অধ্যায় 54

54.1

সংজয় উবাচ
তাং নিশাং দুঃখশোকার্তৌ শ্বসন্তাবিব চোরগৌ
নিদ্রাং নৈবোপলেভাতে বাসুদেবধনংজয়ৌ

54.2

নরনারায়ণৌ ক্রুদ্ধৌ জ্ঞাত্বা দেবাঃ সবাসবাঃ
ব্যথিতাশ্চিন্তয়ামাসুঃ কিং স্বিদেতদ্ভবিষ্যতি

54.3

ববুশ্চ দারুণা বাতা রূক্ষা ঘোরাভিশংসিনঃ
সকবন্ধস্তথাদিত্যে পরিঘঃ সমদৃশ্যত

54.4

শুষ্কাশন্যশ্চ নিষ্পেতুঃ সনির্ঘাতাঃ সবিদ্যুতঃ
চচাল চাপি পৃথিবী সশৈলবনকাননা

54.5

চুক্ষুভুশ্চ মহারাজ সাগরা মকরালয়াঃ
প্রতিস্রোতঃ প্রবৃত্তাশ্চ তথা গন্তুং সমুদ্রগাঃ

54.6

রথাশ্বনরনাগানাং প্রবৃত্তমধরোত্তরম্
ক্রব্যাদানাং প্রমোদার্থং যমরাষ্ট্রবিবৃদ্ধয়ে

54.7

বাহনানি শকৃন্মূত্রে মুমুচূ রুরুদুশ্চ হ
তান্দৃষ্ট্বা দারুণান্সর্বানুত্পাতাঁল্লোমহর্ষণান্

54.8

সর্বে তে ব্যথিতাঃ সৈন্যাস্ত্বদীয়া ভরতর্ষভ
শ্রুত্বা মহাবলস্যোগ্রাং প্রতিজ্ঞাং সব্যসাচিনঃ

54.9

অথ কৃষ্ণং মহাবাহুরব্রবীত্পাকশাসনিঃ
আশ্বাসয় সুভদ্রাং ত্বং ভগিনীং স্নুষয়া সহ

54.10

স্নুষা শ্বশ্র্বানঘায়স্তে বিশোকে কুরু মাধব
সাম্না সত্যেন যুক্তেন বচসাশ্বাসয় প্রভো

54.11

ততোঽর্জুনগৃহং গত্বা বাসুদেবঃ সুদুর্মনাঃ
ভগিনীং পুত্রশোকার্তামাশ্বাসয়ত দুঃখিতাম্

54.12

মা শোকং কুরু বার্ষ্ণেয়ি কুমারং প্রতি সস্নুষা
সর্বেষাং প্রাণিনাং ভীরু নিষ্ঠৈষা কালনির্মিতা

54.13

কুলে জতস্য বীরস্য ক্ষত্রিয়স্য বিশেষতঃ
সদৃশং মরণং হ্যেতত্তব পুত্রস্য মা শুচঃ

54.14

দিষ্ট্যা মহারথো বীরঃ পিতুস্তুল্যপরাক্রমঃ
ক্ষাত্রেণ বিধিনা প্রাপ্তো বীরাভিলষিতাং গতিম্

54.15

জিত্বা সুবহুশঃ শত্রূন্প্রেষয়িত্বা চ মৃত্যবে
গতঃ পুণ্যকৃতাং লোকান্সর্বকামদুহোঽক্ষয়ান্

54.16

তপসা ব্রহ্মচর্যেণ শ্রুতেন প্রজ্ঞয়াপি চ
সন্তো যাং গতিমিচ্ছন্তি প্রাপ্তস্তাং তব পুত্রকঃ

54.17

বীরসূর্বীরপত্নী ত্বং বীরশ্বশুরবান্ধবা
মা শুচস্তনয়ং ভদ্রে গতঃ স পরমাং গতিম্

54.18

প্রাপ্স্যতে চাপ্যসৌ ক্ষুদ্রঃ সৈন্ধবো বালঘাতকঃ
অস্যাবলেপস্য ফলং সসুহৃদ্গণবান্ধবঃ

54.19

ব্যুষ্টায়াং তু বরারোহে রজন্যাং পাপকর্মকৃৎ
ন হি মোক্ষ্যতি পার্থাত্স প্রবিষ্টোঽপ্যমরাবতীম্

54.20

শ্বঃ শিরঃ শ্রোষ্যসে তস্য সৈন্ধবস্য রণে হৃতম্
সমন্তপঞ্চকাদ্বাহ্যং বিশোকা ভব মা রুদঃ

54.21

ক্ষত্রধর্মং পুরস্কৃত্য গতঃ শূরঃ সতাং গতিম্
যাং বয়ং প্রাপ্নুয়ামেহ যে চান্যে শস্ত্রজীবিনঃ

54.22

ব্যূঢোরস্কো মহাবাহুরনিবর্তী বরপ্রণুৎ
গতস্তব বরারোহে পুত্রঃ স্বর্গং জ্বরং জহি

54.23

অনু জাতশ্চ পিতরং মাতৃপক্ষং চ বীর্যবান্
সহস্রশো রিপূন্হত্বা হতঃ শূরো মহারথঃ

54.24

আশ্বাসয় স্নুষাং রাজ্ঞি মা শুচঃ ক্ষত্রিয়ে ভৃশম্
শ্বঃ প্রিয়ং সুমহচ্ছ্রুত্বা বিশোকা ভব নন্দিনি

54.25

যত্পার্থেন প্রতিজ্ঞাতং তত্তথা ন তদন্যথা
চিকীর্ষিতং হি তে ভর্তুর্ন ভবেজ্জাতু নিষ্ফলম্

54.26

যদি চ মনুজপন্নগাঃ পিশাচা; রজনিচরাঃ পতগাঃ সুরাসুরাশ্চ
রণগতমভিয়ান্তি সিন্ধুরাজং; ন স ভবিতা সহ তৈরপি প্রভাতে

Contains text from DharmicData, made available under the Open Database License (ODbL). Simple meanings are written by AI and can contain mistakes.