Utshovঅধ্যায় 58
58.1
সংজয় উবাচ
তয়োঃ সংবদতোরেব কৃষ্ণদারুকয়োস্তদা
সাত্যগাদ্রজনী রাজন্নথ রাজান্ববুধ্যত
58.2
পঠন্তি পাণিস্বনিকা মাগধা মধুপর্কিকাঃ
বৈতালিকাশ্চ সূতাশ্চ তুষ্টুবুঃ পুরুষর্ষভম্
58.3
নর্তকাশ্চাপ্যনৃত্যন্ত জগুর্গীতানি গায়কাঃ
কুরুবংশস্তবার্থানি মধুরং রক্তকণ্ঠিনঃ
58.4
মৃদঙ্গা ঝর্ঝরা ভের্যঃ পণবানকগোমুখাঃ
আডম্বরাশ্চ শঙ্খাশ্চ দুন্দুভ্যশ্চ মহাস্বনাঃ
58.5
এবমেতানি সর্বাণি তথান্যান্যপি ভারত
বাদয়ন্তি স্ম সংহৃষ্টাঃ কুশলাঃ সাধুশিক্ষিতাঃ
58.6
স মেঘসমনির্ঘোষো মহাঞ্শব্দোঽস্পৃশদ্দিবম্
পার্থিবপ্রবরং সুপ্তং যুধিষ্ঠিরমবোধয়ৎ
58.7
প্রতিবুদ্ধঃ সুখং সুপ্তো মহার্হে শয়নোত্তমে
উত্থায়াবশ্যকার্যার্থং যয়ৌ স্নানগৃহং ততঃ
58.8
ততঃ শুক্লাম্বরাঃ স্নাতাস্তরুণাষ্টোত্তরং শতম্
স্নাপকাঃ কাঞ্চনৈঃ কুম্ভৈঃ পূর্ণৈঃ সমুপতস্থিরে
58.9
ভদ্রাসনে সূপবিষ্টঃ পরিধায়াম্বরং লঘু
সস্নৌ চন্দনসংয়ুক্তৈঃ পানীয়ৈরভিমন্ত্রিতৈঃ
58.10
উত্সাদিতঃ কষায়েণ বলবদ্ভিঃ সুশিক্ষিতৈঃ
আপ্লুতঃ সাধিবাসেন জলেন চ সুগন্ধিনা
58.11
হরিণা চন্দনেনাঙ্গমনুলিপ্য মহাভুজঃ
স্রগ্বী চাক্লিষ্টবসনঃ প্রাঙ্মুখঃ প্রাঞ্জলিঃ স্থিতঃ
58.12
জজাপ জপ্যং কৌন্তেয়ঃ সতাং মার্গমনুষ্ঠিতঃ
ততোঽগ্নিশরণং দীপ্তং প্রবিবেশ বিনীতবৎ
58.13
সমিদ্ধং স পবিত্রাভিরগ্নিমাহুতিভিস্তথা
মন্ত্রপূতাভিরর্চিত্বা নিশ্চক্রাম গৃহাত্ততঃ
58.14
দ্বিতীয়াং পুরুষব্যাঘ্রঃ কক্ষ্যাং নিষ্ক্রম্য পার্থিবঃ
তত্র বেদবিদো বিপ্রানপশ্যদ্ব্রাহ্মণর্ষভান্
58.15
দান্তান্বেদব্রতস্নাতান্স্নাতানবভৃথেষু চ
সহস্রানুচরান্সৌরানষ্টৌ দশশতানি চ
58.16
অক্ষতৈঃ সুমনোভিশ্চ বাচয়িত্বা মহাভুজঃ
তান্দ্বিজান্মধুসর্পির্ভ্যাং ফলৈঃ শ্রেষ্ঠৈঃ সুমঙ্গলৈঃ
58.17
প্রাদাত্কাঞ্চনমেকৈকং নিষ্কং বিপ্রায় পাণ্ডবঃ
অলংকৃতং চাশ্বশতং বাসাংসীষ্টাশ্চ দক্ষিণাঃ
58.18
তথা গাঃ কপিলা দোগ্ধ্রীঃ সর্ষভাঃ পাণ্ডুনন্দনঃ
হেমশৃঙ্গী রূপ্যখুরা দত্ত্বা চক্রে প্রদক্ষিণম্
58.19
স্বস্তিকান্বর্ধমানাংশ্চ নন্দ্যাবর্তাংশ্চ কাঞ্চনান্
মাল্যং চ জলকুম্ভাংশ্চ জ্বলিতং চ হুতাশনম্
58.20
পূর্ণান্যক্ষতপাত্রাণি রুচকান্রোচনাংস্তথা
স্বলংকৃতাঃ শুভাঃ কন্যা দধিসর্পির্মধূদকম্
58.21
মঙ্গল্যান্পক্ষিণশ্চৈব যচ্চান্যদপি পূজিতম্
দৃষ্ট্বা স্পৃষ্ট্বা চ কৌন্তেয়ো বাহ্যাং কক্ষ্যামগাত্ততঃ
58.22
ততস্তস্য মহাবাহোস্তিষ্ঠতঃ পরিচারকাঃ
সৌবর্ণং সর্বতোভদ্রং মুক্তাবৈডূর্যমণ্ডিতম্
58.23
পরার্ধ্যাস্তরণাস্তীর্ণং সোত্তরচ্ছদমৃদ্ধিমৎ
বিশ্বকর্মকৃতং দিব্যমুপজহ্রুর্বরাসনম্
58.24
তত্র তস্যোপবিষ্টস্য ভূষণানি মহাত্মনঃ
উপজহ্রুর্মহার্হাণি প্রেষ্যাঃ শুভ্রাণি সর্বশঃ
58.25
যুক্তাভরণবেষস্য কৌন্তেয়স্য মহাত্মনঃ
রূপমাসীন্মহারাজ দ্বিষতাং শোকবর্ধনম্
58.26
পাণ্ডরৈশ্চন্দ্ররশ্ম্যাভৈর্হেমদণ্ডৈশ্চ চামরৈঃ
দোধূয়মানঃ শুশুভে বিদ্যুদ্ভিরিব তোয়দঃ
58.27
সংস্তূয়মানঃ সূতৈশ্চ বন্দ্যমানশ্চ বন্দিভিঃ
উপগীয়মানো গন্ধর্বৈরাস্তে স্ম কুরুনন্দনঃ
58.28
ততো মুহূর্তাদাসীত্তু বন্দিনাং নিস্বনো মহান্
নেমিঘোষশ্চ রথিনাং খুরঘোষশ্চ বাজিনাম্
58.29
হ্রাদেন গজঘণ্টানাং শঙ্খানাং নিনদেন চ
নরাণাং পদশব্দৈশ্চ কম্পতীব স্ম মেদিনী
58.30
ততঃ শুদ্ধান্তমাসাদ্য জানুভ্যাং ভূতলে স্থিতঃ
শিরসা বন্দনীয়ং তমভিবন্দ্য জগত্পতিম্
58.31
কুণ্ডলী বদ্ধনিস্ত্রিংশঃ সংনদ্ধকবচো যুবা
অভিপ্রণম্য শিরসা দ্বাঃস্থো ধর্মাত্মজায় বৈ
ন্যবেদয়দ্ধৃষীকেশমুপয়াতং মহাত্মনে
58.32
সোঽব্রবীত্পুরুষব্যাঘ্রঃ স্বাগতেনৈব মাধবম্
অর্ঘ্যং চৈবাসনং চাস্মৈ দীয়তাং পরমার্চিতম্
58.33
ততঃ প্রবেশ্য বার্ষ্ণেয়মুপবেশ্য বরাসনে
সত্কৃত্য সত্কৃতস্তেন পর্যপৃচ্ছদ্যুধিষ্ঠিরঃ