Utshovঅধ্যায় 52
52.1
সংজয় উবাচ
শ্রুত্বা তু তং মহাশব্দং পাণ্ডূনাং পুত্রগৃদ্ধিনাম্
চারৈঃ প্রবেদিতে তত্র সমুত্থায় জয়দ্রথঃ
52.2
শোকসংমূঢহৃদয়ো দুঃখেনাভিহতো ভৃশম্
মজ্জমান ইবাগাধে বিপুলে শোকসাগরে
52.3
জগাম সমিতিং রাজ্ঞাং সৈন্ধবো বিমৃশন্বহু
স তেষাং নরদেবানাং সকাশে পরিদেবয়ন্
52.4
অভিমন্যোঃ পিতুর্ভীতঃ সব্রীডো বাক্যমব্রবীৎ
যোঽসৌ পাণ্ডোঃ কিল ক্ষেত্রে জাতঃ শক্রেণ কামিনা
52.5
স নিনীষতি দুর্বুদ্ধির্মাং কিলৈকং যমক্ষয়ম্
তত্স্বস্তি বোঽস্তু যাস্যামি স্বগৃহং জীবিতেপ্সয়া
52.6
অথ বা স্থ প্রতিবলাস্ত্রাতুং মাং ক্ষত্রিয়র্ষভাঃ
পার্থেন প্রার্থিতং বীরাস্তে দদন্তু মমাভয়ম্
52.7
দ্রোণদুর্যোধনকৃপাঃ কর্ণমদ্রেশবাহ্লিকাঃ
দুঃশাসনাদয়ঃ শক্তাস্ত্রাতুমপ্যন্তকার্দিতম্
52.8
কিমঙ্গ পুনরেকেন ফল্গুনেন জিঘাংসতা
ন ত্রায়েয়ুর্ভবন্তো মাং সমস্তাঃ পতয়ঃ ক্ষিতেঃ
52.9
প্রহর্ষং পাণ্ডবেয়ানাং শ্রুত্বা মম মহদ্ভয়ম্
সীদন্তীব চ মেঽঙ্গানি মুমূর্ষোরিব পার্থিবাঃ
52.10
বধো নূনং প্রতিজ্ঞাতো মম গাণ্ডীবধন্বনা
তথা হি হৃষ্টাঃ ক্রোশন্তি শোককালেঽপি পাণ্ডবাঃ
52.11
ন দেবা ন চ গন্ধর্বা নাসুরোরগরাক্ষসাঃ
উত্সহন্তেঽন্যথা কর্তুং কুত এব নরাধিপাঃ
52.12
তস্মান্মামনুজানীত ভদ্রং বোঽস্তু নরর্ষভাঃ
অদর্শনং গমিষ্যামি ন মাং দ্রক্ষ্যন্তি পাণ্ডবাঃ
52.13
এবং বিলপমানং তং ভয়াদ্ব্যাকুলচেতসম্
আত্মকার্যগরীয়স্ত্বাদ্রাজা দুর্যোধনোঽব্রবীৎ
52.14
ন ভেতব্যং নরব্যাঘ্র কো হি ত্বা পুরুষর্ষভ
মধ্যে ক্ষত্রিয়বীরাণাং তিষ্ঠন্তং প্রার্থয়েদ্যুধি
52.15
অহং বৈকর্তনঃ কর্ণশ্চিত্রসেনো বিবিংশতিঃ
ভূরিশ্রবাঃ শলঃ শল্যো বৃষসেনো দুরাসদঃ
52.16
পুরুমিত্রো জয়ো ভোজঃ কাম্বোজশ্চ সুদক্ষিণঃ
সত্যব্রতো মহাবাহুর্বিকর্ণো দুর্মুখঃ সহঃ
52.17
দুঃশাসনঃ সুবাহুশ্চ কলিঙ্গশ্চাপ্যুদায়ুধঃ
বিন্দানুবিন্দাবাবন্ত্যৌ দ্রোণো দ্রৌণিঃ সসৌবলঃ
52.18
ত্বং চাপি রথিনাং শ্রেষ্ঠঃ স্বয়ং শূরোঽমিতদ্যুতিঃ
স কথং পাণ্ডবেয়েভ্যো ভয়ং পশ্যসি সৈন্ধব
52.19
অক্ষৌহিণ্যো দশৈকা চ মদীয়াস্তব রক্ষণে
যত্তা যোত্স্যন্তি মা ভৈস্ত্বং সৈন্ধব ব্যেতু তে ভয়ম্
52.20
এবমাশ্বাসিতো রাজন্পুত্রেণ তব সৈন্ধবঃ
দুর্যোধনেন সহিতো দ্রোণং রাত্রাবুপাগমৎ
52.21
উপসংগ্রহণং কৃত্বা দ্রোণায় স বিশাং পতে
উপোপবিশ্য প্রণতঃ পর্যপৃচ্ছদিদং তদা
52.22
নিমিত্তে দূরপাতিত্বে লঘুত্বে দৃঢবেধনে
মম ব্রবীতু ভগবান্বিশেষং ফল্গুনস্য চ
52.23
বিদ্যাবিশেষমিচ্ছামি জ্ঞাতুমাচার্য তত্ত্বতঃ
মমার্জুনস্য চ বিভো যথাতত্ত্বং প্রচক্ষ্ব মে
52.24
দ্রোণ উবাচ
সমমাচার্যকং তাত তব চৈবার্জুনস্য চ
যোগাদ্দুঃখোচিতত্বাচ্চ তস্মাত্ত্বত্তোঽধিকোঽর্জুনঃ
52.25
ন তু তে যুধি সংত্রাসঃ কার্যঃ পার্থাত্কথংচন
অহং হি রক্ষিতা তাত ভয়াত্ত্বাং নাত্র সংশয়ঃ
52.26
ন হি মদ্বাহুগুপ্তস্য প্রভবন্ত্যমরা অপি
ব্যূহিষ্যামি চ তং ব্যূহং যং পার্থো ন তরিষ্যতি
52.27
তস্মাদ্যুধ্যস্ব মা ভৈস্ত্বং স্বধর্মমনুপালয়
পিতৃপৈতামহং মার্গমনুয়াহি নরাধিপ
52.28
অধীত্য বিধিবদ্বেদানগ্নয়ঃ সুহুতাস্ত্বয়া
ইষ্টং চ বহুভির্যজ্ঞৈর্ন তে মৃত্যুভয়াদ্ভয়ম্
52.29
দুর্লভং মানুষৈর্মন্দৈর্মহাভাগ্যমবাপ্য তু
ভুজবীর্যার্জিতাঁল্লোকান্দিব্যান্প্রাপ্স্যস্যনুত্তমান্
52.30
কুরবঃ পাণ্ডবাশ্চৈব বৃষ্ণয়োঽন্যে চ মানবাঃ
অহং চ সহ পুত্রেণ অধ্রুবা ইতি চিন্ত্যতাম্
52.31
পর্যায়েণ বয়ং সর্বে কালেন বলিনা হতাঃ
পরলোকং গমিষ্যামঃ স্বৈঃ স্বৈঃ কর্মভিরন্বিতাঃ
52.32
তপস্তপ্ত্বা তু যাঁল্লোকান্প্রাপ্নুবন্তি তপস্বিনঃ
ক্ষত্রধর্মাশ্রিতাঃ শূরাঃ ক্ষত্রিয়াঃ প্রাপ্নুবন্তি তান্
52.33
সংজয় উবাচ
এবমাশ্বাসিতো রাজন্ভারদ্বাজেন সৈন্ধবঃ
অপানুদদ্ভয়ং পার্থাদ্যুদ্ধায় চ মনো দধে