Utshovঅধ্যায় 60
60.1
সংজয় উবাচ
তথা সংভাষতাং তেষাং প্রাদুরাসীদ্ধনংজয়ঃ
দিদৃক্ষুর্ভরতশ্রেষ্ঠং রাজানং সসুহৃদ্গণম্
60.2
তং প্রবিষ্টং শুভাং কক্ষ্যামভিবাদ্যাগ্রতঃ স্থিতম্
সমুত্থায়ার্জুনং প্রেম্ণা সস্বজে পাণ্ডবর্ষভঃ
60.3
মূর্ধ্নি চৈনমুপাঘ্রায় পরিষ্বজ্য চ বাহুনা
আশিষঃ পরমাঃ প্রোচ্য স্ময়মানোঽভ্যভাষত
60.4
ব্যক্তমর্জুন সংগ্রামে ধ্রুবস্তে বিজয়ো মহান্
যাদৃগ্রূপা হি তে ছায়া প্রসন্নশ্চ জনার্দনঃ
60.5
তমব্রবীত্ততো জিষ্ণুর্মহদাশ্চর্যমুত্তমম্
দৃষ্টবানস্মি ভদ্রং তে কেশবস্য প্রসাদজম্
60.6
ততস্তত্কথয়ামাস যথাদৃষ্টং ধনংজয়ঃ
আশ্বাসনার্থং সুহৃদাং ত্র্যম্বকেন সমাগমম্
60.7
ততঃ শিরোভিরবনিং স্পৃষ্ট্বা সর্বে চ বিস্মিতাঃ
নমস্কৃত্য বৃষাঙ্কায় সাধু সাধ্বিত্যথাব্রুবন্
60.8
অনুজ্ঞাতাস্ততঃ সর্বে সুহৃদো ধর্মসূনুনা
ত্বরমাণাঃ সুসংনদ্ধা হৃষ্টা যুদ্ধায় নির্যয়ুঃ
60.9
অভিবাদ্য তু রাজানং যুয়ুধানাচ্যুতার্জুনাঃ
হৃষ্টা বিনির্যয়ুস্তে বৈ যুধিষ্ঠিরনিবেশনাৎ
60.10
রথেনৈকেন দুর্ধর্ষৌ যুয়ুধানজনার্দনৌ
জগ্মতুঃ সহিতৌ বীরাবর্জুনস্য নিবেশনম্
60.11
তত্র গত্বা হৃষীকেশঃ কল্পয়ামাস সূতবৎ
রথং রথবরস্যাজৌ বানরর্ষভলক্ষণম্
60.12
স মেঘসমনির্ঘোষস্তপ্তকাঞ্চনসপ্রভঃ
বভৌ রথবরঃ কৢপ্তঃ শিশুর্দিবসকৃদ্যথা
60.13
ততঃ পুরুষশার্দূলঃ সজ্জঃ সজ্জং পুরঃসরঃ
কৃতাহ্নিকায় পার্থায় ন্যবেদয়ত তং রথম্
60.14
তং তু লোকে বরঃ পুংসাং কিরীটী হেমবর্মভৃৎ
বাণবাণাসনী বাহং প্রদক্ষিণমবর্তত
60.15
ততো বিদ্যাবয়োবৃদ্ধৈঃ ক্রিয়াবদ্ভির্জিতেন্দ্রিয়ৈঃ
স্তূয়মানো জয়াশীভিরারুরোহ মহারথম্
60.16
জৈত্রৈঃ সাংগ্রামিকৈর্মন্ত্রৈঃ পূর্বমেব রথোত্তমম্
অভিমন্ত্রিতমর্চিষ্মানুদয়ং ভাস্করো যথা
60.17
স রথে রথিনাং শ্রেষ্ঠঃ কাঞ্চনে কাঞ্চনাবৃতঃ
বিবভৌ বিমলোঽর্চিষ্মান্মেরাবিব দিবাকরঃ
60.18
অন্বারুরোহতুঃ পার্থং যুয়ুধানজনার্দনৌ
শর্যাতের্যজ্ঞমায়ান্তং যথেন্দ্রং দেবমশ্বিনৌ
60.19
অথ জগ্রাহ গোবিন্দো রশ্মীন্রশ্মিবতাং বরঃ
মাতলির্বাসবস্যেব বৃত্রং হন্তুং প্রয়াস্যতঃ
60.20
স তাভ্যাং সহিতঃ পার্থো রথপ্রবরমাস্থিতঃ
সহিতো বুধশুক্রাভ্যাং তমো নিঘ্নন্যথা শশী
60.21
সৈন্ধবস্য বধপ্রেপ্সুঃ প্রয়াতঃ শত্রুপূগহা
সহাম্বুপতিমিত্রাভ্যাং যথেন্দ্রস্তারকাময়ে
60.22
ততো বাদিত্রনির্ঘোষৈর্মঙ্গল্যৈশ্চ স্তবৈঃ শুভৈঃ
প্রয়ান্তমর্জুনং সূতা মাগধাশ্চৈব তুষ্টুবুঃ
60.23
সজয়াশীঃ সপুণ্যাহঃ সূতমাগধনিস্বনঃ
যুক্তো বাদিত্রঘোষেণ তেষাং রতিকরোঽভবৎ
60.24
তমনুপ্রয়তো বায়ুঃ পুণ্যগন্ধবহঃ শুচিঃ
ববৌ সংহর্ষয়ন্পার্থং দ্বিষতশ্চাপি শোষয়ন্
60.25
প্রাদুরাসন্নিমিত্তানি বিজয়ায় বহূনি চ
পাণ্ডবানাং ত্বদীয়ানাং বিপরীতানি মারিষ
60.26
দৃষ্ট্বার্জুনো নিমিত্তানি বিজয়ায় প্রদক্ষিণম্
যুয়ুধানং মহেষ্বাসমিদং বচনমব্রবীৎ
60.27
যুয়ুধানাদ্য যুদ্ধে মে দৃশ্যতে বিজয়ো ধ্রুবঃ
যথা হীমানি লিঙ্গানি দৃশ্যন্তে শিনিপুংগব
60.28
সোঽহং তত্র গমিষ্যামি যত্র সৈন্ধবকো নৃপঃ
যিয়াসুর্যমলোকায় মম বীর্যং প্রতীক্ষতে
60.29
যথা পরমকং কৃত্যং সৈন্ধবস্য বধে মম
তথৈব সুমহত্কৃত্যং ধর্মরাজস্য রক্ষণে
60.30
স ত্বমদ্য মহাবাহো রাজানং পরিপালয়
যথৈব হি ময়া গুপ্তস্ত্বয়া গুপ্তো ভবেত্তথা
60.31
ত্বয়ি চাহং পরাশ্বস্য প্রদ্যুম্নে বা মহারথে
শক্নুয়াং সৈন্ধবং হন্তুমনপেক্ষো নরর্ষভ
60.32
ময্যপেক্ষা ন কর্তব্যা কথংচিদপি সাত্বত
রাজন্যেব পরা গুপ্তিঃ কার্যা সর্বাত্মনা ত্বয়া
60.33
ন হি যত্র মহাবাহুর্বাসুদেবো ব্যবস্থিতঃ
কিংচিদ্ব্যাপদ্যতে তত্র যত্রাহমপি চ ধ্রুবম্
60.34
এবমুক্তস্তু পার্থেন সাত্যকিঃ পরবীরহা
তথেত্যুক্ত্বাগমত্তত্র যত্র রাজা যুধিষ্ঠিরঃ