UtshovChapter 62
62.1
संजय उवाच
हन्त ते संप्रवक्ष्यामि सर्वं प्रत्यक्षदर्शिवान्
शुश्रूषस्व स्थिरो भूत्वा तव ह्यपनयो महान्
Sanjaya uvacha
Hanta te sampravakshyami sarvam pratyakshadarshivan
Shushrushasva sthiro bhutva tava hyapanayo mahan
62.2
गतोदके सेतुबन्धो यादृक्तादृगयं तव
विलापो निष्फलो राजन्मा शुचो भरतर्षभ
Gatodake setubandho yadriktadrigayam tava
Vilapo nishphalo rajanma shucho bharatarshabha
62.3
अनतिक्रमणीयोऽयं कृतान्तस्याद्भुतो विधिः
मा शुचो भरतश्रेष्ठ दिष्टमेतत्पुरातनम्
Anatikramaniyoyam kritantasyadbhuto vidhih
Ma shucho bharatashreshtha dishtametatpuratanam
62.4
यदि हि त्वं पुरा द्यूतात्कुन्तीपुत्रं युधिष्ठिरम्
निवर्तयेथाः पुत्रांश्च न त्वां व्यसनमाव्रजेत्
Yadi hi tvam pura dyutatkuntiputram yudhishthiram
Nivartayethah putranshcha na tvam vyasanamavrajet
62.5
युद्धकाले पुनः प्राप्ते तदैव भवता यदि
निवर्तिताः स्युः संरब्धा न त्वां व्यसनमाव्रजेत्
Yuddhakale punah prapte tadaiva bhavata yadi
Nivartitah syuh sanrabdha na tvam vyasanamavrajet
62.6
दुर्योधनं चाविधेयं बध्नीतेति पुरा यदि
कुरूनचोदयिष्यस्त्वं न त्वां व्यसनमाव्रजेत्
Duryodhanam chavidheyam badhniteti pura yadi
Kurunachodayishyastvam na tvam vyasanamavrajet
62.7
तत्ते बुद्धिव्यभीचारमुपलप्स्यन्ति पाण्डवाः
पाञ्चाला वृष्णयः सर्वे ये चान्येऽपि महाजनाः
Tatte buddhivyabhicharamupalapsyanti pandavah
Panchala vrishnayah sarve ye chanyepi mahajanah
62.8
स कृत्वा पितृकर्म त्वं पुत्रं संस्थाप्य सत्पथे
वर्तेथा यदि धर्मेण न त्वां व्यसनमाव्रजेत्
Sa kritva pitrikarma tvam putram sansthapya satpathe
Vartetha yadi dharmena na tvam vyasanamavrajet
62.9
त्वं तु प्राज्ञतमो लोके हित्वा धर्मं सनातनम्
दुर्योधनस्य कर्णस्य शकुनेश्चान्वगा मतम्
Tvam tu pragyatamo loke hitva dharmam sanatanam
Duryodhanasya karnasya shakuneshchanvaga matam
62.10
तत्ते विलपितं सर्वं मया राजन्निशामितम्
अर्थे निविशमानस्य विषमिश्रं यथा मधु
Tatte vilapitam sarvam maya rajannishamitam
Arthe nivishamanasya vishamishram yatha madhu
62.11
न तथा मन्यते कृष्णो राजानं पाण्डवं पुरा
न भीष्मं नैव च द्रोणं यथा त्वां मन्यते नृप
Na tatha manyate krishno rajanam pandavam pura
Na bhishmam naiva cha dronam yatha tvam manyate nripa
62.12
व्यजानत यदा तु त्वां राजधर्मादधश्च्युतम्
तदा प्रभृति कृष्णस्त्वां न तथा बहु मन्यते
Vyajanata yada tu tvam rajadharmadadhashchyutam
Tada prabhriti krishnastvam na tatha bahu manyate
62.13
परुषाण्युच्यमानांश्च यथा पार्थानुपेक्षसे
तस्यानुबन्धः प्राप्तस्त्वां पुत्राणां राज्यकामुकम्
Parushanyuchyamananshcha yatha parthanupekshase
Tasyanubandhah praptastvam putranam rajyakamukam
62.14
पितृपैतामहं राज्यमपवृत्तं तदानघ
अथ पार्थैर्जितां कृत्स्नां पृथिवीं प्रत्यपद्यथाः
Pitripaitamaham rajyamapavrittam tadanagha
Atha parthairjitam kritsnam prithivim pratyapadyathah
62.15
पाण्डुनावर्जितं राज्यं कौरवाणां यशस्तथा
ततश्चाभ्यधिकं भूयः पाण्डवैर्धर्मचारिभिः
Pandunavarjitam rajyam kauravanam yashastatha
Tatashchabhyadhikam bhuyah pandavairdharmacharibhih
62.16
तेषां तत्तादृशं कर्म त्वामासाद्य सुनिष्फलम्
यत्पित्र्याद्भ्रंशिता राज्यात्त्वयेहामिषगृद्धिना
Tesham tattadrisham karma tvamasadya sunishphalam
Yatpitryadbhranshita rajyattvayehamishagriddhina
62.17
यत्पुनर्युद्धकाले त्वं पुत्रान्गर्हयसे नृप
बहुधा व्याहरन्दोषान्न तदद्योपपद्यते
Yatpunaryuddhakale tvam putrangarhayase nripa
Bahudha vyaharandoshanna tadadyopapadyate
62.18
न हि रक्षन्ति राजानो युध्यन्तो जीवितं रणे
चमूं विगाह्य पार्थानां युध्यन्ते क्षत्रियर्षभाः
Na hi rakshanti rajano yudhyanto jivitam rane
Chamum vigahya parthanam yudhyante kshatriyarshabhah
62.19
यां तु कृष्णार्जुनौ सेनां यां सात्यकिवृकोदरौ
रक्षेरन्को नु तां युध्येच्चमूमन्यत्र कौरवैः
Yam tu krishnarjunau senam yam satyakivrikodarau
Raksheranko nu tam yudhyechchamumanyatra kauravaih
62.20
येषां योद्धा गुडाकेशो येषां मन्त्री जनार्दनः
येषां च सात्यकिर्गोप्ता येषां गोप्ता वृकोदरः
Yesham yoddha gudakesho yesham mantri janardanah
Yesham cha satyakirgopta yesham gopta vrikodarah
62.21
को हि तान्विषहेद्योद्धुं मर्त्यधर्मा धनुर्धरः
अन्यत्र कौरवेयेभ्यो ये वा तेषां पदानुगाः
Ko hi tanvishahedyoddhum martyadharma dhanurdharah
Anyatra kauraveyebhyo ye va tesham padanugah
62.22
यावत्तु शक्यते कर्तुमनुरक्तैर्जनाधिपैः
क्षत्रधर्मरतैः शूरैस्तावत्कुर्वन्ति कौरवाः
Yavattu shakyate kartumanuraktairjanadhipaih
Kshatradharmarataih shuraistavatkurvanti kauravah
62.23
यथा तु पुरुषव्याघ्रैर्युद्धं परमसङ्कटम्
कुरूणां पाण्डवैः सार्धं तत्सर्वं शृणु तत्त्वतः
Yatha tu purushavyaghrairyuddham paramasankatam
Kurunam pandavaih sardham tatsarvam shrinu tattvatah