত্তং রামরাবণয়োর্মৃধে
71.29
ততো যুধিষ্ঠিরো রাজা মদ্ররাজানমাহবে
বিদ্ধ্বা পঞ্চাশতা বাণৈঃ পুনর্বিব্যাধ সপ্তভিঃ
71.30
ততঃ প্রববৃতে যুদ্ধং তয়োরত্যদ্ভুতং নৃপ
যথা পূর্বং মহদ্যুদ্ধং শম্বরামররাজয়োঃ
71.31
বিবিংশতিশ্চিত্রসেনো বিকর্ণশ্চ তবাত্মজঃ
অয়োধয়ন্ভীমসেনং মহত্যা সেনয়া বৃতাঃ