Utshovঅধ্যায় 63
63.1
সংজয় উবাচ
তস্যাং নিশায়াং ব্যুষ্টায়াং দ্রোণঃ শস্ত্রভৃতাং বরঃ
স্বান্যনীকানি সর্বাণি প্রাক্রামদ্ব্যূহিতুং ততঃ
63.2
শূরাণাং গর্জতাং রাজন্সংক্রুদ্ধানামমর্ষিণাম্
শ্রূয়ন্তে স্ম গিরশ্চিত্রাঃ পরস্পরবধৈষিণাম্
63.3
বিস্ফার্য চ ধনূংষ্যাজৌ জ্যাঃ করৈঃ পরিমৃজ্য চ
বিনিঃশ্বসন্তঃ প্রাক্রোশন্ক্বেদানীং স ধনংজয়ঃ
63.4
বিকোশান্সুত্সরূনন্যে কৃতধারান্সমাহিতান্
পীতানাকাশসংকাশানসীন্কেচিচ্চ চিক্ষিপুঃ
63.5
চরন্তস্ত্বসিমার্গাংশ্চ ধনুর্মার্গাংশ্চ শিক্ষয়া
সংগ্রামমনসঃ শূরা দৃশ্যন্তে স্ম সহস্রশঃ
63.6
সঘণ্টাশ্চন্দনাদিগ্ধাঃ স্বর্ণবজ্রবিভূষিতাঃ
সমুত্ক্ষিপ্য গদাশ্চান্যে পর্যপৃচ্ছন্ত পাণ্ডবম্
63.7
অন্যে বলমদোন্মত্তাঃ পরিঘৈর্বাহুশালিনঃ
চক্রুঃ সংবাধমাকাশমুচ্ছ্রিতেন্দ্রধ্বজোপমৈঃ
63.8
নানাপ্রহরণৈশ্চান্যে বিচিত্রস্রগলংকৃতাঃ
সংগ্রামমনসঃ শূরাস্তত্র তত্র ব্যবস্থিতাঃ
63.9
ক্বার্জুনঃ ক্ব চ গোবিন্দঃ ক্ব চ মানী বৃকোদরঃ
ক্ব চ তে সুহৃদস্তেষামাহ্বয়ন্তো রণে তদা
63.10
ততঃ শঙ্খমুপাধ্মায় ত্বরয়ন্বাজিনঃ স্বয়ম্
ইতস্ততস্তান্রচয়ন্দ্রোণশ্চরতি বেগিতঃ
63.11
তেষ্বনীকেষু সর্বেষু স্থিতেষ্বাহবনন্দিষু
ভারদ্বাজো মহারাজ জয়দ্রথমথাব্রবীৎ
63.12
ত্বং চৈব সৌমদত্তিশ্চ কর্ণশ্চৈব মহারথঃ
অশ্বত্থামা চ শল্যশ্চ বৃষসেনঃ কৃপস্তথা
63.13
শতং চাশ্বসহস্রাণাং রথানাময়ুতানি ষট্
দ্বিরদানাং প্রভিন্নানাং সহস্রাণি চতুর্দশ
63.14
পদাতীনাং সহস্রাণি দংশিতান্যেকবিংশতিঃ
গব্যূতিষু ত্রিমাত্রেষু মামনাসাদ্য তিষ্ঠত
63.15
তত্রস্থং ত্বাং ন সংসোঢুং শক্তা দেবাঃ সবাসবাঃ
কিং পুনঃ পাণ্ডবাঃ সর্বে সমাশ্বসিহি সৈন্ধব
63.16
এবমুক্তঃ সমাশ্বস্তঃ সিন্ধুরাজো জয়দ্রথঃ
সংপ্রায়াত্সহ গান্ধারৈর্বৃতস্তৈশ্চ মহারথৈঃ
বর্মিভিঃ সাদিভির্যত্তৈঃ প্রাসপাণিভিরাস্থিতৈঃ
63.17
চামরাপীডিনঃ সর্বে জাম্বূনদবিভূষিতাঃ
জয়দ্রথস্য রাজেন্দ্র হয়াঃ সাধুপ্রবাহিনঃ
তে চৈব সপ্তসাহস্রা দ্বিসাহস্রাশ্চ সৈন্ধবাঃ
63.18
মত্তানামধিরূঢানাং হস্ত্যারোহৈর্বিশারদৈঃ
নাগানাং ভীমরূপাণাং বর্মিণাং রৌদ্রকর্মিণাম্
63.19
অধ্যর্ধেন সহস্রেণ পুত্রো দুর্মর্ষণস্তব
অগ্রতঃ সর্বসৈন্যানাং যোত্স্যমানো ব্যবস্থিতঃ
63.20
ততো দুঃশাসনশ্চৈব বিকর্ণশ্চ তবাত্মজৌ
সিন্ধুরাজার্থসিদ্ধ্যর্থমগ্রানীকে ব্যবস্থিতৌ
63.21
দীর্ঘো দ্বাদশগব্যূতিঃ পশ্চার্ধে পঞ্চ বিস্তৃতঃ
ব্যূহঃ স চক্রশকটো ভারদ্বাজেন নির্মিতঃ
63.22
নানানৃপতিভির্বীরৈস্তত্র তত্র ব্যবস্থিতৈঃ
রথাশ্বগজপত্ত্যোঘৈর্দ্রোণেন বিহিতঃ স্বয়ম্
63.23
পশ্চার্ধে তস্য পদ্মস্তু গর্ভব্যূহঃ সুদুর্ভিদঃ
সূচী পদ্মস্য মধ্যস্থো গূঢো ব্যূহঃ পুনঃ কৃতঃ
63.24
এবমেতং মহাব্যূহং ব্যূহ্য দ্রোণো ব্যবস্থিতঃ
সূচীমুখে মহেষ্বাসঃ কৃতবর্মা ব্যবস্থিতঃ
63.25
অনন্তরং চ কাম্বোজো জলসংধশ্চ মারিষ
দুর্যোধনঃ সহামাত্যস্তদনন্তরমেব চ
63.26
ততঃ শতসহস্রাণি যোধানামনিবর্তিনাম্
ব্যবস্থিতানি সর্বাণি শকটে সূচিরক্ষিণঃ
63.27
তেষাং চ পৃষ্ঠতো রাজ বলেন মহতা বৃতঃ
জয়দ্রথস্ততো রাজন্সূচিপাশে ব্যবস্থিতঃ
63.28
শকটস্য তু রাজেন্দ্র ভারদ্বাজো মুখে স্থিতঃ
অনু তস্যাভবদ্ভোজো জুগোপৈনং ততঃ স্বয়ম্
63.29
শ্বেতবর্মাম্বরোষ্ণীষো ব্যূঢোরস্কো মহাভুজঃ
ধনুর্বিস্ফারয়ন্দ্রোণস্তস্থৌ ক্রুদ্ধ ইবান্তকঃ
63.30
পতাকিনং শোণহয়ং বেদীকৃষ্ণাজিনধ্বজম্
দ্রোণস্য রথমালোক্য প্রহৃষ্টাঃ কুরবোঽভবন্
63.31
সিদ্ধচারণসংঘানাং বিস্ময়ঃ সুমহানভূৎ
দ্রোণেন বিহিতং দৃষ্ট্বা ব্যূহং ক্ষুব্ধার্ণবোপমম্
63.32
সশৈলসাগরবনাং নানাজনপদাকুলাম্
গ্রসেদ্ব্যূহঃ ক্ষিতিং সর্বামিতি ভূতানি মেনিরে
63.33
বহুরথমনুজাশ্বপত্তিনাগং; প্রতিভয়নিস্বনমদ্ভুতাভরূপম্
অহিতহৃদয়ভেদনং মহদ্বৈ; শকটমবেক্ষ্য কৃতং ননন্দ রাজা