Utshovঅধ্যায় 70
70.1
সংজয় উবাচ
প্রবিষ্টয়োর্মহারাজ পার্থবার্ষ্ণেয়য়োস্তদা
দুর্যোধনে প্রয়াতে চ পৃষ্ঠতঃ পুরুষর্ষভে
70.2
জবেনাভ্যদ্রবন্দ্রোণং মহতা নিস্বনেন চ
পাণ্ডবাঃ সোমকৈঃ সার্ধং ততো যুদ্ধমবর্তত
70.3
তদ্যুদ্ধমভবদ্ঘোরং তুমুলং লোমহর্ষণম্
পাঞ্চালানাং কুরূণাং চ ব্যূহস্য পুরতোঽদ্ভুতম্
70.4
রাজন্কদাচিন্নাস্মাভির্দৃষ্টং তাদৃঙ্ন চ শ্রুতম্
যাদৃঙ্মধ্যগতে সূর্যে যুদ্ধমাসীদ্বিশাং পতে
70.5
ধৃষ্টদ্যুম্নমুখাঃ পার্থা ব্যূঢানীকাঃ প্রহারিণঃ
দ্রোণস্য সৈন্যং তে সর্বে শরবর্ষৈরবাকিরন্
70.6
বয়ং দ্রোণং পুরস্কৃত্য সর্বশস্ত্রভৃতাং বরম্
পার্ষতপ্রমুখান্পার্থানভ্যবর্ষাম সায়কৈঃ
70.7
মহামেঘাবিবোদীর্ণৌ মিশ্রবাতৌ হিমাত্যয়ে
সেনাগ্রে বিপ্রকাশেতে রুচিরে রথভূষিতে
70.8
সমেত্য তু মহাসেনে চক্রতুর্বেগমুত্তমম্
জাহ্নবীয়মুনে নদ্যৌ প্রাবৃষীবোল্বণোদকে
70.9
নানাশস্ত্রপুরোবাতো দ্বিপাশ্বরথসংবৃতঃ
গদাবিদ্যুন্মহারৌদ্রঃ সংগ্রামজলদো মহান্
70.10
ভারদ্বাজানিলোদ্ধূতঃ শরধারাসহস্রবান্
অভ্যবর্ষন্মহারৌদ্রঃ পাণ্ডুসেনাগ্নিমুদ্ধতম্
70.11
সমুদ্রমিব ঘর্মান্তে বিবান্ঘোরো মহানিলঃ
ব্যক্ষোভয়দনীকানি পাণ্ডবানাং দ্বিজোত্তমঃ
70.12
তেঽপি সর্বপ্রয়ত্নেন দ্রোণমেব সমাদ্রবন্
বিভিত্সন্তো মহাসেতুং বার্যোঘাঃ প্রবলা ইব
70.13
বারয়ামাস তান্দ্রোণো জলৌঘানচলো যথা
পাণ্ডবান্সমরে ক্রুদ্ধান্পাঞ্চালাংশ্চ সকেকয়ান্
70.14
অথাপরেঽপি রাজানঃ পরাবৃত্য সমন্ততঃ
মহাবলা রণে শূরাঃ পাঞ্চালানন্ববারয়ন্
70.15
ততো রণে নরব্যাঘ্রঃ পার্ষতঃ পাণ্ডবৈঃ সহ
সংজঘানাসকৃদ্দ্রোণং বিভিত্সুররিবাহিনীম্
70.16
যথৈব শরবর্ষাণি দ্রোণো বর্ষতি পার্ষতে
তথৈব শরবর্ষাণি ধৃষ্টদ্যুম্নোঽভ্যবর্ষত
70.17
সনিস্ত্রিংশপুরোবাতঃ শক্তিপ্রাসর্ষ্টিসংবৃতঃ
জ্যাবিদ্যুচ্চাপসংহ্রাদো ধৃষ্টদ্যুম্নবলাহকঃ
70.18
শরধারাশ্মবর্ষাণি ব্যসৃজত্সর্বতোদিশম্
নিঘ্নন্রথবরাশ্বৌঘাংশ্ছাদয়ামাস বাহিনীম্
70.19
যং যমার্ছচ্ছরৈর্দ্রোণঃ পাণ্ডবানাং রথব্রজম্
ততস্ততঃ শরৈর্দ্রোণমপাকর্ষত পার্ষতঃ
70.20
তথা তু যতমানস্য দ্রোণস্য যুধি ভারত
ধৃষ্টদ্যুম্নং সমাসাদ্য ত্রিধা সৈন্যমভিদ্যত
70.21
ভোজমেকে ন্যবর্তন্ত জলসংধমথাপরে
পাণ্ডবৈর্হন্যমানাশ্চ দ্রোণমেবাপরেঽব্রজন্
70.22
সৈন্যান্যঘটয়দ্যানি দ্রোণস্তু রথিনাং বরঃ
ব্যধমচ্চাপি তান্যস্য ধৃষ্টদ্যুম্নো মহারথঃ
70.23
ধার্তরাষ্ট্রাস্ত্রিধাভূতা বধ্যন্তে পাণ্ডুসৃঞ্জয়ৈঃ
অগোপাঃ পশবোঽরণ্যে বহুভিঃ শ্বাপদৈরিব
70.24
কালঃ সংগ্রসতে যোধান্ধৃষ্টদ্যুম্নেন মোহিতান্
সংগ্রামে তুমুলে তস্মিন্নিতি সংমেনিরে জনাঃ
70.25
কুনৃপস্য যথা রাষ্ট্রং দুর্ভিক্ষব্যাধিতস্করৈঃ
দ্রাব্যতে তদ্বদাপন্না পাণ্ডবৈস্তব বাহিনী
70.26
অর্করশ্মিপ্রভিন্নেষু শস্ত্রেষু কবচেষু চ
চক্ষূংষি প্রতিহন্যন্তে সৈন্যেন রজসা তথা
70.27
ত্রিধাভূতেষু সৈন্যেষু বধ্যমানেষু পাণ্ডবৈঃ
অমর্ষিতস্ততো দ্রোণঃ পাঞ্চালান্ব্যধমচ্ছরৈঃ
70.28
মৃদ্নতস্তান্যনীকানি নিঘ্নতশ্চাপি সায়কৈঃ
বভূব রূপং দ্রোণস্য কালাগ্নেরিব দীপ্যতঃ
70.29
রথং নাগং হয়ং চাপি পত্তিনশ্চ বিশাং পতে
একৈকেনেষুণা সংখ্যে নির্বিভেদ মহারথঃ
70.30
পাণ্ডবানাং তু সৈন্যেষু নাস্তি কশ্চিত্স ভারত
দধার যো রণে বাণান্দ্রোণচাপচ্যুতাঞ্শিতান্
70.31
তত্পচ্যমানমর্কেণ দ্রোণসায়কতাপিতম্
বভ্রাম পার্ষতং সৈন্যং তত্র তত্রৈব ভারত
70.32
তথৈব পার্ষতেনাপি কাল্যমানং বলং তব
অভবত্সর্বতো দীপ্তং শুষ্কং বনমিবাগ্নিনা
70.33
বধ্যমানেষু সৈন্যেষু দ্রোণপার্ষতসায়কৈঃ
ত্যক্ত্বা প্রাণান্পরং শক্ত্যা প্রায়ুধ্যন্ত স্ম সৈনিকাঃ
70.34
তাবকানাং পরেষাং চ যুধ্যতাং ভরতর্ষভ
নাসীত্কশ্চিন্মহারাজ যোঽত্যাক্ষীত্সংয়ুগং ভয়াৎ
70.35
ভীমসেনং তু কৌন্তেয়ং সোদর্যাঃ পর্যবারয়ন্
বিবিংশতিশ্চিত্রসেনো বিকর্ণশ্চ মহারথঃ
70.36
বিন্দানুবিন্দাবাবন্ত্যৌ ক্ষেমধূর্তিশ্চ বীর্যবান্
ত্রয়াণাং তব পুত্রাণাং ত্রয় এবানুয়ায়িনঃ
70.37
বাহ্লীকরাজস্তেজস্বী কুলপুত্রো মহারথঃ
সহসেনঃ সহামাত্যো দ্রৌপদেয়ানবারয়ৎ
70.38
শৈব্যো গোবাসনো রাজা যোধৈর্দশশতাবরৈঃ
কাশ্যস্যাভিভুবঃ পুত্রং পরাক্রান্তমবারয়ৎ
70.39
অজাতশত্রুং কৌন্তেয়ং জ্বলন্তমিব পাবকম্
মদ্রাণামীশ্বরঃ শল্যো রাজা রাজানমাবৃণোৎ
70.40
দুঃশাসনস্ত্ববস্থাপ্য স্বমনীকমমর্ষণঃ
সাত্যকিং প্রয়য়ৌ ক্রুদ্ধঃ শূরো রথবরং যুধি
70.41
স্বকেনাহমনীকেন সংনদ্ধকবচাবৃতঃ
চতুঃশতৈর্মহেষ্বাসৈশ্চেকিতানমবারয়ম্
70.42
শকুনিস্তু সহানীকো মাদ্রীপুত্রমবারয়ৎ
গান্ধারকৈঃ সপ্তশতৈশ্চাপশক্তিশরাসিভিঃ
70.43
বিন্দানুবিন্দাবাবন্ত্যৌ বিরাটং মত্স্যমার্ছতাম্
প্রাণাংস্ত্যক্ত্বা মহেষ্বাসৌ মিত্রার্থেঽভ্যুদ্যতৌ যুধি
70.44
শিখণ্ডিনং যাজ্ঞসেনিং রুন্ধানমপরাজিতম্
বাহ্লিকঃ প্রতিসংয়ত্তঃ পরাক্রান্তমবারয়ৎ
70.45
ধৃষ্টদ্যুম্নং চ পাঞ্চাল্যং ক্রূরৈঃ সার্ধং প্রভদ্রকৈঃ
আবন্ত্যঃ সহ সৌবীরৈঃ ক্রুদ্ধরূপমবারয়ৎ
70.46
ঘটোত্কচং তথা শূরং রাক্ষসং ক্রূরয়োধিনম্
অলায়ুধোঽদ্রবত্তূর্ণং ক্রুদ্ধমায়ান্তমাহবে
70.47
অলম্বুসং রাক্ষসেন্দ্রং কুন্তিভোজো মহারথঃ
সৈন্যেন মহতা যুক্তঃ ক্রুদ্ধরূপমবারয়ৎ
70.48
সৈন্ধবঃ পৃষ্ঠতস্ত্বাসীত্সর্বসৈন্যস্য ভারত
রক্ষিতঃ পরমেষ্বাসৈঃ কৃপপ্রভৃতিভী রথৈঃ
70.49
তস্যাস্তাং চক্ররক্ষৌ দ্বৌ সৈন্ধবস্য বৃহত্তমৌ
দ্রৌণির্দক্ষিণতো রাজন্সূতপুত্রশ্চ বামতঃ
70.50
পৃষ্ঠগোপাস্তু তস্যাসন্সৌমদত্তিপুরোগমাঃ
কৃপশ্চ বৃষসেনশ্চ শলঃ শল্যশ্চ দুর্জয়ঃ
70.51
নীতিমন্তো মহেষ্বাসাঃ সর্বে যুদ্ধবিশারদাঃ
সৈন্ধবস্য বিধায়ৈবং রক্ষাং যুয়ুধিরে তদা