Utshovঅধ্যায় 64
64.1
সংজয় উবাচ
ততো ব্যূঢেষ্বনীকেষু সমুত্ক্রুষ্টেষু মারিষ
তাড্যমানাসু ভেরীষু মৃদঙ্গেষু নদত্সু চ
64.2
অনীকানাং চ সংহ্রাদে বাদিত্রাণাং চ নিস্বনে
প্রধ্মাপিতেষু শঙ্খেষু সংনাদে লোমহর্ষণে
64.3
অভিহারয়ত্সু শনকৈর্ভরতেষু যুয়ুত্সুষু
রৌদ্রে মুহূর্তে সংপ্রাপ্তে সব্যসাচী ব্যদৃশ্যত
64.4
বডানাং বায়সানাং চ পুরস্তাত্সব্যসাচিনঃ
বহুলানি সহস্রাণি প্রাক্রীডংস্তত্র ভারত
64.5
মৃগাশ্চ ঘোরসংনাদাঃ শিবাশ্চাশিবদর্শনাঃ
দক্ষিণেন প্রয়াতানামস্মাকং প্রাণদংস্তথা
64.6
সনির্ঘাতা জ্বলন্ত্যশ্চ পেতুরুল্কাঃ সমন্ততঃ
চচাল চ মহী কৃত্স্না ভয়ে ঘোরে সমুত্থিতে
64.7
বিষ্বগ্বাতাঃ সনির্ঘাতা রূক্ষাঃ শর্করবর্ষিণঃ
ববুরায়াতি কৌন্তেয়ে সংগ্রামে সমুপস্থিতে
64.8
নাকুলিস্তু শতানীকো ধৃষ্টদ্যুম্নশ্চ পার্ষতঃ
পাণ্ডবানামনীকানি প্রাজ্ঞৌ তৌ ব্যূহতুস্তদা
64.9
ততো রথসহস্রেণ দ্বিরদানাং শতেন চ
ত্রিভিরশ্বসহস্রৈশ্চ পদাতীনাং শতৈঃ শতৈঃ
64.10
অধ্যর্ধমাত্রে ধনুষাং সহস্রে তনয়স্তব
অগ্রতঃ সর্বসৈন্যানাং স্থিত্বা দুর্মর্ষণোঽব্রবীৎ
64.11
অদ্য গাণ্ডীবধন্বানং তপন্তং যুদ্ধদুর্মদম্
অহমাবারয়িষ্যামি বেলেব মকরালয়ম্
64.12
অদ্য পশ্যন্তু সংগ্রামে ধনংজয়মমর্ষণম্
বিষক্তং ময়ি দুর্ধর্ষমশ্মকূটমিবাশ্মনি
64.13
এবং ব্রুবন্মহারাজ মহাত্মা স মহামতিঃ
মহেষ্বাসৈর্বৃতো রাজন্মহেষ্বাসো ব্যবস্থিতঃ
64.14
ততোঽন্তক ইব ক্রুদ্ধঃ সবজ্র ইব বাসবঃ
দণ্ডপাণিরিবাসহ্যো মৃত্যুঃ কালেন চোদিতঃ
64.15
শূলপাণিরিবাক্ষোভ্যো বরুণঃ পাশবানিব
যুগান্তাগ্নিরিবার্চিষ্মান্প্রধক্ষ্যন্বৈ পুনঃ প্রজাঃ
64.16
ক্রোধামর্ষবলোদ্ধূতো নিবাতকবচান্তকঃ
জয়ো জেতা স্থিতঃ সত্যে পারয়িষ্যন্মহাব্রতম্
64.17
আমুক্তকবচঃ খড্গী জাম্বূনদকিরীটভৃৎ
শুভ্রবর্মাম্বরধরঃ স্বঙ্গদী চারুকুণ্ডলী
64.18
রথপ্রবরমাস্থায় নরো নারায়ণানুগঃ
বিধুন্বন্গাণ্ডিবং সংখ্যে বভৌ সূর্য ইবোদিতঃ
64.19
সোঽগ্রানীকস্য মহত ইষুপাতে ধনংজয়ঃ
ব্যবস্থাপ্য রথং সজ্জং শঙ্খং দধ্মৌ প্রতাপবান্
64.20
অথ কৃষ্ণোঽপ্যসংভ্রান্তঃ পার্থেন সহ মারিষ
প্রাধ্মাপয়ত্পাঞ্চজন্যং শঙ্খপ্রবরমোজসা
64.21
তয়োঃ শঙ্খপ্রণাদেন তব সৈন্যে বিশাং পতে
আসন্সংহৃষ্টরোমাণঃ কম্পিতা গতচেতসঃ
64.22
যথা ত্রসন্তি ভূতানি সর্বাণ্যশনিনিস্বনাৎ
তথা শঙ্খপ্রণাদেন বিত্রেসুস্তব সৈনিকাঃ
64.23
প্রসুস্রুবুঃ শকৃন্মূত্রং বাহনানি চ সর্বশঃ
এবং সবাহনং সর্বমাবিগ্নমভবদ্বলম্
64.24
ব্যষীদন্ত নরা রাজঞ্শঙ্খশব্দেন মারিষ
বিসংজ্ঞাশ্চাভবন্কেচিত্কেচিদ্রাজন্বিতত্রসুঃ
64.25
ততঃ কপির্মহানাদং সহ ভূতৈর্ধ্বজালয়ৈঃ
অকরোদ্ব্যাদিতাস্যশ্চ ভীষয়ংস্তব সৈনিকান্
64.26
ততঃ শঙ্খাশ্চ ভের্যশ্চ মৃদঙ্গাশ্চানকৈঃ সহ
পুনরেবাভ্যহন্যন্ত তব সৈন্যপ্রহর্ষণাঃ
64.27
নানাবাদিত্রসংহ্রাদৈঃ ক্ষ্বেডিতাস্ফোটিতাকুলৈঃ
সিংহনাদৈঃ সবাদিত্রৈঃ সমাহূতৈর্মহারথৈঃ
64.28
তস্মিন্সুতুমুলে শব্দে ভীরূণাং ভয়বর্ধনে
অতীব হৃষ্টো দাশার্হমব্রবীত্পাকশাসনিঃ
64.29
চোদয়াশ্বান্হৃষীকেশ যত্র দুর্মর্ষণঃ স্থিতঃ
এতদ্ভিত্ত্বা গজানীকং প্রবেক্ষ্যাম্যরিবাহিনীম্
64.30
এবমুক্তো মহাবাহুঃ কেশবঃ সব্যসাচিনা
অচোদয়দ্ধয়াংস্তত্র যত্র দুর্মর্ষণঃ স্থিতঃ
64.31
স সংপ্রহারস্তুমুলঃ সংপ্রবৃত্তঃ সুদারুণঃ
একস্য চ বহূনাং চ রথনাগনরক্ষয়ঃ
64.32
ততঃ সায়কবর্ষেণ পর্জন্য ইব বৃষ্টিমান্
পরানবাকিরত্পার্থঃ পর্বতানিব নীরদঃ
64.33
তে চাপি রথিনঃ সর্বে ত্বরিতাঃ কৃতহস্তবৎ
অবাকিরন্বাণজালৈস্ততঃ কৃষ্ণধনংজয়ৌ
64.34
ততঃ ক্রুদ্ধো মহাবাহুর্বার্যমাণঃ পরৈর্যুধি
শিরাংসি রথিনাং পার্থঃ কায়েভ্যোঽপাহরচ্ছরৈঃ
64.35
উদ্ভ্রান্তনয়নৈর্বক্ত্রৈঃ সংদষ্টোষ্ঠপুটৈঃ শুভৈঃ
সকুণ্ডলশিরস্ত্রাণৈর্বসুধা সমকীর্যত
64.36
পুণ্ডরীকবনানীব বিধ্বস্তানি সমন্ততঃ
বিনিকীর্ণানি যোধানাং বদনানি চকাশিরে
64.37
তপনীয়বিচিত্রাণি সিক্তানি রুধিরেণ চ
অদৃশ্যন্ত যথা রাজন্মেঘসংঘাঃ সবিদ্যুতঃ
64.38
শিরসাং পততাং রাজঞ্শব্দোঽভূত্পৃথিবীতলে
কালেন পরিপক্বানাং তালানাং পততামিব
64.39
ততঃ কবন্ধঃ কশ্চিত্তু ধনুরালম্ব্য তিষ্ঠতি
কশ্চিত্খড্গং বিনিষ্কৃষ্য ভুজেনোদ্যম্য তিষ্ঠতি
64.40
নাজানন্ত শিরাংস্যুর্ব্যাং পতিতানি নরর্ষভাঃ
অমৃষ্যমাণাঃ কৌন্তেয়ং সংগ্রামে জয়গৃদ্ধিনঃ
64.41
হয়ানামুত্তমাঙ্গৈশ্চ হস্তিহস্তৈশ্চ মেদিনী
বাহুভিশ্চ শিরোভিশ্চ বীরাণাং সমকীর্যত
64.42
অয়ং পার্থঃ কুতঃ পার্থ এষ পার্থ ইতি প্রভো
তব সৈন্যেষু যোধানাং পার্থভূতমিবাভবৎ
64.43
অন্যোন্যমপি চাজঘ্নুরাত্মানমপি চাপরে
পার্থভূতমমন্যন্ত জগত্কালেন মোহিতাঃ
64.44
নিষ্টনন্তঃ সরুধিরা বিসংজ্ঞা গাঢবেদনাঃ
শয়ানা বহবো বীরাঃ কীর্তয়ন্তঃ সুহৃজ্জনম্
64.45
সভিণ্ডিপালাঃ সপ্রাসাঃ সশক্ত্যৃষ্টিপরশ্বধাঃ
সনির্যূহাঃ সনিস্ত্রিংশাঃ সশরাসনতোমরাঃ
64.46
সবাণবর্মাভরণাঃ সগদাঃ সাঙ্গদা রণে
মহাভুজগসংকাশা বাহবঃ পরিঘোপমাঃ
64.47
উদ্বেষ্টন্তি বিচেষ্টন্তি সংবেষ্টন্তি চ সর্বশঃ
বেগং কুর্বন্তি সংরব্ধা নিকৃত্তাঃ পরমেষুভিঃ
64.48
যো যঃ স্ম সমরে পার্থং প্রতিসংরভতে নরঃ
তস্য তস্যান্তকো বাণঃ শরীরমুপসর্পতি
64.49
নৃত্যতো রথমার্গেষু ধনুর্ব্যায়চ্ছতস্তথা
ন কশ্চিত্তত্র পার্থস্য দদর্শান্তরমণ্বপি
64.50
যত্তস্য ঘটমানস্য ক্ষিপ্রং বিক্ষিপতঃ শরান্
লাঘবাত্পাণ্ডুপুত্রস্য ব্যস্ময়ন্ত পরে জনাঃ
64.51
হস্তিনং হস্তিয়ন্তারমশ্বমাশ্বিকমেব চ
অভিনত্ফল্গুনো বাণৈ রথিনং চ সসারথিম্
64.52
আবর্তমানমাবৃত্তং যুধ্যমানং চ পাণ্ডবঃ
প্রমুখে তিষ্ঠমানং চ ন কংচিন্ন নিহন্তি সঃ
64.53
যথোদয়ন্বৈ গগনে সূর্যো হন্তি মহত্তমঃ
তথার্জুনো গজানীকমবধীত্কঙ্কপত্রিভিঃ
64.54
হস্তিভিঃ পতিতৈর্ভিন্নৈস্তব সৈন্যমদৃশ্যত
অন্তকালে যথা ভূমির্বিনিকীর্ণৈর্মহীধরৈঃ
64.55
যথা মধ্যংদিনে সূর্যো দুষ্প্রেক্ষ্যঃ প্রাণিভিঃ সদা
তথা ধনংজয়ঃ ক্রুদ্ধো দুষ্প্রেক্ষ্যো যুধি শত্রুভিঃ
64.56
তত্তথা তব পুত্রস্য সৈন্যং যুধি পরংতপ
প্রভগ্নং দ্রুতমাবিগ্নমতীব শরপীডিতম্
64.57
মারুতেনেব মহতা মেঘানীকং বিধূয়তা
প্রকাল্যমানং তত্সৈন্যং নাশকত্প্রতিবীক্ষিতুম্
64.58
প্রতোদৈশ্চাপকোটীভির্হুংকারৈঃ সাধুবাহিতৈঃ
কশাপার্ষ্ণ্যভিঘাতৈশ্চ বাগ্ভিরুগ্রাভিরেব চ
64.59
চোদয়ন্তো হয়াংস্তূর্ণং পলায়ন্তে স্ম তাবকাঃ
সাদিনো রথিনশ্চৈব পত্তয়শ্চার্জুনার্দিতাঃ
64.60
পার্ষ্ণ্যঙ্গুষ্ঠাঙ্কুশৈর্নাগাংশ্চোদয়ন্তস্তথাপরে
শরৈঃ সংমোহিতাশ্চান্যে তমেবাভিমুখা যয়ৌ
তব যোধা হতোত্সাহা বিভ্রান্তমনসস্তদা