Utshovঅধ্যায় 59
59.1
যুধিষ্ঠির উবাচ
সুখেন রজনী ব্যুষ্টা কচ্চিত্তে মধুসূদন
কচ্চিজ্জ্ঞানানি সর্বাণি প্রসন্নানি তবাচ্যুত
59.2
সংজয় উবাচ
বাসুদেবোঽপি তদ্যুক্তং পর্যপৃচ্ছদ্যুধিষ্ঠিরম্
ততঃ ক্ষত্তা প্রকৃতয়ো ন্যবেদয়দুপস্থিতাঃ
59.3
অনুজ্ঞাতশ্চ রাজ্ঞা স প্রাবেশয়ত তং জনম্
বিরাটং ভীমসেনং চ ধৃষ্টদ্যুম্নং চ সাত্যকিম্
59.4
শিখণ্ডিনং যমৌ চৈব চেকিতানং চ কেকয়ান্
যুয়ুত্সুং চৈব কৌরব্যং পাঞ্চাল্যং চোত্তমৌজসম্
59.5
এতে চান্যে চ বহবঃ ক্ষত্রিয়াঃ ক্ষত্রিয়র্ষভম্
উপতস্থুর্মহাত্মানং বিবিশুশ্চাসনেষু তে
59.6
একস্মিন্নাসনে বীরাবুপবিষ্টৌ মহাবলৌ
কৃষ্ণশ্চ যুয়ুধানশ্চ মহাত্মানৌ মহাদ্যুতী
59.7
ততো যুধিষ্ঠিরস্তেষাং শৃণ্বতাং মধুসূদনম্
অব্রবীত্পুণ্ডরীকাক্ষমাভাষ্য মধুরং বচঃ
59.8
একং ত্বাং বয়মাশ্রিত্য সহস্রাক্ষমিবামরাঃ
প্রার্থয়ামো জয়ং যুদ্ধে শাশ্বতানি সুখানি চ
59.9
ত্বং হি রাজ্যবিনাশং চ দ্বিষদ্ভিশ্চ নিরাক্রিয়াম্
ক্লেশাংশ্চ বিবিধান্কৃষ্ণ সর্বাংস্তানপি বেত্থ নঃ
59.10
ত্বয়ি সর্বেশ সর্বেষামস্মাকং ভক্তবত্সল
সুখমায়ত্তমত্যর্থং যাত্রা চ মধুসূদন
59.11
স তথা কুরু বার্ষ্ণেয় যথা ত্বয়ি মনো মম
অর্জুনস্য যথা সত্যা প্রতিজ্ঞা স্যাচ্চিকীর্ষিতা
59.12
স ভবাংস্তারয়ত্বস্মাদ্দুঃখামর্ষমহার্ণবাৎ
পারং তিতীর্ষতামদ্য প্লবো নো ভব মাধব
59.13
ন হি তত্কুরুতে সংখ্যে কার্তবীর্যসমস্ত্বপি
রথী যত্কুরুতে কৃষ্ণ সারথির্যত্নমাস্থিতঃ
59.14
বাসুদেব উবাচ
সামরেষ্বপি লোকেষু সর্বেষু ন তথাবিধঃ
শরাসনধরঃ কশ্চিদ্যথা পার্থো ধনংজয়ঃ
59.15
বীর্যবানস্ত্রসংপন্নঃ পরাক্রান্তো মহাবলঃ
যুদ্ধশৌণ্ডঃ সদামর্ষী তেজসা পরমো নৃণাম্
59.16
স যুবা বৃষভস্কন্ধো দীর্ঘবাহুর্মহাবলঃ
সিংহর্ষভগতিঃ শ্রীমান্দ্বিষতস্তে হনিষ্যতি
59.17
অহং চ তত্করিষ্যামি যথা কুন্তীসুতোঽর্জুনঃ
ধার্তরাষ্ট্রস্য সৈন্যানি ধক্ষ্যত্যগ্নিরিবোত্থিতঃ
59.18
অদ্য তং পাপকর্মাণং ক্ষুদ্রং সৌভদ্রঘাতিনম্
অপুনর্দর্শনং মার্গমিষুভিঃ ক্ষেপ্স্যতেঽর্জুনঃ
59.19
তস্যাদ্য গৃধ্রাঃ শ্যেনাশ্চ বডগোমায়বস্তথা
ভক্ষয়িষ্যন্তি মাংসানি যে চান্যে পুরুষাদকাঃ
59.20
যদ্যস্য দেবা গোপ্তারঃ সেন্দ্রাঃ সর্বে তথাপ্যসৌ
রাজধানীং যমস্যাদ্য হতঃ প্রাপ্স্যতি সংকুলে
59.21
নিহত্য সৈন্ধবং জিষ্ণুরদ্য ত্বামুপয়াস্যতি
বিশোকো বিজ্বরো রাজন্ভব ভূতিপুরস্কৃতঃ