Utshovঅধ্যায় 53
53.1
সংজয় উবাচ
প্রতিজ্ঞাতে তু পার্থেন সিন্ধুরাজবধে তদা
বাসুদেবো মহাবাহুর্ধনংজয়মভাষত
53.2
ভ্রাতৄণাং মতমাজ্ঞায় ত্বয়া বাচা প্রতিশ্রুতম্
সৈন্ধবং শ্বোঽস্মি হন্তেতি তত্সাহসতমং কৃতম্
53.3
অসংমন্ত্র্য ময়া সার্ধমতিভারোঽয়মুদ্যতঃ
কথং নু সর্বলোকস্য নাবহাস্যা ভবেমহি
53.4
ধার্তরাষ্ট্রস্য শিবিরে ময়া প্রণিহিতাশ্চরাঃ
ত ইমে শীঘ্রমাগম্য প্রবৃত্তিং বেদয়ন্তি নঃ
53.5
ত্বয়া বৈ সংপ্রতিজ্ঞাতে সিন্ধুরাজবধে তদা
সিংহনাদঃ সবাদিত্রঃ সুমহানিহ তৈঃ শ্রুতঃ
53.6
তেন শব্দেন বিত্রস্তা ধার্তরাষ্ট্রাঃ সসৈন্ধবাঃ
নাকস্মাত্সিংহনাদোঽয়মিতি মত্বা ব্যবস্থিতাঃ
53.7
সুমহাঞ্শব্দসংপাতঃ কৌরবাণাং মহাভুজ
আসীন্নাগাশ্বপত্তীনাং রথঘোষশ্চ ভৈরবঃ
53.8
অভিমন্যুবধং শ্রুত্বা ধ্রুবমার্তো ধনংজয়ঃ
রাত্রৌ নির্যাস্যতি ক্রোধাদিতি মত্বা ব্যবস্থিতাঃ
53.9
তৈর্যতদ্ভিরিয়ং সত্যা শ্রুতা সত্যবতস্তব
প্রতিজ্ঞা সিন্ধুরাজস্য বধে রাজীবলোচন
53.10
ততো বিমনসঃ সর্বে ত্রস্তাঃ ক্ষুদ্রমৃগা ইব
আসন্সুয়োধনামাত্যাঃ স চ রাজা জয়দ্রথঃ
53.11
অথোত্থায় সহামাত্যৈর্দীনঃ শিবিরমাত্মনঃ
আয়াত্সৌবীরসিন্ধূনামীশ্বরো ভৃশদুঃখিতঃ
53.12
স মন্ত্রকালে সংমন্ত্র্য সর্বা নৈঃশ্রেয়সীঃ ক্রিয়াঃ
সুয়োধনমিদং বাক্যমব্রবীদ্রাজসংসদি
53.13
মামসৌ পুত্রহন্তেতি শ্বোঽভিয়াতা ধনংজয়ঃ
প্রতিজ্ঞাতো হি সেনায়া মধ্যে তেন বধো মম
53.14
তাং ন দেবা ন গন্ধর্বা নাসুরোরগরাক্ষসাঃ
উত্সহন্তেঽন্যথা কর্তুং প্রতিজ্ঞাং সব্যসাচিনঃ
53.15
তে মাং রক্ষত সংগ্রামে মা বো মূর্ধ্নি ধনংজয়ঃ
পদং কৃত্বাপ্নুয়াল্লক্ষ্যং তস্মাদত্র বিধীয়তাম্
53.16
অথ রক্ষা ন মে সংখ্যে ক্রিয়তে কুরুনন্দন
অনুজানীহি মাং রাজন্গমিষ্যামি গৃহান্প্রতি
53.17
এবমুক্তস্ত্ববাক্শীর্ষো বিমনাঃ স সুয়োধনঃ
শ্রুত্বাভিশপ্তবন্তং ত্বাং ধ্যানমেবান্বপদ্যত
53.18
তমার্তমভিসংপ্রেক্ষ্য রাজা কিল স সৈন্ধবঃ
মৃদু চাত্মহিতং চৈব সাপেক্ষমিদমুক্তবান্
53.19
নাহং পশ্যামি ভবতাং তথাবীর্যং ধনুর্ধরম্
যোঽর্জুনস্যাস্ত্রমস্ত্রেণ প্রতিহন্যান্মহাহবে
53.20
বাসুদেবসহায়স্য গাণ্ডীবং ধুন্বতো ধনুঃ
কোঽর্জুনস্যাগ্রতস্তিষ্ঠেত্সাক্ষাদপি শতক্রতুঃ
53.21
মহেশ্বরোঽপি পার্থেন শ্রূয়তে যোধিতঃ পুরা
পদাতিনা মহাতেজা গিরৌ হিমবতি প্রভুঃ
53.22
দানবানাং সহস্রাণি হিরণ্যপুরবাসিনাম্
জঘানৈকরথেনৈব দেবরাজপ্রচোদিতঃ
53.23
সমায়ুক্তো হি কৌন্তেয়ো বাসুদেবেন ধীমতা
সামরানপি লোকাংস্ত্রীন্নিহন্যাদিতি মে মতিঃ
53.24
সোঽহমিচ্ছাম্যনুজ্ঞাতুং রক্ষিতুং বা মহাত্মনা
দ্রোণেন সহপুত্রেণ বীরেণ যদি মন্যসে
53.25
স রাজ্ঞা স্বয়মাচার্যো ভৃশমাক্রন্দিতোঽর্জুন
সংবিধানং চ বিহিতং রথাশ্চ কিল সজ্জিতাঃ
53.26
কর্ণো ভূরিশ্রবা দ্রৌণির্বৃষসেনশ্চ দুর্জয়ঃ
কৃপশ্চ মদ্ররাজশ্চ ষডেতেঽস্য পুরোগমাঃ
53.27
শকটঃ পদ্মপশ্চার্ধো ব্যূহো দ্রোণেন কল্পিতঃ
পদ্মকর্ণিকমধ্যস্থঃ সূচীপাশে জয়দ্রথঃ
স্থাস্যতে রক্ষিতো বীরৈঃ সিন্ধুরাড্যুদ্ধদুর্মদৈঃ
53.28
ধনুষ্যস্ত্রে চ বীর্যে চ প্রাণে চৈব তথোরসি
অবিষহ্যতমা হ্যেতে নিশ্চিতাঃ পার্থ ষড্রথাঃ
এতানজিত্বা সগণান্নৈব প্রাপ্যো জয়দ্রথঃ
53.29
তেষামেকৈকশো বীর্যং ষণ্ণাং ত্বমনুচিন্তয়
সহিতা হি নরব্যাঘ্রা ন শক্যা জেতুমঞ্জসা
53.30
ভূয়শ্চ চিন্তয়িষ্যামি নীতিমাত্মহিতায় বৈ
মন্ত্রজ্ঞৈঃ সচিবৈঃ সার্ধং সুহৃদ্ভিঃ কার্যসিদ্ধয়ে
53.31
অর্জুন উবাচ
ষড্রথান্ধার্তরাষ্ট্রস্য মন্যসে যান্বলাধিকান্
তেষাং বীর্যং মমার্ধেন ন তুল্যমিতি লক্ষয়ে
53.32
অস্ত্রমস্ত্রেণ সর্বেষামেতেষাং মধুসূদন
ময়া দ্রক্ষ্যসি নির্ভিন্নং জয়দ্রথবধৈষিণা
53.33
দ্রোণস্য মিষতঃ সোঽহং সগণস্য বিলপ্যতঃ
মূর্ধানং সিন্ধুরাজস্য পাতয়িষ্যামি ভূতলে
53.34
যদি সাধ্যাশ্চ রুদ্রাশ্চ বসবশ্চ সহাশ্বিনঃ
মরুতশ্চ সহেন্দ্রেণ বিশ্বেদেবাস্তথাসুরাঃ
53.35
পিতরঃ সহগন্ধর্বাঃ সুপর্ণাঃ সাগরাদ্রয়ঃ
দ্যৌর্বিয়ত্পৃথিবী চেয়ং দিশশ্চ সদিগীশ্বরাঃ
53.36
গ্রাম্যারণ্যানি ভূতানি স্থাবরাণি চরাণি চ
ত্রাতারঃ সিন্ধুরাজস্য ভবন্তি মধুসূদন
53.37
তথাপি বাণৈর্নিহতং শ্বো দ্রষ্টাসি রণে ময়া
সত্যেন তে শপে কৃষ্ণ তথৈবায়ুধমালভে
53.38
যশ্চ গোপ্তা মহেষ্বাসস্তস্য পাপস্য দুর্মতেঃ
তমেব প্রথমং দ্রোণমভিয়াস্যামি কেশব
53.39
তস্মিন্দ্যূতমিদং বদ্ধং মন্যতে স্ম সুয়োধনঃ
তস্মাত্তস্যৈব সেনাগ্রং ভিত্ত্বা যাস্যামি সৈন্ধবম্
53.40
দ্রষ্টাসি শ্বো মহেষ্বাসান্নারাচৈস্তিগ্মতেজনৈঃ
শৃঙ্গাণীব গিরের্বজ্রৈর্দার্যমাণান্ময়া যুধি
53.41
নরনাগাশ্বদেহেভ্যো বিস্রবিষ্যতি শোণিতম্
পতদ্ভ্যঃ পতিতেভ্যশ্চ বিভিন্নেভ্যঃ শিতৈঃ শরৈঃ
53.42
গাণ্ডীবপ্রেষিতা বাণা মনোনিলসমা জবে
নৃনাগাশ্বান্বিদেহাসূন্কর্তারশ্চ সহস্রশঃ
53.43
যমাত্কুবেরাদ্বরুণাদ্রুদ্রাদিন্দ্রাচ্চ যন্ময়া
উপাত্তমস্ত্রং ঘোরং বৈ তদ্দ্রষ্টারো নরা যুধি
53.44
ব্রাহ্মেণাস্ত্রেণ চাস্ত্রাণি হন্যমানানি সংয়ুগে
ময়া দ্রষ্টাসি সর্বেষাং সৈন্ধবস্যাভিরক্ষিণাম্
53.45
শরবেগসমুত্কৃত্তৈ রাজ্ঞাং কেশব মূর্ধভিঃ
আস্তীর্যমাণাং পৃথিবীং দ্রষ্টাসি শ্বো ময়া যুধি
53.46
ক্রব্যাদাংস্তর্পয়িষ্যামি দ্রাবয়িষ্যামি শাত্রবান্
সুহৃদো নন্দয়িষ্যামি পাতয়িষ্যামি সৈন্ধবম্
53.47
বহ্বাগস্কৃত্কুসংবন্ধী পাপদেশসমুদ্ভবঃ
ময়া সৈন্ধবকো রাজা হতঃ স্বাঞ্শোচয়িষ্যতি
53.48
সর্বক্ষীরান্নভোক্তারঃ পাপাচারা রণাজিরে
ময়া সরাজকা বাণৈর্নুন্না নংক্ষ্যন্তি সৈন্ধবাঃ
53.49
তথা প্রভাতে কর্তাস্মি যথা কৃষ্ণ সুয়োধনঃ
নান্যং ধনুর্ধরং লোকে মংস্যতে মত্সমং যুধি
53.50
গাণ্ডীবং চ ধনুর্দিব্যং যোদ্ধা চাহং নরর্ষভ
ত্বং চ যন্তা হৃষীকেশ কিং নু স্যাদজিতং ময়া
53.51
যথা হি লক্ষ্ম চন্দ্রে বৈ সমুদ্রে চ যথা জলম্
এবমেতাং প্রতিজ্ঞাং মে সত্যাং বিদ্ধি জনার্দন
53.52
মাবমংস্থা মমাস্ত্রাণি মাবমংস্থা ধনুর্দৃঢম্
মাবমংস্থা বলং বাহ্বোর্মাবমংস্থা ধনংজয়ম্
53.53
যথা হি যাত্বা সংগ্রামে ন জীয়ে বিজয়ামি চ
তেন সত্যেন সংগ্রামে হতং বিদ্ধি জয়দ্রথম্
53.54
ধ্রুবং বৈ ব্রাহ্মণে সত্যং ধ্রুবা সাধুষু সংনতিঃ
শ্রীর্ধ্রুবা চাপি দক্ষেষু ধ্রুবো নারায়ণে জয়ঃ
53.55
সংজয় উবাচ
এবমুক্ত্বা হৃষীকেশং স্বয়মাত্মানমাত্মনা
সংদিদেশার্জুনো নর্দন্বাসবিঃ কেশবং প্রভুম্
53.56
যথা প্রভাতাং রজনীং কল্পিতঃ স্যাদ্রথো মম
তথা কার্যং ত্বয়া কৃষ্ণ কার্যং হি মহদুদ্যতম্