Utshovঅধ্যায় 57
57.1
সংজয় উবাচ
কুন্তীপুত্রস্তু তং মন্ত্রং স্মরন্নেব ধনংজয়ঃ
প্রতিজ্ঞামাত্মনো রক্ষন্মুমোহাচিন্ত্যবিক্রমঃ
57.2
তং তু শোকেন সংতপ্তং স্বপ্নে কপিবরধ্বজম্
আসসাদ মহাতেজা ধ্যায়ন্তং গরুডধ্বজঃ
57.3
প্রত্যুত্থানং তু কৃষ্ণস্য সর্বাবস্থং ধনংজয়ঃ
নালোপয়ত ধর্মাত্মা ভক্ত্যা প্রেম্ণা চ সর্বদা
57.4
প্রত্যুত্থায় চ গোবিন্দং স তস্মায়াসনং দদৌ
ন চাসনে স্বয়ং বুদ্ধিং বীভত্সুর্ব্যদধাত্তদা
57.5
ততঃ কৃষ্ণো মহাতেজা জানন্পার্থস্য নিশ্চয়ম্
কুন্তীপুত্রমিদং বাক্যমাসীনঃ স্থিতমব্রবীৎ
57.6
মা বিষাদে মনঃ পার্থ কৃথাঃ কালো হি দুর্জয়ঃ
কালঃ সর্বাণি ভূতানি নিয়চ্ছতি পরে বিধৌ
57.7
কিমর্থং চ বিষাদস্তে তদ্ব্রূহি বদতাং বর
ন শোচিতব্যং বিদুষা শোকঃ কার্যবিনাশনঃ
57.8
শোচন্নন্দয়তে শত্রূন্কর্শয়ত্যপি বান্ধবান্
ক্ষীয়তে চ নরস্তস্মান্ন ত্বং শোচিতুমর্হসি
57.9
ইত্যুক্তো বাসুদেবেন বীভত্সুরপরাজিতঃ
আবভাষে তদা বিদ্বানিদং বচনমর্থবৎ
57.10
ময়া প্রতিজ্ঞা মহতী জয়দ্রথবধে কৃতা
শ্বোঽস্মি হন্তা দুরাত্মানং পুত্রঘ্নমিতি কেশব
57.11
মত্প্রতিজ্ঞাবিঘাতার্থং ধার্তরাষ্ট্রৈঃ কিলাচ্যুত
পৃষ্ঠতঃ সৈন্ধবঃ কার্যঃ সর্বৈর্গুপ্তো মহারথৈঃ
57.12
দশ চৈকা চ তাঃ কৃষ্ণ অক্ষৌহিণ্যঃ সুদুর্জয়াঃ
প্রতিজ্ঞায়াং চ হীনায়াং কথং জীবেত মদ্বিধঃ
57.13
দুঃখোপায়স্য মে বীর বিকাঙ্ক্ষা পরিবর্ততে
দ্রুতং চ যাতি সবিতা তত এতদ্ব্রবীম্যহম্
57.14
শোকস্থানং তু তচ্ছ্রুত্বা পার্থস্য দ্বিজকেতনঃ
সংস্পৃশ্যাম্ভস্ততঃ কৃষ্ণঃ প্রাঙ্মুখঃ সমবস্থিতঃ
57.15
ইদং বাক্যং মহাতেজা বভাষে পুষ্করেক্ষণঃ
হিতার্থং পাণ্ডুপুত্রস্য সৈন্ধবস্য বধে বৃতঃ
57.16
পার্থ পাশুপতং নাম পরমাস্ত্রং সনাতনম্
যেন সর্বান্মৃধে দৈত্যাঞ্জঘ্নে দেবো মহেশ্বরঃ
57.17
যদি তদ্বিদিতং তেঽদ্য শ্বো হন্তাসি জয়দ্রথম্
অথ জ্ঞাতুং প্রপদ্যস্ব মনসা বৃষভধ্বজম্
57.18
তং দেবং মনসা ধ্যায়ঞ্জোষমাস্স্ব ধনংজয়
ততস্তস্য প্রসাদাত্ত্বং ভক্তঃ প্রাপ্স্যসি তন্মহৎ
57.19
ততঃ কৃষ্ণবচঃ শ্রুত্বা সংস্পৃশ্যাম্ভো ধনংজয়ঃ
ভূমাবাসীন একাগ্রো জগাম মনসা ভবম্
57.20
ততঃ প্রণিহিতে ব্রাহ্মে মুহূর্তে শুভলক্ষণে
আত্মানমর্জুনোঽপশ্যদ্গগনে সহকেশবম্
57.21
জ্যোতির্ভিশ্চ সমাকীর্ণং সিদ্ধচারণসেবিতম্
বায়ুবেগগতিঃ পার্থঃ খং ভেজে সহকেশবঃ
57.22
কেশবেন গৃহীতঃ স দক্ষিণে বিভুনা ভুজে
প্রেক্ষমাণো বহূন্ভাবাঞ্জগামাদ্ভুতদর্শনান্
57.23
উদীচ্যাং দিশি ধর্মাত্মা সোঽপশ্যচ্ছ্বেতপর্বতম্
কুবেরস্য বিহারে চ নলিনীং পদ্মভূষিতাম্
57.24
সরিচ্ছ্রেষ্ঠাং চ তাং গঙ্গাং বীক্ষমাণো বহূদকাম্
সদাপুষ্পফলৈর্বৃক্ষৈরুপেতাং স্ফটিকোপলাম্
57.25
সিংহব্যাঘ্রসমাকীর্ণাং নানামৃগগণাকুলাম্
পুণ্যাশ্রমবতীং রম্যাং মনোজ্ঞাণ্ডজসেবিতাম্
57.26
মন্দরস্য প্রদেশাংশ্চ কিংনরোদ্গীতনাদিতান্
হেমরূপ্যময়ৈঃ শৃঙ্গৈর্নানৌষধিবিদীপিতান্
তথা মন্দারবৃক্ষৈশ্চ পুষ্পিতৈরুপশোভিতান্
57.27
স্নিগ্ধাঞ্জনচয়াকারং সংপ্রাপ্তঃ কালপর্বতম্
পুণ্যং হিমবতঃ পাদং মণিমন্তং চ পর্বতম্
ব্রহ্মতুঙ্গং নদীশ্চান্যাস্তথা জনপদানপি
57.28
সুশৃঙ্গং শতশৃঙ্গং চ শর্যাতিবনমেব চ
পুণ্যমশ্বশিরঃস্থানং স্থানমাথর্বণস্য চ
57.29
বৃষদংশং চ শৈলেন্দ্রং মহামন্দরমেব চ
অপ্সরোভিঃ সমাকীর্ণং কিংনরৈশ্চোপশোভিতম্
57.30
তাংশ্চ শৈলান্ব্রজন্পার্থঃ প্রেক্ষতে সহকেশবঃ
শুভৈঃ প্রস্রবণৈর্জুষ্টান্হেমধাতুবিভূষিতান্
57.31
চন্দ্ররশ্মিপ্রকাশাঙ্গীং পৃথিবীং পুরমালিনীম্
সমুদ্রাংশ্চাদ্ভুতাকারানপশ্যদ্বহুলাকরান্
57.32
বিয়দ্দ্যাং পৃথিবীং চৈব পশ্যন্বিষ্ণুপদে ব্রজন্
বিস্মিতঃ সহ কৃষ্ণেন ক্ষিপ্তো বাণ ইবাত্যগাৎ
57.33
গ্রহনক্ষত্রসোমানাং সূর্যাগ্ন্যোশ্চ সমত্বিষম্
অপশ্যত তদা পার্থো জ্বলন্তমিব পর্বতম্
57.34
সমাসাদ্য তু তং শৈলং শৈলাগ্রে সমবস্থিতম্
তপোনিত্যং মহাত্মানমপশ্যদ্বৃষভধ্বজম্
57.35
সহস্রমিব সূর্যাণাং দীপ্যমানং স্বতেজসা
শূলিনং জটিলং গৌরং বল্কলাজিনবাসসম্
57.36
নয়নানাং সহস্রৈশ্চ বিচিত্রাঙ্গং মহৌজসম্
পার্বত্যা সহিতং দেবং ভূতসংঘৈশ্চ ভাস্বরৈঃ
57.37
গীতবাদিত্রসংহ্রাদৈস্তাললাস্যসমন্বিতম্
বল্গিতাস্ফোটিতোত্ক্রুষ্টৈঃ পুণ্যগন্ধৈশ্চ সেবিতম্
57.38
স্তূয়মানং স্তবৈর্দিব্যৈর্মুনিভির্ব্রহ্মবাদিভিঃ
গোপ্তারং সর্বভূতানামিষ্বাসধরমচ্যুতম্
57.39
বাসুদেবস্তু তং দৃষ্ট্বা জগাম শিরসা ক্ষিতিম্
পার্থেন সহ ধর্মাত্মা গৃণন্ব্রহ্ম সনাতনম্
57.40
লোকাদিং বিশ্বকর্মাণমজমীশানমব্যয়ম্
মনসঃ পরমাং যোনিং খং বায়ুং জ্যোতিষাং নিধিম্
57.41
স্রষ্টারং বারিধারাণাং ভুবশ্চ প্রকৃতিং পরাম্
দেবদানবয়ক্ষাণাং মানবানাং চ সাধনম্
57.42
যোগিনাং পরমং ব্রহ্ম ব্যক্তং ব্রহ্মবিদাং নিধিম্
চরাচরস্য স্রষ্টারং প্রতিহর্তারমেব চ
57.43
কালকোপং মহাত্মানং শক্রসূর্যগুণোদয়ম্
অবন্দত তদা কৃষ্ণো বাঙ্মনোবুদ্ধিকর্মভিঃ
57.44
যং প্রপশ্যন্তি বিদ্বাংসঃ সূক্ষ্মাধ্যাত্মপদৈষিণঃ
তমজং কারণাত্মানং জগ্মতুঃ শরণং ভবম্
57.45
অর্জুনশ্চাপি তং দেবং ভূয়ো ভূয়োঽভ্যবন্দত
জ্ঞাত্বৈকং ভূতভব্যাদিং সর্বভূতভবোদ্ভবম্
57.46
ততস্তাবাগতৌ শর্বঃ প্রোবাচ প্রহসন্নিব
স্বাগতং বাং নরশ্রেষ্ঠাবুত্তিষ্ঠেতাং গতক্লমৌ
কিং চ বামীপ্সিতং বীরৌ মনসঃ ক্ষিপ্রমুচ্যতাম্
57.47
যেন কার্যেণ সংপ্রাপ্তৌ যুবাং তত্সাধয়ামি বাম্
ব্রিয়তামাত্মনঃ শ্রেয়স্তত্সর্বং প্রদদানি বাম্
57.48
ততস্তদ্বচনং শ্রুত্বা প্রত্যুত্থায় কৃতাঞ্জলী
বাসুদেবার্জুনৌ শর্বং তুষ্টুবাতে মহামতী
57.49
নমো ভবায় শর্বায় রুদ্রায় বরদায় চ
পশূনাং পতয়ে নিত্যমুগ্রায় চ কপর্দিনে
57.50
মহাদেবায় ভীমায় ত্র্যম্বকায় চ শংভবে
ঈশানায় ভগঘ্নায় নমোঽস্ত্বন্ধকঘাতিনে
57.51
কুমারগুরবে নিত্যং নীলগ্রীবায় বেধসে
বিলোহিতায় ধূম্রায় ব্যাধায়ানপরাজিতে
57.52
নিত্যং নীলশিখণ্ডায় শূলিনে দিব্যচক্ষুষে
হন্ত্রে গোপ্ত্রে ত্রিনেত্রায় ব্যাধায় বসুরেতসে
57.53
অচিন্ত্যায়াম্বিকাভর্ত্রে সর্বদেবস্তুতায় চ
বৃষধ্বজায় পিঙ্গায় জটিনে ব্রহ্মচারিণে
57.54
তপ্যমানায় সলিলে ব্রহ্মণ্যায়াজিতায় চ
বিশ্বাত্মনে বিশ্বসৃজে বিশ্বমাবৃত্য তিষ্ঠতে
57.55
নমো নমস্তে সেব্যায় ভূতানাং প্রভবে সদা
ব্রহ্মবক্ত্রায় শর্বায় শংকরায় শিবায় চ
57.56
নমোঽস্তু বাচস্পতয়ে প্রজানাং পতয়ে নমঃ
নমো বিশ্বস্য পতয়ে মহতাং পতয়ে নমঃ
57.57
নমঃ সহস্রশিরসে সহস্রভুজমন্যবে
সহস্রনেত্রপাদায় নমোঽসংখ্যেয়কর্মণে
57.58
নমো হিরণ্যবর্ণায় হিরণ্যকবচায় চ
ভক্তানুকম্পিনে নিত্যং সিধ্যতাং নৌ বরঃ প্রভো
57.59
এবং স্তুত্বা মহাদেবং বাসুদেবঃ সহার্জুনঃ
প্রসাদয়ামাস ভবং তদা হ্যস্ত্রোপলব্ধয়ে
57.60
ততোঽর্জুনঃ প্রীতমনা ববন্দে বৃষভধ্বজম্
দদর্শোত্ফুল্লনয়নঃ সমস্তং তেজসাং নিধিম্
57.61
তং চোপহারং স্বকৃতং নৈশং নৈত্যকমাত্মনঃ
দদর্শ ত্র্যম্বকাভ্যাশে বাসুদেবনিবেদিতম্
57.62
ততোঽভিপূজ্য মনসা শর্বং কৃষ্ণং চ পাণ্ডবঃ
ইচ্ছাম্যহং দিব্যমস্ত্রমিত্যভাষত শংকরম্
57.63
ততঃ পার্থস্য বিজ্ঞায় বরার্থে বচনং প্রভুঃ
বাসুদেবার্জুনৌ দেবঃ স্ময়মানোঽভ্যভাষত
57.64
সরোঽমৃতময়ং দিব্যমভ্যাশে শত্রুসূদনৌ
তত্র মে তদ্ধনুর্দিব্যং শরশ্চ নিহিতঃ পুরা
57.65
যেন দেবারয়ঃ সর্বে ময়া যুধি নিপাতিতাঃ
তত আনীয়তাং কৃষ্ণৌ সশরং ধনুরুত্তমম্
57.66
তথেত্যুক্ত্বা তু তৌ বীরৌ তং শর্বং পার্ষদৈঃ সহ
প্রস্থিতৌ তত্সরো দিব্যং দিব্যাশ্চর্যশতৈর্বৃতম্
57.67
নির্দিষ্টং যদ্বৃষাঙ্কেন পুণ্যং সর্বার্থসাধকম্
তজ্জগ্মতুরসংভ্রান্তৌ নরনারায়ণাবৃষী
57.68
ততস্তু তত্সরো গত্বা সূর্যমণ্ডলসংনিভম্
নাগমন্তর্জলে ঘোরং দদৃশাতেঽর্জুনাচ্যুতৌ
57.69
দ্বিতীয়ং চাপরং নাগং সহস্রশিরসং বরম্
বমন্তং বিপুলাং জ্বালাং দদৃশাতেঽগ্নিবর্চসম্
57.70
ততঃ কৃষ্ণশ্চ পার্থশ্চ সংস্পৃশ্যাপঃ কৃতাঞ্জলী
তৌ নাগাবুপতস্থাতে নমস্যন্তৌ বৃষধ্বজম্
57.71
গৃণন্তৌ বেদবিদুষৌ তদ্ব্রহ্ম শতরুদ্রিয়ম্
অপ্রমেয়ং প্রণমন্তৌ গত্বা সর্বাত্মনা ভবম্
57.72
ততস্তৌ রুদ্রমাহাত্ম্যাদ্ধিত্বা রূপং মহোরগৌ
ধনুর্বাণশ্চ শত্রুঘ্নং তদ্দ্বংদ্বং সমপদ্যত
57.73
ততো জগৃহতুঃ প্রীতৌ ধনুর্বাণং চ সুপ্রভম্
আজহ্রতুর্মহাত্মানৌ দদতুশ্চ মহাত্মনে
57.74
ততঃ পার্শ্বাদ্বৃষাঙ্কস্য ব্রহ্মচারী ন্যবর্তত
পিঙ্গাক্ষস্তপসঃ ক্ষেত্রং বলবান্নীললোহিতঃ
57.75
স তদ্গৃহ্য ধনুঃশ্রেষ্ঠং তস্থৌ স্থানং সমাহিতঃ
ব্যকর্ষচ্চাপি বিধিবত্সশরং ধনুরুত্তমম্
57.76
তস্য মৌর্বীং চ মুষ্টিং চ স্থানং চালক্ষ্য পাণ্ডবঃ
শ্রুত্বা মন্ত্রং ভবপ্রোক্তং জগ্রাহাচিন্ত্যবিক্রমঃ
57.77
সরস্যেব চ তং বাণং মুমোচাতিবলঃ প্রভুঃ
চকার চ পুনর্বীরস্তস্মিন্সরসি তদ্ধনুঃ
57.78
ততঃ প্রীতং ভবং জ্ঞাত্বা স্মৃতিমানর্জুনস্তদা
বরমারণ্যকং দত্তং দর্শনং শংকরস্য চ
মনসা চিন্তয়ামাস তন্মে সংপদ্যতামিতি
57.79
তস্য তন্মতমাজ্ঞায় প্রীতঃ প্রাদাদ্বরং ভবঃ
তচ্চ পাশুপতং ঘোরং প্রতিজ্ঞায়াশ্চ পারণম্
57.80
সংহৃষ্টরোমা দুর্ধর্ষঃ কৃতং কার্যমমন্যত
ববন্দতুশ্চ সংহৃষ্টৌ শিরোভ্যাং তৌ মহেশ্বরম্
57.81
অনুজ্ঞাতৌ ক্ষণে তস্মিন্ভবেনার্জুনকেশবৌ
প্রাপ্তৌ স্বশিবিরং বীরৌ মুদা পরময়া যুতৌ
ইন্দ্রাবিষ্ণূ যথা প্রীতৌ জম্ভস্য বধকাঙ্ক্ষিণৌ