UtshovChapter 57
57.1
संजय उवाच
कुन्तीपुत्रस्तु तं मन्त्रं स्मरन्नेव धनंजयः
प्रतिज्ञामात्मनो रक्षन्मुमोहाचिन्त्यविक्रमः
Sanjaya uvacha
Kuntiputrastu tam mantram smaranneva dhananjayah
Pratigyamatmano rakshanmumohachintyavikramah
57.2
तं तु शोकेन संतप्तं स्वप्ने कपिवरध्वजम्
आससाद महातेजा ध्यायन्तं गरुडध्वजः
Tam tu shokena santaptam svapne kapivaradhvajam
Asasada mahateja dhyayantam garudadhvajah
57.3
प्रत्युत्थानं तु कृष्णस्य सर्वावस्थं धनंजयः
नालोपयत धर्मात्मा भक्त्या प्रेम्णा च सर्वदा
Pratyutthanam tu krishnasya sarvavastham dhananjayah
Nalopayata dharmatma bhaktya premna cha sarvada
57.4
प्रत्युत्थाय च गोविन्दं स तस्मायासनं ददौ
न चासने स्वयं बुद्धिं बीभत्सुर्व्यदधात्तदा
Pratyutthaya cha govindam sa tasmayasanam dadau
Na chasane svayam buddhim bibhatsurvyadadhattada
57.5
ततः कृष्णो महातेजा जानन्पार्थस्य निश्चयम्
कुन्तीपुत्रमिदं वाक्यमासीनः स्थितमब्रवीत्
Tatah krishno mahateja jananparthasya nishchayam
Kuntiputramidam vakyamasinah sthitamabravit
57.6
मा विषादे मनः पार्थ कृथाः कालो हि दुर्जयः
कालः सर्वाणि भूतानि नियच्छति परे विधौ
Ma vishade manah partha krithah kalo hi durjayah
Kalah sarvani bhutani niyachchhati pare vidhau
57.7
किमर्थं च विषादस्ते तद्ब्रूहि वदतां वर
न शोचितव्यं विदुषा शोकः कार्यविनाशनः
Kimartham cha vishadaste tadbruhi vadatam vara
Na shochitavyam vidusha shokah karyavinashanah
57.8
शोचन्नन्दयते शत्रून्कर्शयत्यपि बान्धवान्
क्षीयते च नरस्तस्मान्न त्वं शोचितुमर्हसि
Shochannandayate shatrunkarshayatyapi bandhavan
Kshiyate cha narastasmanna tvam shochitumarhasi
57.9
इत्युक्तो वासुदेवेन बीभत्सुरपराजितः
आबभाषे तदा विद्वानिदं वचनमर्थवत्
Ityukto vasudevena bibhatsuraparajitah
Ababhashe tada vidvanidam vachanamarthavat
57.10
मया प्रतिज्ञा महती जयद्रथवधे कृता
श्वोऽस्मि हन्ता दुरात्मानं पुत्रघ्नमिति केशव
Maya pratigya mahati jayadrathavadhe krita
Shvosmi hanta duratmanam putraghnamiti keshava
57.11
मत्प्रतिज्ञाविघातार्थं धार्तराष्ट्रैः किलाच्युत
पृष्ठतः सैन्धवः कार्यः सर्वैर्गुप्तो महारथैः
Matpratigyavighatartham dhartarashtraih kilachyuta
Prishthatah saindhavah karyah sarvairgupto maharathaih
57.12
दश चैका च ताः कृष्ण अक्षौहिण्यः सुदुर्जयाः
प्रतिज्ञायां च हीनायां कथं जीवेत मद्विधः
Dasha chaika cha tah krishna akshauhinyah sudurjayah
Pratigyayam cha hinayam katham jiveta madvidhah
57.13
दुःखोपायस्य मे वीर विकाङ्क्षा परिवर्तते
द्रुतं च याति सविता तत एतद्ब्रवीम्यहम्
Duhkhopayasya me vira vikanksha parivartate
Drutam cha yati savita tata etadbravimyaham
57.14
शोकस्थानं तु तच्छ्रुत्वा पार्थस्य द्विजकेतनः
संस्पृश्याम्भस्ततः कृष्णः प्राङ्मुखः समवस्थितः
Shokasthanam tu tachchhrutva parthasya dvijaketanah
Sansprishyambhastatah krishnah pranmukhah samavasthitah
57.15
इदं वाक्यं महातेजा बभाषे पुष्करेक्षणः
हितार्थं पाण्डुपुत्रस्य सैन्धवस्य वधे वृतः
Idam vakyam mahateja babhashe pushkarekshanah
Hitartham panduputrasya saindhavasya vadhe vritah
57.16
पार्थ पाशुपतं नाम परमास्त्रं सनातनम्
येन सर्वान्मृधे दैत्याञ्जघ्ने देवो महेश्वरः
Partha pashupatam nama paramastram sanatanam
Yena sarvanmridhe daityanjaghne devo maheshvarah
57.17
यदि तद्विदितं तेऽद्य श्वो हन्तासि जयद्रथम्
अथ ज्ञातुं प्रपद्यस्व मनसा वृषभध्वजम्
Yadi tadviditam tedya shvo hantasi jayadratham
Atha gyatum prapadyasva manasa vrishabhadhvajam
57.18
तं देवं मनसा ध्यायञ्जोषमास्स्व धनंजय
ततस्तस्य प्रसादात्त्वं भक्तः प्राप्स्यसि तन्महत्
Tam devam manasa dhyayanjoshamassva dhananjaya
Tatastasya prasadattvam bhaktah prapsyasi tanmahat
57.19
ततः कृष्णवचः श्रुत्वा संस्पृश्याम्भो धनंजयः
भूमावासीन एकाग्रो जगाम मनसा भवम्
Tatah krishnavachah shrutva sansprishyambho dhananjayah
Bhumavasina ekagro jagama manasa bhavam
57.20
ततः प्रणिहिते ब्राह्मे मुहूर्ते शुभलक्षणे
आत्मानमर्जुनोऽपश्यद्गगने सहकेशवम्
Tatah pranihite brahme muhurte shubhalakshane
Atmanamarjunopashyadgagane sahakeshavam
57.21
ज्योतिर्भिश्च समाकीर्णं सिद्धचारणसेवितम्
वायुवेगगतिः पार्थः खं भेजे सहकेशवः
Jyotirbhishcha samakirnam siddhacharanasevitam
Vayuvegagatih parthah kham bheje sahakeshavah
57.22
केशवेन गृहीतः स दक्षिणे विभुना भुजे
प्रेक्षमाणो बहून्भावाञ्जगामाद्भुतदर्शनान्
Keshavena grihitah sa dakshine vibhuna bhuje
Prekshamano bahunbhavanjagamadbhutadarshanan
57.23
उदीच्यां दिशि धर्मात्मा सोऽपश्यच्छ्वेतपर्वतम्
कुबेरस्य विहारे च नलिनीं पद्मभूषिताम्
Udichyam dishi dharmatma sopashyachchhvetaparvatam
Kuberasya vihare cha nalinim padmabhushitam
57.24
सरिच्छ्रेष्ठां च तां गङ्गां वीक्षमाणो बहूदकाम्
सदापुष्पफलैर्वृक्षैरुपेतां स्फटिकोपलाम्
Sarichchhreshtham cha tam gangam vikshamano bahudakam
Sadapushpaphalairvrikshairupetam sphatikopalam
57.25
सिंहव्याघ्रसमाकीर्णां नानामृगगणाकुलाम्
पुण्याश्रमवतीं रम्यां मनोज्ञाण्डजसेविताम्
Sinhavyaghrasamakirnam nanamrigaganakulam
Punyashramavatim ramyam manogyandajasevitam
57.26
मन्दरस्य प्रदेशांश्च किंनरोद्गीतनादितान्
हेमरूप्यमयैः शृङ्गैर्नानौषधिविदीपितान्
तथा मन्दारवृक्षैश्च पुष्पितैरुपशोभितान्
Mandarasya pradeshanshcha kinnarodgitanaditan
Hemarupyamayaih shringairnanaushadhividipitan
Tatha mandaravrikshaishcha pushpitairupashobhitan
57.27
स्निग्धाञ्जनचयाकारं संप्राप्तः कालपर्वतम्
पुण्यं हिमवतः पादं मणिमन्तं च पर्वतम्
ब्रह्मतुङ्गं नदीश्चान्यास्तथा जनपदानपि
Snigdhanjanachayakaram sampraptah kalaparvatam
Punyam himavatah padam manimantam cha parvatam
Brahmatungam nadishchanyastatha janapadanapi
57.28
सुशृङ्गं शतशृङ्गं च शर्यातिवनमेव च
पुण्यमश्वशिरःस्थानं स्थानमाथर्वणस्य च
Sushringam shatashringam cha sharyativanameva cha
Punyamashvashirahsthanam sthanamatharvanasya cha
57.29
वृषदंशं च शैलेन्द्रं महामन्दरमेव च
अप्सरोभिः समाकीर्णं किंनरैश्चोपशोभितम्
Vrishadansham cha shailendram mahamandarameva cha
Apsarobhih samakirnam kinnaraishchopashobhitam
57.30
तांश्च शैलान्व्रजन्पार्थः प्रेक्षते सहकेशवः
शुभैः प्रस्रवणैर्जुष्टान्हेमधातुविभूषितान्
Tanshcha shailanvrajanparthah prekshate sahakeshavah
Shubhaih prasravanairjushtanhemadhatuvibhushitan
57.31
चन्द्ररश्मिप्रकाशाङ्गीं पृथिवीं पुरमालिनीम्
समुद्रांश्चाद्भुताकारानपश्यद्बहुलाकरान्
Chandrarashmiprakashangim prithivim puramalinim
Samudranshchadbhutakaranapashyadbahulakaran
57.32
वियद्द्यां पृथिवीं चैव पश्यन्विष्णुपदे व्रजन्
विस्मितः सह कृष्णेन क्षिप्तो बाण इवात्यगात्
Viyaddyam prithivim chaiva pashyanvishnupade vrajan
Vismitah saha krishnena kshipto bana ivatyagat
57.33
ग्रहनक्षत्रसोमानां सूर्याग्न्योश्च समत्विषम्
अपश्यत तदा पार्थो ज्वलन्तमिव पर्वतम्
Grahanakshatrasomanam suryagnyoshcha samatvisham
Apashyata tada partho jvalantamiva parvatam
57.34
समासाद्य तु तं शैलं शैलाग्रे समवस्थितम्
तपोनित्यं महात्मानमपश्यद्वृषभध्वजम्
Samasadya tu tam shailam shailagre samavasthitam
Taponityam mahatmanamapashyadvrishabhadhvajam
57.35
सहस्रमिव सूर्याणां दीप्यमानं स्वतेजसा
शूलिनं जटिलं गौरं वल्कलाजिनवाससम्
Sahasramiva suryanam dipyamanam svatejasa
Shulinam jatilam gauram valkalajinavasasam
57.36
नयनानां सहस्रैश्च विचित्राङ्गं महौजसम्
पार्वत्या सहितं देवं भूतसंघैश्च भास्वरैः
Nayananam sahasraishcha vichitrangam mahaujasam
Parvatya sahitam devam bhutasanghaishcha bhasvaraih
57.37
गीतवादित्रसंह्रादैस्ताललास्यसमन्वितम्
वल्गितास्फोटितोत्क्रुष्टैः पुण्यगन्धैश्च सेवितम्
Gitavaditrasanhradaistalalasyasamanvitam
Valgitasphotitotkrushtaih punyagandhaishcha sevitam
57.38
स्तूयमानं स्तवैर्दिव्यैर्मुनिभिर्ब्रह्मवादिभिः
गोप्तारं सर्वभूतानामिष्वासधरमच्युतम्
Stuyamanam stavairdivyairmunibhirbrahmavadibhih
Goptaram sarvabhutanamishvasadharamachyutam
57.39
वासुदेवस्तु तं दृष्ट्वा जगाम शिरसा क्षितिम्
पार्थेन सह धर्मात्मा गृणन्ब्रह्म सनातनम्
Vasudevastu tam drishtva jagama shirasa kshitim
Parthena saha dharmatma grinanbrahma sanatanam
57.40
लोकादिं विश्वकर्माणमजमीशानमव्ययम्
मनसः परमां योनिं खं वायुं ज्योतिषां निधिम्
Lokadim vishvakarmanamajamishanamavyayam
Manasah paramam yonim kham vayum jyotisham nidhim
57.41
स्रष्टारं वारिधाराणां भुवश्च प्रकृतिं पराम्
देवदानवयक्षाणां मानवानां च साधनम्
Srashtaram varidharanam bhuvashcha prakritim param
Devadanavayakshanam manavanam cha sadhanam
57.42
योगिनां परमं ब्रह्म व्यक्तं ब्रह्मविदां निधिम्
चराचरस्य स्रष्टारं प्रतिहर्तारमेव च
Yoginam paramam brahma vyaktam brahmavidam nidhim
Characharasya srashtaram pratihartarameva cha
57.43
कालकोपं महात्मानं शक्रसूर्यगुणोदयम्
अवन्दत तदा कृष्णो वाङ्मनोबुद्धिकर्मभिः
Kalakopam mahatmanam shakrasuryagunodayam
Avandata tada krishno vanmanobuddhikarmabhih
57.44
यं प्रपश्यन्ति विद्वांसः सूक्ष्माध्यात्मपदैषिणः
तमजं कारणात्मानं जग्मतुः शरणं भवम्
Yam prapashyanti vidvansah sukshmadhyatmapadaishinah
Tamajam karanatmanam jagmatuh sharanam bhavam
57.45
अर्जुनश्चापि तं देवं भूयो भूयोऽभ्यवन्दत
ज्ञात्वैकं भूतभव्यादिं सर्वभूतभवोद्भवम्
Arjunashchapi tam devam bhuyo bhuyobhyavandata
Gyatvaikam bhutabhavyadim sarvabhutabhavodbhavam
57.46
ततस्तावागतौ शर्वः प्रोवाच प्रहसन्निव
स्वागतं वां नरश्रेष्ठावुत्तिष्ठेतां गतक्लमौ
किं च वामीप्सितं वीरौ मनसः क्षिप्रमुच्यताम्
Tatastavagatau sharvah provacha prahasanniva
Svagatam vam narashreshthavuttishthetam gataklamau
Kim cha vamipsitam virau manasah kshipramuchyatam
57.47
येन कार्येण संप्राप्तौ युवां तत्साधयामि वाम्
व्रियतामात्मनः श्रेयस्तत्सर्वं प्रददानि वाम्
Yena karyena sampraptau yuvam tatsadhayami vam
Vriyatamatmanah shreyastatsarvam pradadani vam
57.48
ततस्तद्वचनं श्रुत्वा प्रत्युत्थाय कृताञ्जली
वासुदेवार्जुनौ शर्वं तुष्टुवाते महामती
Tatastadvachanam shrutva pratyutthaya kritanjali
Vasudevarjunau sharvam tushtuvate mahamati
57.49
नमो भवाय शर्वाय रुद्राय वरदाय च
पशूनां पतये नित्यमुग्राय च कपर्दिने
Namo bhavaya sharvaya rudraya varadaya cha
Pashunam pataye nityamugraya cha kapardine
57.50
महादेवाय भीमाय त्र्यम्बकाय च शंभवे
ईशानाय भगघ्नाय नमोऽस्त्वन्धकघातिने
Mahadevaya bhimaya tryambakaya cha shambhave
Ishanaya bhagaghnaya namostvandhakaghatine
57.51
कुमारगुरवे नित्यं नीलग्रीवाय वेधसे
विलोहिताय धूम्राय व्याधायानपराजिते
Kumaragurave nityam nilagrivaya vedhase
Vilohitaya dhumraya vyadhayanaparajite
57.52
नित्यं नीलशिखण्डाय शूलिने दिव्यचक्षुषे
हन्त्रे गोप्त्रे त्रिनेत्राय व्याधाय वसुरेतसे
Nityam nilashikhandaya shuline divyachakshushe
Hantre goptre trinetraya vyadhaya vasuretase
57.53
अचिन्त्यायाम्बिकाभर्त्रे सर्वदेवस्तुताय च
वृषध्वजाय पिङ्गाय जटिने ब्रह्मचारिणे
Achintyayambikabhartre sarvadevastutaya cha
Vrishadhvajaya pingaya jatine brahmacharine
57.54
तप्यमानाय सलिले ब्रह्मण्यायाजिताय च
विश्वात्मने विश्वसृजे विश्वमावृत्य तिष्ठते
Tapyamanaya salile brahmanyayajitaya cha
Vishvatmane vishvasrije vishvamavritya tishthate
57.55
नमो नमस्ते सेव्याय भूतानां प्रभवे सदा
ब्रह्मवक्त्राय शर्वाय शंकराय शिवाय च
Namo namaste sevyaya bhutanam prabhave sada
Brahmavaktraya sharvaya shankaraya shivaya cha
57.56
नमोऽस्तु वाचस्पतये प्रजानां पतये नमः
नमो विश्वस्य पतये महतां पतये नमः
Namostu vachaspataye prajanam pataye namah
Namo vishvasya pataye mahatam pataye namah
57.57
नमः सहस्रशिरसे सहस्रभुजमन्यवे
सहस्रनेत्रपादाय नमोऽसंख्येयकर्मणे
Namah sahasrashirase sahasrabhujamanyave
Sahasranetrapadaya namosankhyeyakarmane
57.58
नमो हिरण्यवर्णाय हिरण्यकवचाय च
भक्तानुकम्पिने नित्यं सिध्यतां नौ वरः प्रभो
Namo hiranyavarnaya hiranyakavachaya cha
Bhaktanukampine nityam sidhyatam nau varah prabho
57.59
एवं स्तुत्वा महादेवं वासुदेवः सहार्जुनः
प्रसादयामास भवं तदा ह्यस्त्रोपलब्धये
Evam stutva mahadevam vasudevah saharjunah
Prasadayamasa bhavam tada hyastropalabdhaye
57.60
ततोऽर्जुनः प्रीतमना ववन्दे वृषभध्वजम्
ददर्शोत्फुल्लनयनः समस्तं तेजसां निधिम्
Tatorjunah pritamana vavande vrishabhadhvajam
Dadarshotphullanayanah samastam tejasam nidhim
57.61
तं चोपहारं स्वकृतं नैशं नैत्यकमात्मनः
ददर्श त्र्यम्बकाभ्याशे वासुदेवनिवेदितम्
Tam chopaharam svakritam naisham naityakamatmanah
Dadarsha tryambakabhyashe vasudevaniveditam
57.62
ततोऽभिपूज्य मनसा शर्वं कृष्णं च पाण्डवः
इच्छाम्यहं दिव्यमस्त्रमित्यभाषत शंकरम्
Tatobhipujya manasa sharvam krishnam cha pandavah
Ichchhamyaham divyamastramityabhashata shankaram
57.63
ततः पार्थस्य विज्ञाय वरार्थे वचनं प्रभुः
वासुदेवार्जुनौ देवः स्मयमानोऽभ्यभाषत
Tatah parthasya vigyaya vararthe vachanam prabhuh
Vasudevarjunau devah smayamanobhyabhashata
57.64
सरोऽमृतमयं दिव्यमभ्याशे शत्रुसूदनौ
तत्र मे तद्धनुर्दिव्यं शरश्च निहितः पुरा
Saromritamayam divyamabhyashe shatrusudanau
Tatra me taddhanurdivyam sharashcha nihitah pura
57.65
येन देवारयः सर्वे मया युधि निपातिताः
तत आनीयतां कृष्णौ सशरं धनुरुत्तमम्
Yena devarayah sarve maya yudhi nipatitah
Tata aniyatam krishnau sasharam dhanuruttamam
57.66
तथेत्युक्त्वा तु तौ वीरौ तं शर्वं पार्षदैः सह
प्रस्थितौ तत्सरो दिव्यं दिव्याश्चर्यशतैर्वृतम्
Tathetyuktva tu tau virau tam sharvam parshadaih saha
Prasthitau tatsaro divyam divyashcharyashatairvritam
57.67
निर्दिष्टं यद्वृषाङ्केन पुण्यं सर्वार्थसाधकम्
तज्जग्मतुरसंभ्रान्तौ नरनारायणावृषी
Nirdishtam yadvrishankena punyam sarvarthasadhakam
Tajjagmaturasambhrantau naranarayanavrishi
57.68
ततस्तु तत्सरो गत्वा सूर्यमण्डलसंनिभम्
नागमन्तर्जले घोरं ददृशातेऽर्जुनाच्युतौ
Tatastu tatsaro gatva suryamandalasannibham
Nagamantarjale ghoram dadrishaterjunachyutau
57.69
द्वितीयं चापरं नागं सहस्रशिरसं वरम्
वमन्तं विपुलां ज्वालां ददृशातेऽग्निवर्चसम्
Dvitiyam chaparam nagam sahasrashirasam varam
Vamantam vipulam jvalam dadrishategnivarchasam
57.70
ततः कृष्णश्च पार्थश्च संस्पृश्यापः कृताञ्जली
तौ नागावुपतस्थाते नमस्यन्तौ वृषध्वजम्
Tatah krishnashcha parthashcha sansprishyapah kritanjali
Tau nagavupatasthate namasyantau vrishadhvajam
57.71
गृणन्तौ वेदविदुषौ तद्ब्रह्म शतरुद्रियम्
अप्रमेयं प्रणमन्तौ गत्वा सर्वात्मना भवम्
Grinantau vedavidushau tadbrahma shatarudriyam
Aprameyam pranamantau gatva sarvatmana bhavam
57.72
ततस्तौ रुद्रमाहात्म्याद्धित्वा रूपं महोरगौ
धनुर्बाणश्च शत्रुघ्नं तद्द्वंद्वं समपद्यत
Tatastau rudramahatmyaddhitva rupam mahoragau
Dhanurbanashcha shatrughnam taddvandvam samapadyata
57.73
ततो जगृहतुः प्रीतौ धनुर्बाणं च सुप्रभम्
आजह्रतुर्महात्मानौ ददतुश्च महात्मने
Tato jagrihatuh pritau dhanurbanam cha suprabham
Ajahraturmahatmanau dadatushcha mahatmane
57.74
ततः पार्श्वाद्वृषाङ्कस्य ब्रह्मचारी न्यवर्तत
पिङ्गाक्षस्तपसः क्षेत्रं बलवान्नीललोहितः
Tatah parshvadvrishankasya brahmachari nyavartata
Pingakshastapasah kshetram balavannilalohitah
57.75
स तद्गृह्य धनुःश्रेष्ठं तस्थौ स्थानं समाहितः
व्यकर्षच्चापि विधिवत्सशरं धनुरुत्तमम्
Sa tadgrihya dhanuhshreshtham tasthau sthanam samahitah
Vyakarshachchapi vidhivatsasharam dhanuruttamam
57.76
तस्य मौर्वीं च मुष्टिं च स्थानं चालक्ष्य पाण्डवः
श्रुत्वा मन्त्रं भवप्रोक्तं जग्राहाचिन्त्यविक्रमः
Tasya maurvim cha mushtim cha sthanam chalakshya pandavah
Shrutva mantram bhavaproktam jagrahachintyavikramah
57.77
सरस्येव च तं बाणं मुमोचातिबलः प्रभुः
चकार च पुनर्वीरस्तस्मिन्सरसि तद्धनुः
Sarasyeva cha tam banam mumochatibalah prabhuh
Chakara cha punarvirastasminsarasi taddhanuh
57.78
ततः प्रीतं भवं ज्ञात्वा स्मृतिमानर्जुनस्तदा
वरमारण्यकं दत्तं दर्शनं शंकरस्य च
मनसा चिन्तयामास तन्मे संपद्यतामिति
Tatah pritam bhavam gyatva smritimanarjunastada
Varamaranyakam dattam darshanam shankarasya cha
Manasa chintayamasa tanme sampadyatamiti
57.79
तस्य तन्मतमाज्ञाय प्रीतः प्रादाद्वरं भवः
तच्च पाशुपतं घोरं प्रतिज्ञायाश्च पारणम्
Tasya tanmatamagyaya pritah pradadvaram bhavah
Tachcha pashupatam ghoram pratigyayashcha paranam
57.80
संहृष्टरोमा दुर्धर्षः कृतं कार्यममन्यत
ववन्दतुश्च संहृष्टौ शिरोभ्यां तौ महेश्वरम्
Sanhrishtaroma durdharshah kritam karyamamanyata
Vavandatushcha sanhrishtau shirobhyam tau maheshvaram
57.81
अनुज्ञातौ क्षणे तस्मिन्भवेनार्जुनकेशवौ
प्राप्तौ स्वशिबिरं वीरौ मुदा परमया युतौ
इन्द्राविष्णू यथा प्रीतौ जम्भस्य वधकाङ्क्षिणौ
Anugyatau kshane tasminbhavenarjunakeshavau
Praptau svashibiram virau muda paramaya yutau
Indravishnu yatha pritau jambhasya vadhakankshinau