UtshovChapter 59
59.1
युधिष्ठिर उवाच
सुखेन रजनी व्युष्टा कच्चित्ते मधुसूदन
कच्चिज्ज्ञानानि सर्वाणि प्रसन्नानि तवाच्युत
Yudhishthira uvacha
Sukhena rajani vyushta kachchitte madhusudana
Kachchijgyanani sarvani prasannani tavachyuta
59.2
संजय उवाच
वासुदेवोऽपि तद्युक्तं पर्यपृच्छद्युधिष्ठिरम्
ततः क्षत्ता प्रकृतयो न्यवेदयदुपस्थिताः
Sanjaya uvacha
Vasudevopi tadyuktam paryaprichchhadyudhishthiram
Tatah kshatta prakritayo nyavedayadupasthitah
59.3
अनुज्ञातश्च राज्ञा स प्रावेशयत तं जनम्
विराटं भीमसेनं च धृष्टद्युम्नं च सात्यकिम्
Anugyatashcha ragya sa praveshayata tam janam
Viratam bhimasenam cha dhrishtadyumnam cha satyakim
59.4
शिखण्डिनं यमौ चैव चेकितानं च केकयान्
युयुत्सुं चैव कौरव्यं पाञ्चाल्यं चोत्तमौजसम्
Shikhandinam yamau chaiva chekitanam cha kekayan
Yuyutsum chaiva kauravyam panchalyam chottamaujasam
59.5
एते चान्ये च बहवः क्षत्रियाः क्षत्रियर्षभम्
उपतस्थुर्महात्मानं विविशुश्चासनेषु ते
Ete chanye cha bahavah kshatriyah kshatriyarshabham
Upatasthurmahatmanam vivishushchasaneshu te
59.6
एकस्मिन्नासने वीरावुपविष्टौ महाबलौ
कृष्णश्च युयुधानश्च महात्मानौ महाद्युती
Ekasminnasane viravupavishtau mahabalau
Krishnashcha yuyudhanashcha mahatmanau mahadyuti
59.7
ततो युधिष्ठिरस्तेषां शृण्वतां मधुसूदनम्
अब्रवीत्पुण्डरीकाक्षमाभाष्य मधुरं वचः
Tato yudhishthirastesham shrinvatam madhusudanam
Abravitpundarikakshamabhashya madhuram vachah
59.8
एकं त्वां वयमाश्रित्य सहस्राक्षमिवामराः
प्रार्थयामो जयं युद्धे शाश्वतानि सुखानि च
Ekam tvam vayamashritya sahasrakshamivamarah
Prarthayamo jayam yuddhe shashvatani sukhani cha
59.9
त्वं हि राज्यविनाशं च द्विषद्भिश्च निराक्रियाम्
क्लेशांश्च विविधान्कृष्ण सर्वांस्तानपि वेत्थ नः
Tvam hi rajyavinasham cha dvishadbhishcha nirakriyam
Kleshanshcha vividhankrishna sarvanstanapi vettha nah
59.10
त्वयि सर्वेश सर्वेषामस्माकं भक्तवत्सल
सुखमायत्तमत्यर्थं यात्रा च मधुसूदन
Tvayi sarvesha sarveshamasmakam bhaktavatsala
Sukhamayattamatyartham yatra cha madhusudana
59.11
स तथा कुरु वार्ष्णेय यथा त्वयि मनो मम
अर्जुनस्य यथा सत्या प्रतिज्ञा स्याच्चिकीर्षिता
Sa tatha kuru varshneya yatha tvayi mano mama
Arjunasya yatha satya pratigya syachchikirshita
59.12
स भवांस्तारयत्वस्माद्दुःखामर्षमहार्णवात्
पारं तितीर्षतामद्य प्लवो नो भव माधव
Sa bhavanstarayatvasmadduhkhamarshamaharnavat
Param titirshatamadya plavo no bhava madhava
59.13
न हि तत्कुरुते संख्ये कार्तवीर्यसमस्त्वपि
रथी यत्कुरुते कृष्ण सारथिर्यत्नमास्थितः
Na hi tatkurute sankhye kartaviryasamastvapi
Rathi yatkurute krishna sarathiryatnamasthitah
59.14
वासुदेव उवाच
सामरेष्वपि लोकेषु सर्वेषु न तथाविधः
शरासनधरः कश्चिद्यथा पार्थो धनंजयः
Vasudeva uvacha
Samareshvapi lokeshu sarveshu na tathavidhah
Sharasanadharah kashchidyatha partho dhananjayah
59.15
वीर्यवानस्त्रसंपन्नः पराक्रान्तो महाबलः
युद्धशौण्डः सदामर्षी तेजसा परमो नृणाम्
Viryavanastrasampannah parakranto mahabalah
Yuddhashaundah sadamarshi tejasa paramo nrinam
59.16
स युवा वृषभस्कन्धो दीर्घबाहुर्महाबलः
सिंहर्षभगतिः श्रीमान्द्विषतस्ते हनिष्यति
Sa yuva vrishabhaskandho dirghabahurmahabalah
Sinharshabhagatih shrimandvishataste hanishyati
59.17
अहं च तत्करिष्यामि यथा कुन्तीसुतोऽर्जुनः
धार्तराष्ट्रस्य सैन्यानि धक्ष्यत्यग्निरिवोत्थितः
Aham cha tatkarishyami yatha kuntisutorjunah
Dhartarashtrasya sainyani dhakshyatyagnirivotthitah
59.18
अद्य तं पापकर्माणं क्षुद्रं सौभद्रघातिनम्
अपुनर्दर्शनं मार्गमिषुभिः क्षेप्स्यतेऽर्जुनः
Adya tam papakarmanam kshudram saubhadraghatinam
Apunardarshanam margamishubhih kshepsyaterjunah
59.19
तस्याद्य गृध्राः श्येनाश्च वडगोमायवस्तथा
भक्षयिष्यन्ति मांसानि ये चान्ये पुरुषादकाः
Tasyadya gridhrah shyenashcha vadagomayavastatha
Bhakshayishyanti mansani ye chanye purushadakah
59.20
यद्यस्य देवा गोप्तारः सेन्द्राः सर्वे तथाप्यसौ
राजधानीं यमस्याद्य हतः प्राप्स्यति संकुले
Yadyasya deva goptarah sendrah sarve tathapyasau
Rajadhanim yamasyadya hatah prapsyati sankule
59.21
निहत्य सैन्धवं जिष्णुरद्य त्वामुपयास्यति
विशोको विज्वरो राजन्भव भूतिपुरस्कृतः
Nihatya saindhavam jishnuradya tvamupayasyati
Vishoko vijvaro rajanbhava bhutipuraskritah