Utshovঅধ্যায় 65
65.1
ধৃতরাষ্ট্র উবাচ
তস্মিন্প্রভগ্নে সৈন্যাগ্রে বধ্যমানে কিরীটিনা
কে নু তত্র রণে বীরাঃ প্রত্যুদীয়ুর্ধনংজয়ম্
65.2
আহোস্বিচ্ছকটব্যূহং প্রবিষ্টা মোঘনিশ্চয়াঃ
দ্রোণমাশ্রিত্য তিষ্ঠন্তঃ প্রাকারমকুতোভয়াঃ
65.3
সংজয় উবাচ
তথার্জুনেন সংভগ্নে তস্মিংস্তব বলে তদা
হতবীরে হতোত্সাহে পলায়নকৃতক্ষণে
65.4
পাকশাসনিনাভীক্ষ্ণং বধ্যমানে শরোত্তমৈঃ
ন তত্র কশ্চিত্সংগ্রামে শশাকার্জুনমীক্ষিতুম্
65.5
ততস্তব সুতো রাজন্দৃষ্ট্বা সৈন্যং তথাগতম্
দুঃশাসনো ভৃশং ক্রুদ্ধো যুদ্ধায়ার্জুনমভ্যয়াৎ
65.6
স কাঞ্চনবিচিত্রেণ কবচেন সমাবৃতঃ
জাম্বূনদশিরস্ত্রাণঃ শূরস্তীব্রপরাক্রমঃ
65.7
নাগানীকেন মহতা গ্রসন্নিব মহীমিমাম্
দুঃশাসনো মহারাজ সব্যসাচিনমাবৃণোৎ
65.8
হ্রাদেন গজঘণ্টানাং শঙ্খানাং নিনদেন চ
জ্যাক্ষেপনিনদৈশ্চৈব বিরাবেণ চ দন্তিনাম্
65.9
ভূর্দিশশ্চান্তরিক্ষং চ শব্দেনাসীত্সমাবৃতম্
স মুহূর্তং প্রতিভয়ো দারুণঃ সমপদ্যত
65.10
তান্দৃষ্ট্বা পততস্তূর্ণমঙ্কুশৈরভিচোদিতান্
ব্যালম্বহস্তান্সংরব্ধান্সপক্ষানিব পর্বতান্
65.11
সিংহনাদেন মহতা নরসিংহো ধনংজয়ঃ
গজানীকমমিত্রাণামভিতো ব্যধমচ্ছরৈঃ
65.12
মহোর্মিণমিবোদ্ধূতং শ্বসনেন মহার্ণবম্
কিরীটী তদ্গজানীকং প্রাবিশন্মকরো যথা
65.13
কাষ্ঠাতীত ইবাদিত্যঃ প্রতপন্যুগসংক্ষয়ে
দদৃশে দিক্ষু সর্বাসু পার্থঃ পরপুরংজয়ঃ
65.14
খুরশব্দেন চাশ্বানাং নেমিঘোষেণ তেন চ
তেন চোত্ক্রুষ্টশব্দেন জ্যানিনাদেন তেন চ
দেবদত্তস্য ঘোষেণ গাণ্ডীবনিনদেন চ
65.15
মন্দবেগতরা নাগা বভূবুস্তে বিচেতসঃ
শরৈরাশীবিষস্পর্শৈর্নির্ভিন্নাঃ সব্যসাচিনা
65.16
তে গজা বিশিখৈস্তীক্ষ্ণৈর্যুধি গাণ্ডীবচোদিতৈঃ
অনেকশতসাহস্রৈঃ সর্বাঙ্গেষু সমর্পিতাঃ
65.17
আরাবং পরমং কৃত্বা বধ্যমানাঃ কিরীটিনা
নিপেতুরনিশং ভূমৌ ছিন্নপক্ষা ইবাদ্রয়ঃ
65.18
অপরে দন্তবেষ্টেষু কুম্ভেষু চ কটেষু চ
শরৈঃ সমর্পিতা নাগাঃ ক্রৌঞ্চবদ্ব্যনদন্মুহুঃ
65.19
গজস্কন্ধগতানাং চ পুরুষাণাং কিরীটিনা
আচ্ছিদ্যন্তোত্তমাঙ্গানি ভল্লৈঃ সংনতপর্বভিঃ
65.20
সকুণ্ডলানাং পততাং শিরসাং ধরণীতলে
পদ্মানামিব সংঘাতৈঃ পার্থশ্চক্রে নিবেদনম্
65.21
যন্ত্রবদ্ধা বিকবচা ব্রণার্তা রুধিরোক্ষিতাঃ
ভ্রমত্সু যুধি নাগেষু মনুষ্যা বিললম্বিরে
65.22
কেচিদেকেন বাণেন সুমুক্তেন পতত্রিণা
দ্বৌ ত্রয়শ্চ বিনির্ভিন্না নিপেতুর্ধরণীতলে
65.23
মৌর্বীং ধনুর্ধ্বজং চৈব যুগানীষাস্তথৈব চ
রথিনাং কুট্টয়ামাস ভল্লৈঃ সংনতপর্বভিঃ
65.24
ন সংদধন্ন চাপ্যস্যন্ন বিমুঞ্চন্ন চোদ্ধরন্
মণ্ডলেনৈব ধনুষা নৃত্যন্পার্থঃ স্ম দৃশ্যতে
65.25
অতিবিদ্ধাশ্চ নারাচৈর্বমন্তো রুধিরং মুখৈঃ
মুহূর্তান্নিপতন্ত্যন্যে বারণা বসুধাতলে
65.26
উত্থিতান্যগণেয়ানি কবন্ধানি সমন্ততঃ
অদৃশ্যন্ত মহারাজ তস্মিন্পরমসংকুলে
65.27
সচাপাঃ সাঙ্গুলিত্রাণাঃ সখড্গাঃ সাঙ্গদা রণে
অদৃশ্যন্ত ভুজাশ্ছিন্না হেমাভরণভূষিতাঃ
65.28
সূপস্করৈরধিষ্ঠানৈরীষাদণ্ডকবন্ধুরৈঃ
চক্রৈর্বিমথিতৈরক্ষৈ ভগ্নৈশ্চ বহুধা যুগৈঃ
65.29
বর্মচাপশরৈশ্চৈব ব্যবকীর্ণৈস্ততস্ততঃ
স্রগ্ভিরাভরণৈর্বস্ত্রৈঃ পতিতৈশ্চ মহাধ্বজৈঃ
65.30
নিহতৈর্বারণৈরশ্বৈঃ ক্ষত্রিয়ৈশ্চ নিপাতিতৈঃ
অদৃশ্যত মহী তত্র দারুণপ্রতিদর্শনা
65.31
এবং দুঃশাসনবলং বধ্যমানং কিরীটিনা
সংপ্রাদ্রবন্মহারাজ ব্যথিতং বৈ সনায়কম্
65.32
ততো দুঃশাসনস্ত্রস্তঃ সহানীকঃ শরার্দিতঃ
দ্রোণং ত্রাতারমাকাঙ্ক্ষঞ্শকটব্যূহমভ্যগাৎ