Utshovঅধ্যায় 68
68.1
সংজয় উবাচ
হতে সুদক্ষিণে রাজন্বীরে চৈব শ্রুতায়ুধে
জবেনাভ্যদ্রবন্পার্থং কুপিতাঃ সৈনিকাস্তব
68.2
অভীষাহাঃ শূরসেনাঃ শিবয়োঽথ বসাতয়ঃ
অভ্যবর্ষংস্ততো রাজঞ্শরবর্ষৈর্ধনংজয়ম্
68.3
তেষাং ষষ্টিশতানার্যান্প্রামথ্নাত্পাণ্ডবঃ শরৈঃ
তে স্ম ভীতাঃ পলায়ন্ত ব্যাঘ্রাত্ক্ষুদ্রমৃগা ইব
68.4
তে নিবৃত্য পুনঃ পার্থং সর্বতঃ পর্যবারয়ন্
রণে সপত্নান্নিঘ্নন্তং জিগীষন্তṃ পরান্যুধি
68.5
তেষামাপততাং তূর্ণং গাণ্ডীবপ্রেষিতৈঃ শরৈঃ
শিরাংসি পাতয়ামাস বাহূংশ্চৈব ধনংজয়ঃ
68.6
শিরোভিঃ পতিতৈস্তত্র ভূমিরাসীন্নিরন্তরা
অভ্রচ্ছায়েব চৈবাসীদ্ধ্বাঙ্ক্ষগৃধ্রবডৈর্যুধি
68.7
তেষু তূত্সাদ্যমানেষু ক্রোধামর্ষসমন্বিতৌ
শ্রুতায়ুশ্চাচ্যুতায়ুশ্চ ধনংজয়ময়ুধ্যতাম্
68.8
বলিনৌ স্পর্ধিনৌ বীরৌ কুলজৌ বাহুশালিনৌ
তাবেনং শরবর্ষাণি সব্যদক্ষিণমস্যতাম্
68.9
ত্বরায়ুক্তৌ মহারাজ প্রার্থয়ানৌ মহদ্যশঃ
অর্জুনস্য বধপ্রেপ্সূ পুত্রার্থে তব ধন্বিনৌ
68.10
তাবর্জুনং সহস্রেণ পত্রিণাং নতপর্বণাম্
পূরয়ামাসতুঃ ক্রুদ্ধৌ তডাগং জলদৌ যথা
68.11
শ্রুতায়ুশ্চ ততঃ ক্রুদ্ধস্তোমরেণ ধনংজয়ম্
আজঘান রথশ্রেষ্ঠঃ পীতেন নিশিতেন চ
68.12
সোঽতিবিদ্ধো বলবতা শত্রুণা শত্রুকর্শনঃ
আজগাম পরং মোহং মোহয়ন্কেশবং রণে
68.13
এতস্মিন্নেব কালে তু সোঽচ্যুতায়ুর্মহারথঃ
শূলেন ভৃশতীক্ষ্ণেন তাডয়ামাস পাণ্ডবম্
68.14
ক্ষতে ক্ষারং স হি দদৌ পাণ্ডবস্য মহাত্মনঃ
পার্থোঽপি ভৃশসংবিদ্ধো ধ্বজয়ষ্টিং সমাশ্রিতঃ
68.15
ততঃ সর্বস্য সৈন্যস্য তাবকস্য বিশাং পতে
সিংহনাদো মহানাসীদ্ধতং মত্বা ধনংজয়ম্
68.16
কৃষ্ণশ্চ ভৃশসংতপ্তো দৃষ্ট্বা পার্থং বিচেতসম্
আশ্বাসয়ত্সুহৃদ্যাভির্বাগ্ভিস্তত্র ধনংজয়ম্
68.17
ততস্তৌ রথিনাং শ্রেষ্ঠৌ লব্ধলক্ষৌ ধনংজয়ম্
বাসুদেবং চ বার্ষ্ণেয়ং শরবর্ষৈঃ সমন্ততঃ
68.18
সচক্রকূবররথং সাশ্বধ্বজপতাকিনম্
অদৃশ্যং চক্রতুর্যুদ্ধে তদদ্ভুতমিবাভবৎ
68.19
প্রত্যাশ্বস্তস্তু বীভত্সুঃ শনকৈরিব ভারত
প্রেতরাজপুরং প্রাপ্য পুনঃ প্রত্যাগতো যথা
68.20
সংছন্নং শরজালেন রথং দৃষ্ট্বা সকেশবম্
শত্রূ চাভিমুখৌ দৃষ্ট্বা দীপ্যমানাবিবানলৌ
68.21
প্রাদুশ্চক্রে ততঃ পার্থঃ শাক্রমস্ত্রং মহারথঃ
তস্মাদাসন্সহস্রাণি শরাণাং নতপর্বণাম্
68.22
তে জঘ্নুস্তৌ মহেষ্বাসৌ তাভ্যাং সৃষ্টাংশ্চ সায়কান্
বিচেরুরাকাশগতাঃ পার্থবাণবিদারিতাঃ
68.23
প্রতিহত্য শরাংস্তূর্ণং শরবেগেন পাণ্ডবঃ
প্রতস্থে তত্র তত্রৈব যোধয়ন্বৈ মহারথান্
68.24
তৌ চ ফল্গুনবাণৌঘৈর্বিবাহুশিরসৌ কৃতৌ
বসুধামন্বপদ্যেতাং বাতনুন্নাবিব দ্রুমৌ
68.25
শ্রুতায়ুষশ্চ নিধনং বধশ্চৈবাচ্যুতায়ুষঃ
লোকবিস্মাপনমভূত্সমুদ্রস্যেব শোষণম্
68.26
তয়োঃ পদানুগান্হত্বা পুনঃ পঞ্চশতান্রথান্
অভ্যগাদ্ভারতীং সেনাং নিঘ্নন্পার্থো বরান্বরান্
68.27
শ্রুতায়ুষং চ নিহতং প্রেক্ষ্য চৈবাচ্যুতায়ুষম্
অয়ুতায়ুশ্চ সংক্রুদ্ধো দীর্ঘায়ুশ্চৈব ভারত
68.28
পুত্রৌ তয়োর্নরশ্রেষ্ঠৌ কৌন্তেয়ং প্রতিজগ্মতুঃ
কিরন্তৌ বিবিধান্বাণান্পিতৃব্যসনকর্শিতৌ
68.29
তাবর্জুনো মুহূর্তেন শরৈঃ সংনতপর্বভিঃ
প্রেষয়ত্পরমক্রুদ্ধো যমস্য সদনং প্রতি
68.30
লোডয়ন্তমনীকানি দ্বিপং পদ্মসরো যথা
নাশক্নুবন্বারয়িতুং পার্থং ক্ষত্রিয়পুংগবাঃ
68.31
অঙ্গাস্তু গজবারেণ পাণ্ডবং পর্যবারয়ন্
ক্রুদ্ধাঃ সহস্রশো রাজঞ্শিক্ষিতা হস্তিসাদিনঃ
68.32
দুর্যোধনসমাদিষ্টাঃ কুঞ্জরৈঃ পর্বতোপমৈঃ
প্রাচ্যাশ্চ দাক্ষিণাত্যাশ্চ কলিঙ্গপ্রমুখা নৃপাঃ
68.33
তেষামাপততাং শীঘ্রং গাণ্ডীবপ্রেষিতৈঃ শরৈঃ
নিচকর্ত শিরাংস্যুগ্রৌ বাহূনপি সুভূষণান্
68.34
তৈঃ শিরোভির্মহী কীর্ণা বাহুভিশ্চ সহাঙ্গদৈঃ
বভৌ কনকপাষাণা ভুজগৈরিব সংবৃতা
68.35
বাহবো বিশিখৈশ্ছিন্নাঃ শিরাংস্যুন্মথিতানি চ
চ্যবমানান্যদৃশ্যন্ত দ্রুমেভ্য ইব পক্ষিণঃ
68.36
শরৈঃ সহস্রশো বিদ্ধা দ্বিপাঃ প্রস্রুতশোণিতাঃ
ব্যদৃশ্যন্তাদ্রয়ঃ কালে গৈরিকাম্বুস্রবা ইব
68.37
নিহতাঃ শেরতে স্মান্যে বীভত্সোর্নিশিতৈঃ শরৈঃ
গজপৃষ্ঠগতা ম্লেচ্ছা নানাবিকৃতদর্শনাঃ
68.38
নানাবেষধরা রাজন্নানাশস্ত্রৌঘসংবৃতাঃ
রুধিরেণানুলিপ্তাঙ্গা ভান্তি চিত্রৈঃ শরৈর্হতাঃ
68.39
শোণিতং নির্বমন্তি স্ম দ্বিপাঃ পার্থশরাহতাঃ
সহস্রশশ্ছিন্নগাত্রাঃ সারোহাঃ সপদানুগাঃ
68.40
চুক্রুশুশ্চ নিপেতুশ্চ বভ্রমুশ্চাপরে দিশঃ
ভৃশং ত্রস্তাশ্চ বহুধা স্বানেন মমৃদুর্গজাঃ
সান্তরায়ুধিকা মত্তা দ্বিপাস্তীক্ষ্ণবিষোপমাঃ
68.41
বিদন্ত্যসুরমায়াং যে সুঘোরা ঘোরচক্ষুষঃ
যবনাঃ পারদাশ্চৈব শকাশ্চ সুনিকৈঃ সহ
68.42
গোয়োনিপ্রভবা ম্লেচ্ছাঃ কালকল্পাঃ প্রহারিণঃ
দার্বাভিসারা দরদাঃ পুণ্ড্রাশ্চ সহ বাহ্লিকৈঃ
68.43
ন তে স্ম শক্যাঃ সংখ্যাতুং ব্রাতাঃ শতসহস্রশঃ
বৃষ্টিস্তথাবিধা হ্যাসীচ্ছলভানামিবায়তিঃ
68.44
অভ্রচ্ছায়ামিব শরৈঃ সৈন্যে কৃত্বা ধনংজয়ঃ
মুণ্ডার্ধমুণ্ডজটিলানশুচীঞ্জটিলাননান্
ম্লেচ্ছানশাতয়ত্সর্বান্সমেতানস্ত্রমায়য়া
68.45
শরৈশ্চ শতশো বিদ্ধাস্তে সংঘাঃ সংঘচারিণঃ
প্রাদ্রবন্ত রণে ভীতা গিরিগহ্বরবাসিনঃ
68.46
গজাশ্বসাদিম্লেচ্ছানাং পতিতানাং শতৈঃ শরৈঃ
বডাঃ কঙ্কা বৃকা ভূমাবপিবন্রুধিরং মুদা
68.47
পত্ত্যশ্বরথনাগৈশ্চ প্রচ্ছন্নকৃতসংক্রমাম্
শরবর্ষপ্লবাং ঘোরাং কেশশৈবলশাড্বলাম্
প্রাবর্তয়ন্নদীমুগ্রাং শোণিতৌঘতরঙ্গিণীম্
68.48
শিরস্ত্রাণক্ষুদ্রমত্স্যাং যুগান্তে কালসংভৃতাম্
অকরোদ্গজসংবাধাং নদীমুত্তরশোণিতাম্
দেহেভ্যো রাজপুত্রাণাং নাগাশ্বরথসাদিনাম্
68.49
যথা স্থলং চ নিম্নং চ ন স্যাদ্বর্ষতি বাসবে
তথাসীত্পৃথিবী সর্বা শোণিতেন পরিপ্লুতা
68.50
ষট্সহস্রান্বরান্বীরান্পুনর্দশশতান্বরান্
প্রাহিণোন্মৃত্যুলোকায় ক্ষত্রিয়ান্ক্ষত্রিয়র্ষভঃ
68.51
শরৈঃ সহস্রশো বিদ্ধা বিধিবত্কল্পিতা দ্বিপাঃ
শেরতে ভূমিমাসাদ্য শৈলা বজ্রহতা ইব
68.52
স বাজিরথমাতঙ্গান্নিঘ্নন্ব্যচরদর্জুনঃ
প্রভিন্ন ইব মাতঙ্গো মৃদ্নন্নডবনং যথা
68.53
ভূরিদ্রুমলতাগুল্মং শুষ্কেন্ধনতৃণোলপম্
নির্দহেদনলোঽরণ্যং যথা বায়ুসমীরিতঃ
68.54
সৈন্যারণ্যং তব তথা কৃষ্ণানিলসমীরিতঃ
শরার্চিরদহত্ক্রুদ্ধঃ পাণ্ডবাগ্নির্ধনংজয়ঃ
68.55
শূন্যান্কুর্বন্রথোপস্থান্মানবৈঃ সংস্তরন্মহীম্
প্রানৃত্যদিব সংবাধে চাপহস্তো ধনংজয়ঃ
68.56
বজ্রকল্পৈঃ শরৈর্ভূমিং কুর্বন্নুত্তরশোণিতাম্
প্রাবিশদ্ভারতীং সেনাং সংক্রুদ্ধো বৈ ধনংজয়ঃ
তং শ্রুতায়ুস্তথাম্বষ্ঠো ব্রজমানং ন্যবারয়ৎ
68.57
তস্যার্জুনঃ শরৈস্তীক্ষ্ণৈঃ কঙ্কপত্রপরিচ্ছদৈঃ
ন্যপাতয়দ্ধয়াঞ্শীঘ্রং যতমানস্য মারিষ
ধনুশ্চাস্যাপরৈশ্ছিত্ত্বা শরৈঃ পার্থো বিচক্রমে
68.58
অম্বষ্ঠস্তু গদাং গৃহ্য ক্রোধপর্যাকুলেক্ষণঃ
আসসাদ রণে পার্থং কেশবং চ মহারথম্
68.59
ততঃ স প্রহসন্বীরো গদামুদ্যম্য ভারত
রথমাবার্য গদয়া কেশবং সমতাডয়ৎ
68.60
গদয়া তাডিতং দৃষ্ট্বা কেশবং পরবীরহা
অর্জুনো ভৃশসংক্রুদ্ধঃ সোঽম্বষ্ঠং প্রতি ভারত
68.61
ততঃ শরৈর্হেমপুঙ্খৈঃ সগদং রথিনাং বরম্
ছাদয়ামাস সমরে মেঘঃ সূর্যমিবোদিতম্
68.62
ততোঽপরৈঃ শরৈশ্চাপি গদাং তস্য মহাত্মনঃ
অচূর্ণয়ত্তদা পার্থস্তদদ্ভুতমিবাভবৎ
68.63
অথ তাং পতিতাং দৃষ্ট্বা গৃহ্যান্যাং মহতীং গদাম্
অর্জুনং বাসুদেবং চ পুনঃ পুনরতাডয়ৎ
68.64
তস্যার্জুনঃ ক্ষুরপ্রাভ্যাং সগদাবুদ্যতৌ ভুজৌ
চিচ্ছেদেন্দ্রধ্বজাকারৌ শিরশ্চান্যেন পত্রিণা
68.65
স পপাত হতো রাজন্বসুধামনুনাদয়ন্
ইন্দ্রধ্বজ ইবোত্সৃষ্টো যন্ত্রনির্মুক্তবন্ধনঃ
68.66
রথানীকাবগাঢশ্চ বারণাশ্বশতৈর্বৃতঃ
সোঽদৃশ্যত তদা পার্থো ঘনৈঃ সূর্য ইবাবৃতঃ