Utshovঅধ্যায় 66
66.1
সংজয় উবাচ
দুঃশাসনবলং হত্বা সব্যসাচী ধনংজয়ঃ
সিন্ধুরাজং পরীপ্সন্বৈ দ্রোণানীকমুপাদ্রবৎ
66.2
স তু দ্রোণং সমাসাদ্য ব্যূহস্য প্রমুখে স্থিতম্
কৃতাঞ্জলিরিদং বাক্যং কৃষ্ণস্যানুমতেঽব্রবীৎ
66.3
শিবেন ধ্যাহি মাং ব্রহ্মন্স্বস্তি চৈব বদস্ব মে
ভবত্প্রসাদাদিচ্ছামি প্রবেষ্টুং দুর্ভিদাং চমূম্
66.4
ভবান্পিতৃসমো মহ্যং ধর্মরাজসমোঽপি চ
তথা কৃষ্ণসমশ্চৈব সত্যমেতদ্ব্রবীমি তে
66.5
অশ্বত্থামা যথা তাত রক্ষণীয়স্তবানঘ
তথাহমপি তে রক্ষ্যঃ সদৈব দ্বিজসত্তম
66.6
তব প্রসাদাদিচ্ছামি সিন্ধুরাজানমাহবে
নিহন্তুং দ্বিপদাং শ্রেষ্ঠ প্রতিজ্ঞাং রক্ষ মে বিভো
66.7
এবমুক্তস্তদাচার্যঃ প্রত্যুবাচ স্ময়ন্নিব
মামজিত্বা ন বীভত্সো শক্যো জেতুং জয়দ্রথঃ
66.8
এতাবদুক্ত্বা তং দ্রোণঃ শরব্রাতৈরবাকিরৎ
সরথাশ্বধ্বজং তীক্ষ্ণৈঃ প্রহসন্বৈ সসারথিম্
66.9
ততোঽর্জুনঃ শরব্রাতান্দ্রোণস্যাবার্য সায়কৈঃ
দ্রোণমভ্যর্দয়দ্বাণৈর্ঘোররূপৈর্মহত্তরৈঃ
66.10
বিব্যাধ চ রণে দ্রোণমনুমান্য বিশাং পতে
ক্ষত্রধর্মং সমাস্থায় নবভিঃ সায়কৈঃ পুনঃ
66.11
তস্যেষূনিষুভিশ্ছিত্ত্বা দ্রোণো বিব্যাধ তাবুভৌ
বিষাগ্নিজ্বলনপ্রখ্যৈরিষুভিঃ কৃষ্ণপাণ্ডবৌ
66.12
ইয়েষ পাণ্ডবস্তস্য বাণৈশ্ছেত্তুং শরাসনম্
তস্য চিন্তয়তস্ত্বেবং ফল্গুনস্য মহাত্মনঃ
দ্রোণঃ শরৈরসংভ্রান্তো জ্যাং চিচ্ছেদাশু বীর্যবান্
66.13
বিব্যাধ চ হয়ানস্য ধ্বজং সারথিমেব চ
অর্জুনং চ শরৈর্বীরং স্ময়মানোঽভ্যবাকিরৎ
66.14
এতস্মিন্নন্তরে পার্থঃ সজ্জং কৃত্বা মহদ্ধনুঃ
বিশেষয়িষ্যন্নাচার্যং সর্বাস্ত্রবিদুষাং বরম্
মুমোচ ষট্শতান্বাণান্গৃহীত্বৈকমিব দ্রুতম্
66.15
পুনঃ সপ্ত শতানন্যান্সহস্রং চানিবর্তিনাম্
চিক্ষেপায়ুতশশ্চান্যাংস্তেঽঘ্নন্দ্রোণস্য তাং চমূম্
66.16
তৈঃ সম্যগস্তৈর্বলিনা কৃতিনা চিত্রয়োধিনা
মনুষ্যবাজিমাতঙ্গা বিদ্ধাঃ পেতুর্গতাসবঃ
66.17
বিদ্রুতাশ্চ রণে পেতুঃ সংছিন্নায়ুধজীবিতাঃ
রথিনো রথমুখ্যেভ্যঃ সহয়াঃ শরপীডিতাঃ
66.18
চূর্ণিতাক্ষিপ্তদগ্ধানাং বজ্রানিলহুতাশনৈঃ
তুল্যরূপা গজাঃ পেতুর্গির্যগ্রাম্বুদবেশ্মনাম্
66.19
পেতুরশ্বসহস্রাণি প্রহতান্যর্জুনেষুভিঃ
হংসা হিমবতঃ পৃষ্ঠে বারিবিপ্রহতা ইব
66.20
রথাশ্বদ্বিপপত্ত্যোঘাঃ সলিলৌঘা ইবাদ্ভুতাঃ
যুগান্তাদিত্যরশ্ম্যাভৈঃ পাণ্ডবাস্তশরৈর্হতাঃ
66.21
তং পাণ্ডবাদিত্যশরাংশুজালং; কুরুপ্রবীরান্যুধি নিষ্টপন্তম্
স দ্রোণমেঘঃ শরবর্ষবেগৈঃ; প্রাচ্ছাদয়ন্মেঘ ইবার্করশ্মীন্
66.22
অথাত্যর্থবিসৃষ্টেন দ্বিষতামসুভোজিনা
আজঘ্নে বক্ষসি দ্রোণো নারাচেন ধনংজয়ম্
66.23
স বিহ্বলিতসর্বাঙ্গঃ ক্ষিতিকম্পে যথাচলঃ
ধৈর্যমালম্ব্য বীভত্সুর্দ্রোণং বিব্যাধ পত্রিভিঃ
66.24
দ্রোণস্তু পঞ্চভির্বাণৈর্বাসুদেবমতাডয়ৎ
অর্জুনং চ ত্রিসপ্তত্যা ধ্বজং চাস্য ত্রিভিঃ শরৈঃ
66.25
বিশেষয়িষ্যঞ্শিষ্যং চ দ্রোণো রাজন্পরাক্রমী
অদৃশ্যমর্জুনং চক্রে নিমেষাচ্ছরবৃষ্টিভিঃ
66.26
প্রসক্তান্পততোঽদ্রাক্ষ্ম ভারদ্বাজস্য সায়কান্
মণ্ডলীকৃতমেবাস্য ধনুশ্চাদৃশ্যতাদ্ভুতম্
66.27
তেঽভ্যয়ুঃ সমরে রাজন্বাসুদেবধনংজয়ৌ
দ্রোণসৃষ্টাঃ সুবহবঃ কঙ্কপত্রপরিচ্ছদাঃ
66.28
তদ্দৃষ্ট্বা তাদৃশং যুদ্ধং দ্রোণপাণ্ডবয়োস্তদা
বাসুদেবো মহাবুদ্ধিঃ কার্যবত্তামচিন্তয়ৎ
66.29
ততোঽব্রবীদ্বাসুদেবো ধনংজয়মিদং বচঃ
পার্থ পার্থ মহাবাহো ন নঃ কালাত্যয়ো ভবেৎ
66.30
দ্রোণমুত্সৃজ্য গচ্ছামঃ কৃত্যমেতন্মহত্তরম্
পার্থশ্চাপ্যব্রবীত্কৃষ্ণং যথেষ্টমিতি কেশব
66.31
ততঃ প্রদক্ষিণং কৃত্বা দ্রোণং প্রায়ান্মহাভুজঃ
পরিবৃত্তশ্চ বীভত্সুরগচ্ছদ্বিসৃজঞ্শরান্
66.32
ততোঽব্রবীত্স্ময়ন্দ্রোণঃ ক্বেদং পাণ্ডব গম্যতে
ননু নাম রণে শত্রুমজিত্বা ন নিবর্তসে
66.33
অর্জুন উবাচ
গুরুর্ভবান্ন মে শত্রুঃ শিষ্যঃ পুত্রসমোঽস্মি তে
ন চাস্তি স পুমাঁল্লোকে যস্ত্বাং যুধি পরাজয়েৎ
66.34
সংজয় উবাচ
এবং ব্রুবাণো বীভত্সুর্জয়দ্রথবধোত্সুকঃ
ত্বরায়ুক্তো মহাবাহুস্তত্সৈন্যং সমুপাদ্রবৎ
66.35
তং চক্ররক্ষৌ পাঞ্চাল্যৌ যুধামন্যূত্তমৌজসৌ
অন্বয়াতাং মহাত্মানৌ বিশন্তং তাবকং বলম্
66.36
ততো জয়ো মহারাজ কৃতবর্মা চ সাত্ত্বতঃ
কাম্বোজশ্চ শ্রুতায়ুশ্চ ধনংজয়মবারয়ন্
66.37
তেষাং দশসহস্রাণি রথানামনুয়ায়িনাম্
অভীষাহাঃ শূরসেনাঃ শিবয়োঽথ বসাতয়ঃ
66.38
মাচেল্লকা ললিত্থাশ্চ কেকয়া মদ্রকাস্তথা
নারায়ণাশ্চ গোপালাঃ কাম্বোজানাং চ যে গণাঃ
66.39
কর্ণেন বিজিতাঃ পূর্বং সংগ্রামে শূরসংমতাঃ
ভারদ্বাজং পুরস্কৃত্য ত্যক্তাত্মানোঽর্জুনং প্রতি
66.40
পুত্রশোকাভিসংতপ্তং ক্রুদ্ধং মৃত্যুমিবান্তকম্
ত্যজন্তং তুমুলে প্রাণান্সংনদ্ধং চিত্রয়োধিনম্
66.41
গাহমানমনীকানি মাতঙ্গমিব যূথপম্
মহেষ্বাসং পরাক্রান্তং নরব্যাঘ্রমবারয়ন্
66.42
ততঃ প্রববৃতে যুদ্ধং তুমুলং লোমহর্ষণম্
অন্যোন্যং বৈ প্রার্থয়তাং যোধানামর্জুনস্য চ
66.43
জয়দ্রথবধপ্রেপ্সুমায়ান্তং পুরুষর্ষভম্
ন্যবারয়ন্ত সহিতাঃ ক্রিয়া ব্যাধিমিবোত্থিতম্