অধ্যায় 62

62.1

সংজয় উবাচ
হন্ত তে সংপ্রবক্ষ্যামি সর্বং প্রত্যক্ষদর্শিবান্
শুশ্রূষস্ব স্থিরো ভূত্বা তব হ্যপনয়ো মহান্

গতোদকে সেতুবন্ধো যাদৃক্তাদৃগয়ং তব
বিলাপো নিষ্ফলো রাজন্মা শুচো ভরতর্ষভ

অনতিক্রমণীয়োঽয়ং কৃতান্তস্যাদ্ভুতো বিধিঃ
মা শুচো ভরতশ্রেষ্ঠ দিষ্টমেতত্পুরাতনম্

যদি হি ত্বং পুরা দ্যূতাত্কুন্তীপুত্রং যুধিষ্ঠিরম্
নিবর্তয়েথাঃ পুত্রাংশ্চ ন ত্বাং ব্যসনমাব্রজেৎ

যুদ্ধকালে পুনঃ প্রাপ্তে তদৈব ভবতা যদি
নিবর্তিতাঃ স্যুঃ সংরব্ধা ন ত্বাং ব্যসনমাব্রজেৎ

দুর্যোধনং চাবিধেয়ং বধ্নীতেতি পুরা যদি
কুরূনচোদয়িষ্যস্ত্বং ন ত্বাং ব্যসনমাব্রজেৎ

তত্তে বুদ্ধিব্যভীচারমুপলপ্স্যন্তি পাণ্ডবাঃ
পাঞ্চালা বৃষ্ণয়ঃ সর্বে যে চান্যেঽপি মহাজনাঃ

স কৃত্বা পিতৃকর্ম ত্বং পুত্রং সংস্থাপ্য সত্পথে
বর্তেথা যদি ধর্মেণ ন ত্বাং ব্যসনমাব্রজেৎ

ত্বং তু প্রাজ্ঞতমো লোকে হিত্বা ধর্মং সনাতনম্
দুর্যোধনস্য কর্ণস্য শকুনেশ্চান্বগা মতম্

তত্তে বিলপিতং সর্বং ময়া রাজন্নিশামিতম্
অর্থে নিবিশমানস্য বিষমিশ্রং যথা মধু

ন তথা মন্যতে কৃষ্ণো রাজানং পাণ্ডবং পুরা
ন ভীষ্মং নৈব চ দ্রোণং যথা ত্বাং মন্যতে নৃপ

ব্যজানত যদা তু ত্বাং রাজধর্মাদধশ্চ্যুতম্
তদা প্রভৃতি কৃষ্ণস্ত্বাং ন তথা বহু মন্যতে

পরুষাণ্যুচ্যমানাংশ্চ যথা পার্থানুপেক্ষসে
তস্যানুবন্ধঃ প্রাপ্তস্ত্বাং পুত্রাণাং রাজ্যকামুকম্

পিতৃপৈতামহং রাজ্যমপবৃত্তং তদানঘ
অথ পার্থৈর্জিতাং কৃত্স্নাং পৃথিবীং প্রত্যপদ্যথাঃ

পাণ্ডুনাবর্জিতং রাজ্যং কৌরবাণাং যশস্তথা
ততশ্চাভ্যধিকং ভূয়ঃ পাণ্ডবৈর্ধর্মচারিভিঃ

তেষাং তত্তাদৃশং কর্ম ত্বামাসাদ্য সুনিষ্ফলম্
যত্পিত্র্যাদ্ভ্রংশিতা রাজ্যাত্ত্বয়েহামিষগৃদ্ধিনা

যত্পুনর্যুদ্ধকালে ত্বং পুত্রান্গর্হয়সে নৃপ
বহুধা ব্যাহরন্দোষান্ন তদদ্যোপপদ্যতে

ন হি রক্ষন্তি রাজানো যুধ্যন্তো জীবিতং রণে
চমূং বিগাহ্য পার্থানাং যুধ্যন্তে ক্ষত্রিয়র্ষভাঃ

যাং তু কৃষ্ণার্জুনৌ সেনাং যাং সাত্যকিবৃকোদরৌ
রক্ষেরন্কো নু তাং যুধ্যেচ্চমূমন্যত্র কৌরবৈঃ

যেষাং যোদ্ধা গুডাকেশো যেষাং মন্ত্রী জনার্দনঃ
যেষাং চ সাত্যকির্গোপ্তা যেষাং গোপ্তা বৃকোদরঃ

কো হি তান্বিষহেদ্যোদ্ধুং মর্ত্যধর্মা ধনুর্ধরঃ
অন্যত্র কৌরবেয়েভ্যো যে বা তেষাং পদানুগাঃ

যাবত্তু শক্যতে কর্তুমনুরক্তৈর্জনাধিপৈঃ
ক্ষত্রধর্মরতৈঃ শূরৈস্তাবত্কুর্বন্তি কৌরবাঃ

যথা তু পুরুষব্যাঘ্রৈর্যুদ্ধং পরমসঙ্কটম্
কুরূণাং পাণ্ডবৈঃ সার্ধং তত্সর্বং শৃণু তত্ত্বতঃ