Utshovঅধ্যায় 51
51.1
যুধিষ্ঠির উবাচ
ত্বয়ি যাতে মহাবাহো সংশপ্তকবলং প্রতি
প্রয়ত্নমকরোত্তীব্রমাচার্যো গ্রহণে মম
51.2
ব্যূঢানীকং বয়ং দ্রোণং বরয়ামঃ স্ম সর্বশঃ
প্রতিব্যূহ্য রথানীকং যতমানং তথা রণে
51.3
স বার্যমাণো রথিভী রক্ষিতেন ময়া তথা
অস্মানপি জঘানাশু পীডয়ন্নিশিতৈঃ শরৈঃ
51.4
তে পীড্যমানা দ্রোণেন দ্রোণানীকং ন শক্নুমঃ
প্রতিবীক্ষিতুমপ্যাজৌ ভেত্তুং তত্কুত এব তু
51.5
বয়ং ত্বপ্রতিমং বীর্যে সর্বে সৌভদ্রমাত্মজম্
উক্তবন্তঃ স্ম তে তাত ভিন্ধ্যনীকমিতি প্রভো
51.6
স তথা চোদিতোঽস্মাভিঃ সদশ্ব ইব বীর্যবান্
অসহ্যমপি তং ভারং বোঢুমেবোপচক্রমে
51.7
স তবাস্ত্রোপদেশেন বীর্যেণ চ সমন্বিতঃ
প্রাবিশত্তদ্বলং বালঃ সুপর্ণ ইব সাগরম্
51.8
তেঽনুয়াতা বয়ং বীরং সাত্বতীপুত্রমাহবে
প্রবেষ্টুকামাস্তেনৈব যেন স প্রাবিশচ্চমূম্
51.9
ততঃ সৈন্ধবকো রাজা ক্ষুদ্রস্তাত জয়দ্রথঃ
বরদানেন রুদ্রস্য সর্বান্নঃ সমবারয়ৎ
51.10
ততো দ্রোণঃ কৃপঃ কর্ণো দ্রৌণিশ্চ স বৃহদ্বলঃ
কৃতবর্মা চ সৌভদ্রং ষড্রথাঃ পর্যবারয়ন্
51.11
পরিবার্য তু তৈঃ সর্বৈর্যুধি বালো মহারথৈঃ
যতমানঃ পরং শক্ত্যা বহুভির্বিরথীকৃতঃ
51.12
ততো দৌঃশাসনিঃ ক্ষিপ্রং তথা তৈর্বিরথীকৃতম্
সংশয়ং পরমং প্রাপ্য দিষ্টান্তেনাভ্যয়োজয়ৎ
51.13
স তু হত্বা সহস্রাণি দ্বিপাশ্বরথসাদিনাম্
রাজপুত্রশতং চাগ্র্যং বীরাংশ্চালক্ষিতান্বহূন্
51.14
বৃহদ্বলং চ রাজানং স্বর্গেণাজৌ প্রয়োজ্য হ
ততঃ পরমধর্মাত্মা দিষ্টান্তমুপজগ্মিবান্
51.15
এতাবদেব নির্বৃত্তমস্মাকং শোকবর্ধনম্
স চৈবং পুরুষব্যাঘ্রঃ স্বর্গলোকমবাপ্তবান্
51.16
সংজয় উবাচ
ততোঽর্জুনো বচঃ শ্রুত্বা ধর্মরাজেন ভাষিতম্
হা পুত্র ইতি নিঃশ্বস্য ব্যথিতো ন্যপতদ্ভুবি
51.17
বিষণ্ণবদনাঃ সর্বে পরিগৃহ্য ধনংজয়ম্
নেত্রৈরনিমিষৈর্দীনাঃ প্রত্যবেক্ষন্পরস্পরম্
51.18
প্রতিলভ্য ততঃ সংজ্ঞাং বাসবিঃ ক্রোধমূর্ছিতঃ
কম্পমানো জ্বরেণেব নিঃশ্বসংশ্চ মুহুর্মুহুঃ
51.19
পাণিং পাণৌ বিনিষ্পিষ্য শ্বসমানোঽশ্রুনেত্রবান্
উন্মত্ত ইব বিপ্রেক্ষন্নিদং বচনমব্রবীৎ
51.20
সত্যং বঃ প্রতিজানামি শ্বোঽস্মি হন্তা জয়দ্রথম্
ন চেদ্বধভয়াদ্ভীতো ধার্তরাষ্ট্রান্প্রহাস্যতি
51.21
ন চাস্মাঞ্শরণং গচ্ছেত্কৃষ্ণং বা পুরুষোত্তমম্
ভবন্তং বা মহারাজ শ্বোঽস্মি হন্তা জয়দ্রথম্
51.22
ধার্তরাষ্ট্রপ্রিয়করং ময়ি বিস্মৃতসৌহৃদম্
পাপং বালবধে হেতুং শ্বোঽস্মি হন্তা জয়দ্রথম্
51.23
রক্ষমাণাশ্চ তং সংখ্যে যে মাং যোত্স্যন্তি কেচন
অপি দ্রোণকৃপৌ বীরৌ ছাদয়িষ্যামি তাঞ্শরৈঃ
51.24
যদ্যেতদেবং সংগ্রামে ন কুর্যাং পুরুষর্ষভাঃ
মা স্ম পুণ্যকৃতাং লোকান্প্রাপ্নুয়াং শূরসংমতান্
51.25
যে লোকা মাতৃহন্তৄণাং যে চাপি পিতৃঘাতিনাম্
গুরুদারগামিনাং যে চ পিশুনানাং চ যে তথা
51.26
সাধূনসূয়তাং যে চ যে চাপি পরিবাদিনাম্
যে চ নিক্ষেপহর্তৄণাং যে চ বিশ্বাসঘাতিনাম্
51.27
ভুক্তপূর্বাং স্ত্রিয়ং যে চ নিন্দতামঘশংসিনাম্
ব্রহ্মঘ্নানাং চ যে লোকা যে চ গোঘাতিনামপি
51.28
পায়সং বা যবান্নং বা শাকং কৃসরমেব বা
সংয়াবাপূপমাংসানি যে চ লোকা বৃথাশ্নতাম্
তানহ্নৈবাধিগচ্ছেয়ং ন চেদ্ধন্যাং জয়দ্রথম্
51.29
বেদাধ্যায়িনমত্যর্থং সংশিতং বা দ্বিজোত্তমম্
অবমন্যমানো যান্যাতি বৃদ্ধান্সাধূংস্তথা গুরূন্
51.30
স্পৃশতাং ব্রাহ্মণং গাং চ পাদেনাগ্নিং চ যাং লভেৎ
যাপ্সু শ্লেষ্ম পুরীষং বা মূত্রং বা মুঞ্চতাং গতিঃ
তাং গচ্ছেয়ং গতিং ঘোরাং ন চেদ্ধন্যাং জয়দ্রথম্
51.31
নগ্নস্য স্নায়মানস্য যা চ বন্ধ্যাতিথের্গতিঃ
উত্কোচিনাং মৃষোক্তীনাং বঞ্চকানাং চ যা গতিঃ
আত্মাপহারিণাং যা চ যা চ মিথ্যাভিশংসিনাম্
51.32
ভৃত্যৈঃ সংদৃশ্যমানানাং পুত্রদারাশ্রিতৈস্তথা
অসংবিভজ্য ক্ষুদ্রাণাং যা গতির্মৃষ্টমশ্নতাম্
তাং গচ্ছেয়ং গতিং ঘোরাং ন চেদ্ধন্যাং জয়দ্রথম্
51.33
সংশ্রিতং বাপি যস্ত্যক্ত্বা সাধুং তদ্বচনে রতম্
ন বিভর্তি নৃশংসাত্মা নিন্দতে চোপকারিণম্
51.34
অর্হতে প্রাতিবেশ্যায় শ্রাদ্ধং যো ন দদাতি চ
অনর্হতে চ যো দদ্যাদ্বৃষলীপত্যুরেব চ
51.35
মদ্যপো ভিন্নমর্যাদঃ কৃতঘ্নো ভ্রাতৃনিন্দকঃ
তেষাং গতিমিয়াং ক্ষিপ্রং ন চেদ্ধন্যাং জয়দ্রথম্
51.36
ধর্মাদপেতা যে চান্যে ময়া নাত্রানুকীর্তিতাঃ
যে চানুকীর্তিতাঃ ক্ষিপ্রং তেষাং গতিমবাপ্নুয়াম্
যদি ব্যুষ্টামিমাং রাত্রিং শ্বো ন হন্যাং জয়দ্রথম্
51.37
ইমাং চাপ্যপরাং ভূয়ঃ প্রতিজ্ঞাং মে নিবোধত
যদ্যস্মিন্নহতে পাপে সূর্যোঽস্তমুপয়াস্যতি
ইহৈব সংপ্রবেষ্টাহং জ্বলিতং জাতবেদসম্
51.38
অসুরসুরমনুষ্যাঃ পক্ষিণো বোরগা বা; পিতৃরজনিচরা বা ব্রহ্মদেবর্ষয়ো বা
চরমচরমপীদং যত্পরং চাপি তস্মা;ত্তদপি মম রিপুং তং রক্ষিতুং নৈব শক্তাঃ
51.39
যদি বিশতি রসাতলং তদগ্র্যং; বিয়দপি দেবপুরং দিতেঃ পুরং বা
তদপি শরশতৈরহং প্রভাতে; ভৃশমভিপত্য রিপোঃ শিরোঽভিহর্তা
51.40
এবমুক্ত্বা বিচিক্ষেপ গাণ্ডীবং সব্যদক্ষিণম্
তস্য শব্দমতিক্রম্য ধনুঃশব্দোঽস্পৃশদ্দিবম্
51.41
অর্জুনেন প্রতিজ্ঞাতে পাঞ্চজন্যং জনার্দনঃ
প্রদধ্মৌ তত্র সংক্রুদ্ধো দেবদত্তং ধনংজয়ঃ
51.42
স পাঞ্চজন্যোঽচ্যুতবক্ত্রবায়ুনা; ভৃশং সুপূর্ণোদরনিঃসৃতধ্বনিঃ
জগত্সপাতালবিয়দ্দিগীশ্বরং; প্রকম্পয়ামাস যুগাত্যয়ে যথা
51.43
ততো বাদিত্রঘোষাশ্চ প্রাদুরাসন্সমন্ততঃ
সিংহনাদাশ্চ পাণ্ডূনাং প্রতিজ্ঞাতে মহাত্মনা