Utshovঅধ্যায় 61
61.1
ধৃতরাষ্ট্র উবাচ
শ্বোভূতে কিমকার্ষুস্তে দুঃখশোকসমন্বিতাঃ
অভিমন্যৌ হতে তত্র কে বায়ুধ্যন্ত মামকাঃ
61.2
জানন্তস্তস্য কর্মাণি কুরবঃ সব্যসাচিনঃ
কথং তত্কিল্বিষং কৃত্বা নির্ভয়া ব্রূহি মামকাঃ
61.3
পুত্রশোকাভিসংতপ্তং ক্রুদ্ধং মৃত্যুমিবান্তকম্
আয়ান্তং পুরুষব্যাঘ্রং কথং দদৃশুরাহবে
61.4
কপিরাজধ্বজং সংখ্যে বিধুন্বানং মহদ্ধনুঃ
দৃষ্ট্বা পুত্রপরিদ্যূনং কিমকুর্বন্ত মামকাঃ
61.5
কিং নু সংজয় সংগ্রামে বৃত্তং দুর্যোধনং প্রতি
পরিদেবো মহানত্র শ্রুতো মে নাভিনন্দনম্
61.6
বভূবুর্যে মনোগ্রাহ্যাঃ শব্দাঃ শ্রুতিসুখাবহাঃ
ন শ্রূয়ন্তেঽদ্য তে সর্বে সৈন্ধবস্য নিবেশনে
61.7
স্তুবতাং নাদ্য শ্রূয়ন্তে পুত্রাণাং শিবিরে মম
সূতমাগধসংঘানাং নর্তকানাং চ সর্বশঃ
61.8
শব্দেন নাদিতাভীক্ষ্ণমভবদ্যত্র মে শ্রুতিঃ
দীনানামদ্য তং শব্দং ন শৃণোমি সমীরিতম্
61.9
নিবেশনে সত্যধৃতেঃ সোমদত্তস্য সংজয়
আসীনোঽহং পুরা তাত শব্দমশ্রৌষমুত্তমম্
61.10
তদদ্য হীনপুণ্যোঽহমার্তস্বরনিনাদিতম্
নিবেশনং হতোত্সাহং পুত্রাণাং মম লক্ষয়ে
61.11
বিবিংশতের্দুর্মুখস্য চিত্রসেনবিকর্ণয়োঃ
অন্যেষাং চ সুতানাং মে ন তথা শ্রূয়তে ধ্বনিঃ
61.12
ব্রাহ্মণাঃ ক্ষত্রিয়া বৈশ্যা যং শিষ্যাঃ পর্যুপাসতে
দ্রোণপুত্রং মহেষ্বাসং পুত্রাণাং মে পরায়ণম্
61.13
বিতণ্ডালাপসংলাপৈর্হুতয়াচিতবন্দিতৈঃ
গীতৈশ্চ বিবিধৈরিষ্টৈ রমতে যো দিবানিশম্
61.14
উপাস্যমানো বহুভিঃ কুরুপাণ্ডবসাত্বতৈঃ
সূত তস্য গৃহে শব্দো নাদ্য দ্রৌণের্যথা পুরা
61.15
দ্রোণপুত্রং মহেষ্বাসং গায়না নর্তকাশ্চ যে
অত্যর্থমুপতিষ্ঠন্তি তেষাং ন শ্রূয়তে ধ্বনিঃ
61.16
বিন্দানুবিন্দয়োঃ সায়ং শিবিরে যো মহাধ্বনিঃ
শ্রূয়তে সোঽদ্য ন তথা কেকয়ানাং চ বেশ্মসু
61.17
নিত্যপ্রমুদিতানাং চ তালগীতস্বনো মহান্
নৃত্যতাং শ্রূয়তে তাত গণানাং সোঽদ্য ন ধ্বনিঃ
61.18
সপ্ততন্তূন্বিতন্বানা যমুপাসন্তি যাজকাঃ
সৌমদত্তিং শ্রুতনিধিং তেষাং ন শ্রূয়তে ধ্বনিঃ
61.19
জ্যাঘোষো ব্রহ্মঘোষশ্চ তোমরাসিরথধ্বনিঃ
দ্রোণস্যাসীদবিরতো গৃহে তন্ন শৃণোম্যহম্
61.20
নানাদেশসমুত্থানাং গীতানাং যোঽভবত্স্বনঃ
বাদিত্রনাদিতানাং চ সোঽদ্য ন শ্রূয়তে মহান্
61.21
যদা প্রভৃত্যুপপ্লব্যাচ্ছান্তিমিচ্ছঞ্জনার্দনঃ
আগতঃ সর্বভূতানামনুকম্পার্থমচ্যুতঃ
61.22
ততোঽহমব্রুবং সূত মন্দং দুর্যোধনং তদা
বাসুদেবেন তীর্থেন পুত্র সংশাম্য পাণ্ডবৈঃ
61.23
কালপ্রাপ্তমহং মন্যে মা ত্বং দুর্যোধনাতিগাঃ
শমে চেদ্যাচমানং ত্বং প্রত্যাখ্যাস্যসি কেশবম্
হিতার্থমভিজল্পন্তং ন তথাস্ত্যপরাজয়ঃ
61.24
প্রত্যাচষ্ট স দাশার্হমৃষভং সর্বধন্বিনাম্
অনুনেয়ানি জল্পন্তমনয়ান্নান্বপদ্যত
61.25
ততো দুঃশাসনস্যৈব কর্ণস্য চ মতং দ্বয়োঃ
অন্ববর্তত হিত্বা মাং কৃষ্টঃ কালেন দুর্মতিঃ
61.26
ন হ্যহং দ্যূতমিচ্ছামি বিদুরো ন প্রশংসতি
সৈন্ধবো নেচ্ছতে দ্যূতং ভীষ্মো ন দ্যূতমিচ্ছতি
61.27
শল্যো ভূরিশ্রবাশ্চৈব পুরুমিত্রো জয়স্তথা
অশ্বত্থামা কৃপো দ্রোণো দ্যূতং নেচ্ছন্তি সংজয়
61.28
এতেষাং মতমাজ্ঞায় যদি বর্তেত পুত্রকঃ
সজ্ঞাতিমিত্রঃ সসুহৃচ্চিরং জীবেদনাময়ঃ
61.29
শ্লক্ষ্ণা মধুরসংভাষা জ্ঞাতিমধ্যে প্রিয়ংবদাঃ
কুলীনাঃ সংমতাঃ প্রাজ্ঞাঃ সুখং প্রাপ্স্যন্তি পাণ্ডবাঃ
61.30
ধর্মাপেক্ষো নরো নিত্যং সর্বত্র লভতে সুখম্
প্রেত্যভাবে চ কল্যাণং প্রসাদং প্রতিপদ্যতে
61.31
অর্হন্ত্যর্ধং পৃথিব্যাস্তে ভোক্তুং সামর্থ্যসাধনাঃ
তেষামপি সমুদ্রান্তা পিতৃপৈতামহী মহী
61.32
নিয়ুজ্যমানাঃ স্থাস্যন্তি পাণ্ডবা ধর্মবর্ত্মনি
সন্তি নো জ্ঞাতয়স্তাত যেষাং শ্রোষ্যন্তি পাণ্ডবাঃ
61.33
শল্যস্য সোমদত্তস্য ভীষ্মস্য চ মহাত্মনঃ
দ্রোণস্যাথ বিকর্ণস্য বাহ্লিকস্য কৃপস্য চ
61.34
অন্যেষাং চৈব বৃদ্ধানাং ভরতানাং মহাত্মনাম্
ত্বদর্থং ব্রুবতাং তাত করিষ্যন্তি বচো হিতম্
61.35
কং বা ত্বং মন্যসে তেষাং যস্ত্বা ব্রূয়াদতোঽন্যথা
কৃষ্ণো ন ধর্মং সংজহ্যাত্সর্বে তে চ ত্বদন্বয়াঃ
61.36
ময়াপি চোক্তাস্তে বীরা বচনং ধর্মসংহিতম্
নান্যথা প্রকরিষ্যন্তি ধর্মাত্মানো হি পাণ্ডবাঃ
61.37
ইত্যহং বিলপন্সূত বহুশঃ পুত্রমুক্তবান্
ন চ মে শ্রুতবান্মূঢো মন্যে কালস্য পর্যয়ম্
61.38
বৃকোদরার্জুনৌ যত্র বৃষ্ণিবীরশ্চ সাত্যকিঃ
উত্তমৌজাশ্চ পাঞ্চাল্যো যুধামন্যুশ্চ দুর্জয়ঃ
61.39
ধৃষ্টদ্যুম্নশ্চ দুর্ধর্ষঃ শিখণ্ডী চাপরাজিতঃ
অশ্মকাঃ কেকয়াশ্চৈব ক্ষত্রধর্মা চ সৌমকিঃ
61.40
চৈদ্যশ্চ চেকিতানশ্চ পুত্রঃ কাশ্যস্য চাভিভুঃ
দ্রৌপদেয়া বিরাটশ্চ দ্রুপদশ্চ মহারথঃ
যমৌ চ পুরুষব্যাঘ্রৌ মন্ত্রী চ মধুসূদনঃ
61.41
ক এতাঞ্জাতু যুধ্যেত লোকেঽস্মিন্বৈ জিজীবিষুঃ
দিব্যমস্ত্রং বিকুর্বাণান্সংহরেয়ুররিংদমাঃ
61.42
অন্যো দুর্যোধনাত্কর্ণাচ্ছকুনেশ্চাপি সৌবলাৎ
দুঃশাসনচতুর্থানাং নান্যং পশ্যামি পঞ্চমম্
61.43
যেষামভীশুহস্তঃ স্যাদ্বিষ্বক্সেনো রথে স্থিতঃ
সংনদ্ধশ্চার্জুনো যোদ্ধা তেষাং নাস্তি পরাজয়ঃ
61.44
তেষাং মম বিলাপানাং ন হি দুর্যোধনঃ স্মরেৎ
হতৌ হি পুরুষব্যাঘ্রৌ ভীষ্মদ্রোণৌ ত্বমাত্থ মে
61.45
তেষাং বিদুরবাক্যানামুক্তানাং দীর্ঘদর্শিনাম্
দৃষ্ট্বেমাং ফলনির্বৃত্তিং মন্যে শোচন্তি পুত্রকাঃ
61.46
হিমাত্যয়ে যথা কক্ষং শুষ্কং বাতেরিতো মহান্
অগ্নির্দহেত্তথা সেনাং মামিকাং স ধনংজয়ঃ
61.47
আচক্ষ্ব তদ্ধি নঃ সর্বং কুশলো হ্যসি সংজয়
যদুপায়াত্তু সায়াহ্নে কৃত্বা পার্থস্য কিল্বিষম্
অভিমন্যৌ হতে তাত কথমাসীন্মনো হি বঃ
61.48
ন জাতু তস্য কর্মাণি যুধি গাণ্ডীবধন্বনঃ
অপকৃত্বা মহত্তাত সোঢুং শক্ষ্যন্তি মামকাঃ
61.49
কিং নু দুর্যোধনঃ কৃত্যং কর্ণঃ কৃত্যং কিমব্রবীৎ
দুঃশাসনঃ সৌবলশ্চ তেষামেবং গতে অপি
সর্বেষাং সমবেতানাং পুত্রাণাং মম সংজয়
61.50
যদ্বৃত্তং তাত সংগ্রামে মন্দস্যাপনয়ৈর্ভৃশম্
লোভানুগতদুর্বুদ্ধেঃ ক্রোধেন বিকৃতাত্মনঃ
61.51
রাজ্যকামস্য মূঢস্য রাগোপহতচেতসঃ
দুর্নীতং বা সুনীতং বা তন্মমাচক্ষ্ব সংজয়