Utshovঅধ্যায় 55
55.1
সংজয় উবাচ
এতচ্ছ্রুত্বা বচস্তস্য কেশবস্য মহাত্মনঃ
সুভদ্রা পুত্রশোকার্তা বিললাপ সুদুঃখিতা
55.2
হা পুত্র মম মন্দায়াঃ কথং সংয়ুগমেত্য হ
নিধনং প্রাপ্তবাংস্তাত পিতৃতুল্যপরাক্রমঃ
55.3
কথমিন্দীবরশ্যামং সুদংষ্ট্রং চারুলোচনম্
মুখং তে দৃশ্যতে বত্স গুণ্ঠিতং রণরেণুনা
55.4
নূনং শূরং নিপতিতং ত্বাং পশ্যন্ত্যনিবর্তিনম্
সুশিরোগ্রীববাহ্বংসং ব্যূঢোরস্কং নিরূদরম্
55.5
চারূপচিতসর্বাঙ্গং স্বক্ষং শস্ত্রক্ষতাচিতম্
ভূতানি ত্বা নিরীক্ষন্তে নূনং চন্দ্রমিবোদিতম্
55.6
শয়নীয়ং পুরা যস্য স্পর্ধ্যাস্তরণসংবৃতম্
ভূমাবদ্য কথং শেষে বিপ্রবিদ্ধঃ সুখোচিতঃ
55.7
যোঽন্বাস্যত পুরা বীরো বরস্ত্রীভির্মহাভুজঃ
কথমন্বাস্যতে সোঽদ্য শিবাভিঃ পতিতো মৃধে
55.8
যোঽস্তূয়ত পুরা হৃষ্টৈঃ সূতমাগধবন্দিভিঃ
সোঽদ্য ক্রব্যাদ্গণৈর্ঘোরৈর্বিনদদ্ভিরুপাস্যতে
55.9
পাণ্ডবেষু চ নাথেষু বৃষ্ণিবীরেষু চাভিভো
পাঞ্চালেষু চ বীরেষু হতঃ কেনাস্যনাথবৎ
55.10
অতৃপ্তদর্শনা পুত্র দর্শনস্য তবানঘ
মন্দভাগ্যা গমিষ্যামি ব্যক্তমদ্য যমক্ষয়ম্
55.11
বিশালাক্ষং সুকেশান্তং চারুবাক্যং সুগন্ধি চ
তব পুত্র কদা ভূয়ো মুখং দ্রক্ষ্যামি নির্ব্রণম্
55.12
ধিগ্বলং ভীমসেনস্য ধিক্পার্থস্য ধনুষ্মতাম্
ধিগ্বীর্যং বৃষ্ণিবীরাণাং পাঞ্চালানাং চ ধিগ্বলম্
55.13
ধিক্কেকয়াংস্তথা চেদীন্মত্স্যাংশ্চৈবাথ সৃঞ্জয়ান্
যে ত্বা রণে গতং বীরং ন জানন্তি নিপাতিতম্
55.14
অদ্য পশ্যামি পৃথিবীং শূন্যামিব হতত্বিষম্
অভিমন্যুমপশ্যন্তী শোকব্যাকুললোচনা
55.15
স্বস্রীয়ং বাসুদেবস্য পুত্রং গাণ্ডীবধন্বনঃ
কথং ত্বা বিরথং বীরং দ্রক্ষ্যাম্যন্যৈর্নিপাতিতম্
55.16
হা বীর দৃষ্টো নষ্টশ্চ ধনং স্বপ্ন ইবাসি মে
অহো হ্যনিত্যং মানুষ্যং জলবুদ্বুদচঞ্চলম্
55.17
ইমাং তে তরুণীং ভার্যাং ত্বদাধিভিরভিপ্লুতাম্
কথং সংধারয়িষ্যামি বিবত্সামিব ধেনুকাম্
55.18
অহো হ্যকালে প্রস্থানং কৃতবানসি পুত্রক
বিহায় ফলকালে মাং সুগৃদ্ধাং তব দর্শনে
55.19
নূনং গতিঃ কৃতান্তস্য প্রাজ্ঞৈরপি সুদুর্বিদা
যত্র ত্বং কেশবে নাথে সংগ্রামেঽনাথবদ্ধতঃ
55.20
যজ্বনাং দানশীলানাং ব্রাহ্মণানাং কৃতাত্মনাম্
চরিতব্রহ্মচর্যাণাং পুণ্যতীর্থাবগাহিনাম্
55.21
কৃতজ্ঞানাং বদান্যানাং গুরুশুশ্রূষিণামপি
সহস্রদক্ষিণানাং চ যা গতিস্তামবাপ্নুহি
55.22
যা গতির্যুধ্যমানানাং শূরাণামনিবর্তিনাম্
হত্বারীন্নিহতানাং চ সংগ্রামে তাং গতিং ব্রজ
55.23
গোসহস্রপ্রদাতৄণাং ক্রতুদানাং চ যা গতিঃ
নৈবেশিকং চাভিমতং দদতাং যা গতিঃ শুভা
55.24
ব্রহ্মচর্যেণ যাং যান্তি মুনয়ঃ সংশিতব্রতাঃ
একপত্ন্যশ্চ যাং যান্তি তাং গতিং ব্রজ পুত্রক
55.25
রাজ্ঞাং সুচরিতৈর্যা চ গতির্ভবতি শাশ্বতী
চতুরাশ্রমিণাং পুণ্যৈঃ পাবিতানাং সুরক্ষিতৈঃ
55.26
দীনানুকম্পিনাং যা চ সততং সংবিভাগিনাম্
পৈশুন্যাচ্চ নিবৃত্তানাং তাং গতিং ব্রজ পুত্রক
55.27
ব্রতিনাং ধর্মশীলানাং গুরুশুশ্রূষিণামপি
অমোঘাতিথিনাং যা চ তাং গতিং ব্রজ পুত্রক
55.28
ঋতুকালে স্বকাং পত্নীং গচ্ছতাং যা মনস্বিনাম্
ন চান্যদারসেবীনাং তাং গতিং ব্রজ পুত্রক
55.29
সাম্না যে সর্বভূতানি গচ্ছন্তি গতমত্সরাঃ
নারুংতুদানাং ক্ষমিণাং যা গতিস্তামবাপ্নুহি
55.30
মধুমাংসনিবৃত্তানাং মদাদ্দম্ভাত্তথানৃতাৎ
পরোপতাপত্যক্তানাং তাং গতিং ব্রজ পুত্রক
55.31
হ্রীমন্তঃ সর্বশাস্ত্রজ্ঞা জ্ঞানতৃপ্তা জিতেন্দ্রিয়াঃ
যাং গতিং সাধবো যান্তি তাং গতিং ব্রজ পুত্রক
55.32
এবং বিলপতীং দীনাং সুভদ্রাং শোককর্শিতাম্
অভ্যপদ্যত পাঞ্চালী বৈরাটীসহিতা তদা
55.33
তাঃ প্রকামং রুদিত্বা চ বিলপ্য চ সুদুঃখিতাঃ
উন্মত্তবত্তদা রাজন্বিসংজ্ঞা ন্যপতন্ক্ষিতৌ
55.34
সোপচারস্তু কৃষ্ণস্তাং দুঃখিতাং ভৃশদুঃখিতঃ
সিক্ত্বাম্ভসা সমাশ্বাস্য তত্তদুক্ত্বা হিতং বচঃ
55.35
বিসংজ্ঞকল্পাং রুদতীমপবিদ্ধাং প্রবেপতীম্
ভগিনীং পুণ্ডরীকাক্ষ ইদং বচনমব্রবীৎ
55.36
সুভদ্রে মা শুচঃ পুত্রং পাঞ্চাল্যাশ্বাসয়োত্তরাম্
গতোঽভিমন্যুঃ প্রথিতাং গতিং ক্ষত্রিয়পুংগবঃ
55.37
যে চান্যেঽপি কুলে সন্তি পুরুষা নো বরাননে
সর্বে তে বৈ গতিং যান্তু অভিমন্যোর্যশস্বিনঃ
55.38
কুর্যাম তদ্বয়ং কর্ম ক্রিয়াসুঃ সুহৃদশ্চ নঃ
কৃতবান্যাদৃগদ্যৈকস্তব পুত্রো মহারথঃ
55.39
এবমাশ্বাস্য ভগিনীং দ্রৌপদীমপি চোত্তরাম্
পার্থস্যৈব মহাবাহুঃ পার্শ্বমাগাদরিংদমঃ
55.40
ততোঽভ্যনুজ্ঞায় নৃপান্কৃষ্ণো বন্ধূংস্তথাভিভূঃ
বিবেশান্তঃপুরং রাজংস্তেঽন্যে জগ্মুর্যথালয়ম্