Utshovঅধ্যায় 56
56.1
সংজয় উবাচ
ততোঽর্জুনস্য ভবনং প্রবিশ্যাপ্রতিমং বিভুঃ
স্পৃষ্ট্বাম্ভঃ পুণ্ডরীকাক্ষঃ স্থণ্ডিলে শুভলক্ষণে
সংতস্তার শুভাং শয্যাং দর্ভৈর্বৈডূর্যসংনিভৈঃ
56.2
ততো মাল্যেন বিধিবল্লাজৈর্গন্ধৈঃ সুমঙ্গলৈঃ
অলংচকার তাং শয্যাং পরিবার্যায়ুধোত্তমৈঃ
56.3
ততঃ স্পৃষ্টোদকং পার্থং বিনীতাঃ পরিচারকাঃ
দর্শয়াং নৈত্যকং চক্রুর্নৈশং ত্রৈয়ম্বকং বলিম্
56.4
ততঃ প্রীতমনাঃ পার্থো গন্ধৈর্মাল্যৈশ্চ মাধবম্
অলংকৃত্যোপহারং তং নৈশমস্মৈ ন্যবেদয়ৎ
56.5
স্ময়মানস্তু গোবিন্দঃ ফল্গুনং প্রত্যভাষত
সুপ্যতাং পার্থ ভদ্রং তে কল্যাণায় ব্রজাম্যহম্
56.6
স্থাপয়িত্বা ততো দ্বাঃস্থান্গোপ্তৄংশ্চাত্তায়ুধান্নরান্
দারুকানুগতঃ শ্রীমান্বিবেশ শিবিরং স্বকম্
শিশ্যে চ শয়নে শুভ্রে বহুকৃত্যং বিচিন্তয়ন্
56.7
ন পাণ্ডবানাং শিবিরে কশ্চিত্সুষ্বাপ তাং নিশাম্
প্রজাগরঃ সর্বজনমাবিবেশ বিশাং পতে
56.8
পুত্রশোকাভিভূতেন প্রতিজ্ঞাতো মহাত্মনা
সহসা সিন্ধুরাজস্য বধো গাণ্ডীবধন্বনা
56.9
তত্কথং নু মহাবাহুর্বাসবিঃ পরবীরহা
প্রতিজ্ঞাং সফলাং কুর্যাদিতি তে সমচিন্তয়ন্
56.10
কষ্টং হীদং ব্যবসিতং পাণ্ডবেন মহাত্মনা
পুত্রশোকাভিতপ্তেন প্রতিজ্ঞা মহতী কৃতা
56.11
ভ্রাতরশ্চাপি বিক্রান্তা বহুলানি বলানি চ
ধৃতরাষ্ট্রস্য পুত্রেণ সর্বং তস্মৈ নিবেদিতম্
56.12
স হত্বা সৈন্ধবং সংখ্যে পুনরেতু ধনংজয়ঃ
জিত্বা রিপুগণাংশ্চৈব পারয়ত্বর্জুনো ব্রতম্
56.13
অহত্বা সিন্ধুরাজং হি ধূমকেতুং প্রবেক্ষ্যতি
ন হ্যেতদনৃতং কর্তুমর্হঃ পার্থো ধনংজয়ঃ
56.14
ধর্মপুত্রঃ কথং রাজা ভবিষ্যতি মৃতেঽর্জুনে
তস্মিন্হি বিজয়ঃ কৃত্স্নঃ পাণ্ডবেন সমাহিতঃ
56.15
যদি নঃ সুকৃতং কিংচিদ্যদি দত্তং হুতং যদি
ফলেন তস্য সর্বস্য সব্যসাচী জয়ত্বরীন্
56.16
এবং কথয়তাং তেষাং জয়মাশংসতাং প্রভো
কৃচ্ছ্রেণ মহতা রাজন্রজনী ব্যত্যবর্তত
56.17
তস্যাং রজন্যাং মধ্যে তু প্রতিবুদ্ধো জনার্দনঃ
স্মৃত্বা প্রতিজ্ঞাং পার্থস্য দারুকং প্রত্যভাষত
56.18
অর্জুনেন প্রতিজ্ঞাতমার্তেন হতবন্ধুনা
জয়দ্রথং হনিষ্যামি শ্বোভূত ইতি দারুক
56.19
তত্তু দুর্যোধনঃ শ্রুত্বা মন্ত্রিভির্মন্ত্রয়িষ্যতি
যথা জয়দ্রথং পার্থো ন হন্যাদিতি সংয়ুগে
56.20
অক্ষৌহিণ্যো হি তাঃ সর্বা রক্ষিষ্যন্তি জয়দ্রথম্
দ্রোণশ্চ সহ পুত্রেণ সর্বাস্ত্রবিধিপারগঃ
56.21
একো বীরঃ সহস্রাক্ষো দৈত্যদানবমর্দিতা
সোঽপি তং নোত্সহেতাজৌ হন্তুং দ্রোণেন রক্ষিতম্
56.22
সোঽহং শ্বস্তত্করিষ্যামি যথা কুন্তীসুতোঽর্জুনঃ
অপ্রাপ্তেঽস্তং দিনকরে হনিষ্যতি জয়দ্রথম্
56.23
ন হি দারা ন মিত্রাণি জ্ঞাতয়ো ন চ বান্ধবাঃ
কশ্চিন্নান্যঃ প্রিয়তরঃ কুন্তীপুত্রান্মমার্জুনাৎ
56.24
অনর্জুনমিমং লোকং মুহূর্তমপি দারুক
উদীক্ষিতুং ন শক্তোঽহং ভবিতা ন চ তত্তথা
56.25
অহং ধ্বজিন্যঃ শত্রূণাং সহয়াঃ সরথদ্বিপাঃ
অর্জুনার্থে হনিষ্যামি সকর্ণাঃ সসুয়োধনাঃ
56.26
শ্বো নিরীক্ষন্তু মে বীর্যং ত্রয়ো লোকা মহাহবে
ধনংজয়ার্থং সমরে পরাক্রান্তস্য দারুক
56.27
শ্বো নরেন্দ্রসহস্রাণি রাজপুত্রশতানি চ
সাশ্বদ্বিপরথান্যাজৌ বিদ্রবিষ্যন্তি দারুক
56.28
শ্বস্তাং চক্রপ্রমথিতাং দ্রক্ষ্যসে নৃপবাহিনীম্
ময়া ক্রুদ্ধেন সমরে পাণ্ডবার্থে নিপাতিতাম্
56.29
শ্বঃ সদেবাঃ সগন্ধর্বাঃ পিশাচোরগরাক্ষসাঃ
জ্ঞাস্যন্তি লোকাঃ সর্বে মাং সুহৃদং সব্যসাচিনঃ
56.30
যস্তং দ্বেষ্টি স মাং দ্বেষ্টি যস্তমনু স মামনু
ইতি সংকল্প্যতাং বুদ্ধ্যা শরীরার্ধং মমার্জুনঃ
56.31
যথা ত্বমপ্রভাতায়ামস্যাং নিশি রথোত্তমম্
কল্পয়িত্বা যথাশাস্ত্রমাদায় ব্রতসংয়তঃ
56.32
গদাং কৌমোদকীং দিব্যাং শক্তিং চক্রং ধনুঃ শরান্
আরোপ্য বৈ রথে সূত সর্বোপকরণানি চ
56.33
স্থানং হি কল্পয়িত্বা চ রথোপস্থে ধ্বজস্য মে
বৈনতেয়স্য বীরস্য সমরে রথশোভিনঃ
56.34
ছত্রং জাম্বূনদৈর্জালৈরর্কজ্বলনসংনিভৈঃ
বিশ্বকর্মকৃতৈর্দিব্যৈরশ্বানপি চ ভূষিতান্
56.35
বলাহকং মেঘপুষ্পং সৈন্যং সুগ্রীবমেব চ
যুক্ত্বা বাজিবরান্যত্তঃ কবচী তিষ্ঠ দারুক
56.36
পাঞ্চজন্যস্য নির্ঘোষমার্ষভেণৈব পূরিতম্
শ্রুত্বা তু ভৈরবং নাদমুপয়ায়া জবেন মাম্
56.37
একাহ্নাহমমর্ষং চ সর্বদুঃখানি চৈব হ
ভ্রাতুঃ পিতৃষ্বসেয়স্য ব্যপনেষ্যামি দারুক
56.38
সর্বোপায়ৈর্যতিষ্যামি যথা বীভত্সুরাহবে
পশ্যতাং ধার্তরাষ্ট্রাণাং হনিষ্যতি জয়দ্রথম্
56.39
যস্য যস্য চ বীভত্সুর্বধে যত্নং করিষ্যতি
আশংসে সারথে তত্র ভবিতাস্য ধ্রুবো জয়ঃ
56.40
দারুক উবাচ
জয় এব ধ্রুবস্তস্য কুত এব পরাজয়ঃ
যস্য ত্বং পুরুষব্যাঘ্র সারথ্যমুপজগ্মিবান্
56.41
এবং চৈতত্করিষ্যামি যথা মামনুশাসসি
সুপ্রভাতামিমাং রাত্রিং জয়ায় বিজয়স্য হি