Utshovঅধ্যায় 69
69.1
সংজয় উবাচ
ততঃ প্রবিষ্টে কৌন্তেয়ে সিন্ধুরাজজিঘাংসয়া
দ্রোণানীকং বিনির্ভিদ্য ভোজানীকং চ দুস্তরম্
69.2
কাম্বোজস্য চ দায়াদে হতে রাজন্সুদক্ষিণে
শ্রুতায়ুধে চ বিক্রান্তে নিহতে সব্যসাচিনা
69.3
বিপ্রদ্রুতেষ্বনীকেষু বিধ্বস্তেষু সমন্ততঃ
প্রভগ্নং স্ববলং দৃষ্ট্বা পুত্রস্তে দ্রোণমভ্যয়াৎ
69.4
ত্বরন্নেকরথেনৈব সমেত্য দ্রোণমব্রবীৎ
গতঃ স পুরুষব্যাঘ্রঃ প্রমথ্যেমাং মহাচমূম্
69.5
অত্র বুদ্ধ্যা সমীক্ষস্ব কিং নু কার্যমনন্তরম্
অর্জুনস্য বিঘাতায় দারুণেঽস্মিঞ্জনক্ষয়ে
69.6
যথা স পুরুষব্যাঘ্রো ন হন্যেত জয়দ্রথঃ
তথা বিধত্স্ব ভদ্রং তে ত্বং হি নঃ পরমা গতিঃ
69.7
অসৌ ধনংজয়াগ্নির্হি কোপমারুতচোদিতঃ
সেনাকক্ষং দহতি মে বহ্নিঃ কক্ষমিবোত্থিতঃ
69.8
অতিক্রান্তে হি কৌন্তেয়ে ভিত্ত্বা সৈন্যং পরংতপ
জয়দ্রথস্য গোপ্তারঃ সংশয়ং পরমং গতাঃ
69.9
স্থিরা বুদ্ধির্নরেন্দ্রাণামাসীদ্ব্রহ্মবিদাং বর
নাতিক্রমিষ্যতি দ্রোণং জাতু জীবন্ধনংজয়ঃ
69.10
সোঽসৌ পার্থো ব্যতিক্রান্তো মিষতস্তে মহাদ্যুতে
সর্বং হ্যদ্যাতুরং মন্যে নৈতদস্তি বলং মম
69.11
জানামি ত্বাং মহাভাগ পাণ্ডবানাং হিতে রতম্
তথা মুহ্যামি চ ব্রহ্মন্কার্যবত্তাং বিচিন্তয়ন্
69.12
যথাশক্তি চ তে ব্রহ্মন্বর্তয়ে বৃত্তিমুত্তমাম্
প্রীণামি চ যথাশক্তি তচ্চ ত্বং নাববুধ্যসে
69.13
অস্মান্ন ত্বং সদা ভক্তানিচ্ছস্যমিতবিক্রম
পাণ্ডবান্সততং প্রীণাস্যস্মাকং বিপ্রিয়ে রতান্
69.14
অস্মানেবোপজীবংস্ত্বমস্মাকং বিপ্রিয়ে রতঃ
ন হ্যহং ত্বাং বিজানামি মধুদিগ্ধমিব ক্ষুরম্
69.15
নাদাস্যচ্চেদ্বরং মহ্যং ভবান্পাণ্ডবনিগ্রহে
নাবারয়িষ্যং গচ্ছন্তমহং সিন্ধুপতিং গৃহান্
69.16
ময়া ত্বাশংসমানেন ত্বত্তস্ত্রাণমবুদ্ধিনা
আশ্বাসিতঃ সিন্ধুপতির্মোহাদ্দত্তশ্চ মৃত্যবে
69.17
যমদংষ্ট্রান্তরং প্রাপ্তো মুচ্যেতাপি হি মানবঃ
নার্জুনস্য বশং প্রাপ্তো মুচ্যেতাজৌ জয়দ্রথঃ
69.18
স তথা কুরু শোণাশ্ব যথা রক্ষ্যেত সৈন্ধবঃ
মম চার্তপ্রলাপানাং মা ক্রুধঃ পাহি সৈন্ধবম্
69.19
দ্রোণ উবাচ
নাভ্যসূয়ামি তে বাচমশ্বত্থাম্নাসি মে সমঃ
সত্যং তু তে প্রবক্ষ্যামি তজ্জুষস্ব বিশাং পতে
69.20
সারথিঃ প্রবরঃ কৃষ্ণঃ শীঘ্রাশ্চাস্য হয়োত্তমাঃ
অল্পং চ বিবরং কৃত্বা তূর্ণং যাতি ধনংজয়ঃ
69.21
কিং নু পশ্যসি বাণৌঘান্ক্রোশমাত্রে কিরীটিনঃ
পশ্চাদ্রথস্য পতিতান্ক্ষিপ্তাঞ্শীঘ্রং হি গচ্ছতঃ
69.22
ন চাহং শীঘ্রয়ানেঽদ্য সমর্থো বয়সান্বিতঃ
সেনামুখে চ পার্থানামেতদ্বলমুপস্থিতম্
69.23
যুধিষ্ঠিরশ্চ মে গ্রাহ্যো মিষতাং সর্বধন্বিনাম্
এবং ময়া প্রতিজ্ঞাতং ক্ষত্রমধ্যে মহাভুজ
69.24
ধনংজয়েন চোত্সৃষ্টো বর্ততে প্রমুখে মম
তস্মাদ্ব্যূহমুখং হিত্বা নাহং যাস্যামি ফল্গুনম্
69.25
তুল্যাভিজনকর্মাণং শত্রুমেকং সহায়বান্
গত্বা যোধয় মা ভৈস্ত্বং ত্বং হ্যস্য জগতঃ পতিঃ
69.26
রাজা শূরঃ কৃতী দক্ষো বৈরমুত্পাদ্য পাণ্ডবৈঃ
বীর স্বয়ং প্রয়াহ্যাশু যত্র যাতো ধনংজয়ঃ
69.27
দুর্যোধন উবাচ
কথং ত্বামপ্যতিক্রান্তঃ সর্বশস্ত্রভৃতাং বরঃ
ধনংজয়ো ময়া শক্য আচার্য প্রতিবাধিতুম্
69.28
অপি শক্যো রণে জেতুং বজ্রহস্তঃ পুরংদরঃ
নার্জুনঃ সমরে শক্যো জেতুং পরপুরংজয়ঃ
69.29
যেন ভোজশ্চ হার্দিক্যো ভবাংশ্চ ত্রিদশোপমঃ
অস্ত্রপ্রতাপেন জিতৌ শ্রুতায়ুশ্চ নিবর্হিতঃ
69.30
সুদক্ষিণশ্চ নিহতঃ স চ রাজা শ্রুতায়ুধঃ
শ্রুতায়ুশ্চাচ্যুতায়ুশ্চ ম্লেচ্ছাশ্চ শতশো হতাঃ
69.31
তং কথং পাণ্ডবং যুদ্ধে দহন্তমহিতান্বহূন্
প্রতিয়োত্স্যামি দুর্ধর্ষং তন্মে শংসাস্ত্রকোবিদ
69.32
ক্ষমং চেন্মন্যসে যুদ্ধং মম তেনাদ্য শাধি মাম্
পরবানস্মি ভবতি প্রেষ্যকৃদ্রক্ষ মে যশঃ
69.33
দ্রোণ উবাচ
সত্যং বদসি কৌরব্য দুরাধর্ষো ধনংজয়ঃ
অহং তু তত্করিষ্যামি যথৈনং প্রসহিষ্যসি
69.34
অদ্ভুতং চাদ্য পশ্যন্তু লোকে সর্বধনুর্ধরাঃ
বিষক্তং ত্বয়ি কৌন্তেয়ং বাসুদেবস্য পশ্যতঃ
69.35
এষ তে কবচং রাজংস্তথা বধ্নামি কাঞ্চনম্
যথা ন বাণা নাস্ত্রাণি বিষহিষ্যন্তি তে রণে
69.36
যদি ত্বাং সাসুরসুরাঃ সয়ক্ষোরগরাক্ষসাঃ
যোধয়ন্তি ত্রয়ো লোকাঃ সনরা নাস্তি তে ভয়ম্
69.37
ন কৃষ্ণো ন চ কৌন্তেয়ো ন চান্যঃ শস্ত্রভৃদ্রণে
শরানর্পয়িতুং কশ্চিত্কবচে তব শক্ষ্যতি
69.38
স ত্বং কবচমাস্থায় ক্রুদ্ধমদ্য রণেঽর্জুনম্
ত্বরমাণঃ স্বয়ং যাহি ন চাসৌ ত্বাং সহিষ্যতে
69.39
সংজয় উবাচ
এবমুক্ত্বা ত্বরন্দ্রোণঃ স্পৃষ্ট্বাম্ভো বর্ম ভাস্বরম্
আববন্ধাদ্ভুততমং জপন্মন্ত্রং যথাবিধি
69.40
রণে তস্মিন্সুমহতি বিজয়ায় সুতস্য তে
বিসিস্মাপয়িষুর্লোকং বিদ্যয়া ব্রহ্মবিত্তমঃ
69.41
দ্রোণ উবাচ
করোতু স্বস্তি তে ব্রহ্মা স্বস্তি চাপি দ্বিজাতয়ঃ
সরীসৃপাশ্চ যে শ্রেষ্ঠাস্তেভ্যস্তে স্বস্তি ভারত
69.42
যয়াতির্নহুষশ্চৈব ধুন্ধুমারো ভগীরথঃ
তুভ্যং রাজর্ষয়ঃ সর্বে স্বস্তি কুর্বন্তু সর্বশঃ
69.43
স্বস্তি তেঽস্ত্বেকপাদেভ্যো বহুপাদেভ্য এব চ
স্বস্ত্যস্ত্বপাদকেভ্যশ্চ নিত্যং তব মহারণে
69.44
স্বাহা স্বধা শচী চৈব স্বস্তি কুর্বন্তু তে সদা
লক্ষ্মীররুন্ধতী চৈব কুরুতাং স্বস্তি তেঽনঘ
69.45
অসিতো দেবলশ্চৈব বিশ্বামিত্রস্তথাঙ্গিরাঃ
বসিষ্ঠঃ কশ্যপশ্চৈব স্বস্তি কুর্বন্তু তে নৃপ
69.46
ধাতা বিধাতা লোকেশো দিশশ্চ সদিগীশ্বরাঃ
স্বস্তি তেঽদ্য প্রয়চ্ছন্তু কার্ত্তিকেয়শ্চ ষণ্মুখঃ
69.47
বিবস্বান্ভগবান্স্বস্তি করোতু তব সর্বশঃ
দিগ্গজাশ্চৈব চত্বারঃ ক্ষিতিঃ খং গগনং গ্রহাঃ
69.48
অধস্তাদ্ধরণীং যোঽসৌ সদা ধারয়তে নৃপ
স শেষঃ পন্নগশ্রেষ্ঠঃ স্বস্তি তুভ্যং প্রয়চ্ছতু
69.49
গান্ধারে যুধি বিক্রম্য নির্জিতাঃ সুরসত্তমাঃ
পুরা বৃত্রেণ দৈত্যেন ভিন্নদেহাঃ সহস্রশঃ
69.50
হৃততেজোবলাঃ সর্বে তদা সেন্দ্রা দিবৌকসঃ
ব্রহ্মাণং শরণং জগ্মুর্বৃত্রাদ্ভীতা মহাসুরাৎ
69.51
দেবা ঊচুঃ
প্রমর্দিতানাং বৃত্রেণ দেবানাং দেবসত্তম
গতির্ভব সুরশ্রেষ্ঠ ত্রাহি নো মহতো ভয়াৎ
69.52
দ্রোণ উবাচ
অথ পার্শ্বে স্থিতং বিষ্ণুং শক্রাদীংশ্চ সুরোত্তমান্
প্রাহ তথ্যমিদং বাক্যং বিষণ্ণান্সুরসত্তমান্
69.53
রক্ষ্যা মে সততং দেবাঃ সহেন্দ্রাঃ সদ্বিজাতয়ঃ
ত্বষ্টুঃ সুদুর্ধরং তেজো যেন বৃত্রো বিনির্মিতঃ
69.54
ত্বষ্ট্রা পুরা তপস্তপ্ত্বা বর্ষায়ুতশতং তদা
বৃত্রো বিনির্মিতো দেবাঃ প্রাপ্যানুজ্ঞাং মহেশ্বরাৎ
69.55
স তস্যৈব প্রসাদাদ্বৈ হন্যাদেব রিপুর্বলী
নাগত্বা শংকরস্থানং ভগবান্দৃশ্যতে হরঃ
69.56
দৃষ্ট্বা হনিষ্যথ রিপুং ক্ষিপ্রং গচ্ছত মন্দরম্
যত্রাস্তে তপসাং যোনির্দক্ষয়জ্ঞবিনাশনঃ
পিনাকী সর্বভূতেশো ভগনেত্রনিপাতনঃ
69.57
তে গত্বা সহিতা দেবা ব্রহ্মণা সহ মন্দরম্
অপশ্যংস্তেজসাং রাশিং সূর্যকোটিসমপ্রভম্
69.58
সোঽব্রবীত্স্বাগতং দেবা ব্রূত কিং করবাণ্যহম্
অমোঘং দর্শনং মহ্যং কামপ্রাপ্তিরতোঽস্তু বঃ
69.59
এবমুক্তাস্তু তে সর্বে প্রত্যূচুস্তং দিবৌকসঃ
তেজো হৃতং নো বৃত্রেণ গতির্ভব দিবৌকসাম্
69.60
মূর্তীরীক্ষষ্ব নো দেব প্রহারৈর্জর্জরীকৃতাঃ
শরণং ত্বাং প্রপন্নাঃ স্ম গতির্ভব মহেশ্বর
69.61
মহেশ্বর উবাচ
বিদিতং মে যথা দেবাঃ কৃত্যেয়ং সুমহাবলা
ত্বষ্টুস্তেজোভবা ঘোরা দুর্নিবার্যাকৃতাত্মভিঃ
69.62
অবশ্যং তু ময়া কার্যং সাহ্যং সর্বদিবৌকসাম্
মমেদং গাত্রজং শক্র কবচং গৃহ্য ভাস্বরম্
বধানানেন মন্ত্রেণ মানসেন সুরেশ্বর
69.63
দ্রোণ উবাচ
ইত্যুক্ত্বা বরদঃ প্রাদাদ্বর্ম তন্মন্ত্রমেব চ
স তেন বর্মণা গুপ্তঃ প্রায়াদ্বৃত্রচমূং প্রতি
69.64
নানাবিধৈশ্চ শস্ত্রৌঘৈঃ পাত্যমানৈর্মহারণে
ন সংধিঃ শক্যতে ভেত্তুং বর্মবন্ধস্য তস্য তু
69.65
ততো জঘান সমরে বৃত্রং দেবপতিঃ স্বয়ম্
তং চ মন্ত্রময়ং বন্ধং বর্ম চাঙ্গিরসে দদৌ
69.66
অঙ্গিরাঃ প্রাহ পুত্রস্য মন্ত্রজ্ঞস্য বৃহস্পতেঃ
বৃহস্পতিরথোবাচ অগ্নিবেশ্যায় ধীমতে
69.67
অগ্নিবেশ্যো মম প্রাদাত্তেন বধ্নামি বর্ম তে
তবাদ্য দেহরক্ষার্থং মন্ত্রেণ নৃপসত্তম
69.68
সংজয় উবাচ
এবমুক্ত্বা ততো দ্রোণস্তব পুত্রং মহাদ্যুতিঃ
পুনরেব বচঃ প্রাহ শনৈরাচার্যপুংগবঃ
69.69
ব্রহ্মসূত্রেণ বধ্নামি কবচং তব পার্থিব
হিরণ্যগর্ভেণ যথা বদ্ধং বিষ্ণোঃ পুরা রণে
69.70
যথা চ ব্রহ্মণা বদ্ধং সংগ্রামে তারকাময়ে
শক্রস্য কবচং দিব্যং তথা বধ্নাম্যহং তব
69.71
বদ্ধ্বা তু কবচং তস্য মন্ত্রেণ বিধিপূর্বকম্
প্রেষয়ামাস রাজানং যুদ্ধায় মহতে দ্বিজঃ
69.72
স সংনদ্ধো মহাবাহুরাচার্যেণ মহাত্মনা
রথানাং চ সহস্রেণ ত্রিগর্তানাং প্রহারিণাম্
69.73
তথা দন্তিসহস্রেণ মত্তানাং বীর্যশালিনাম্
অশ্বানাময়ুতেনৈব তথান্যৈশ্চ মহারথৈঃ
69.74
বৃতঃ প্রায়ান্মহাবাহুরর্জুনস্য রথং প্রতি
নানাবাদিত্রঘোষেণ যথা বৈরোচনিস্তথা
69.75
ততঃ শব্দো মহানাসীত্সৈন্যানাং তব ভারত
অগাধং প্রস্থিতং দৃষ্ট্বা সমুদ্রমিব কৌরবম্