Utshovঅধ্যায় 67
67.1
সংজয় উবাচ
সংনিরুদ্ধস্তু তৈঃ পার্থো মহাবলপরাক্রমঃ
দ্রুতং সমনুয়াতশ্চ দ্রোণেন রথিনাং বরঃ
67.2
কিরন্নিষুগণাংস্তীক্ষ্ণান্স্বরশ্মীনিব ভাস্করঃ
তাপয়ামাস তত্সৈন্যং দেহং ব্যাধিগণো যথা
67.3
অশ্বো বিদ্ধো ধ্বজশ্ছিন্নঃ সারোহঃ পতিতো গজঃ
ছত্রাণি চাপবিদ্ধানি রথাশ্চক্রৈর্বিনা কৃতাঃ
67.4
বিদ্রুতানি চ সৈন্যানি শরার্তানি সমন্ততঃ
ইত্যাসীত্তুমুলং যুদ্ধং ন প্রাজ্ঞায়ত কিংচন
67.5
তেষামায়চ্ছতাং সংখ্যে পরস্পরমজিহ্মগৈঃ
অর্জুনো ধ্বজিনীং রাজন্নভীক্ষ্ণং সমকম্পয়ৎ
67.6
সত্যাং চিকীর্ষমাণস্তু প্রতিজ্ঞাং সত্যসংগরঃ
অভ্যদ্রবদ্রথশ্রেষ্ঠং শোণাশ্বং শ্বেতবাহনঃ
67.7
তং দ্রোণঃ পঞ্চবিংশত্যা মর্মভিদ্ভিরজিহ্মগৈঃ
অন্তেবাসিনমাচার্যো মহেষ্বাসং সমর্দয়ৎ
67.8
তং তূর্ণমিব বীভত্সুঃ সর্বশস্ত্রভৃতাং বরঃ
অভ্যধাবদিষূনস্যন্নিষুবেগবিঘাতকান্
67.9
তস্যাশু ক্ষিপতো ভল্লান্ভল্লৈঃ সংনতপর্বভিঃ
প্রত্যবিধ্যদমেয়াত্মা ব্রহ্মাস্ত্রং সমুদীরয়ন্
67.10
তদদ্ভুতমপশ্যাম দ্রোণস্যাচার্যকং যুধি
যতমানো যুবা নৈনং প্রত্যবিধ্যদ্যদর্জুনঃ
67.11
ক্ষরন্নিব মহামেঘো বারিধারাঃ সহস্রশঃ
দ্রোণমেঘঃ পার্থশৈলং ববর্ষ শরবৃষ্টিভিঃ
67.12
অর্জুনঃ শরবর্ষং তদ্ব্রহ্মাস্ত্রেণৈব মারিষ
প্রতিজগ্রাহ তেজস্বী বাণৈর্বাণান্বিশাতয়ন্
67.13
দ্রোণস্তু পঞ্চবিংশত্যা শ্বেতবাহনমার্দয়ৎ
বাসুদেবং চ সপ্তত্যা বাহ্বোরুরসি চাশুগৈঃ
67.14
পার্থস্তু প্রহসন্ধীমানাচার্যং স শরৌঘিণম্
বিসৃজন্তং শিতান্বাণানবারয়ত তং যুধি
67.15
অথ তৌ বধ্যমানৌ তু দ্রোণেন রথসত্তমৌ
আবর্জয়েতাং দুর্ধর্ষং যুগান্তাগ্নিমিবোত্থিতম্
67.16
বর্জয়ন্নিশিতান্বাণান্দ্রোণচাপবিনিঃসৃতান্
কিরীটমালী কৌন্তেয়ো ভোজানীকং ন্যপাতয়ৎ
67.17
সোঽন্তরা কৃতবর্মাণং কাম্বোজং চ সুদক্ষিণম্
অভ্যয়াদ্বর্জয়ন্দ্রোণং মৈনাকমিব পর্বতম্
67.18
ততো ভোজো নরব্যাঘ্রং দুঃসহঃ কুরুসত্তম
অবিধ্যত্তূর্ণমব্যগ্রো দশভিঃ কঙ্কপত্রিভিঃ
67.19
তমর্জুনঃ শিতেনাজৌ রাজন্বিব্যাধ পত্রিণা
পুনশ্চান্যৈস্ত্রিভির্বাণৈর্মোহয়ন্নিব সাত্বতম্
67.20
ভোজস্তু প্রহসন্পার্থং বাসুদেবং চ মাধবম্
একৈকং পঞ্চবিংশত্যা সায়কানাং সমার্পয়ৎ
67.21
তস্যার্জুনো ধনুশ্ছিত্ত্বা বিব্যাধৈনং ত্রিসপ্তভিঃ
শরৈরগ্নিশিখাকারৈঃ ক্রুদ্ধাশীবিষসংনিভৈঃ
67.22
অথান্যদ্ধনুরাদায় কৃতবর্মা মহারথঃ
পঞ্চভিঃ সায়কৈস্তূর্ণং বিব্যাধোরসি ভারত
67.23
পুনশ্চ নিশিতৈর্বাণৈঃ পার্থং বিব্যাধ পঞ্চভিঃ
তং পার্থো নবভির্বাণৈরাজঘান স্তনান্তরে
67.24
বিষক্তং দৃশ্য কৌন্তেয়ং কৃতবর্মরথং প্রতি
চিন্তয়ামাস বার্ষ্ণেয়ো ন নঃ কালাত্যয়ো ভবেৎ
67.25
ততঃ কৃষ্ণোঽব্রবীত্পার্থং কৃতবর্মণি মা দয়াম্
কুরুসাংবন্ধিকং কৃত্বা প্রমথ্যৈনং বিশাতয়
67.26
ততঃ স কৃতবর্মাণং মোহয়িত্বার্জুনঃ শরৈঃ
অভ্যগাজ্জবনৈরশ্বৈঃ কাম্বোজানামনীকিনীম্
67.27
অমর্ষিতস্তু হার্দিক্যঃ প্রবিষ্টে শ্বেতবাহনে
বিধুন্বন্সশরং চাপং পাঞ্চাল্যাভ্যাং সমাগতঃ
67.28
চক্ররক্ষৌ তু পাঞ্চাল্যাবর্জুনস্য পদানুগৌ
পর্যবারয়দায়ান্তৌ কৃতবর্মা রথেষুভিঃ
67.29
তাববিধ্যত্ততো ভোজঃ সর্বপারশবৈঃ শরৈঃ
ত্রিভিরেব যুধামন্যুং চতুর্ভিশ্চোত্তমৌজসম্
67.30
তাবপ্যেনং বিব্যধতুর্দশভির্দশভিঃ শরৈঃ
সংচিচ্ছিদতুরপ্যস্য ধ্বজং কার্মুকমেব চ
67.31
অথান্যদ্ধনুরাদায় হার্দিক্যঃ ক্রোধমূর্ছিতঃ
কৃত্বা বিধনুষৌ বীরৌ শরবর্ষৈরবাকিরৎ
67.32
তাবন্যে ধনুষী সজ্যে কৃত্বা ভোজং বিজঘ্নতুঃ
তেনান্তরেণ বীভত্সুর্বিবেশামিত্রবাহিনীম্
67.33
ন লেভাতে তু তৌ দ্বারং বারিতৌ কৃতবর্মণা
ধার্তরাষ্ট্রেষ্বনীকেষু যতমানৌ নরর্ষভৌ
67.34
অনীকান্যর্দয়ন্যুদ্ধে ত্বরিতঃ শ্বেতবাহনঃ
নাবধীত্কৃতবর্মাণং প্রাপ্তমপ্যরিসূদনঃ
67.35
তং দৃষ্ট্বা তু তথায়ান্তং শূরো রাজা শ্রুতায়ুধঃ
অভ্যদ্রবত্সুসংক্রুদ্ধো বিধুন্বানো মহদ্ধনুঃ
67.36
স পার্থং ত্রিভিরানর্ছত্সপ্তত্যা চ জনার্দনম্
ক্ষুরপ্রেণ সুতীক্ষ্ণেন পার্থকেতুমতাডয়ৎ
67.37
তমর্জুনো নবত্যা তু শরাণাং নতপর্বণাম্
আজঘান ভৃশং ক্রুদ্ধস্তোত্ত্রৈরিব মহাদ্বিপম্
67.38
স তন্ন মমৃষে রাজন্পাণ্ডবেয়স্য বিক্রমম্
অথৈনং সপ্তসপ্তত্যা নারাচানাং সমার্পয়ৎ
67.39
তস্যার্জুনো ধনুশ্ছিত্ত্বা শরাবাপং নিকৃত্য চ
আজঘানোরসি ক্রুদ্ধঃ সপ্তভির্নতপর্বভিঃ
67.40
অথান্যদ্ধনুরাদায় স রাজা ক্রোধমূর্ছিতঃ
বাসবিং নবভির্বাণৈর্বাহ্বোরুরসি চার্পয়ৎ
67.41
ততোঽর্জুনঃ স্ময়ন্নেব শ্রুতায়ুধমরিংদমঃ
শরৈরনেকসাহস্রৈঃ পীডয়ামাস ভারত
67.42
অশ্বাংশ্চাস্যাবধীত্তূর্ণং সারথিং চ মহারথঃ
বিব্যাধ চৈনং সপ্তত্যা নারাচানাং মহাবলঃ
67.43
হতাশ্বং রথমুত্সৃজ্য স তু রাজা শ্রুতায়ুধঃ
অভ্যদ্রবদ্রণে পার্থং গদামুদ্যম্য বীর্যবান্
67.44
বরুণস্যাত্মজো বীরঃ স তু রাজা শ্রুতায়ুধঃ
পর্ণাশা জননী যস্য শীততোয়া মহানদী
67.45
তস্য মাতাব্রবীদ্বাক্যং বরুণং পুত্রকারণাৎ
অবধ্যোঽয়ং ভবেল্লোকে শত্রূণাং তনয়ো মম
67.46
বরুণস্ত্বব্রবীত্প্রীতো দদাম্যস্মৈ বরং হিতম্
দিব্যমস্ত্রং সুতস্তেঽয়ং যেনাবধ্যো ভবিষ্যতি
67.47
নাস্তি চাপ্যমরত্বং বৈ মনুষ্যস্য কথংচন
সর্বেণাবশ্যমর্তব্যং জাতেন সরিতাং বরে
67.48
দুর্ধর্ষস্ত্বেষ শত্রূণাং রণেষু ভবিতা সদা
অস্ত্রস্যাস্য প্রভাবাদ্বৈ ব্যেতু তে মানসো জ্বরঃ
67.49
ইত্যুক্ত্বা বরুণঃ প্রাদাদ্গদাং মন্ত্রপুরস্কৃতাম্
যামাসাদ্য দুরাধর্ষঃ সর্বলোকে শ্রুতায়ুধঃ
67.50
উবাচ চৈনং ভগবান্পুনরেব জলেশ্বরঃ
অয়ুধ্যতি ন মোক্তব্যা সা ত্বয্যেব পতেদিতি
67.51
স তয়া বীরঘাতিন্যা জনার্দনমতাডয়ৎ
প্রতিজগ্রাহ তাং কৃষ্ণঃ পীনেনাংসেন বীর্যবান্
67.52
নাকম্পয়ত শৌরিং সা বিন্ধ্যং গিরিমিবানিলঃ
প্রত্যভ্যয়াত্তং বিপ্রোঢা কৃত্যেব দুরধিষ্ঠিতা
67.53
জঘান চাস্থিতং বীরং শ্রুতায়ুধমমর্ষণম্
হত্বা শ্রুতায়ুধং বীরং জগতীমন্বপদ্যত
67.54
হাহাকারো মহাংস্তত্র সৈন্যানাং সমজায়ত
স্বেনাস্ত্রেণ হতং দৃষ্ট্বা শ্রুতায়ুধমরিংদমম্
67.55
অয়ুধ্যমানায় হি সা কেশবায় নরাধিপ
ক্ষিপ্তা শ্রুতায়ুধেনাথ তস্মাত্তমবধীদ্গদা
67.56
যথোক্তং বরুণেনাজৌ তথা স নিধনং গতঃ
ব্যসুশ্চাপ্যপতদ্ভূমৌ প্রেক্ষতাং সর্বধন্বিনাম্
67.57
পতমানস্তু স বভৌ পর্ণাশায়াঃ প্রিয়ঃ সুতঃ
সংভগ্ন ইব বাতেন বহুশাখো বনস্পতিঃ
67.58
ততঃ সর্বাণি সৈন্যানি সেনামুখ্যাশ্চ সর্বশঃ
প্রাদ্রবন্ত হতং দৃষ্ট্বা শ্রুতায়ুধমরিংদমম্
67.59
তথ কাম্বোজরাজস্য পুত্রঃ শূরঃ সুদক্ষিণঃ
অভ্যয়াজ্জবনৈরশ্বৈঃ ফল্গুনং শত্রুসূদনম্
67.60
তস্য পার্থঃ শরান্সপ্ত প্রেষয়ামাস ভারত
তে তং শূরং বিনির্ভিদ্য প্রাবিশন্ধরণীতলম্
67.61
সোঽতিবিদ্ধঃ শরৈস্তীক্ষ্ণৈর্গাণ্ডীবপ্রেষিতৈর্মৃধে
অর্জুনং প্রতিবিব্যাধ দশভিঃ কঙ্কপত্রিভিঃ
67.62
বাসুদেবং ত্রিভির্বিদ্ধ্বা পুনঃ পার্থং চ পঞ্চভিঃ
তস্য পার্থো ধনুশ্ছিত্ত্বা কেতুং চিচ্ছেদ মারিষ
67.63
ভল্লাভ্যাং ভৃশতীক্ষ্ণাভ্যাং তং চ বিব্যাধ পাণ্ডবঃ
স তু পার্থং ত্রিভির্বিদ্ধ্বা সিংহনাদমথানদৎ
67.64
সর্বপারশবীং চৈব শক্তিং শূরঃ সুদক্ষিণঃ
সঘণ্টাং প্রাহিণোদ্ঘোরাং ক্রুদ্ধো গাণ্ডীবধন্বনে
67.65
সা জ্বলন্তী মহোল্কেব তমাসাদ্য মহারথম্
সবিস্ফুলিঙ্গা নির্ভিদ্য নিপপাত মহীতলে
67.66
তং চতুর্দশভিঃ পার্থো নারাচৈঃ কঙ্কপত্রিভিঃ
সাশ্বধ্বজধনুঃসূতং বিব্যাধাচিন্ত্যবিক্রমঃ
রথং চান্যৈঃ সুবহুভিশ্চক্রে বিশকলং শরৈঃ
67.67
সুদক্ষিণং তু কাম্বোজং মোঘসংকল্পবিক্রমম্
বিভেদ হৃদি বাণেন পৃথুধারেণ পাণ্ডবঃ
67.68
স ভিন্নমর্মা স্রস্তাঙ্গঃ প্রভ্রষ্টমুকুটাঙ্গদঃ
পপাতাভিমুখঃ শূরো যন্ত্রমুক্ত ইব ধ্বজঃ
67.69
গিরেঃ শিখরজঃ শ্রীমান্সুশাখঃ সুপ্রতিষ্ঠিতঃ
নির্ভগ্ন ইব বাতেন কর্ণিকারো হিমাত্যয়ে
67.70
শেতে স্ম নিহতো ভূমৌ কাম্বোজাস্তরণোচিতঃ
সুদর্শনীয়স্তাম্রাক্ষঃ কর্ণিনা স সুদক্ষিণঃ
পুত্রঃ কাম্বোজরাজস্য পার্থেন বিনিপাতিতঃ
67.71
ততঃ সর্বাণি সৈন্যানি ব্যদ্রবন্ত সুতস্য তে
হতং শ্রুতায়ুধং দৃষ্ট্বা কাম্বোজং চ সুদক্ষিণম্